Mainunungon nga Nagaalagad kay Cristo nga Hari
Mainunungon nga Nagaalagad kay Cristo nga Hari
“Ginhatagan sia sing pagbulut-an kag kadungganan kag ginharian, agod nga ang mga katawhan, mga pungsod kag mga hambal mag-alagad tanan sa iya.”—DANIEL 7:14.
1, 2. Paano naton nahibaluan nga si Cristo wala pa maggahom sing bug-os sa Ginharian sang 33 C.E.?
SIN-O nga manuggahom ang mahimo makahatag sang iya kabuhi para sa iya mga sakop apang mabuhi liwat agod maggahom subong hari? Sin-o nga hari ang mahimo makapuyo sa duta, agod saligan sia kag unungan sang iya mga sakop, kag nian makagahom gikan sa langit? Ang lamang nga makahimo sini—kag sang madamo iban pa nga mga butang—amo si Jesucristo. (Lucas 1:32, 33) Sang Pentecostes 33 C.E., pagkatapos nga si Cristo napatay, nabanhaw, kag nagkayab sa langit, ang Dios ‘naghimo sa iya nga ulo sa ibabaw sang tanan nga butang sa kongregasyon.’ (Efeso 1:20-22; Binuhatan 2:32-36) Sa amo si Cristo nagsugod na sa paggahom apang indi pa bug-os ini nga paggahom. Ang iya una nga mga sakop hinaplas sang espiritu nga mga Cristiano, nga ginahuman sang espirituwal nga Israel, “ang Israel sang Dios.”—Galacia 6:16; Colosas 1:13.
2 Halos 30 ka tuig pagkatapos sang Pentecostes 33 C.E., ginpamatud-an ni apostol Pablo nga si Cristo wala pa maggahom sing bug-os sa Ginharian, apang yara sia sa “tuo nga kamot sang Dios, nga nagahulat tubtob nga ang iya mga kaaway mahimo nga palatungan sang iya mga tiil.” (Hebreo 10:12, 13) Nian, sa hingapusan sang unang siglo C.E., nakita sang tigulang na nga si apostol Juan sa isa ka palanan-awon ang Soberano sa Bug-os nga Uniberso nga si Jehova, nga ginapalingkod si Cristo Jesus subong Hari sa bag-o natukod nga langitnon nga Ginharian. (Bugna 11:15; 12:1-5) Gikan sa aton pagbinagbinag sa maragtas, marepaso naton ang mabakod nga ebidensia nga nagapamatuod nga si Cristo nagsugod na sa paggahom subong Mesianikong Hari sa langit sang 1914. *
3. (a) Sugod sang 1914, anong bag-o nga aspekto ang ginlakip sang maayong balita sang Ginharian? (b) Anong pamangkot ang mapamangkot naton sa aton kaugalingon?
3 Huo, sugod sang 1914 ang maayong balita sang Ginharian nagalakip sing isa ka bag-o kag makakulunyag nga aspekto. Si Cristo aktibo nga nagagahom subong Hari sa langitnon nga Ginharian sang Dios, bisan sa “tunga sang [iya] mga kaaway.” (Salmo 110:1, 2; Mateo 24:14; Bugna 12:7-12) Dugang pa, sa bug-os nga duta ang iya mainunungon nga mga sakop malangkagon nga nagatuman sa iya awtoridad paagi sa pagpakigbahin sa tugob globo nga programa sang pagtudlo sa Biblia nga indi matupungan sa maragtas sang katawhan. (Daniel 7:13, 14; Mateo 28:18) Ang hinaplas sang espiritu nga mga Cristiano, ang “mga anak sang ginharian,” nagapangalagad subong “mga embahador nga salili para kay Cristo.” Mainunungon sila nga ginabuligan sang isa ka nagadamo nga panong ni Cristo sang “iban nga mga karnero,” nga nagapangalagad subong mga mensahero sang Ginharian sang Dios. (Mateo 13:38; 2 Corinto 5:20; Juan 10:16) Walay sapayan sini, dapat naton binagbinagon kon bala kita subong mga indibiduwal nagakilala gid sa awtoridad ni Cristo. Determinado gid bala kita nga mangin mainunungon sa iya? Paano naton mapakita ang pagkamainunungon sa isa ka Hari nga nagagahom sa langit? Antes sini, binagbinagon anay naton ang mga rason kon ngaa nangin mainunungon kita kay Cristo.
Isa ka Hari nga Nagapahulag sing Pagkamainunungon
4. Ano ang nahimo ni Jesus subong Gintangdo nga Hari sa tion sang iya ministeryo sa duta?
4 Ang aton pagkamainunungon kay Cristo napasad sa aton apresasyon sa iya ginhimo kag subong man sa iya talalupangdon nga mga kinaiya. (1 Pedro 1:8) Samtang yari sa duta, si Jesus subong Gintangdo nga Hari nagpakita sa isa ka limitado nga paagi kon ano ang iya himuon subong nagagahom nga Hari sa bug-os nga duta sa gintalana nga tion sang Dios. Ginpakaon niya ang mga ginagutom. Gin-ayo niya ang masakiton, ang bulag, ang may sablag, ang bungol, kag ang apa. Ginbanhaw pa gani niya ang pila ka indibiduwal nga napatay. (Mateo 15:30, 31; Lucas 7:11-16; Juan 6:5-13) Dugang pa, ang ihibalo tuhoy sa kabuhi ni Jesus sa duta magabulig sa aton nga mahibaluan ang iya mga kinaiya subong palaabuton nga Manuggahom sang duta—labi na gid ang iya masinakripisyuhon nga gugma. (Marcos 1:40-45) Sa sini nga bahin, si Napoléon Bonaparte nagsiling kuno: “Si Alejandro, si Cesar, si Carlomagno, kag ako nagtukod sing mga emperyo, apang sa anong sadsaran namon ginhimo ang amon dakung mga buhat? Sa kusog. Si Jesucristo lamang ang nagtukod sang iya ginharian sa gugma, kag sa karon nga adlaw minilyon ka tawo ang manginmatay tungod sa iya.”
5. Ngaa makagalanyat gid ang personalidad ni Jesus?
5 Si Jesus malulo kag mapainubuson sa tagipusuon, gani ang mga ginaluyahan bangod sang mga pag-ipit kag mga lulan naumpawan paagi sa iya makapalig-on nga mga panudlo kag malulo nga personalidad. (Mateo 11:28-30) Napahamtang gid ang buot sang mga kabataan sa iya. Ang mapainubuson kag mahinantupon nga mga tawo malangkagon nga nangin mga disipulo niya. (Mateo 4:18-22; Marcos 10:13-16) Ang iya mapatugsilingon kag matinahuron nga kinaiya nagpahulag sa madamong mahinadlukon sa Dios nga mga babayi, nga ang pila sa ila naghatag sang ila tion, panikasog, kag materyal nga mga pagkabutang agod atipanon sia samtang ginahimo niya ang iya ministeryo.—Lucas 8:1-3.
6. Anong mapinalanggaon nga mga balatyagon ang ginpakita ni Jesus sang napatay si Lazaro?
6 Ginpakita ni Cristo ang pila sang iya labing mapinalanggaon nga mga balatyagon sang napatay ang iya pinalangga nga abyan nga si Lazaro. Natandog gid sia sang kalisod nanday Maria kag Marta amo nga indi niya mapunggan ang iya kalisang, kag “nagluha” sia. “Nalisang” sia—natublag sang daku nga kasakit kag kasubo—bisan pa nahibaluan niya nga sa indi madugay banhawon niya si Lazaro. Nian, napahulag sang gugma kag kaawa, gingamit ni Jesus ang iya hatag-Dios nga awtoridad kag ginbanhaw si Lazaro.—Juan 11:11-15, 33-35, 38-44.
7. Ngaa takus si Jesus sang aton pagkamainunungon? (Tan-awa man ang kahon sa pahina 31.)
7 May yara kita matinahuron nga kahadlok sa malig-on nga gugma ni Jesus sa kon ano ang matarong kag sa iya pagdumot sa pagkasalimpapaw kag kalautan. Makaduha nga naghulag sia sing maisugon agod tinluan ang templo batok sa makagod nga mga negosyante. (Mateo 21:12, 13; Juan 2:14-17) Dugang pa, subong isa ka tawo sa duta, naeksperiensiahan niya ang tanan nga sahi sang kabudlayan, amo nga naagihan man niya ang mga pag-ipit kag mga kabudlayan naton. (Hebreo 5:7-9) Nahibaluan man ni Jesus kon ano ang balatyagon nga mangin biktima sang dumot kag inhustisya. (Juan 5:15-18; 11:53, 54; 18:38–19:16) Sang ulihi, maisugon sia nga nag-antos sa isa ka masakit nga kamatayon agod matuman ang kabubut-on sang iya Amay kag hatagan ang iya mga sakop sing kabuhi nga walay katapusan. (Juan 3:16) Wala ka bala napahulag sa sining mga kinaiya ni Cristo nga magpadayon sa pag-alagad sa iya sing mainunungon? (Hebreo 13:8; Bugna 5:6-10) Apang, ano ang kinahanglanon agod mangin sakop ni Cristo nga Hari?
Ang mga Kalipikasyon Agod Mangin Sakop
8. Ano ang ginapatuman sa mga sakop ni Cristo?
8 Hunahunaa ini nga pagpaanggid: Agod mangin banwahanon sang isa ka pungsod masami ini nga nagadalahig sa paglab-ot sa pila ka importante nga mga kalipikasyon. Ayhan kinahanglan nga matinlo ang ila rekord sa pungsod nga ila ginhalinan kag nalab-ot nila ang pila ka talaksan sa panglawas. Sing kaanggid, kinahanglan nga huptan sang mga sakop ni Cristo ang mataas nga talaksan sa moralidad kag maayo nga kapagros sa espirituwal.—1 Corinto 6:9-11; Galacia 5:19-23.
9. Paano naton mapakita nga mainunungon kita kay Cristo?
9 Makatarunganon man nga ginapatuman ni Jesucristo nga ang iya mga sakop mangin mainunungon sa iya kag sa iya Ginharian. Ginapakita nila ina nga pagkamainunungon paagi sa pagkabuhi suno sa iya gintudlo sang yari sia sa duta subong Gintangdo nga Hari. Halimbawa, ginauna nila ang mga intereses sang Ginharian kag ang kabubut-on sang Dios sangsa materyal nga mga pagkabutang. (Mateo 6:31-34) Ginatinguhaan gid nila nga ipabanaag ang tulad-Cristo nga personalidad, bisan sa labing mabudlay nga mga kahimtangan. (1 Pedro 2:21-23) Dugang pa, ginasunod sang mga sakop ni Cristo ang iya halimbawa paagi sa paghimo sing maayo sa iban.—Mateo 7:12; Juan 13:3-17.
10. Paano ang pagkamainunungon kay Cristo mapakita (a) sa pamilya kag (b) sa kongregasyon?
10 Ginapakita man sang mga sumulunod ni Jesus ang ila pagkamainunungon sa iya paagi sa pagpabanaag sang iya mga kinaiya sa pamilya. Halimbawa, ginapakita sang mga bana ang ila pagkamainunungon sa ila langitnon nga Hari paagi sa pag-ilog sa mga kinaiya ni Cristo kon nagapakig-angot sa ila mga asawa kag mga kabataan. (Efeso 5:25, 28-30; 6:4; 1 Pedro 3:7) Ginapakita sang mga asawa ang ila pagkamainunungon kay Cristo paagi sa ila putli nga paggawi kag paagi sa pagpakita sing “malinong kag malulo nga espiritu.” (1 Pedro 3:1-4; Efeso 5:22-24) Ang mga kabataan mainunungon kay Cristo kon ginasunod nila ang iya halimbawa sa pagkamatinumanon. Subong isa ka pamatan-on, si Jesus nagpabilin nga mapinasakupon sa iya mga ginikanan, bisan pa indi sila himpit. (Lucas 2:51, 52; Efeso 6:1) Ang mga sakop ni Cristo mainunungon nga nagatinguha nga ilugon sia paagi sa ‘pagpakita sing patugsiling, utudnon nga gugma’ kag ‘mapinalanggaon nga kaawa.’ Ginatinguhaan nila nga mangin kaangay ni Cristo, nga “mapainubuson sa hunahuna, nga wala nagabalos sing halit sa halit ukon pasipala sa pasipala.”—1 Pedro 3:8, 9; 1 Corinto 11:1.
Masinulundon sa Kasuguan nga mga Sakop
11. Sa ano nga kasuguan nagapasakop ang mga sakop ni Cristo?
11 Subong nga ang luyag mangin banwahanon sa isa ka pungsod nagatuman sa mga kasuguan sang ila bag-o nga pungsod, ang mga sakop ni Cristo nagapasakop man sa “kasuguan ni Cristo” paagi sa pagpahisuno sang ila kabuhi sa tanan nga gintudlo kag ginsugo ni Jesus. (Galacia 6:2) Ilabi na nga mainunungon sila nga nagakabuhi sa “harianon nga kasuguan” sang gugma. (Santiago 2:8) Ano ang nadalahig sa sining mga kasuguan?
12, 13. Paano kita nagapasakop sing mainunungon sa “kasuguan ni Cristo”?
12 Ang mga sakop ni Cristo may mga di-kahimpitan kag mga kasaypanan. (Roma 3:23) Busa, dapat padayon nila nga palambuon ang “indi salimpapaw nga utudnon nga gugma” agod nga sila “maghigugmaanay sing hanuot gikan sa tagipusuon.” (1 Pedro 1:22) “Kon ang isa may inugsumbong batok sa isa,” mainunungon nga ginaaplikar sang mga Cristiano ang kasuguan ni Cristo paagi sa ‘pagpainumuray sa isa kag isa kag hilway nga pagpinatawaray sa isa kag isa.’ Ang pagtuman sa sining kasuguan nagabulig sa ila nga padayon nga palampason ang di-kahimpitan kag pangitaon ang rason nga maghigugmaanay. Wala mo bala ginaapresyar nga kaupod mo ang mga tawo nga bangod mainunungon nga nagapasakop sa aton mahigugmaon nga Hari nagapanapot sang ila kaugalingon sing gugma, ang “himpit nga higot sang paghiusa”?—Colosas 3:13, 14.
13 Dugang pa, ginpaathag ni Jesus nga ang gugma nga iya ginpakita mas daku pa sangsa gugma nga masami ginapakita sang katawhan sa isa kag isa. (Juan 13:34, 35) Kon ginahigugma lamang naton ang mga nagahigugma sa aton, wala kita nagahimo sing “pinasahi nga butang.” Sa sini nga bahin ang aton gugma indi bug-os. Ginpalig-on kita ni Jesus nga ilugon ang gugma sang iya Amay paagi sa pagpakita sing may prinsipio nga gugma bisan sa mga kaaway nga nagadumot kag nagahingabot sa aton. (Mateo 5:46-48) Ini nga gugma nagapahulag man sa mga sakop sang Ginharian nga magpadayon sing mainunungon sa ila panguna nga hilikuton. Ano inang panguna nga hilikuton?
Ginatilawan ang Pagkamainunungon
14. Ngaa importante gid ang pagbantala nga hilikuton?
14 Ang mga sakop sang Ginharian sang Dios karon may importante nga hilikuton nga “pagpanaksi sing maid-id tuhoy sa ginharian sang Dios.” (Binuhatan 28:23) Ang paghimo sini importante bangod ang Mesianikong Ginharian magabindikar sang bug-os uniberso nga pagkasoberano ni Jehova. (1 Corinto 15:24-28) Kon ginabantala naton ang maayong balita, may kahigayunan ang mga makabati nga mangin mga sakop sang Ginharian sang Dios. Dugang pa, ang reaksion sang mga tawo sa sina nga mensahe mangin basehan ukon talaksan sang paghukom ni Cristo nga Hari sa katawhan. (Mateo 24:14; 2 Tesalonica 1:6-10) Sa amo, ang panguna nga paagi nga mapakita naton ang aton pagkamainunungon kay Cristo amo ang pagtuman sa iya sugo nga sugiran ang iban tuhoy sa Ginharian.—Mateo 28:18-20.
15. Ngaa ginatilawan ang pagkamainunungon sang mga Cristiano?
15 Ginapamatukan ni Satanas ang pagbantala nga hilikuton tubtob sa bug-os nga masarangan niya, kag wala ginakilala sang tawhanon nga mga gumalahom ang hatag-Dios nga awtoridad ni Cristo. (Salmo 2:1-3, 6-8) Gani, ginpaandaman ni Jesus ang iya mga disipulo: “Ang ulipon indi daku pa sa iya agalon. Kon ginhingabot nila ako, hingabuton man nila kamo.” (Juan 15:20) Busa, ang mga sumulunod ni Cristo nadalahig sa isa ka espirituwal nga pagpakig-away nga nagatilaw sang ila pagkamainunungon.—2 Corinto 10:3-5; Efeso 6:10-12.
16. Paano ginahatag sang mga sakop sang Ginharian ang “mga butang sang Dios sa Dios”?
16 Walay sapayan sini, ang mga sakop sang Ginharian sang Dios nagapabilin nga mainunungon sa ila di-makita nga Hari apang nagatahod sa tawhanon nga awtoridad. (Tito 3:1, 2) Si Jesus nagsiling: “Ibayad ninyo kay Cesar ang mga butang nga iya ni Cesar, apang sa Dios ang mga butang nga iya sang Dios.” (Marcos 12:13-17) Busa, ang mga sakop ni Cristo nagatuman sa kasuguan sang panguluhan kon wala ini nagasumpakil sa mga kasuguan sang Dios. (Roma 13:1-7) Apang, sang ginpamatukan sang Judiyong mataas nga korte ang mga kasuguan sang Dios paagi sa pagmando nga untatan sang mga disipulo ni Cristo ang pagbantala, malig-on apang matinahuron sila nga nagsiling nga dapat nila “tumanon ang Dios subong manuggahom sa baylo sang mga tawo.”—Binuhatan 1:8; 5:27-32.
17. Ngaa maatubang naton sing maisugon ang mga pagtilaw sa aton pagkamainunungon?
17 Huo, nagakinahanglan gid sing kaisog para sa mga sakop ni Cristo nga magpabilin nga mainunungon sa ila Hari kon ginahingabot. Walay sapayan, si Jesus nagsiling: “Malipayon kamo kon ang mga tawo nagapakahuya kag nagahingabot sa inyo kag binutig nga nagahambal batok sa inyo sang tanan nga sahi sang kalautan tungod sa akon. Magkasadya kamo kag magtumbo sa kalipay, kay daku ang inyo padya sa langit.” (Mateo 5:11, 12) Naeksperiensiahan sang mga sumulunod ni Cristo sang una ang pagkamaminatud-on sining mga pulong. Bisan pa ginbakol sila bangod sa pagpadayon sa pagbantala tuhoy sa Ginharian, nagkalipay sila “bangod ginkabig sila nga takus pakahuy-an tungod sa iya ngalan. Kag adlaw-adlaw sa templo kag sa mga balay nagpadayon sila sa pagpanudlo kag sa pagbantala sing maayong balita tuhoy sa Cristo, si Jesus.” (Binuhatan 5:41, 42) Takus ka sang komendasyon kay ginapakita mo ang amo man nga espiritu sang pagkamainunungon kon ginabatas mo ang mga kabudlayan, balatian, kalisod, ukon pagpamatok.—Roma 5:3-5; Hebreo 13:6.
18. Ano ang ginapakita sang mga pinamulong ni Jesus kay Poncio Pilato?
18 Sang sia gintangdo pa lang subong Hari, ginpaathag ni Jesus sa Romanong Gobernador nga si Poncio Pilato: “Ang akon ginharian indi bahin sini nga kalibutan. Kon ang akon ginharian bahin sini nga kalibutan, ang akon mga alagad nakig-away kuntani agod indi ako matugyan sa mga Judiyo. Apang, ang matuod, ang akon ginharian indi gikan sa sini.” (Juan 18:36) Busa, ang mga sakop sang langitnon nga Ginharian wala nagapakig-away sa isa kag isa ukon nagadampig sa bisan anong tawhanon nga inaway. Bilang pagpakita sing pagkamainunungon sa “Prinsipe sang Paghidait,” nagapabilin sila nga bug-os nga neutral sa nabahinbahin nga mga hilikuton sang kalibutan.—Isaias 2:2-4; 9:6, 7.
Walay Katapusan nga mga Padya Para sa Mainunungon nga mga Sakop
19. Ngaa ang mga sakop ni Cristo may pagsalig nga nagalaum sa palaabuton?
19 Ang mainunungon nga mga sakop ni Cristo, ang “Hari sang mga hari,” may pagsalig nga nagahulat sa palaabuton. Malangkagon nila nga ginapaabot ang pagpasundayag niya sang langitnon nga harianon nga gahom. (Bugna 19:11–20:3; Mateo 24:30) Ang nabilin sang mainunungon nga hinaplas sang espiritu nga “mga anak sang ginharian” nagalaum sa ila hamili nga palanublion subong mga hari upod kay Cristo sa langit. (Mateo 13:38; Lucas 12:32) Ang mainunungon nga “iban nga mga karnero” ni Cristo nagahulat sa kahamuot sang ila hari kon magsiling sia: “Kari, kamo nga ginpakamaayo sang akon Amay, panublia ninyo ang [dutan-on nga Paraiso sang] ginharian nga gin-aman sa inyo kutob sa pagtukod sa kalibutan.” (Juan 10:16; Mateo 25:34) Gani, kabay nga ang tanan nga sakop sang Ginharian mangin determinado nga magpadayon sing mainunungon sa pag-alagad kay Cristo nga Hari.
[Nota]
^ par. 2 Tan-awa ang Reasoning From the Scriptures, “Ngaa ang mga Saksi ni Jehova nagasiling nga ang Ginharian sang Dios gintukod sang 1914?” pahina 95-7, nga ginabalhag sang mga Saksi ni Jehova.
Mapaathag Mo Bala?
• Ngaa takus si Cristo sang aton pagkamainunungon?
• Paano ang mga sakop ni Cristo nagapakita sang ila pagkamainunungon sa iya?
• Ngaa luyag naton mangin mainunungon kay Cristo nga Hari?
[Mga Pamangkot sa Pagtinuon]
[Kahon sa pahina 31]
DUGANG PA NGA TALALUPANGDON NGA MGA KINAIYA NI CRISTO
Walay pinasulabi—Juan 4:7-30.
Mainawaon—Mateo 9:35-38; 12:18-21; Marcos 6:30-34.
Nagasakripisyo sa kaugalingon nga gugma—Juan 13:1; 15:12-15.
Pagkamainunungon—Mateo 4:1-11; 28:20; Marcos 11:15-18.
Empatiya—Marcos 7:32-35; Lucas 7:11-15; Hebreo 4:15, 16.
Pagkamakatarunganon—Mateo 15:21-28.
[Retrato sa pahina 29]
Paagi sa paghigugmaanay, mainunungon nga nagapasakop kita sa “kasuguan ni Cristo”
[Retrato sa pahina 31]
Napahulag ka bala sang mga kinaiya ni Cristo nga alagaron sia sing mainunungon?
