Ginhingabot sang Una, Apang sang Ulihi Ginhigugma

SANG nagligad nga mga tinuig, nagsaylo si Santiago kag ang iya asawa nga si Lourdes sa matahom nga banwa sang Huillcapata, Peru agod ipaambit ang mensahe sang paglaum sa Biblia sa mga tawo didto. Apang, pagligad lamang sang pila ka tion nag-abot ang isa ka pari halin sa Cuzco kag gintipon ang mga pumuluyo sang banwa. Ginpaandaman sila sang pari nga ang mga Saksi ni Jehova magadala sing makamamatay nga salot kag mabaskog nga pag-ulan sing yelo nga magapatay sang ila mga baka kag magapierde sang ila mga pananom.

Madamo ang nagpati sa sining “tagna,” kag sa sulod sang kapin sa anom ka bulan, wala gid bisan isa ang nagbaton sa imbitasyon nanday Santiago kag Lourdes nga magtuon sa Biblia. Ginlagas sang bise-gobernador nga si Miguel, nga isa ka opisyal sang banwa, sanday Santiago kag Lourdes sa dalan kag ginbato sila. Apang padayon sila nga nangin mahidaiton kag ginhuptan ang Cristianong paggawi.

Sang ulihi, nagbaton ang pila ka pumuluyo sing pagtuon sa Biblia. Bisan gani si Miguel nagbalhin man sing panimuot. Nagtuon sia sa Biblia upod kay Santiago, nag-untat sa pagpahubog, kag nangin mahidaiton. Sang ulihi si Miguel, ang iya asawa, kag duha sang iya mga anak nga babayi nagbaton sang kamatuoran sang Biblia.

May isa na karon ka mainuswagon nga kongregasyon sang mga Saksi ni Jehova sa sining banwa. Nalipay si Miguel nga wala maigo sanday Santiago kag Lourdes sang kalabanan sang mga bato nga ginhaboy niya, kag nagapasalamat sia sa mag-asawa bangod sang ila maayo nga halimbawa sang pagkamahidaiton.

[Mga retrato sa pahina 32]

Ang pagkamahidaiton nanday Santiago kag Lourdes (naibabaw) nagpabalhin sang panimuot ni Miguel (natuo)