Pabaskuga ang Inyo mga Kamot

“Pabaskuga ang inyo mga kamot, kamo nga nagapamati sining mga adlaw sining mga pulong gikan sa baba sang mga manalagna.”​—⁠ZACARIAS 8:9.

1, 2. Ngaa takus nga talupangdon naton ang tulun-an nanday Hageo kag Zacarias?

ANG mga tagna nanday Hageo kag Zacarias ginsulat mga 2,500 ka tuig na ang nagligad, apang pat-od gid nga may importante ini nga kahulugan sa imo kabuhi. Ang rekord sang Biblia nga masapwan sa sining duha ka tulun-an indi lamang maragtas. Bahin ini sang “tanan nga butang nga ginsulat sadto anay . . . sa pagtudlo sa aton.” (Roma 15:4) Madamo sa aton mabasa sa sini ang magapahunahuna sa aton sang matuod nga mga kahimtangan nga nagakahanabo sugod sang pagtukod sang Ginharian sa langit sang 1914.

² Ginapatuhuyan ang madugay na nga mga hitabo kag mga kahimtangan nga naagihan sang katawhan sang Dios, si apostol Pablo nagsiling: “Karon ining mga butang nahanabo sa ila subong mga halimbawa, kag ginsulat sila subong paandam sa aton nga naabutan sang katapusan sang sistema sang mga butang.” (1 Corinto 10:11) Gani mahimo magpalibog ka, ‘Ano ang kapuslanan sang mga tulun-an nanday Hageo kag Zacarias sa aton karon?’

3. Sa ano nagkonsentrar sanday Hageo kag Zacarias?

³ Subong sang ginsiling sang nauna nga artikulo, ang mga tagna nanday Hageo kag Zacarias nagadalahig sang tion nga nagbalik ang mga Judiyo sa ila hatag-Dios nga duta gikan sa pagkabihag sa Babilonia. Ining duha ka manalagna nagkonsentrar gid sa pagpatindog liwat sang templo. Ginpasad sang mga Judiyo ang pundasyon sang templo sang 536 B.⁠C.⁠E. Bisan pa ang pila ka tigulang nga mga Judiyo nagkonsentrar sa mga butang sang nagligad, sa kabug-usan may daku “nga pagsinggit sa kalipay.” Apang sa pagkamatuod, may mas importante pa nga butang nga natabo sa aton tion. Paano?​—⁠Esdras 3:3-13.

4. Ano ang natabo pagkatapos sang Bug-os Kalibutan nga Inaway I?

⁴ Wala madugay pagkatapos sang Bug-os Kalibutan nga Inaway I, ang mga hinaplas ni Jehova ginhilway sa pagkabihag sa Babilonia nga Daku. Ginpakita gid sini ang pagsakdag ni Jehova. Antes sini daw napauntat sang mga lider sang relihion kag sang ila mga kaupdanan nga mga politiko ang dayag nga pagbantala kag pagtudlo nga hilikuton sang mga Estudyante sang Biblia. (Esdras 4:​8, 13, 21-24) Apang, ginkuha ni Jehova nga Dios ang mga balagbag sa pagbantala kag paghimo disipulo nga hilikuton. Sa sulod sang mga dekada sugod sang 1919, nag-uswag ang hilikuton sang Ginharian kag wala gid sing nakapauntat sini.

5, 6. Anong dakung katumanan ang ginapatuhuyan sang Zacarias 4:7?

⁵ Mapat-od naton nga sa karon magapadayon ang pagbantala kag pagpanudlo nga ginahimo sang matinumanon nga mga alagad ni Jehova paagi sa bulig Niya. Sa Zacarias 4:​7, mabasa naton: “Pat-od nga paguaon niya ang sadsaran nga bato. May paghinugyaw bangod sini: ‘Maayuayo gid! Maayuayo gid!’” Anong dakung katumanan sa aton karon ang ginapatuhuyan sini?

⁶ Ang Zacarias 4:7 nagapatuhoy sa tion nga ang matuod nga pagsimba sa Soberanong Ginuo mahimpit sa dutan-on nga mga luwang sang iya espirituwal nga templo. Ining templo amo ang kahimusan ni Jehova sa pagpalapit sa pagsimba sa iya pasad sa nagatumbas nga halad ni Cristo Jesus. Matuod, ang daku nga espirituwal nga templo nagluntad na sugod sang unang siglo C.⁠E. Apang, ang matuod nga pagsimba sa dutan-on nga luwang sini sa palaabuton pa himpiton. Minilyon  sang sumilimba karon ang nagaalagad sa dutan-on nga luwang sang espirituwal nga templo. Sila kag ang madamo nga pagabanhawon himpiton sa tion sang Isa ka Libo ka Tuig Sang Paggahom ni Jesucristo. Sa katapusan sang isa ka libo ka tuig, ang matuod nga mga sumilimba sang Dios lamang ang mabilin sa natinluan nga duta.

7. Ano ang papel ni Jesus sa pagpahimpit sang matuod nga pagsimba sa aton adlaw karon, kag ngaa makapalig-on ini sa aton?

⁷ Presente si Gobernador Zerubabel kag ang Mataas nga Saserdote nga si Josue agod saksihan ang pagkahuman sang templo sang 515 B.⁠C.⁠E. Gintagna sang Zacarias 6:​12, 13 ang kaanggid man nga papel ni Jesus sa paghimpit sang matuod nga pagsimba: “Amo ini ang ginhambal ni Jehova sang mga kasuldadusan: ‘Yari ang tawo nga ang ngalan Salingsing. Kag gikan sa iya kaugalingon nga duog magapanalingsing sia, kag pat-od nga patindugon niya ang templo ni Jehova. Kag sia, para sa iya kaugalingon, magadala sing kadungganan; kag magapungko sia kag magagahom sa iya trono, kag mangin saserdote sia sa iya trono.’” Bangod sang katunayan nga si Jesus, nga yara sa langit kag nagapasalingsing sang Davidiko nga linya sang mga hari, nagasakdag sa hilikuton sang Ginharian sa espirituwal nga templo, sin-o ang makaupang sang pag-uswag sini? Wala gid! Indi bala nga dapat ini magpalig-on sa aton nga magpadayon sa aton ministeryo, nga wala nagatugot nga matublag sang kinaandan nga mga butang?

Kon Ano ang mga Prioridad

8. Ngaa dapat unahon gid naton ang hilikuton sa espirituwal nga templo sa aton kabuhi?

⁸ Agod matigayon naton ang bulig kag pagpakamaayo ni Jehova, dapat padayon naton nga unahon sa aton kabuhi ang hilikuton sa espirituwal nga templo. Indi kaangay sa mga Judiyo nga nagsiling, “Ang tion wala pa mag-abot,” dapat naton dumdumon nga nagakabuhi na kita sa “katapusan nga mga adlaw.” (Hageo 1:⁠2; 2 Timoteo 3:1) Gintagna ni Jesus nga ibantala sang iya matutom nga mga sumulunod ang maayong balita sang Ginharian kag maghimo sing mga disipulo. Dapat maghalong kita nga indi mapatumbayaan ang aton pribilehiyo sa pag-alagad. Wala pa matapos ang pagbantala kag pagpanudlo nga ginpadayon sang 1919 sa tapos ini mapauntat sing makadali bangod sang pagpamatok sang kalibutan. Apang, makasalig ka nga matapos gid ini!

9, 10. Sa ano nagadepende ang pagpakamaayo ni Jehova, kag ano ang kahulugan sini sa aton?

⁹ Samtang maukod kita nga nagapadayon sa hilikuton, pakamaayuhon kita​—⁠subong isa ka grupo ukon indibiduwal. Talupangda ang saad ni Jehova  nga makasalig gid kita. Kutob sang tion nga maukod nga ginpadayon sang mga Judiyo ang pagpasad sa pundasyon sang templo, si Jehova nagsaad: “Kutob sa adlaw nga ini magahatag ako sing pagpakamaayo.” (Hageo 2:19) Matigayon nila ang bug-os nga pagpasag-uli sang iya kahamuot. Nian binagbinaga ang saad nga mga pagpakamaayo sang Dios: “Kay maabot ang binhi sang paghidait; ang puno sang ubas mismo magahatag sang bunga sini, kag ang duta magahatag sang patubas sini, kag ang langit magahatag sang iya tun-og; kag ipapanubli ko sa sining nabilin nga katawhan ining tanan nga butang.”​—⁠Zacarias 8:9-13.

¹⁰ Subong nga nagsaad si Jehova sing espirituwal kag materyal nga mga pagpakamaayo sa mga Judiyo, pakamaayuhon man niya kita samtang mapisan kag malipayon naton nga ginahimo ang hilikuton nga gintugyan niya sa aton. Ining mga pagpakamaayo nagalakip sang paghidait sa tunga naton, kalig-unan, kahamungayaan, kag espirituwal nga pag-uswag. Apang, pat-od gid nga narealisar naton nga ang padayon nga pagpakamaayo sang Dios depende sa paghimo naton sing hilikuton sa espirituwal nga templo suno sa luyag ni Jehova.

11. Paano naton usisaon ang aton kaugalingon?

¹¹ Karon na ang tion nga ‘ipahamtang naton ang aton tagipusuon sa aton dalanon.’ (Hageo 1:​5, 7) Dapat kita tanan magpain sing tion agod usisaon ang aton mga prioridad sa kabuhi. Ang mga pagpakamaayo ni Jehova sa aton karon nagadepende sa kasangkaron sang pagbayaw naton sang iya ngalan kag pagpadayon sang aton hilikuton sa iya espirituwal nga templo. Mahimo mo pamangkuton ang imo kaugalingon: ‘Nagbag-o na bala ang akon prioridad? Kamusta na karon ang akon kakugi kay Jehova, sa iya kamatuoran, kag sa iya hilikuton kon ipaanggid sa akon kakugi sang ginbawtismuhan ako? Ang kaluyag bala sa isa ka masulhay nga kabuhi, nakaapektar sa akon pagpatuhoy sing igtalupangod kay Jehova kag sa iya Ginharian? Ang kahadlok bala sa tawo​—⁠sa kon ano ang mahimo isiling sang iban​—⁠daw nagapugong sa akon?’​—⁠Bugna 2:2-4.

12. Ano ang kahimtangan sang mga Judiyo nga ginpatalupangod sa Hageo 1:​6, 9?

¹² Indi naton luyag nga punggan sang Dios ang iya bugana nga pagpakamaayo bangod ginpatumbayaan naton ang hilikuton nga pagbayaw sang iya ngalan. Dumduma nga sa tapos masugdan sang napasag-uli nga mga Judiyo ang pagpatindog sa templo, sila ‘nagdalagan, ang kada isa sa iya kaugalingon nga balay,’ subong sang ginasiling sang Hageo 1:9. Nangin masako sila sa ila adlaw-adlaw nga mga kinahanglanon kag pagsinalayo. Apang, ‘ang patubas diutay,’ may kaiwaton sa makaalayaw nga pagkaon, ilimnon, kag madamol nga panapton. (Hageo 1:6) Ginbawi ni Jehova ang iya pagpakamaayo. May leksion bala ini para sa aton karon?

13, 14. Paano naton maaplikar ang leksion gikan sa Hageo 1:​6, 9, kag ngaa importante ini?

¹³ Wala ka bala nagaugyon nga agod padayon nga matigayon ang pagpakamaayo sang Dios, dapat naton pakigbatuan ang paghingamo sa mga butang para sa aton kaugalingon amo nga mapatumbayaan na naton ang pagsimba kay Jehova? Nagalakip ini sang paghingamo nga makakuarta,  madali-magpamanggad nga mga pahito, kag determinado nga mga plano para sa mataas pa nga edukasyon agod matigayon ang ginahandum nga karera sa sini nga sistema, ukon mga programa para malab-ot ang ginahandum.

¹⁴ Ining mga butang indi man sala. Apang, wala mo bala nahantop nga kon may kaangtanan sa kabuhi nga walay katapusan, ini “patay nga mga buhat”? (Hebreo 9:14) Sa ano nga kahulugan? Ining mga buhat patay sa espirituwal, walay pulos, kag indi mabungahon. Kon ang isa magpadayon sa sining mga buhat, magaresulta ini sa espirituwal nga kamatayon. Natabo ini sa pila ka hinaplas nga mga Cristiano sang adlaw sang mga apostoles. (Filipos 3:17-19) Natabo man ini sa iban karon. Mahimo may kilala ka nga amat-amat nga naglisa gikan sa Cristianong hilikuton kag gikan sa kongregasyon; karon wala na sila sing handum nga magbalik sa pag-alagad kay Jehova. Nagalaum gid kita nga magabalik sila kay Jehova, apang ang kamatuoran amo nga ang paghingamo sa “patay nga mga buhat” nagaresulta sa pagkadula sang kahamuot kag pagpakamaayo ni Jehova. Nakita mo kon daw ano gid kasubo ini. Nagaresulta ini sa pagkadula sing kalipay kag paghidait nga ginapatubas sang espiritu sang Dios. Kag handurawa lang kon ano nga kadulaan kon indi ka na makapakig-upod sa mainit nga Cristianong paghiliutod!​—⁠Galacia 1:⁠6; 5:​7, 13, 22-24.

15. Paano ginapakita sang Hageo 2:14 ang pagkaserioso sang aton pagsimba?

¹⁵ Serioso gid ini nga butang. Talupangda sa Hageo 2:14 kon ano ang pagtamod ni Jehova sa mga Judiyo nga nagpatumbaya sa balay sang pagsimba kay Jehova bangod sa pagkisame sa ila balay, sa literal ukon malaragwayon nga paagi. “‘Subong sina ining katawhan, kag subong sina ining pungsod sa atubangan nakon,’ siling ni Jehova, ‘kag subong sina ang tanan nga binuhatan sang ila mga kamot, kag bisan ano man nga ginahalad nila didto. Ini di-matinlo.’” Indi kalahamut-an ang bisan ano nga pakulahaw nga mga halad sang mga Judiyo sa temporaryo nga halaran sa Jerusalem samtang ginapatumbayaan sang katawhan ang matuod nga pagsimba.​—⁠Esdras 3:3.

Gingarantiya ang Pagsakdag

16. Pasad sa mga palanan-awon ni Zacarias, sa ano makasalig ang mga Judiyo?

¹⁶ Paagi sa walo ka paagisod nga palanan-awon nga nakita ni Zacarias, ang matinumanon nga mga Judiyo nga nagpatindog liwat sang templo sang Dios ginpasalig nga buligan sila sang Dios. Ang nahauna nga palanan-awon naggarantiya nga mahuman ang templo kag mangin mahamungayaon ang Jerusalem kag Juda kon matinumanon nga padayunon sang mga Judiyo ang hilikuton sa pagpatindog. (Zacarias 1:8-17) Ang ikaduha nga palanan-awon nagsaad nga laglagon ang tanan nga panguluhan nga nagapamatok sa matuod nga pagsimba. (Zacarias 1:18-21) Ang iban nga palanan-awon nagpasalig sang pag-amlig sang Dios sa pagpatindog, sa pagdugok sang katawhan sang madamong pungsod sa nahuman nga balay sang pagsimba kay Jehova, matuod nga paghidait kag kalig-unan, ang paghawan sa daw di-malandas nga mga upang sa ila hatag-Dios nga hilikuton, pagdula sang kalautan, kag pagdumala kag pag-amlig sang mga anghel. (Zacarias 2:​5, 11; 3:10; 4:⁠7; 5:6-11; 6:1-8) Mahangpan mo nga tungod sining mga garantiya sang pagsakdag sang Dios, ginbag-o sang mga matinumanon ang ila paagi sang pagkabuhi kag ginhugod ang ila igtalupangod sa pagtapos sa hilikuton nga tungod sini ginhilway sila sang Dios.

17. Bangod sa gingarantiya sa aton, ano ang dapat naton ipamangkot sa aton kaugalingon?

¹⁷ Sa kaanggid nga paagi, ang garantiya sang pat-od nga kadalag-an sang matuod nga pagsimba dapat magpahulag sa aton sa pagpanghikot kag  magpukaw sa aton nga hunahunaon sing serioso ang tuhoy sa balay sang pagsimba kay Jehova. Pamangkuta ang imo kaugalingon: ‘Kon nagapati ako nga karon na ang tion nga ibantala ang maayong balita sang Ginharian kag maghimo sing mga disipulo, nahisuno bala sa sini nga pagpati ang akon mga tulumuron kag paagi sa pagkabuhi? Nagahugod bala ako sing nagakaigo nga tion sa pagtuon sa matagnaon nga Pulong sang Dios, nga ginapabaloran gid ini, kag ginapakigsugilanon ini sa masigka-Cristiano subong man sa mga tawo nga masumalang ko?’

18. Ano ang matabo sa dili madugay, suno sa Zacarias kapitulo 14?

¹⁸ Ginpatuhuyan ni Zacarias ang kalaglagan sang Babilonia nga Daku nga pagasundan sang inaway sang Armagedon. Mabasa naton: “Mangin isa yadto ka adlaw nga kilala nga iya ni Jehova. Indi ini mangin adlaw, ni mangin gab-i; kag mahanabo nga sa kagab-ihon mangin masanag ini.” Huo, ang adlaw ni Jehova mangin madulom kag makahalanusbo gid nga adlaw para sa iya mga kaaway sa duta! Apang ini mangin tion sang dalayon nga kapawa kag kahamuot para sa matutom nga mga sumilimba ni Jehova. Ginlaragway man ni Zacarias kon paano iproklamar sang tanan nga butang sa bag-ong kalibutan ang pagkabalaan ni Jehova. Ang matuod nga pagsimba sa Dios sa iya daku nga espirituwal nga templo amo lamang ang sahi sang pagsimba sa duta. (Zacarias 14:​7, 16-19) Daku gid nga garantiya! Maeksperiensiahan naton ang katumanan sang mga gintagna kag makita ang pagbindikar sa pagkasoberano ni Jehova. Mangin pinasahi nga adlaw gid ini nga iya ni Jehova!

Dayon nga mga Pagpakamaayo

19, 20. Ngaa napalig-on ka sang Zacarias 14:​8, 9?

¹⁹ Magasunod sa sining makapulunaw nga pagbindikar sa pagkasoberano ni Jehova, si Satanas kag ang iya mga demonyo bilangguon sa kadadalman sang pagkadiaktibo. (Bugna 20:1-3, 7) Nian magailig ang mga pagpakamaayo sa tion sang Isa ka Libo ka Tuig nga Paghari ni Cristo. Ang Zacarias 14:​8, 9 nagasiling: ‘Mahanabo sa sina nga adlaw, nga magagua sa Jerusalem ang buhi nga tubig, katunga sini pakadto sa nasidlangan nga dagat kag katunga sini pakadto sa nakatundan nga dagat. Mahanabo ini sa tig-ilinit kag sa tigtulugnaw. Kag si Jehova mangin hari sa bug-os nga duta. Sa sina nga adlaw si Jehova mangin isa, kag ang iya ngalan isa.’

²⁰ Ang “buhi nga tubig,” ukon “suba sang tubig sang kabuhi,” nga nagalaragway sa mga aman ni Jehova para sa kabuhi, padayon nga magailig gikan sa trono sang Mesianikong Ginharian. (Bugna 22:​1, 2) Ang dakung kadam-an sang mga sumilimba ni Jehova nga nakalampuwas sa Armagedon, makabenepisyo paagi sa kahilwayan sa katagudilian sang kamatayon gikan kay Adan. Bisan ang mga patay makabenepisyo paagi sa pagkabanhaw. Nian magasugod ang bag-o nga hugna sang paggahom ni Jehova sa bug-os nga duta. Ang katawhan sa bug-os nga duta magakilala kay Jehova subong ang Soberano sang Uniberso, ang isa lamang nga dapat simbahon.

21. Ano dapat ang mangin determinasyon naton?

²¹ Bangod sang tanan nga gintagna nanday Hageo kag Zacarias kag sang tanan nga natuman na, may mabakod kita nga rason nga magpadayon sa hilikuton nga ginapahimo sa aton sang Dios sa dutan-on nga luwang sang iya espirituwal nga templo. Samtang wala pa mahimpit ang matuod nga pagsimba, kabay nga manikasog kita tanan nga padayon nga unahon ang mga intereses sang Ginharian. Ang Zacarias 8:9 nagapanugyan sa aton: “Pabaskuga ang inyo mga kamot, kamo nga nagapamati sining mga adlaw sining mga pulong gikan sa baba sang mga manalagna.”

Madumduman Mo Bala?

• Ano nga pagkaanggid sa inagihan ang naghimo sa mga tulun-an nanday Hageo kag Zacarias nga mapuslanon sa aton karon?

• Ano nga leksion tuhoy sa prioridad ang ginahatag sa aton nanday Hageo kag Zacarias?

• Ngaa ang pagbinagbinag sang Hageo kag Zacarias nagahatag sa aton sing rason nga magsalig tuhoy sa palaabuton?

[Mga Pamangkot sa Pagtinuon]

[Retrato sa pahina 26]

Sanday Hageo kag Zacarias nagpalig-on sa mga Judiyo nga magpangabudlay sing bug-os tagipusuon agod mabaton ang pagpakamaayo

[Mga retrato sa pahina 27]

‘Nagapanikasog ka bala tungod sa imo balay’?

[Retrato sa pahina 28]

Ginsaad ni Jehova ang pagpakamaayo, kag ginhatag niya ini