Sin-o ang Matuod Gid nga mga Cristiano?

“ANG Cristianismo nagaluntad lamang kon ang ihibalo tuhoy kay Cristo nagaimpluwensia sa ginatudlo kag ginabuhat sang mga tawo.” (On Being a Christian) Paagi sa sining mga pulong, ginpabutyag sang Swiso nga teologo nga si Hans Küng ang maathag gid nga kamatuoran: Ang matuod nga Cristianismo nagaluntad lamang kon ginaaplikar sang sinsero nga mga indibiduwal ang mga panudlo ni Jesus.

Nian, ano kon wala ginaaplikar sang mga indibiduwal ukon mga institusyon nga nagapangangkon nga mga sumulunod ni Cristo ang iya gintudlo? Si Jesus mismo nagsiling nga madamo ang magapangangkon nga mga Cristiano sila. Ipatalupangod nila ang nanuhaytuhay nga mga butang subong pamatuod nga nag-alagad sila sa iya, sa pagsiling: “Wala bala kami nagpanagna sa imo ngalan, kag nagpanabog sing mga demonyo sa imo ngalan, kag  naghimo sing madamong gamhanan nga mga buhat sa imo ngalan?” Apang, paano ini tamdon ni Jesus? Maathag nga ginapakita sang iya talalupangdon nga mga pulong kon ano ang iya mangin paghukom: “Wala gid ako makakilala sa inyo! Palayo sa akon, kamo nga mga manugbuhat sang pagkamalinapason.”​—⁠Mateo 7:​22, 23.

Daw ano ini kadaku nga paandam batok sa “mga manugbuhat sang pagkamalinapason” nga nagapangangkon nga nagasunod sila kay Jesus! Binagbinaga ang duha ka importante nga kondisyon nga dapat tumanon sang mga tawo agod kilalahon sila ni Jesus subong matuod nga mga Cristiano sa baylo nga sikwayon sila subong mga manugbuhat sang pagkamalinapason.

“Kon Nagahigugmaanay Kamo”

Ang isa ka kondisyon nga ginhatag ni Jesus amo ini: “Nagahatag ako sa inyo sing isa ka bag-o nga sugo, nga higugmaon ninyo ang isa kag isa; subong nga ako nagahigugma sa inyo, higugmaon man ninyo ang isa kag isa. Sa sini ang tanan makahibalo nga kamo mga disipulo ko, kon nagahigugmaanay kamo.”​—⁠Juan 13:​34, 35.

Ginasugo ni Jesus ang iya mga sumulunod nga dapat sila magpakita sing matuod nga gugma sa isa kag isa kag sa tanan nga katawhan. Madamong indibiduwal nga mga Cristiano ang nakatuman sina nga kondisyon sa sulod sang mga siglo halin sang nagkabuhi si Jesus sa duta. Apang nahimo bala ini sang kalabanan nga relihiosong mga organisasyon nga nagapangangkon nga nagatiglawas kay Cristo? Ginapakita bala sang ila maragtas nga may gugma sila? Wala gid. Sa baylo, nagapanguna sila sa di-maisip nga mga inaway kag mga ginamo nga nagresulta sa pagpaagay sang dugo sang inosente nga mga tawo.​—⁠Bugna 18:24.

Amo gid sina bisan tubtob karon. Ang mga pungsod nga nagapangangkon nga Cristiano amo ang nanguna sa pagpamatay nga natabo sa duha ka bug-os kalibutan nga inaway sang ika-20 nga siglo. Sining karon lang, ang mga katapo sang ginatawag nga Cristianong mga iglesia amo ang nanguna sa mga pagpamintas kag plano nga pagpapas sa isa ka kaliwatan nga natabo sa Rwanda sang 1994. “Ang mga nag-ilinaway sa sining madugo nga inaway,” sulat sang Anglikano nga arsobispo anay nga si Desmond Tutu, “may isa lamang ka relihion. Kalabanan sa ila mga Cristiano.”

“Kon Magpabilin Kamo sa Akon Pulong”

Ginsambit ni Jesus ang ikaduha nga kondisyon para sa matuod nga Cristianismo sang magsiling sia: “Kon magpabilin kamo sa akon pulong, mga disipulo ko gid kamo, kag mahibaluan ninyo ang kamatuoran, kag ang kamatuoran magahilway sa inyo.”​—⁠Juan 8:​31, 32.

Ginapaabot ni Jesus nga magpabilin ang iya mga sumulunod sa iya pulong​—⁠buot silingon, magasunod gid sila sa iya mga panudlo. Sa baylo, ang relihioso nga mga manunudlo nga nagapangangkon nga nagasunod sila kay Cristo “amat-amat nga nagbaton sang Griego nga mga pagpati,” siling sang teologo nga si Küng. Gin-islan nila ang mga panudlo ni Jesus sing mga ideya subong sang pagkadimamalatyon sang kalag, pagtuo sa purgatoryo, pagsimba kay Maria, kag ang pagpaluntad sang klero nga klase​—⁠mga ideya nga ginkuha sa pagano nga mga relihion kag mga pilosopo.​—⁠1 Corinto 1:19-21; 3:18-20.

Ginpakilala man sang relihioso nga mga manunudlo ang makalilibog nga doktrina sang Trinidad, nga nagabayaw kay Jesus sa isa ka posisyon nga wala gid niya gin-angkon. Paagi sa sini nga doktrina, ginpatalang nila ang mga tawo gikan sa pagsimba sa isa nga pirme ginpatuhuyan ni Jesus sing igtalupangod​ —⁠ang iya Amay nga si Jehova. (Mateo 5:16; 6:⁠9; Juan 14:28; 20:17) “Sa kada tion nga ginasambit ni Jesus ang Dios,” sulat ni Hans Küng, “ang ginapatuhuyan niya amo ang dumaan nga Dios sang mga patriarka nga sanday Abraham, Isaac kag Jacob: si Yahweh . . . Para sa iya amo ini ang isa kag lamang nga Dios.” Pila ayhan ka tawo karon nga kon sambiton mo gani ang Dios kag Amay ni Jesus ang ila dayon hunahunaon amo si Yahweh, ukon si Jehova, nga amo ang kinaandan nga pagkasulat sang iya ngalan sa Hiligaynon nga lenguahe?

Ginlapas gid sang relihiosong mga lider ang sugo ni Jesus nga dapat sila magpabilin nga neutral sa politika. Sang panahon ni Jesus, ang Galilea “amo ang sentro sang nasyonalismo,” siling sang manunulat nga si Trevor Morrow. Madamo nga Judiyong mga patriotiko ang nag-uyat sing armas agod matigayon ang kahilwayan sa politika kag relihion. Ginsugo bala ni Jesus ang iya mga disipulo sadto nga magbuylog sa sini nga pagpakigbato? Wala. Sa baylo, ginsilingan niya sila: “Kamo indi bahin sang kalibutan.” (Juan 15:19; 17:14) Apang, sa baylo nga magpabilin nga neutral, ginpalambo sang mga lider sang simbahan ang ginalaragway sang Irlandes nga manunulat nga si Hubert Butler subong “militante kag politikal nga eklesiastisismo.” “Ang politikal nga Cristianismo,” sulat niya, “daw isa man pirme ka militarista nga Cristianismo kag kon magsugtanay gani ang mga politiko kag mga lider sang relihion, ang pirme nagakatabo amo nga, kabaylo sang pila ka benepisyo, ginabendisyunan sang Simbahan ang mga puersa militar sang estado.”

Ginapanghiwala sang Butig nga mga Manunudlo si Jesus

Nagpaandam si apostol Pablo tuhoy sa pagtalikod sa matuod nga Cristianismo. Nagsiling sia nga kon mapatay na gani sia, “ang mapiguson nga mga lobo” gikan sa tunga sang nagapangangkon nga mga Cristiano “magapamulong sing tiko nga mga butang agod ipahilayo ang mga disipulo kag pasundon sa ila.” (Binuhatan 20:​29, 30) ‘Ipahayag nila sing dayag nga kilala nila ang Dios,’ apang ang matuod “ginapanghiwala nila sia paagi sa ila mga buhat.” (Tito 1:16) Nagpaandam man si apostol Pedro nga ang butig nga mga manunudlo “mahipos nga magapasulod sing malaglagon nga mga sekta kag magapanghiwala bisan sa tag-iya nga nagbakal sa ila.” Bangod sang ila malain nga paggawi, siling niya, “pakamalauton” sang mga tawo ang “dalanon sang kamatuoran.” (2 Pedro 2:​1, 2) Ang pagpanghiwala kay Cristo sa sining paagi, siling sang Griegong iskolar nga si W. E. Vine, nagakahulugan sing “pagpanghiwala sa Amay kag sa Anak, paagi sa pag-apostata kag paagi sa pagpalapnag sing makahalalit nga mga panudlo.”

Ano ang himuon ni Jesus kon ang mga tawo nga nagapangangkon nga mga disipulo niya hungod nga indi “magpabilin sa [iya] pulong” kag indi magtuman sang iban pa nga mga kondisyon nga ginhatag niya? Nagpaandam sia: “Ang bisan sin-o nga magpanghiwala sa akon sa atubang sang mga tawo, ipanghiwala ko man sia sa atubang sang akon Amay nga yara sa langit.” (Mateo 10:33) Sa pagkamatuod, wala ginapanghiwala ni Jesus ang isa ka tawo nga nagasayop walay sapayan sang iya hanuot nga pagtinguha nga mangin matutom. Halimbawa, bisan pa makatlo nga ginpanghiwala ni apostol Pedro si Jesus, naghinulsol si Pedro kag ginpatawad sia. (Mateo 26:69-75) Apang, ginapanghiwala ni Jesus ang mga indibiduwal ukon mga institusyon nga sa kamatuoran mga lobo gali nga nagapakunokuno lamang nga mga karnero​—⁠nagapakunokuno nga nagasunod kay Cristo apang hungod kag padayon nga nagasikway sang iya mga panudlo. Tuhoy sa sining butig nga mga manunudlo, si Jesus nagsiling: “Paagi sa ila mga bunga makilala ninyo sila.”​—⁠Mateo 7:15-20.

Naglambo ang Apostasya sang Mapatay ang mga Apostoles

San-o ginpanghiwala sang butig nga mga Cristiano si Cristo? Wala magdugay sa tapos mapatay si Jesus. Sia mismo nagpaandam nga si Satanas nga Yawa magasab-ug man dayon sing “mga gamhon,” ukon butig nga mga Cristiano, sa tunga sang “maayo nga binhi,” ukon matuod nga mga Cristiano, nga gintanom ni Jesus sa tion sang iya ministeryo. (Mateo 13:​24, 25, 37-39) Nagpaandam si apostol Pablo nga nagapanghikot na ang malimbungon nga mga manunudlo sang panahon niya. Ang rason gid kon ngaa nagsipak sila sa mga panudlo ni Jesucristo, siling niya, amo nga wala sila sing matuod nga “gugma sa kamatuoran.”​—⁠2 Tesalonica 2:10.

Napunggan sang mga apostoles ni Jesucristo ang apostasya samtang nagakabuhi sila. Apang, sang mapatay na ang mga apostoles, gingamit sang relihioso nga mga lider ang “tagsa ka gamhanan nga buhat kag butig nga mga tanda kag . . . tagsa ka malaut  nga paglimbong” agod patalikuron ang kapin kag kapin pa nga mga tawo gikan sa mga kamatuoran nga gintudlo ni Jesus kag sang iya mga apostoles. (2 Tesalonica 2:​3, 6-12) Wala magdugay, sulat sang Ingles nga pilosopo nga si Bertrand Russell, ang orihinal nga Cristianong kongregasyon nangin isa ka relihiosong organisasyon nga “magapakibot kay Jesus, kag bisan gani kay Pablo.”

Ginpasag-uli ang Matuod nga Cristianismo

Maathag ang mga katunayan. Halin sang mapatay ang mga apostoles, ginpamatud-an sang halos tanan nga nagakatabo sa ngalan sang Cristianismo nga wala sini ginasakdag ang mga panudlo ni Cristo. Apang, wala ina nagakahulugan nga wala gintuman ni Jesus ang iya saad nga mangin kaupod sia sang iya mga sumulunod “sa tanan nga adlaw tubtob sa katapusan sang sistema sang mga butang.” (Mateo 28:20) Mapat-od naton nga halin sang ginsiling niya yadtong mga pulong, may yara matutom nga mga indibiduwal nga sa tunga nila ‘ang ihibalo tuhoy kay Jesucristo nagaimpluwensia sa ila ginatudlo kag ginabuhat.’ Gintuman ni Jesucristo ang iya saad nga sakdagon ang subong sini nga mga tawo bangod nagatinguha sila nga ipakita ang gugma nga amo ang nagapakilala sa matuod nga mga Cristiano kag magpabilin nga matutom sa mga kamatuoran nga iya gintudlo.

Dugang pa, nagsaad si Jesus nga sa katapusan nga mga adlaw sining sistema sang mga butang, tipunon niya ang iya matutom nga mga disipulo sa isa ka madali makilala nga Cristianong kongregasyon nga gamiton niya sa pagtuman sang iya kabubut-on. (Mateo 24:​14, 45-47) Ginagamit niya karon ina nga kongregasyon sa pagtipon sang “dakung kadam-an” sang mga lalaki, mga babayi, kag mga kabataan “gikan sa tanan nga mga pungsod kag mga tribo kag mga katawhan kag mga hambal,” kag ginahiusa niya sila sa idalom sang iya pagkaulo padulong sa “isa ka panong” sa idalom sang “isa ka manugbantay.”​—⁠Bugna 7:​9, 14-17; Juan 10:16; Efeso 4:11-16.

Busa, palayui ang bisan anong mga institusyon ukon mga organisasyon nga nagmusing sa ngalan ni Cristo kag nagtamay sa Cristianismo sa sulod sang nagligad nga duha ka libo ka tuig. Kay kon indi, subong sang ginsiling ni Jesucristo kay apostol Juan, mahimo ikaw “makabaton sing bahin sa [ila] mga kalalat-an” kon himuon na sang Dios ang iya paghukom sa ila sa malapit na nga palaabuton. (Bugna 1:⁠1; 18:​4, 5) Mangin determinado nga malakip ikaw sa ginapatuhuyan ni manalagna Miqueas sang magsiling sia nga “sa ulihi nga bahin sang mga adlaw,” ang matuod nga mga sumilimba​—⁠ang mga sumalakdag sang matuod nga Cristianismo​—⁠magapamati sa mga instruksion sang Dios kag ‘magalakat sa iya mga banas’ sang napasag-uli nga putli nga pagsimba. (Miqueas 4:1-4) Malipay ang mga manugbalhag sini nga magasin sa pagbulig sa imo nga makilala mo ining matuod nga mga sumilimba.

[Mga retrato sa pahina 5]

Ngaa wala nagapakigbahin ang matuod nga mga Cristiano sa mga inaway?

[Credit Lines]

Soldiers, left: U.⁠S. National Archives photo; flamethrower, right: U.⁠S. Army Photo

[Mga retrato sa pahina 7]

‘Maghigugmaanay kamo’ kag ‘magpabilin sa akon pulong’ amo ang importante gid nga mga kondisyon nga ginhatag ni Jesus para sa matuod nga mga Cristiano