Kaimulon—Ang Kahimtangan Karon

SI Vicente * masami makita nga nagaguyod sing kargado gid nga karito sa mga kalye sang São Paulo, Brazil. Nagapanipon sia sing mga karton, iskrap nga mga metal, kag mga plastik. Kon magsirom na gani, nagahapnig sia sing karton sa idalom sang iya karito kag diri magtulog. Daw wala lang sa iya bungog ang hagunghong sang mga awto kag mga bus sa masako nga kalye diin nagapaligad sia sang gab-i. May obra sia anay, puluy-an, kag pamilya​—⁠apang nadula ini tanan. Nagapakabudlay sia karon sa kalye agod may ibuhi lamang sa iya kaugalingon.

Makapasubo nga minilyon ka tawo sa bug-os nga kalibutan, kaangay ni Vicente, ang daw indi na makatibawas gikan sa sobra nga kaimulon. Sa nagauswag pa nga mga pungsod, madamo ang nagakapilitan nga magpuyo sa kalye ukon sa mga hayubhayob. Ang mga manugpakilimos​—⁠mga piang, mga bulag, mga babayi nga may ginabatiti nga mga lapsag​—⁠kinaandan nga makita. Sa nahamtangan sang mga suga sang trapiko, ang mga kabataan nagadinalagan kon magdulog ang mga salakyan, nga nagabaligya sing mga dulse agod makatigayon sing senintimos.

Mabudlay ipaathag kon ngaa nagaluntad ang subong sini nga kaimulon. Ang Britaniko nga magasin nga The Economist nagkomento: “Ang kaliwatan sang tawo nakatigayon karon sing kapin nga manggad, ukon kapin nga ihibalo sa medisina, kalantip sa teknolohiya kag kinaalam nga kinahanglanon agod malandas ang kaimulon.” Madamo sa pagkamatuod ang nakabenepisyo sa sini nga ihibalo. Nagaginutok ang bag-o kag nagainggat nga mga salakyan sa mga kalye sang dalagku nga mga siudad sang pila ka nagauswag pa nga mga pungsod. Ang mga shopping mall puno sing pinakaulihi nga mga kasangkapan, kag madamo ang nagabinakal sini. Naghiwat ang duha ka shopping center sa Brazil sing isa ka espesyal nga promosyon. Nagbukas sila sa bug-os nga gab-i halin sang Disiembre 23 tubtob 24, 2004. Ang isa sini nga shopping center nagkuha pa gani sing mga manugsaot agod maglingaw sa mga bumalakal. Mga 500,000 ka bumalakal ang nagkadto sa sini nga okasyon!

Apang, madamo gihapon ang wala nagabenepisyo gikan sa manggad sang mga manggaranon. Bangod sang daku nga lang-at sang mga  manggaranon kag mga imol, madamo ang naghinakop nga dapat gid dulaon na ang kaimulon. Ang magasin nga Veja sang Brazil nagsiling: “Ang labing importante nga butang nga dapat hambalan sang mga lider sang kalibutan karon nga tuig [2005] amo ang paglandas sa kaimulon.” Nagreport man ang Veja tuhoy sa ginabuko nga isa ka bag-o nga Marshall Plan agod buligan ang pinakaimol nga mga pungsod, ilabi na sa Aprika.⁠ * Apang, bisan pa ang subong sini nga mga buko nagahatag sing impresyon nga may yara pag-uswag, ini gihapon nga magasin nagsiling pa: “Madamo man ang rason nga duhaduhaan ang mga resulta. Kon ang kalabanan nga mga pungsod nagapaganot sa pag-amot, ini bangod ang mga pundo talagsa lang makadangat sa mga tawo nga amo ang ginapadalhan sini.” Makapasubo nga bangod sang kagarukan, kag marikubikos nga sahi sang panguluhan, ang daku nga bahin sang mga pundo nga ginaaman sang mga panguluhan, internasyonal nga mga ahensia, kag mga indibiduwal wala gid nagadangat sa mga tawo nga nagakinahanglan gid sini.

Nahibaluan ni Jesus nga ang kaimulon isa ka problema nga magaunay sa tawo. Nagsiling sia: “Ang mga imol kaupod ninyo pirme.” (Mateo 26:11) Nagakahulugan bala ini nga ang kaimulon indi na madula sa duta? Wala bala sing mahimo agod maremedyuhan ang kahimtangan? Ano ang mahimo sang mga Cristiano sa pagbulig sa mga imol?

[Mga nota]