“Sugiri Pa Gid Kami!”

SA Nezlobnaya, sa Rusya, ginatun-an sang isa ka klase sa literatura sa hayskul ang mga sinulatan sang isa ka Ruso nga awtor nga si Mikhail Bulgakov. Isa sa iya mga sinulatan amo ang isa ka nobela nga nagapakanubo kay Jesucristo, samtang ginalaragway sini si Satanas nga isa ka baganihan. Pagkatapos sang paghinun-anon sang klase, ang maestra naghatag sing test nga napasad sa sini nga nobela. Apang, ang isa sa mga estudyante, ang 16 anyos nga Saksi ni Jehova nga si Andrey, matinahuron nga nagpangabay nga indi lang sia magkuha sing test kay indi magtugot ang iya konsiensia nga tun-an niya ini nga sahi sang literatura. Sa baylo, nagsiling sia nga masulat na lang sia sing isa ka salaysay nga magapaathag sang iya pagtamod kay Jesucristo. Nagpasugot ang iya maestra.

Sa iya salaysay, ginpaathag ni Andrey nga bisan pa ginatahod niya ang opinyon sang iban, nasapwan niya nga ang pinakamaayo nga paagi agod matun-an ang tuhoy kay Jesus amo ang pagbasa sa isa sa apat ka mga kasaysayan sang Ebanghelyo. Kon himuon mo ini, “matun-an mo ang tuhoy sa kabuhi kag mga panudlo ni Jesus nga napasad sa rekord sang mga nakasaksi.” Si Andrey nagsiling pa: “Isa pa gid nga ginakabalak-an ko amo kon paano ginlaragway si Satanas. Mahimo nga makalilingaw para sa iban ang magbasa sing isa ka libro diin si Satanas isa ka baganihan, apang para sa akon indi ini makalilingaw.” Ginpaathag niya nga sa pagkamatuod si Satanas isa ka gamhanan, malaut nga espiritu nga tinuga nga nagtalikod sa Dios, nga amo ang kabangdanan sang kalautan, kasakit, kag pag-antos sang pamilya sang tawo. Sa katapusan sang salaysay ni Andrey nagsiling sia: “Wala ako nagapati nga makabenepisyo ako sa pagbasa sini nga nobela. Siempre pa, indi ako akig kay Bulgakov. Apang sa akon lang, mas maayo nga Biblia ang akon basahon agod makatuon sang matuod nga kasaysayan tuhoy kay Jesucristo.”

Nanamian gid ang maestra sa salaysay ni Andrey amo nga ginpangabay niya sia nga maghanda sing oral nga report tuhoy kay Jesucristo. Nagpasugot dayon si Andrey. Sa masunod nila nga klase sa literatura, ginbasa ni Andrey ang iya report sa bug-os nga klase. Ginpaathag niya kon ngaa nagapati sia nga si Jesus ang pinakabantog nga tawo nga nagkabuhi. Nian, ginbasa niya ang isa ka kapitulo gikan sa libro sang Mateo sa Biblia tuhoy sa kamatayon ni Jesus. Bangod dali na lang matapos ang oras para sa iya report, luyag na ini tapuson ni Andrey, apang ginsilingan sia sang iya mga klasmeyt: “Sugiri pa gid kami! Ano dayon ang natabo?” Gani ginpadayon niya ang pagbasa sang kasaysayan ni Mateo tuhoy sa pagkabanhaw ni Jesus.

Sang makatapos si Andrey, madamo sing pamangkot ang iya mga klasmeyt tuhoy kay Jesus kag kay Jehova. “Nangamuyo ako kay Jehova sing kaalam kag ginpamatian niya ako,” siling ni Andrey. “Nasabat ko ang tanan nila nga pamangkot!” Pagkatapos sang klase, ginhatagan ni Andrey ang iya maestra sing isa ka kopya sang libro nga Ang Pinakabantog nga Tawo nga Nagkabuhi,⁠ * nga malipayon niya nga ginbaton. Si Andrey nagsiling: “Ginhatagan niya ako sing mataas nga grado sa akon report kag gindayaw niya ako sa akon mabakod nga pagpati kag indi pagkahuya sini. Nagsiling man sia nga nagaugyon sia sa pila ko ka ginapatihan.”

Nalipay si Andrey nga nagdesisyon sia nga sundon ang iya nahanas-sa-Biblia nga konsiensia paagi sa indi pagbasa sing balasahon nga nagapasipala kay Jehova kag sa iya Anak nga si Jesucristo. Ini nga panindugan wala lamang nag-amlig sa iya nga madagtaan sing di-Makasulatanhon nga pagtamod kundi nagbukas man ini sing isa ka daku nga kahigayunan nga mapaambit ang kamatuoran sa iban.

[Nota]