Mga Pamangkot Gikan sa mga Bumalasa

Ano ang buot silingon ni apostol Pablo sang magsiling sia nga ang mga babayi dapat “maghipos sa mga kongregasyon”?

Nagsulat si Pablo sa Cristianong kongregasyon sa Corinto: “Subong sa tanan nga mga kongregasyon sang mga balaan, ang mga babayi maghipos sa mga kongregasyon, kay wala ginatugot sa ila ang paghambal.” (1 Corinto 14:​33, 34) Agod mahangpan naton ini sing husto, makabulig ang pagbinagbinag sa konteksto sang laygay ni Pablo.

Sa 1 Corinto kapitulo 14, ginbinagbinag ni Pablo ang mga butang may kaangtanan sa mga pagtilipon sa Cristianong kongregasyon. Ginlaragway niya kon ano ang dapat hinun-anunan sa sini nga mga pagtilipon kag gintudlo niya kon paano ini dumalahan. (1 Corinto 14:1-6, 26-34) Dugang pa, ginpadaku niya ang katuyuan sang Cristianong mga pagtilipon​—⁠“agod nga mapalig-on ang kongregasyon.”​—⁠1 Corinto 14:​4, 5, 12, 26.

Ang instruksion ni Pablo nga “maghipos” makita sing tatlo ka beses sa 1 Corinto kapitulo 14. Sa kada pagsambit sini, nagapatuhoy ini sa lain naman nga grupo sa sulod sang kongregasyon, apang sa tanan nga higayon, ginhatag ini sa amo gihapon nga rason​—⁠agod “ang tanan nga butang himuon sing nagakaigo kag suno sa kahimusan.”​—⁠1 Corinto 14:40.

Una, si Pablo nagsiling: “Kon ang bisan sin-o magpamulong sing lain nga hambal, limitehan ini sa duha ukon tatlo sa pinakamadamo, kag bulosbulos; kag ang isa magpatpat. Apang kon wala sing manugpatpat, maghipos sia sa kongregasyon kag maghambal sia sa iya kaugalingon kag sa Dios.” (1 Corinto 14:​27, 28) Indi buot silingon sini nga ini nga tawo indi na gid maghambal sa mga pagtilipon kundi nga may mga tion nga dapat sia maghipos. Dapat dumdumon nga ang katuyuan sang mga pagtilipon​—⁠nga amo ang magpalig-unay​—⁠indi maagom kon magpamulong sia sa hambal nga indi mahangpan.

Ikaduha, si Pablo nagsiling: “Ang duha ukon tatlo ka manalagna maghambal, kag magbinagbinag ang iban sang ginsiling. Kon may bugna sa isa nga nagalingkod, maghipos ang nahauna.” Wala ini nagakahulugan nga ang nahauna nga manalagna indi maghambal sa mga pagtilipon, kundi may mga tion nga kinahanglan sia maghipos. Nian ang isa nga may milagruso nga mga  bugna makapamulong sa kongregasyon, kag ang katuyuan sang mga pagtilipon​—⁠nga “ang tanan mapalig-on”​—⁠matuman.​—⁠1 Corinto 14:​26, 29-31.

Ikatlo, ginpatuhuyan ni Pablo ang Cristianong mga babayi, nga nagasiling: “Ang mga babayi maghipos sa mga kongregasyon, kay wala ginatugot sa ila ang paghambal, apang magpasakop sila.” (1 Corinto 14:34) Ngaa ginhatag ni Pablo ini nga sugo sa mga kauturan nga babayi? Agod mahuptan ang kahim-ong sa kongregasyon. Sia nagsiling: “Kon buot sila magtuon sing bisan ano, magpamangkot sila sa ila mga bana sa balay, kay makahuluya sa babayi ang paghambal sa kongregasyon.”​—⁠1 Corinto 14:35.

Mahimo nga ginasuay sang pila ka utod nga babayi ang mga ginasiling sa kongregasyon. Ang laygay ni Pablo nagbulig sa mga kauturan nga babayi nga likawan ining magamo nga espiritu kag mapainubuson nga batunon ang ila papel sa kahimusan sang pagkaulo nga ginpatok ni Jehova, ilabi na may kaangtanan sa ila mga bana. (1 Corinto 11:3) Dugang pa, paagi sa paghipos, mapakita sang mga kauturan nga babayi nga wala sila nagahandum nga mangin mga manunudlo sa kongregasyon. Sang magsulat si Pablo kay Timoteo, ginpakita niya nga indi nagakaigo sa isa ka babayi ang magpanudlo sa kongregasyon: “Wala ako nagatugot sa babayi nga magpanudlo ukon maggahom sa lalaki, kinahanglan maghipos sia.”​—⁠1 Timoteo 2:12.

Buot bala silingon sini nga ang isa ka Cristianong babayi indi na gid maghambal sa pagtilipon sang kongregasyon? Indi. Sang panahon ni Pablo, may mga okasyon nga ang Cristianong mga babayi, nga ayhan ginpahulag sang balaan nga espiritu, nagpangamuyo ukon nagpanagna sa mga kongregasyon. Sa sini nga mga okasyon, ginkilala nila ang ila papel paagi sa pagtakdong sang ila ulo.⁠ * (1 Corinto 11:5) Isa pa, sang panahon ni Pablo kag sa karon, ginaagda ang mga kauturan nga babayi kaupod sa mga kauturan nga lalaki nga maghimo sing isa ka dayag nga pagpahayag sang ila paglaum. (Hebreo 10:23-25) Magluwas sa paghimo sini sa ministeryo sa latagon, ginapahayag sang mga kauturan nga babayi ang ila paglaum kag ginapalig-on ang iban sa tion sang mga pagtilipon sa kongregasyon paagi sa paghatag sing nahandaan-sing-maayo nga mga komento kon ginatukso sila kag paagi sa pagbaton sing mga asaynment nga maghatag sing mga demonstrasyon ukon maghatag sing bahin subong mga estudyante sa Teokratikong Eskwelahan Para sa Ministeryo.

Gani, ang Cristianong mga babayi ‘nagahipos’ paagi sa paglikaw nga agawon ang papel sang isa ka lalaki kag magtudlo sa kongregasyon. Wala sila nagaargumento paagi sa mga pamangkot nga mahimo magsuay sa awtoridad sang mga nagapanudlo sa kongregasyon. Paagi sa pagtungod sa ila nagakaigo nga papel sa kongregasyon, daku gid ang ginaamot sang Cristianong mga babayi agod may yara paghidait diin “ang tanan nga butang [sa mga pagtilipon sa kongregasyon] himuon para sa pagpalig-on.”​—⁠1 Corinto 14:​26, 33.

[Nota]