Nagakinahanglan Bala Kita sing Mesias?

MAHIMO ipamangkot mo ina, “Nagakinahanglan bala kita sing Mesias?” Huo, makatarunganon gid ipamangkot kon bala makabulig gid sa imo ang isa ka Mesias.

Ang iban nga ang ila opinyon mahimo ginatahod mo magapasalig sa imo nga ang sabat klaro kag indi maduhaduhaan: Kinahanglan gid sang tanan ang Mesias. Ang isa ka eksperto sa kasuguan sang mga Judiyo sang nahauna nga siglo nagsulat tuhoy sa Mesias: “Bisan pa daw ano kadamo ang mga saad sang Dios, nangin Huo ini paagi sa iya.” Sa amo, ginpatalupangod niya ang importante nga papel nga pagatungdan sang Mesias sa katuyuan sang Manunuga nga pakamaayuhon ang tanan nga pungsod sang duta. (2 Corinto 1:20) Importante gid ang papel sang Mesias amo kon ngaa ang mga tagna sa Biblia nasentro sa iya pag-abot kag pagkabuhi sa duta. Sa isa ka libro nga gingamit sang minilyon ka tawo sa sulod sang nagligad nga 70 ka tuig, nagsiling si Henry H. Halley: “Ginsulat ang Daan nga Testamento agod kalangkagan, kag ihanda ang dalan para sa, Pagkari sang [Mesias].” Apang kinahanglan gid bala nga magkari sia? Ngaa dapat ka mangin interesado?

Ang matuod, ang “Mesias” nagakahulugan sing “Isa nga Hinaplas” kag amo ang katumbas sang kilala nga termino nga “Cristo.” Ining Isa, nga ginapatuhuyan sang Encyclopædia Britannica, 1970 nga Edisyon, subong “ang labing daku nga manunubos,” dapat magkari bangod sang tampalasan nga mga buhat sang unang mag-asawa, sanday Adan kag Eva. Gintuga sila nga himpit, nga may makalilipay nga paglaum nga mabuhi sing dayon sa Paraiso, apang nadula nila ina nga paglaum. Ang isa ka rebelyuso nga anghel, nga nakilal-an subong si Satanas nga Yawa, nagsiling nga ang ila Manunuga tuman ka estrikto kag nga mas magaayuhan sila kon sila mismo ang magdesisyon para sa ila kaugalingon kon ano ang maayo kag malain.​—⁠Genesis 3:1-5.

Nalimbungan si Eva kag nagpati sa sina nga kabutigan. Si Adan naman, bangod siguro sang iya pagpasulabi sa pagpakig-upod sang iya asawa labaw sa iya katutom sa Dios, nangin kakunsabo sa sining pagrebelde nga ginsugdan sang Yawa. (Genesis 3:⁠6; 1 Timoteo 2:14) Paagi sa ila ginhimo, indi lamang ang ila paglaum nga mabuhi sing dayon sa tulad-paraiso nga mga kahimtangan ang nadula nila. Ginpapanubli nila sa ila wala pa sadto mabun-ag nga mga anak ang sala kag ang resulta sini nga kamatayon.​—⁠Roma 5:12.

Sa gilayon, ang aton Manunuga nga si Jehova naghimo sing paagi agod dulaon ang malain nga mga epekto sang alagisod nga matabo bangod sang pagrebelde. Mahimo sia sing paagi nga makapanumbalik sa iya ang katawhan paagi sa basehan nga sa ulihi mangin isa ka legal nga prinsipio sa Mosaikong Kasuguan​—⁠kabuhi sa kabuhi. (Deuteronomio 19:21; 1 Juan 3:8) Dapat masunod ining legal nga prinsipio agod ang  makaluluoy nga mga kaliwat nanday Adan kag Eva makatigayon sing dayon nga kabuhi sa isa ka paraiso nga duta, subong amo ang gintuyo sang Manunuga para sa tawhanon nga pamilya. Amo kon ngaa kinahanglan naton ang Mesias.

Sang ginpamatbatan ang Yawa, nagsiling si Jehova nga Dios sa una nga tagna sa Biblia: “Butangan ko sing kaawayon sa tunga mo kag sang babayi kag sa tunga sang imo binhi kag sang iya binhi. Dugmukon ka niya sa ulo kag dugmukon mo sia sa tikod.” (Genesis 3:15) Ang isa ka iskolar sa Biblia nagsiling nga “ang sugilanon tuhoy sa mesianiko nga mga saad nga ginapresentar sang Kasulatan nagasugod paagi [sa sini] nga pinamulong.” Ang isa pa ka iskolar nagsiling nga ang Mesias amo ang instrumento sang Dios nga “magatubos sa sala sang una nga mga tawo,” kag sa amo man nga tion magadala sing mga pagpakamaayo sa katawhan.​—⁠Hebreo 2:​14, 15.

Apang, ayhan narealisar mo nga wala gid ginapakamaayo sa karon ang katawhan. Sa baylo, desperado na kag nadulaan sing paglaum ang kaliwatan sang tawo. Amo kon ngaa, ang The World Book Encyclopedia nagsiling nga “madamo nga mga Judiyo ang nagapaabot gihapon sa Mesias” kag iya “tadlungon ang mga sayop kag lutuson ang mga kaaway sang tawo.” Apang, nagasiling ang Biblia nga nag-abot na ang Mesias. May rason bala nga patihan ang ginasiling sang Biblia? Sabton ini sang masunod nga artikulo.