Mga Pamangkot Gikan sa mga Bumalasa
Mga Pamangkot Gikan sa mga Bumalasa
Naggamit bala ang matutom nga alagad ni Jehova nga si Jose sing pinasahi nga pilak nga kopa sa pagpakot sang palaabuton, subong sang ginsiling sa Genesis 44:5?
Wala kita sing rason sa pagpati nga naggamit si Jose sing bisan ano nga porma sang pagpamakot.
Ginapakita sang Biblia nga nahangpan gid ni Jose ang nahanungod sa paggamit sing salamangka sa paghibalo sang palaabuton. Antes sini, sang ginpangabay si Jose sa pagpatpat sang damgo ni Paraon, pila ka beses sia nga nag-insister nga ang Dios lamang ang ‘makapahayag’ sang palaabuton nga mga hitabo. Subong resulta, nagpati si Paraon nga ang Dios nga ginasimba ni Jose—ang matuod nga Dios, indi ang gahom sang okultismo—amo ang nagbulig kay Jose nga mahibaluan ang mga detalye nahanungod sa palaabuton. (Genesis 41:16, 25, 28, 32, 39) Sang ulihi, paagi sa Kasuguan nga ginhatag kay Moises, gindumili ni Jehova ang paggamit sing madyik ukon pagpamakot, sa amo nagpamatuod nga Sia lamang ang makatagna sang palaabuton.—Deuteronomio 18:10-12.
Ngaa, nian, nagsiling si Jose paagi sa iya alagad nga gingamit niya ang pilak nga kopa sa ‘pagpakot sing lantip sang palaabuton’? a (Genesis 44:5) Dapat binagbinagon naton ang mga kahimtangan kon ngaa nasiling niya ini.
Bangod sang grabe nga gutom, nagkadto ang mga utod ni Jose sa Egipto sa pagbakal sing pagkaon. Pila ka tuig antes sini, ini mismo nga mga utod ni Jose amo ang nagbaligya sa iya sa pagkaulipon. Karon, lipod sa ila ihibalo, nangayo sila sing bulig sa ila mismo utod, nga nangin administrador sang pagkaon sa Egipto. Wala nagpakilala si Jose sa ila. Sa baylo, gintilawan niya sila. Siempre, luyag pat-uron ni Jose nga sinsero ang ila paghinulsol. Luyag man niya hibaluon kon daw ano nila ka palangga ang ila manghod nga si Benjamin kag ang ila amay nga si Jacob, nga nagahigugma gid kay Benjamin. Gani, namat-od si Jose nga limbungan sila.—Genesis 41:55–44:3.
Ginsugo ni Jose ang isa niya ka alagad nga pun-on sing pagkaon ang mga sako sang iya mga utod, iuli ang kuarta sang kada isa sa baba sang ila mga sako, kag ibutang ang iya pilak nga kopa sa sako ni Benjamin. Ang paghimo sini ni Jose nagpakita nga ginatungdan niya ang papel sang isa ka administrador sa isa ka pagano nga pungsod. Ginpasibu niya ang iya kaugalingon, ang iya mga aksion, kag ang iya lenguahe sa karakter sang isa ka administrador, sa panan-aw sang iya wala gid nagsuspetsa nga mga utod.
Sang ginkomprontar ni Jose ang iya mga utod, padayon niya nga ginlimbungan sila kag ginpamangkot: “Wala bala kamo makahibalo nga ang isa ka lalaki kaangay ko malantipon nga makapamakot?” (Genesis 44:15) Gani, maathag nga ang kopa bahin lamang sang paglimbong. Indi matuod nga gingamit ni Jose ang kopa sa pagpamakot subong nga indi man matuod nga ginkawat ni Benjamin ang kopa.
[Nota]
a Sa paglaragway sining dumaan nga kinabatasan, ang The Holy Bible, With an Explanatory and Critical Commentary, nga gin-edit ni F. C. Cook, nagpaathag: “Ginahimo ini paagi sa paghulog sing bulawan, pilak, ukon mga hiyas, sa tubig, kag dayon ginausisa ang dagway sini; ukon paagi lamang sa pagtan-aw sa tubig kaangay sang pagtan-aw sa espeho.” Ang komentarista sa Biblia nga si Christopher Wordsworth nagsiling: “Kon kaisa ang kopa ginabuta sang tubig, kag mahibaluan ang sabat paagi sa ban-aw nga tuga sang sinag sang adlaw sa tubig nga yara sa kopa.”
