Indi Magkahadlok—Si Jehova Upod sa Imo!

SANG nagligad nga kapin sa 50 ka tuig, indi pa lang madugay nga naglupok ang nahauna nga mga bomba nuklear, ang sientista nga si Harold C. Urey nga nagdaug sing Nobel Prize, nagsiling tuhoy sa palaabuton: “Magakaon kita sa kahadlok, magatulog sa kahadlok, magakabuhi sa kahadlok kag mapatay sa kahadlok.” Sa pagkamatuod, ang aton kalibutan karon nalatom sang kahadlok, kag indi katingalahan! Kada adlaw, ang mga pamantalaan nagasugid sing makakulugmat nga mga balita tuhoy sa terorismo, masingki nga mga krimen, kag makatalanhaga nga mga balatian.

Subong mga Cristiano, nahibaluan naton kon ano ang kahulugan sini nga mga kahimtangan. Nagapakita ini nga nagakabuhi kita sa “katapusan nga mga adlaw” sining malaut nga sistema, nga suno sa tagna sang Biblia mahibaluan paagi sa “makahalanguyos nga mga tion nga mabudlay pakigbagayan.” (2 Timoteo 3:1) Sa amo, nagabakod ang aton kompiansa nga sa indi na lang madugay paluntaron ni Jehova nga Dios ang isa ka bag-ong kalibutan diin magapuyo ang pagkamatarong. (2 Pedro 3:13) Apang, samtang ginahulat naton ina, hilway bala kita sa kahadlok?

Kon Paano Ginatamod sang mga Alagad sang Dios ang Kahadlok

Sanday Jacob, David, kag Elias, pila sa mga alagad ni Jehova nga nakabatyag sing kahadlok sang mabutang sa katalagman ang ila kabuhi. (Genesis 32:​6, 7; 1 Samuel 21:​11, 12; 1 Hari 19:​2, 3) Indi kulang sing pagtuo ini nga mga tawo. Sa baylo, nagpakita sila sing mabakod nga pagsalig kay Jehova. Apang, tawo lamang sanday Jacob, David, kag Elias; gani, nagbatyag man sila sing kahadlok. “Si Elias isa ka tawo nga may mga balatyagon kaangay naton,” sulat ni disipulo Santiago.​—⁠Santiago 5:17.

Mahimo nga kita man makabatyag sing kahadlok samtang ginabinagbinag naton ang isa ka problema nga ginaatubang naton karon ukon basi masumalang naton sa palaabuton. Natural lang ina nga kahadlok. Kay man, ang Biblia nagasiling nga si Satanas nga Yawa determinado nga ‘magpakig-away’ sa mga “nagatuman sang mga sugo sang Dios kag may hilikuton sa pagpanaksi tuhoy kay Jesus.” (Bugna 12:17) Bisan pa ini nga mga pulong espesipiko nga naaplikar sa hinaplas nga mga Cristiano, nagsulat si Pablo: “Ang tanan nga luyag magkabuhi nga may diosnon nga debosyon may kaangtanan kay Cristo Jesus pagahingabuton man.” (2 Timoteo 3:12) Walay sapayan sini, indi kita dapat magpadaug sa kahadlok kon may mga problema kita. Ngaa?

“Isa ka Dios sang mga Buhat sang Pagluwas”

Ang salmista nga si David nagsulat: “Ang matuod nga Dios isa ka Dios sang mga buhat sang pagluwas para sa aton.” (Salmo 68:20) Makapila na nga ginpakita ni Jehova ang iya ikasarang sa pagluwas sa iya katawhan, paagi sa pagluwas sa ila gikan sa makatalagam nga mga kahimtangan ukon paagi sa paghatag sa ila sing kusog sa pagbatas. (Salmo 34:17; Daniel 6:22; 1 Corinto 10:13) Gikan sa imo pagtuon sa Biblia, pila sining “mga buhat sang pagluwas” ang madumduman mo?

Ginagamit ang Watch Tower Publications Index,⁠ * ngaa indi ka magpanalawsaw tuhoy sa matuod nga mga hitabo subong sang bug-os kalibutan nga Anaw sang adlaw ni Noe, sang pagluwas kay Lot kag sa iya mga anak nga babayi gikan sa Sodoma kag Gomorra, sang Exodo ukon paggua sang Israel gikan sa Egipto kag pagtabok sa Dagat nga Mapula, ukon sang pagpaslaw sa padihot ni Haman nga papason ang mga Judiyo? Ang pagbasa kag pagpamalandong sa sining makakulunyag nga mga kasaysayan magapabakod sang imo pagtuo nga si Jehova isa ka Dios sang mga buhat sang pagluwas. Nian, magabulig ini sa imo sa pag-atubang sa mga pagtilaw sa imo pagtuo nga walay kahadlok.

 Mga Halimbawa Karon

May mahunahuna ka bala nga mga halimbawa karon sang mga utod sa inyo lugar nga nagpakita sing pagbatas? Ayhan isa ka utod nga nabilanggo bangod sang katutom sa Dios. Ayhan may kilala ka nga isa ka may edad na nga Cristiano nga nagaalagad gihapon kay Jehova walay sapayan sang maluya nga panglawas. Ukon hunahunaa ang mga pamatan-on nga nagapabilin nga napain sa kalibutan walay sapayan sang daku nga pag-ipit gikan sa ila mga kaeskwela. Yara man ang nagasolo nga mga ginikanan, nga nagapadaku sing kabataan nga wala sing bulig sang tiayon, ukon ang di-minyo nga mga tawo nga nagaalagad kay Jehova walay sapayan nga ginapung-awan sila. Ano ang matun-an mo gikan sa ila? Ang pagbinagbinag sang ila katutom makabulig sa imo sa pagbatas kag sa pagpabilin nga walay kahadlok walay sapayan sang bisan anong mga pagtilaw nga mahimo ginaatubang mo.

Kinahanglan ang pagkawalay kahadlok indi lamang kon ginapamatukan kita ukon ginahingabot kundi kon magsugod man kita sa pagduhaduha tuhoy sa gugma ni Jehova sa aton. Dapat naton palambuon ang kompiansa nga ang gawad ni Cristo para sa aton tanan subong mga indibiduwal. (Galacia 2:20) Nian, makapalapit kita kay Jehova nga wala sing kahadlok ukon kahangawa. Kon sa pamatyag naton indi kita takus sa gugma ni Jehova, mapamalandungan naton ang ginsiling ni Jesus sa iya mga sumulunod: “Indi bala nga ginabaligya ang duha ka maya sa bili nga isa ka sensilyo nga diutay sing balor? Apang wala sing isa sa ila nga mahulog sa duta nga indi mahibaluan sang inyo Amay. Bisan ang mga buhok mismo sa inyo ulo naisip na tanan. Busa indi kamo magkahadlok: mas importante pa kamo sangsa madamo nga maya.”​—⁠Mateo 10:29-31.

Ang magasin nga Ang Lalantawan kag Magmata! pirme nagabalhag sing mga eksperiensia sang mga Saksi ni Jehova karon nga nag-atubang sang mabudlay nga mga kahimtangan nga walay kahadlok. Indi buot silingon nga wala sila makabatyag sing kasubo ukon kabalaka tuhoy sa ila kabudlayan. Apang wala nila pagtuguti ini nga mga balatyagon nga magpauntat sa ila sa pag-alagad kay Jehova. Ang ila nabalhag nga kasaysayan makabulig man sa imo sa pagbatas nga walay kahadlok. Binagbinaga ang duha ka halimbawa.

Nagbag-o ang Iya Kabuhi Bangod sang Isa ka Halit

Ang Abril 22, 2003 nga gua sang Awake! nag-unod sing artikulo nga “How an Injury Changed My Life.” Sa sini, ginsaysay ni Stanley Ombeva, isa sa mga Saksi ni Jehova sa Kenya, ang mga problema nga iya naatubang sa tapos sia mabungguan sang isa ka nagahagunos nga salakyan. Bangod nagluya ang iya lawas, nadula niya ang iya trabaho kag ang tanan nga benepisyo. “Samtang amat-amat nga nagaathag sa akon kon daw ano kagrabe ang akon kahimtangan,” baton ni Utod Ombeva sa iya panaysayon, “nangin negatibo ako, buringot, kag kaugalingon ko na lang ang akon ginapamensar. Kon kaisa, akig ako kag nagahinakit.” Walay sapayan sining mabudlay nga kahimtangan, nagpabilin nga walay kahadlok ining Cristiano nga lalaki. Wala sia magpadaug sa kapaslawan kag wala sia mangampo. Sa baylo, nagsandig sia kay Jehova. “Ginbuligan niya ako sa tanan nga inagyan ko​—⁠amo kon ngaa nga ginakahuya ko kon kaisa ang akon kaugalingon,” siling ni Utod Ombeva. “Namat-od ako nga basahon kag pamalandungan ang mga teksto nga nahibaluan ko makapalig-on sa akon walay sapayan sang akon kahimtangan.”

Ang prangka nga mga komento ni Utod Ombeva nakabulig sa madamo nga batason ang mga pagtilaw nga walay kahadlok. “Naghibi ako sang mabasa ko ini nga artikulo,” sulat sang isa ka Cristianong utod nga babayi. “Ginbatyag ko nga paagi sa sini nga artikulo ginapakita ni Jehova ang iya pagpalangga kag mahigugmaon nga pag-ulikid kag ginalugpayan niya ako.” Ang isa pa ka Saksi nagsulat: “Ang subong sini nga mga artikulo nagahatag sing daku nga pagpalig-on sa mga utod naton nga yara sa kaanggid sini nga mga kahimtangan kag hipos nga nagaantos.”

 Kon Paano Atubangon ang Problema sa Emosyon

Ang isa pa ka makatalandog nga eksperiensia amo ang iya ni Herbert Jennings, nga gin-asoy sa artikulo nga “Wala Kamo Makahibalo Kon Ano ang Mangin Kabuhi Ninyo Buwas.”⁠ * Si Utod Jennings nagapakigbato sa isa ka sahi sang problema sa emosyon. Sa paghinumdom sang una nga mga inadlaw sang iya balatian, nagsiling sia: “Nabudlayan gid ako agod lang makatambong ako sa Cristianong mga miting. Apang, kumbinsido ako nga mapuslanon ang pagpakig-upod sa kauturan. Agod indi ako mabudlayan, masami ako nga nagasulod sa Kingdom Hall kon makapungko na ang tanan kag nagahalin ako antes magkinarankaran ang mga tawo pagkatapos sang miting.”

Mabudlay man magbantala. “Kon kaisa, pagsampot ko pa lang sa isa ka balay, daw wala na ako sing kaisog bisan sa pagpislit lang sang doorbell,” siling ni Utod Jennings. “Apang, indi ko luyag mag-untat, bangod nahangpan ko nga ang aton ministeryo nagakahulugan sing kaluwasan para sa aton kaugalingon kag para sa bisan sin-o nga magabaton sini. (1 Timoteo 4:16) Pagkadugaydugay, makontrol ko na ang akon emosyon kag nagatilaw naman ako sa masunod nga ganhaan. Paagi sa padayon nga pagpakigbahin sa ministeryo, nakapabilin ako nga aktibo sa espirituwal sa masarangan ko, kag labi pa nga nakabulig ini agod masarangan ko ang akon problema.”

Ang prangka nga panaysayon ni Utod Jennings nakabulig sa madamo nga bumalasa nga atubangon ang ila problema sa emosyon nga walay kahadlok man. Halimbawa, ang isa ka Cristianong utod nga babayi nagsulat: “Sa 28 ka tuig nga binasahay ko sang mga magasin nga Ang Lalantawan kag Magmata!, karon pa lang ako natandog sing tudok sang mabasa ko ini nga artikulo. Napilitan ako anay nga mag-untat sa pag-alagad sa Dios sing bug-os tion apang natublag ang akon konsiensia, kay sa pamatyag ko wala kuntani ako mag-untat kon may dugang lamang ako nga pagtuo. Nabuligan ako nga tamdon ang akon kahimtangan sing balanse pagkatapos ko mabasa kon paano napilitan si Utod Jennings nga mag-untat sa iya pinasahi nga asaynment agod atipanon ang iya balatian. Amo gid ini ang sabat sa akon mga pangamuyo!”

Nagsulat man ang isa ka Cristianong utod nga lalaki: “Pagkatapos mag-alagad subong isa ka gulang sa kongregasyon sing napulo ka tuig, gin-untatan ko ini nga pribilehiyo bangod sang isa ka sahi sang balatian sa hunahuna. Nakabatyag ako sing daku gid nga kapaslawan sa akon kaugalingon amo nga masami ako nagakasubo kon makabasa ako sing mga artikulo tuhoy sa mga sugilanon sang kabuhi, nga masami nagaasoy sang tumalagsahon nga mga hinimuan sang katawhan ni Jehova. Apang nakahatag sa akon sing kalipay ang pagbatas ni Utod Jennings. Pila ka beses ko na nga nabasa ini nga artikulo.”

Pagpadayon nga May Kompiansa

Kaangay nanday Utod Ombeva kag Utod Jennings, madamo nga mga Saksi ni Jehova ang walay kahadlok nga nagapadayon sa pagsimba kay Jehova nga Dios walay sapayan sang mabudlay gid nga mga balagbag. Kon isa ikaw sa ila, dalayawon ka. Saligi ini: “Ang Dios indi di-matarong nga malipat sang inyo binuhatan kag sang gugma nga ginpakita ninyo tungod sa iya ngalan, kay nag-alagad kamo sa mga balaan kag padayon nga nagaalagad.”​—⁠Hebreo 6:10.

Subong nga ginbuligan ni Jehova ang iya matutom nga katawhan sang dumaan nga panahon sa paglutos sa ila mga kaaway, mabuligan ka niya sa pagdaug sang bisan anong balagbag nga masumalang mo. Busa, dumduma ang ginsiling ni Jehova paagi kay manalagna Isaias: “Dili ka mahadlok, kay ako upod sa imo. Dili ka manghulonghulong, kay ako ang imo Dios. Palig-unon ko ikaw. Buligan ko gid ikaw. Alay-ayon ko gid ikaw sang akon tuo nga kamot sang pagkamatarong.”​—⁠Isaias 41:10.

[Mga nota]

[Mga Retrato sa pahina 16]

Kaangay nanday Stanley Ombeva (ibabaw) kag Herbert Jennings (tuo), madamo ang walay kahadlok nga nagaalagad kay Jehova

[Credit Line sang retrato sa pahina 14]

USAF photo