Kaangay Ka Bala sang Kahoy nga Lagani Auna?

SA ISA ka minuro sa nagua nga bahin sang Port Moresby, Papua New Guinea, manugpauli na ang duha ka ministro sa ila balay pagkatapos sang pagbantala. Samtang nagalakat, nakakita sila sang isa ka matahom nga kahoy. “Oy, lagani auna!” siling sang mas may edad nga lalaki. Nagliso sia sa mas bataon nga lalaki kag nagsiling pa: “Ina nga ngalan nagakahulugan sing ‘tuigan nga kahoy.’ Indi kaangay sang madamo pa nga mga kahoy sa tropiko, kada tuig ang mga dahon sini nagakalagas kag nangin daw patay tan-awon. Apang, kon mag-ulan na, nagapanglumbay ini, nagapamulak, kag nagabalik ang iya katahom.”

May leksion kita nga matun-an sa lagani auna, ukon dapdap, subong nga amo ang tawag sa aton. Suno sa mga eksperto, isa ini sa lima sang labing matahom nga kahoy nga nagapamulak sa bug-os nga kalibutan. Bisan nagakalagas ang mga bulak kag mga dahon sini kon tingadlaw, ang kahoy nagasupot sang tubig. Ang mga gamot sini mabakod kag nagapangapkap sa mga igang sa idalom-duta. Gani, indi ini matumba kon magbaskog nga hangin. Sa malip-ot nga hambal, masarangan sini ang pinakamabudlay nga mga kahimtangan.

Mahimo mabutang man kita sa mga kahimtangan nga magatilaw kon daw ano kabakod ang aton pagtuo. Ano ang makabulig sa aton nga makabatas? Kaangay sang lagani auna, mahimo kita mag-inom kag magsupot sing nagahatag-kabuhi nga tubig sang Pulong sang Dios. Dapat man kita manguyapot sing hugot sa ‘aton igang,’ si Jehova, kag subong man sa iya organisasyon. (2 Samuel 22:3) Ang lagani auna isa gid ka matahom nga pahanumdom nga bisan pa sa mabudlay nga kahimtangan, mahimo naton mahuptan ang aton espirituwal nga kusog kag katahom kon himuslan naton ang mga bulig nga ginaaman ni Jehova. Kon himuon naton ini, ‘mapanubli naton ang iya mga saad’ lakip na ang saad nga kabuhi nga walay katapusan.​—⁠Hebreo 6:​12; Bugna 21:4.