Himua ang Pagpamalandong nga Mangin Makalilipay

PARA sa iban nga mga tawo, ang ideya tuhoy sa pagpamalandong mahimo nga nagahalawhaw sa ila. Mahimo ginatamod nila ang pagpamalandong subong isa ka mabudlay nga hilikuton nga nagakinahanglan sing daku nga konsentrasyon. Mahimo man sila makonsiensia nga wala sila nagapamalandong, ilabi na kon mabasa nila ang tuhoy sa importansia sini. (Filipos 4:8) Apang, ang mahipos nga pagpamensar sa mga kamatuoran nga natun-an naton tuhoy kay Jehova, sa iya matahom nga mga kinaiya, sa iya makahalawhaw nga mga hinimuan, sa iya mga ginapatuman, kag sa iya makatilingala nga katuyuan isa gid ka makalilipay nga paagi sa paghinguyang sing tion. Ngaa?

Si Jehova nga Dios amo ang Supremo nga Manuggahom sang uniberso kag masako sia sa pagpanghikot para sa katumanan sang iya dalayawon nga katuyuan. (Juan 5:17) Walay sapayan sini, mahipos nga ginahunahuna niya ang tagsa ka indibiduwal nga sumilimba. Nahibaluan ini ni salmista David kag nagsulat sia sa idalom sang inspirasyon sang Dios: “O Jehova, gin-usisa mo ako, kag nakilala mo ako. Nakilala mo ang akon paglingkod kag ang akon pagtindog. Ginbinagbinag mo ang akon panghunahuna gikan sa malayo.”​—⁠Salmo 139:​1, 2.

Ini nga pinamulong sang salmista mahimo tamdon sang isa sing negatibo. Mahimo sia mangatarungan, ‘Bisan pa ang Dios “malayo,” nahibaluan niya ang tanan nga malain nga panghunahuna nga nagasulod sa akon pensar.’ Sa pagkamatuod, mapuslanon nga nahibaluan naton ang tuhoy sini nga butang. Makabulig ini sa aton agod mabatuan ang sayop nga panghunahuna kag agod matu-ad sa Dios kon may amo kita sini nga panghunahuna, nagasalig nga patawaron niya kita pasad sa aton pagtuo sa halad gawad ni Jesus. (1 Juan 1:​8, 9; 2:​1, 2) Apang, dapat man naton dumdumon nga ginausisa ni Jehova ang iya mga sumilimba sa positibo nga paagi. Ginatalupangod niya kon ginahunahuna naton sia sing mapinasalamaton.

“Ginatalupangod gid bala ni Jehova ang tanan nga maayo nga panghunahuna sang iya minilyon ka sumilimba?” mahimo mamangkot ka. Huo. Ginpadaku ni Jesus nga si Jehova interesado sa aton sang nagsiling sia nga natalupangdan ni Jehova bisan ang magagmay nga mga maya, kag nian nagdugang sia: “Mahal pa kamo sa madamo nga maya.” (Lucas 12:​6, 7) Ang mga maya indi makahunahuna tuhoy kay Jehova. Gani kon nagakabalaka sia sa ila, daw ano pa gid nga dapat sia magkabalaka sa aton kag magkalipay kon ginahunahuna sia sang kada isa sa aton! Huo, kaangay ni David, makapangamuyo kita sing masinaligon: “Kabay nga ang . . . pagpamalandong sang akon tagipusuon mangin kalahamut-an sa atubangan mo, O Jehova nga akon Igang kag akon Manunubos.”​—⁠Salmo 19:14.

Ang dugang pa nga pamatuod nga interesado gid si Jehova sa pagpamalandong sang iya mainunungon nga mga sumilimba makita sa inspirado nga mga pulong ni manalagna Malaquias. Nagapamulong tuhoy sa aton adlaw, nagtagna sia: “Sa sina nga tion ang mga nagakahadlok kay Jehova nagsinilingay, ang kada isa sa iya kaupod, kag si Jehova padayon nga nagtalupangod kag nagpamati. Kag isa ka tulun-an sang handumanan ang ginsulat sa atubangan niya para sa mga nagakahadlok kay Jehova kag para sa mga nagapainuino sa iya ngalan.” (Malaquias 3:16) Ang pagpahanumdom sa aton kaugalingon nga si Jehova pirme ‘nagatalupangod’ kon ginahunahuna naton sia magahimo gid sa diosnon nga pagpamalandong nga mangin makalilipay. Busa, kabay nga ipalanog naton ang pinamulong sang salmista nga nagsulat: “Magapamalandong ako sa tanan mo nga binuhatan, kag sa imo mga pagpakig-angot magatalupangod ako.”​—⁠Salmo 77:12.