Sin-o ang Nagaaplikar Karon sang mga Panudlo ni Cristo?

SI Jesucristo lapnag nga ginatamod subong isa sa pinakabantog nga mga tawo nga nabuhi anay. Madamo ang nagakabig sa iya subong ang pinakabantog nga tawo. Sa halos duha ka libo ka tuig, naimpluwensiahan gid sang iya mga panudlo ang kabuhi sang mga tawo​—⁠“ang indi talalupangdon nga kabuhi sang maayo kag mabuot nga mga tawo subong man ang kabuhi sang mga tawo nga nagpakita sing daku nga mga buhat sang kaluoy,” sulat sang Ingles nga awtor nga si Melvyn Bragg.

Paano Ginatamod Sang mga Tawo ang Cristianismo?

Paano ginatamod sang mga tawo ang Cristianismo? Ginlaragway ini subong “isa sa labing daku nga mga pag-uswag sang katawhan sa espirituwal.” Ginpabutyag ni David Kelso sang Glasgow Caledonian University sa Scotland, ang isa ka pagtamod. Nagsulat sia: “Ang duha ka libo ka tuig nga maragtas sini napuno gid sang walay tupong nga mga katigayunan sa patag sang arte, arkitektura, pilosopiya, musika, kag mga buhat para sa katawhan.”

Apang, tuhay ang pagtamod sang madamo pa. Wala sila nagapamatok sa Cristianismo nga suno sa isa ka diksionaryo, amo sini ang kahulugan: “Isa ka relihion nga napasad sa mga panudlo ni Jesucristo kag sa pagpati nga sia ang anak sang Dios.” (Collins Cobuild) Ang ginakangil-aran nila amo ang paggawi sang relihioso nga mga institusyon kag mga organisasyon nga nagapangangkon nga nagatiglawas sa Cristianismo.

Halimbawa, ginlaragway sang Aleman nga pilosopo nga si Friedrich Nietzsche sang ika-19 nga siglo, ang Cristianismo nahisanto sa ulihi nasambit nga punto subong “isa ka indi na mapanas nga tap-ing sang katawhan.” Nagsulat sia nga amo ini ang “isa ka daku nga ginatunaan sang halit, ang isa ka grabe gid kag tudok nga kagarukan, . . . nga magagamit sang bisan anong makahalalit, malimbungon, patago kag mapintas nga mga paagi agod malab-ot lamang ang tulumuron sini.” Matuod nga sobra gid ang pagtamod ni Nietzsche, apang amo man sini ang ginhinakop sang pila ka mas makatarunganon nga mga tagpanilag. Ngaa? Bangod sa bug-os nga  maragtas, indi mga kinaiya ni Jesucristo ang nakita sa paggawi sang mga nagapangangkon nga mga Cristiano, kundi ang lapnag nga “kagarukan, mapintas nga mga krimen kag mga pagtampalas.”

Ginasuportahan Bala Gihapon ni Cristo ang Cristianismo?

Gani, makatarunganon lamang nga ipamangkot ini, “Ginasuportahan bala gihapon ni Cristo ang Cristianismo?” “Siempre!” amo dayon ang isabat sang pila. “Indi bala nanaad sia sa iya mga sumulunod nga mangin kaupod nila sia ‘bisan tubtob sa katapusan sang kalibutan’?” (Mateo 28:​20, King James Version) Huo, ginsiling matuod ina ni Jesus. Apang buot bala niya silingon nga mangin kaupod sia sang tagsatagsa nga nagapangangkon nga sumulunod niya, bisan ano pa ang paggawi sina nga tawo?

Dumduma nga nagpati anay ang pila ka relihioso nga mga lider sang panahon ni Jesus nga kaupod nila ang Dios bisan ano pa ang ila himuon. Bangod ginpili sang Dios ang Israel para sa isa ka pinasahi nga papel, nagdumdom ang pila ka relihioso nga mga lider sadto nga indi gid sila pagbiyaan sang Dios​—⁠bisan ano pa ang himuon nila. (Miqueas 3:11) Apang, sang ulihi, ginsikway gid nila ang mga kasuguan kag mga talaksan sang Dios. Gani, gintampad sila ni Jesucristo: “Yari karon! Ang inyo balay ginapabay-an sa inyo.” (Mateo 23:38) Nadula sang isa ka bug-os nga sistema sang relihion ang kahamuot sang Dios. Ginsikway niya ini kag gintugutan ang Romanong hangaway nga laglagon ang kapital nga siudad sini, ang Jerusalem, kag ang templo sini sang 70 C.⁠E.

Matabo man ayhan ini sa Cristianismo? Binagbinagon naton kon ano nga mga kondisyon ang ginhatag ni Jesus may kaangtanan sa iya saad nga mangin kaupod sia sang iya mga sumulunod tubtob sa “katapusan sang kalibutan.”

 [Mga retrato sa pahina 3, 4]

Daku ang impluwensia sang mga panudlo ni Jesucristo sa minilyon ka tawo sa bug-os nga kalibutan