Kamatayon—Isa ka Makahaladlok nga Realidad!

“HALIN sa pagkabun-ag, nagaunay ang posibilidad nga ang isa ka tawo mahimo mapatay sa bisan ano nga tion,” sulat sang Britanikong istoryador nga si Arnold Toynbee. Nagsiling pa sia: “Kag pat-od gid nga ang tanan nga tawo mapatay sa ulihi.” Daw ano gid kalisod kon ang aton pinalangga nga katapo sang pamilya ukon ang aton suod nga abyan mapatay!

Ang kamatayon isa ka makahaladlok nga realidad para sa katawhan sa sulod sang madamo nga tinuig. Wala gid kita sing mahimo agod punggan ang kamatayon sang aton pinalangga. Wala sing bisan sin-o ang makalikaw sa kamatayon. Ang tanan nagakapatay. “Ang kasubo nagahimo sa aton tanan nga mangin bata liwat—ang tanan, bisan ano pa ang tinun-an, wala sing mahatag nga solusyon. Ang pinakamaalam wala sing nahibaluan.” Amo ini ang ginsulat sang isa ka manunulat sang mga salaysay sang ika-19 nga siglo. Nangin subong kita sang mga bata—walay mahimo kag walay ikasarang agod mabag-o ang kahimtangan. Bisan ang manggad ukon gahom indi makapugong sa kamatayon. Ang mga maalam wala sing mahatag nga solusyon. Ang mga makusog nagatangis, kag amo man ang mga maluya.

Naeksperiensiahan ni Hari David sang dumaan nga Israel ang amo nga kalisod sang napatay ang iya anak nga si Absalom. Sang mabalitaan niya nga si Absalom napatay, ang hari nagtangis kag nagtu-aw: “Anak ko nga Absalom, anak ko, anak ko nga Absalom! O kon ako na lang kuntani ang napatay, sa baylo nga ikaw, O Absalom, anak ko, anak ko!” (2 Samuel 18:33) Ang isa ka gamhanan nga hari nga nakalutos sa gamhanan nga mga kaaway wala sing mahimo kundi ang maghandum nga kuntani sia na lang, kag indi ang iya anak, ang nangampo sa “katapusan nga kaaway, ang kamatayon.”—1 Corinto 15:26.

May solusyon bala sa kamatayon? Kon amo, ano ang paglaum sang mga patay? Makita pa ayhan naton liwat ang aton mga hinigugma? Ang masunod nga artikulo nagahatag sing Makasulatanhon nga mga sabat sa sining mga pamangkot.