Paglab-ot sa Tagipusuon sang Isa ka Bata

NAKAAGI ka na bala nga nagkasubo ka sang may nakita ka nga isa ka bata nga nagahampang sing uluinaway? Sa karon, bisan ang magagmay pa nga kabataan kinaandan nga nagahampang sini, kay lapnag na ang kasingki sa kalibutan sang kalingawan. Paano mo makumbinsi ang isa ka bata nga bayluhan ang iya hampanganan nga para sa uluinaway sing indi masingki nga hampanganan? Si Waltraud, nga isa ka madugay na nga misyonera sang mga Saksi ni Jehova sa Aprika, nakakita sing paagi nga makumbinsi ang isa ka bata nga lalaki nga bayluhan ang iya hampanganan.

Bangod sang inaway, nagbiya si Waltraud sa pungsod nga iya ginapuy-an kag nagsaylo sa iban nga pungsod sa Aprika. Didto naghiwat sia sing pagtuon sa Biblia upod sa iloy sang lima ka tuig nga bata nga lalaki. Sa kada tion nga duawon niya ang iloy, ang bata nga lalaki nagahampang sing isa ka gamay kag plastik nga pusilpusil, ang amoamo lang niya nga hampanganan. Wala pa makita ni Waltraud nga may ginatayaan sia sang iya pusilpusil, apang masami nga ginaabre-sira niya ini, nga daw ginabalahan ini.

Ginhambalan ni Waltraud ang bata: “Werner, nakahibalo ka bala kon ngaa diri ako nagapuyo sa inyo pungsod? Ina bangod sang inaway​—⁠kinahanglan ko magpalagyo sa akon pungsod agod makalikaw sa makatalagam nga mga tawo nga nagapangluthang sang iban gamit ang mga pusil nga kaangay sang imo hampanganan. Sa banta mo maayo bala ang magpangluthang?”

“Indi,” masinulub-on nga sabat ni Werner.

“Husto ka,” siling ni Waltraud. Nian, namangkot sia: “Nahibaluan mo bala kon ngaa ginaduaw ko kamo sang imo iloy kada semana? Ina bangod luyag sang mga Saksi ni Jehova nga buligan ang iban nga makighidait sa Dios kag sa ila mga isigkatawo.” Upod ang pahanugot sang iloy ni Werner, ginsilingan sia ni Waltraud: “Kon ihatag mo sa akon ang imo pusilpusil, ihaboy ko ini, kag ginapangako ko nga hatagan ko ikaw sing isa ka taraktarak.”

Ginhatag sa iya ni Werner ang iya pusilpusil. Apat ka semana nga naghulat si Werner, kag nag-abot gid man ang iya bag-o nga hampanganan​—⁠isa ka taraktarak nga kahoy, nga malipayon gid niya nga ginbaton.

Nagahinguyang ka bala sing tion sa pagpakigsugilanon sa imo kabataan, kag nagatinguha nga malab-ot ang ila tagipusuon agod nga mapahulag sila nga ihaboy ang ila mga hampanganan nga kaangay sa mga hinganiban sa inaway? Kon amo, ginatudluan mo sila sing isa ka leksion nga makabulig sa ila sa bug-os nila nga kabuhi.