Pagkalipikar sa Cristianong Bawtismo
Pagkalipikar sa Cristianong Bawtismo
“Ano ang nagapugong sa akon sa pagpabawtismo?”—BINUHATAN 8:36.
1, 2. Paano nasugdan ni Felipe ang pagpakigsugilanon sa isa ka Etiopianhon nga opisyal, kag ano ang nagapamatuod nga ining tawo interesado sa matuod nga pagsimba?
MGA isa ukon duha ka tuig pagkatapos sang kamatayon ni Jesus, isa ka opisyal sang gobierno ang nagalakbay pabagatnan sa dalan halin sa Jerusalem pakadto sa Gaza. Mga 1,500 kilometros pa nga makakalapoy nga paglakbay sakay sa kangga ang iya pagahimuon. Ining debotado nga tawo naglakbay halin sa Etiopia pakadto sa Jerusalem agod magsimba kay Jehova. Sa iya malawig nga paglakbay pauli, gingamit niya sing maalamon ang iya tion paagi sa pagbasa sang Pulong sang Dios—isa ini ka ebidensia sang iya pagtuo. Natalupangdan ni Jehova ining hanuot nga tawo, kag paagi sa isa ka anghel, gintuytuyan Niya si disipulo Felipe agod magbantala sa iya.—Binuhatan 8:26-28.
2 Mahapos lang para kay Felipe nga umpisahan ang pagpakigsugilanon, bangod nagabasa sing mabaskog ang Etiopianhon nga opisyal, subong amo ang kinabatasan sadto. Sa amo, nabatian ni Felipe nga nagbasa sia gikan sa linukot ni Isaias. Ang isa ka simple nga pamangkot ni Felipe nagpukaw sa interes sang tawo: “Nahibaluan mo gid bala ang imo ginabasa?” Nagdul-ong ini sa paghinun-anon sang Isaias 53:7, 8. Sang ulihi, “ginpahayag [ni Felipe] sa iya ang maayong balita tuhoy kay Jesus.”—Binuhatan 8:29-35.
3, 4. (a) Ngaa ginbawtismuhan gilayon ni Felipe ang Etiopianhon? (b) Anong mga pamangkot ang binagbinagon naton karon?
3 Sa sulod sang malip-ot nga tion, nahangpan sang Etiopianhon ang papel ni Jesus sa katuyuan sang Dios, subong man ang kinahanglanon nga mangin isa ka bawtismado nga disipulo ni Cristo. “Ano ang nagapugong sa akon sa pagpabawtismo?” pamangkot niya kay Felipe sang may nakita sia nga isa ka duog nga may tubig. Sa pagkamatuod, pinasahi ini nga kahimtangan. Ang Etiopianhon nga opisyal isa ka tawo nga may pagtuo nga nagasimba na sa Dios subong isa ka Judiyo nga proselita. Mahimo nga madugay nga tion ang hulaton niya agod makatigayon liwat sing kahigayunan nga mabawtismuhan. Labing importante, nahangpan na sining tawo ang ginapatuman sang Dios sa iya, kag luyag niya himuon ini sing bug-os tagipusuon. Malipayon nga nagpasugot si Felipe sa iya pangabay, kag sang matapos mabawtismuhan, “nagpadayon [ang Etiopianhon] nga masinadyahon sa iya dalanon.” Walay duhaduha nga nangin isa sia ka makugi nga manugbantala sang maayong balita sa iya tumandok nga pungsod.—Binuhatan 8:36-39.
4 Bisan pa nga ang mga tikang sang dedikasyon kag bawtismo indi dapat pakadiutayon ukon himuon sing padasudaso, ginapakita sang halimbawa sang Etiopianhon nga opisyal nga may mga okasyon nga ang mga indibiduwal ginbawtismuhan wala magdugay pagkatapos mabatian ang kamatuoran sang Pulong sang Dios. * Busa, nagakaigo nga binagbinagon ang masunod nga mga pamangkot: Paano ang isa makahanda para sa bawtismo? Pila ang edad sang isa nga puede na sia bawtismuhan? Anong espirituwal nga pag-uswag ang dapat makita sa tawo antes sia bawtismuhan? Labaw sa tanan, ngaa ginapatuman ini ni Jehova sa iya mga alagad?
Isa ka Solemne nga Kasugtanan
5, 6. (a) Paano ang katawhan sang Dios sang una nagbalos sa gugma ni Jehova? (b) Anong suod nga kaangtanan sa Dios ang maagom naton sa tion nga mabawtismuhan kita?
5 Pagkatapos maluwas ang mga Israelinhon gikan sa Egipto, handa si Jehova nga batunon sila subong iya “pinasahi nga pagkabutang,” agod higugmaon kag amligan sila kag himuon sila nga “isa ka balaan nga pungsod.” Apang, agod mabaton ining mga pagpakamaayo, kinahanglan sila magbalos sa gugma sang Dios sa isa ka espesipiko nga paagi. Ginhimo nila ini paagi sa pagpasugot nga tumanon “ang tanan nga pinamulong ni Jehova” kag sa pagpakigkatipan sa iya. (Exodo 19:4-9) Sang unang siglo, ginsugo ni Jesus ang iya mga sumulunod nga maghimo sing mga disipulo sang mga tawo sang tanan nga pungsod, kag yadtong mga nagbaton sang iya panudlo ginbawtismuhan. Ang maayo nga kaangtanan sa Dios nasandig sa pagtuo kay Jesucristo kag ginasundan ini sang bawtismo.—Mateo 28:19, 20; Binuhatan 2:38, 41.
6 Ginapakita sining mga rekord sa Kasulatan nga ginapakamaayo ni Jehova ang mga nagahimo kag nagahupot sing solemne nga panumpa nga alagaron sia. Para sa mga Cristiano, ang dedikasyon kag bawtismo kinahanglanon nga mga tikang nga nagaresulta sa pagpakamaayo ni Jehova. Determinado kita nga sundon ang iya mga dalanon kag pangitaon ang iya panuytoy. (Salmo 48:14) Subong resulta, daw subong nga ginauyatan ni Jehova ang aton kamot kag ginatuytuyan kita sa dalanon nga dapat naton laktan.—Salmo 73:23; Isaias 30:21; 41:10, 13.
7. Ngaa isa dapat ka personal nga desisyon ang pagdedikar kag pagpabawtismo?
7 Ang dapat magpahulag sa aton sa paghimo sini amo ang gugma kay Jehova kag handum nga alagaron sia. Wala dapat sing magpabawtismo bangod lamang may nagsiling sa iya nga madugay na sia nga nagatuon ukon kay ang iya mga abyan magapabawtismo na. Natural lamang nga palig-unon sang mga ginikanan kag sang iban pa nga hamtong nga mga Cristiano ang isa ka tawo nga hunahunaon ang pagdedikar kag pagpabawtismo. Ginlaygayan ni apostol Pedro ang mga nakabati sa iya sang Pentecostes nga “magpabawtismo.” (Binuhatan 2:38) Walay sapayan, ang aton dedikasyon isa ka personal nga desisyon, kag wala dapat sing maghimo sini para sa aton. Kita dapat ang magdesisyon sa paghimo sang kabubut-on sang Dios.—Salmo 40:8.
Nagakaigo nga Preparasyon Para sa Bawtismo
8, 9. (a) Ngaa ang pagbawtismo sa mga lapsag wala nahisanto sa Biblia? (b) Ano nga espirituwal nga pag-uswag ang dapat himuon sang pamatan-on antes sang bawtismo?
8 Sarang bala makahimo sing maligdong nga desisyon sa pagdedikar ang mga bata? Ang Kasulatan wala nagasiling kon pila ang edad sang isa agod makalipikar para sa bawtismo. Walay sapayan, ang mga lapsag indi gid puede mangin tumuluo, makapakita sing pagtuo, ukon makadedikar sa Dios. (Binuhatan 8:12) Tuhoy sa unang-siglo nga mga Cristiano, ang istoryador nga si Augustus Neander nagsiling sa iya libro nga General History of the Christian Religion and Church: “Mga adulto lamang anay ang ginabawtismuhan, bangod nahangpan sang mga tawo nga ang bawtismo kag pagtuo naangot sing suod.”
9 Sa bahin sang mga pamatan-on, ang iban nakapalambo na sing espirituwalidad samtang hoben pa, samtang ang iban naman sang ulihi na. Apang, antes bawtismuhan, dapat ang pamatan-on may yara personal nga kaangtanan kay Jehova, may sibu nga paghangop sa sadsaran nga mga panudlo sang Kasulatan, kag nakahangop gid kon ano ang nadalahig sa dedikasyon, subong sang ginapatuman man sa mga adulto.
10. Ano nga mga tikang ang dapat himuon antes sang dedikasyon kag bawtismo?
10 Gin-instruksionan ni Jesus ang iya mga disipulo nga tudluan nila ang mga bag-uhan sang tanan nga butang nga iya ginsugo. (Mateo 28:20) Gani una sa tanan, ang mga bag-uhan kinahanglan magkuha sing sibu nga ihibalo sang kamatuoran, kag ini naman magabulig sa ila sa pagpalambo sing pagtuo kay Jehova kag sa iya Pulong. (Roma 10:17; 1 Timoteo 2:4; Hebreo 11:6) Nian, kon matandog sang kamatuoran sang Kasulatan ang tagipusuon sang isa ka tawo, ginapahulag sia sini nga maghinulsol kag magtalikod sa iya anay paagi sang pagkabuhi. (Binuhatan 3:19) Sa katapusan, ang tawo makadangat sa punto nga luyag na niya idedikar ang iya kaugalingon kay Jehova kag magpabawtismo, subong sang ginsugo ni Jesus.
11. Ngaa importante nga makigbahin kita sing regular sa pagbantala nga hilikuton antes magpabawtismo?
11 Ang isa pa ka importante nga tikang sa pag-uswag tubtob sa bawtismo amo ang pagpakigbahin sa pagbantala sing maayong balita sang Ginharian. Amo ini ang labing importante nga hilikuton nga gintangdo ni Jehova sa iya katawhan sa sining katapusan nga mga adlaw. (Mateo 24:14) Busa ang di-bawtismado nga mga manugbantala nagakalipay sa pagpakigsugilanon sang ila pagtuo sa iban. Ang pagpakigbahin sa sining hilikuton nagahanda man sa ila para sa regular kag makugi nga pagpakigbahin sa ministeryo sa latagon pagkatapos sang bawtismo.—Roma 10:9, 10, 14, 15.
May Nagapugong Bala sa Imo sa Pagpabawtismo?
12. Ano mahimo ang magpugong sa pila sa pagpabawtismo?
12 Ang iban mahimo indi magpabawtismo bangod nagapangalag-ag sila sa pagbaton sang mga salabton nga upod sini. Nahangpan nila nga agod masunod ang mga talaksan ni Jehova, dapat sila maghimo sing daku nga mga pagbag-o sa ila kabuhi. Ukon mahimo nahadlok sila nga basi mabudlayan sila sa pagkabuhi nahisuno sa mga talaksan sang Dios pagkatapos sang bawtismo. Ang iban mahimo pa gani mangatarungan, “Basi sa ulihi makahimo ako sing isa ka malain nga butang kag i-disfellowship sa kongregasyon.”
13. Sang panahon ni Jesus, ano ang nagpugong sa pila nga mangin sumulunod ni Jesus?
13 Sang panahon ni Jesus, gintugutan sang pila ang ila personal nga mga intereses kag suod nga mga kaangtanan sa pamilya nga magpugong sa ila nga mangin mga disipulo. Ang isa ka escriba nagsiling nga sundon niya si Jesus bisan diin Sia magkadto. Apang ginpatalupangod sa iya ni Jesus nga madamo nga beses nga wala gani sia sing matulugan. Sang gin-agda ni Jesus ang isa pa ka manugpamati nga mangin iya sumulunod, nagsabat ining tawo nga kinahanglan niya anay “ilubong” ang iya amay. Mahimo nga ginpili niya nga magtener sa ila puluy-an kag hulaton anay nga mapatay ang iya amay sa baylo nga magsunod kay Jesus kag atipanon inang salabton sa pamilya kon mag-abot man gid. Sa katapusan, ang ikatlo nagsiling nga antes niya sundon si Jesus, kinahanglan sia anay “magpaalam” sa iya panimalay. Ginlaragway ni Jesus ining pagpabuyanbuyan subong ‘pagbalikid sa mga butang sa likuran.’ Busa, ginapakita sini nga ang mga nagapauyaya may makita pirme nga mga balibad para likawan ang ila Cristianong mga salabton.—Lucas 9:57-62.
14. (a) Ano ang ginhimo nanday Pedro, Andres, Santiago, kag Juan sang gin-agda sila ni Jesus nga mangin mangingisda sang mga tawo? (b) Ngaa indi kita dapat mangalag-ag sa pagbaton sang gota ni Jesus?
14 Tuhay gid ang halimbawa nanday Pedro, Andres, Santiago, kag Juan. Sang gin-agda sila ni Jesus nga magsunod sa iya kag mangin mangingisda sang mga tawo, ang Biblia nagsiling: “Ginbayaan nila gilayon ang ila mga pukot, kag nagsunod sila sa iya.” (Mateo 4:19-22) Paagi sa walay pangalag-ag nga paghimo sinang desisyon, personal nila nga naeksperiensiahan ang ginhambal sang ulihi ni Jesus sa ila: “Itakod ang akon gota kag magtuon kamo sa akon, kay ako malulo kag mapainubuson sing tagipusuon, kag makakita kamo sing kaumpawan sa inyo kaugalingon. Kay ang akon gota mahapos kag ang akon lulan mamag-an.” (Mateo 11:29, 30) Bisan pa ang bawtismo may dala nga gota sang responsibilidad, ginapasalig kita ni Jesus nga mahapos ini kag masarangan amo nga makapaumpaw gid sa aton sing daku.
15. Paano ginapakita sang mga halimbawa nanday Moises kag Jeremias nga makasalig kita nga sakdagon kita sang Dios?
15 Sa pagkamatuod, normal lamang nga magbatyag nga di-sangkol. Si Moises kag si Jeremias lunsay nagbatyag sing primero nga indi sila sangkol sa pagtuman sang mga asaynment nga ginhatag ni Jehova sa ila. (Exodo 3:11; Jeremias 1:6) Paano sila ginpalig-on sang Dios? “Magaupod ako sa imo,” siling niya kay Moises. “Ako nagaupod sa imo sa pagluwas sa imo,” pangako niya kay Jeremias. (Exodo 3:12; Jeremias 1:8) Makasalig man kita nga sakdagon kita sang Dios. Ang gugma sa Dios kag pagsalig sa iya makabulig sa aton nga malandas ang indi madula nga mga pangduhaduha tuhoy sa kon bala masarangan naton magkabuhi nahisuno sa aton dedikasyon. “Wala sing kahadlok sa gugma,” sulat ni apostol Juan, “kundi ginatabog sang himpit nga gugma ang kahadlok.” (1 Juan 4:18) Ang isa ka bata nga lalaki mahimo nahadlok maglakat kon isahanon lang sia, apang indi sia mahadlok kon nagauyat sia sa iya amay samtang nagalakat. Subong man, kon nagasalig kita kay Jehova sing bug-os tagipusuon, nangako sia nga ‘tadlungon ang aton mga banas’ samtang nagalakat kita upod sa iya.—Hulubaton 3:5, 6.
Isa ka Talahuron nga Okasyon
16. Ngaa ang bawtismo nagadalahig sang bug-os nga pagtum-oy sa tubig?
16 Antes sang aktual nga bawtismo, isa anay ka Makasulatanhon nga pamulongpulong ang ginahatag nga nagapaathag sang importansia sang Cristianong bawtismo. Sa konklusion sining pamulongpulong, ginapangabay ang mga kandidato nga maghimo sing isa ka dayag nga pagpahayag sang ila pagtuo paagi sa pagsabat sang duha ka pamangkot sa bawtismo. (Roma 10:10; tan-awa ang kahon sa pahina 22.) Nian ang mga kandidato ginatum-oy sa tubig, bilang pagsunod sa halimbawa nga ginpahamtang ni Jesus mismo. Ginapakita sang Biblia nga pagkatapos sia mabawtismuhan, “nagbutwa si Jesus sa tubig.” (Mateo 3:16; Marcos 1:10) Maathag nga gintum-oy gid sing bug-os ni Juan Bautista si Jesus. * Ang bug-os nga pagtum-oy sibu nga nagasimbulo sang talalupangdon nga pagbag-o nga ginahimo naton sa aton kabuhi—malaragwayon kita nga napatay sa aton anay dalanon sang pagkabuhi kag nagsugod sa bag-o nga kabuhi sa pag-alagad sa Dios.
17. Paano ang mga kandidato sa bawtismo kag ang mga tagpanilag makapakita sing pagtahod sa tion sang bawtismo?
17 Ang bawtismo isa ka serioso kag malipayon nga okasyon. Ginapakita sang Biblia nga nagapangamuyo si Jesus sang gintum-oy sia ni Juan sa Suba Jordan. (Lucas 3:21, 22) Nahisanto sa sini nga huwaran, ang mga kandidato karon sa bawtismo dapat maggawi sing nagakaigo. Kag bangod ginalaygayan kita sang Biblia nga magpanapot sing maugdang sa matag-adlaw nga pagkabuhi, daw ano pa nga kinahanglan naton sundon ining laygay sa adlaw sang aton bawtismo! (1 Timoteo 2:9) Ang mga tagpanilag makapakita man sing pagtahod paagi sa pagpamati sing maayo sa pamulongpulong sa bawtismo kag paagi sa pagtan-aw sa bawtismo sing mahim-ong.—1 Corinto 14:40.
Mga Pagpakamaayo nga Natigayon sang Bawtismado nga mga Disipulo
18, 19. Ano nga mga pribilehiyo kag mga pagpakamaayo ang ginadala sang bawtismo?
18 Sa tion nga gindedikar naton ang aton kaugalingon sa Dios kag ginbawtismuhan, mangin bahin kita sang isa ka pinasahi nga pamilya. Una sa tanan, si Jehova mangin aton Amay kag aton Abyan. Antes sang aton bawtismo, nahamulag kita sa Dios; karon napasag-uli kita sa iya. (2 Corinto 5:19; Colosas 1:20) Paagi sa halad ni Cristo, nangin suod kita sa Dios kag nangin suod sia sa aton. (Santiago 4:8) Ginlaragway ni manalagna Malaquias kon paano nagatalupangod kag nagapamati si Jehova sa mga nagagamit kag nagadala sang iya ngalan, kag ginalakip niya ang ila mga ngalan sa iya tulun-an sang handumanan. “Sila pat-od nga mangin akon,” siling sang Dios, “kag kaluy-an ko sila, subong sang pagkaluoy sang tawo sa iya anak nga lalaki nga nagaalagad sa iya.”—Malaquias 3:16-18.
19 Bangod sa bawtismo, nangin katapo man kita sang bug-os kalibutan nga paghiliutod. Sang namangkot si apostol Pedro kon ano nga mga pagpakamaayo ang mabaton sang mga disipulo ni Cristo tungod sa mga sakripisyo nga ila ginhimo, nangako si Jesus: “Ang tagsatagsa nga nagbiya sing mga balay ukon mga utod nga lalaki ukon mga utod nga babayi ukon amay ukon iloy ukon mga anak ukon mga duta tungod sa akon ngalan magabaton sing mas madamo pa kag magapanubli sing kabuhi nga wala sing katapusan.” (Mateo 19:29) Madamo nga tuig pagkatapos sini, nagsulat si Pedro tuhoy sa “bug-os nga katilingban sang mga kauturan,” nga naglapnag “sa kalibutan.” Personal nga naeksperiensiahan ni Pedro ang pagsakdag kag mga pagpakamaayo sang isa ka mahigugmaon nga paghiliutod, kag amo man kita.—1 Pedro 2:17; 5:9.
20. Ano nga makalilipay nga paglaum ang ginatanyag sang bawtismo?
20 Dugang pa, ginpatalupangod ni Jesus nga yadtong nagasunod sa iya “magapanubli sing kabuhi nga wala sing katapusan.” Sa pagkamatuod, ang dedikasyon kag bawtismo nagahatag sa aton sing paglaum nga ‘makapanguyapot sing hugot sa matuod nga kabuhi’—kabuhi nga wala sing katapusan sa bag-ong kalibutan sang Dios. (1 Timoteo 6:19) May mas maayo pa bala nga pundasyon para sa palaabuton nga mahimo naton para sa aton kaugalingon kag para sa aton pamilya? Ining makalilipay nga paglaum makabulig sa aton sa ‘paglakat sa ngalan ni Jehova nga aton Dios tubtob sa tion nga walay latid, tubtob sa walay katubtuban.’—Miqueas 4:5.
[Mga nota]
^ par. 4 Ang tatlo ka libo nga mga Judiyo kag mga proselita nga nagpamati sa pamulongpulong ni Pedro sang Pentecostes nagpabawtismo man gilayon. Sa pagkamatuod, kaangay sang Etiopianhon nga eunuco, nahibaluan na nila ang sadsaran nga mga panudlo kag mga prinsipio sang Pulong sang Dios.—Binuhatan 2:37-41.
^ par. 16 Ang Griegong tinaga nga baʹpti·sma (bawtismo) nagapahangop “sang proseso sang pagtum-oy, pagsalop kag pagbutwa,” suno sa Vine’s Expository Dictionary of New Testament Words.
Mapaathag Mo Bala?
• Paano kag ngaa dapat kita magbalos sa gugma ni Jehova?
• Ano nga espirituwal nga pag-uswag ang dapat himuon antes sang bawtismo?
• Ngaa indi naton dapat tugutan ang kahadlok nga mapaslawan kita ukon ang pagpangalag-ag sa pagbaton sang salabton nga magpugong sa aton sa pagpabawtismo?
• Anong pinasahi nga mga pagpakamaayo ang ginaagom sang mga bawtismado nga mga disipulo ni Jesucristo?
[Mga Pamangkot sa Pagtinuon]
[Retrato sa pahina 26]
“Ano ang nagapugong sa akon sa pagpabawtismo?”
[Retrato sa pahina 29]
Ang bawtismo isa ka serioso kag malipayon nga okasyon
