Si Jehova Nagahanas sing mga Manugbantay Para sa Iya Panong

“Si Jehova nagahatag sing kaalam; gikan sa iya baba nagagua ang ihibalo kag paghantop.”​—⁠HULUBATON 2:6.

1, 2. Ngaa ginalab-ot sang bawtismado nga mga lalaki ang dugang pa nga responsibilidad sa kongregasyon?

“MALIPAYON gid ako sang gintangdo ako subong isa ka gulang,” siling ni Nick, nga nag-alagad subong manugtatap sa sulod sang pito ka tuig. “Ginakabig ko ini nga pribilehiyo subong isa ka kahigayunan nga mapasangkad ang akon pag-alagad kay Jehova. Ginabatyag ko nga may utang ako nga kabalaslan sa tanan nga ginhimo niya para sa akon. Luyag ko man buligan ang mga miembro sang kongregasyon tubtob sa bug-os ko nga masarangan, subong sang pagbulig man sang mga gulang sa akon.” Apang, bisan pa malipayon sia nagabatyag man sia sing kabalaka. “Sanglit wala pa ako mag-30 anyos sang gintangdo ako,” padayon ni Nick, “nagakabalaka ako nga kulang ako sing kinahanglanon nga kalantip​—⁠ang paghantop kag kaalam​—⁠sa pagtatap sing epektibo sa kongregasyon.”

² Ang mga ginatangdo ni Jehova sa pagtatap sa iya panong may madamo gid nga rason sa pagkalipay. Ginpahanumdom ni apostol Pablo ang mga gulang sa Efeso sang isa ka rason sang ginkutlo niya ang ginsiling ni Jesus: “May kapin nga kalipay sa paghatag sangsa pagbaton.” (Binuhatan 20:35) Ang pag-alagad subong isa ka ministeryal nga alagad ukon gulang nagaaman sing dugang pa nga kahigayunan sa bawtismado nga mga lalaki nga maghatag kay Jehova kag sa kongregasyon. Halimbawa, ang mga ministeryal nga alagad nagapanghikot upod sa mga gulang. Ginaatipan man sining mga ministeryal nga alagad ang madamong iban pa nga hilimuon nga nagaubos sing tion apang tuman ka importante. Ining mga utod nga lalaki ginapahulag sang ila gugma sa Dios kag sa isigkatawo nga himuon ining mapuslanon nga pag-alagad.​—⁠Marcos 12:​30, 31.

3. Ngaa mahimo magpangalag-ag ang iban sa paglab-ot sa mga pribilehiyo sa kongregasyon?

³ Kamusta naman ang isa ka Cristianong lalaki nga nagapangalag-ag sa paglab-ot sa pribilehiyo nga mangin ministeryal nga alagad kag sa ulihi mangin isa ka gulang kay nagabatyag sia nga di-sangkol? Kaangay ni Nick, mahimo nga nagakabalaka sia nga wala sa iya ang kinahanglanon nga mga kalantip agod mangin isa ka epektibo nga manugbantay. Subong isa ka bawtismado nga utod nga lalaki, nagabatyag ka man bala sing subong sini? Makatarunganon lang ina nga pagkabalaka. Ang gintangdo nga mga manugbantay may salabton kay Jehova sa ila pagpakig-angot sa panong. Si Jesus nagsiling: “Ang tagsatagsa nga ginhatagan sing madamo, madamo ang pangayuon sa iya; kag ang isa nga gintugyanan sang mga tawo sing madamo, labi pa sangsa kinaandan ang pangayuon nila sa iya.”​—⁠Lucas 12:48.

4. Paano ginabuligan ni Jehova ang mga ginatangdo niya sa pagtatap sa iya mga karnero?

⁴ Ginapaabot bala ni Jehova sa ginatangdo niya nga mga ministeryal nga alagad kag mga gulang nga pas-anon nila ang dugang nga lulan nga sila lang? Sa baylo, nagahatag sia sing praktikal nga bulig nga magapaposible sa ila indi lamang sa paglandas kundi nga mangin madinalag-on man. Subong ginbinagbinag sa nagligad nga artikulo, ginhatagan sila ni Jehova sang iya balaan nga espiritu, nga ang mga bunga sini nagabulig sa ila sa pag-atipan sing mainayuhon sa mga karnero. (Binuhatan 20:28; Galacia 5:​22, 23) Dugang pa, ginahatagan sila ni Jehova sing kaalam, ihibalo, kag paghantop. (Hulubaton 2:6) Paano niya ginahimo ini? Binagbinagon naton ang tatlo ka paagi nga ginahanas ni Jehova ang mga indibiduwal nga ginatangdo niya sa pagtatap sa iya mga karnero.

 Ginhanas sang Eksperiensiado nga mga Manugbantay

5. Ngaa epektibo nga mga manugbantay sanday Pedro kag Juan?

⁵ Sang nag-atubang sanday apostol Pedro kag Juan sa Sanhedrin, ang mangin-alamon sa kalibutan nga mga hukom sadtong korte nagkabig sa ila nga mga “wala sing tinun-an kag kinaandan lamang.” Kay man, bisan pa makabasa sila kag makasulat, wala sila makabaton sing bisan anong rabinikong paghanas sa pagtuon sa Kasulatan. Apang, ginpamatud-an nanday Pedro kag Juan kag sang iban pa nga mga disipulo nga epektibo sila nga mga manunudlo, amo nga napahulag ang madamo sadtong nagpamati sa ila nga mangin tumuluo. Paano ining kinaandan lamang nga mga tawo nangin maayo gid nga mga manunudlo? Pagkatapos nga nagpamati kanday Pedro kag Juan, ang korte ‘nagkilala sa ila nga kaupod sila anay ni Jesus.’ (Binuhatan 4:1-4, 13) Matuod, nabaton nila ang balaan nga espiritu. (Binuhatan 1:8) Apang maathag man​—⁠bisan sa bulag sa espirituwal nga mga hukom​—⁠nga ginhanas ni Jesus ini nga mga tawo. Samtang yara sia sa duta upod sa ila, gintudluan ni Jesus ang mga apostoles indi lamang sa pagtipon sa tulad karnero nga mga tawo kundi sa pagbantay man sa ila kon mangin bahin na sila sang panong.​—⁠Mateo 11:29; 20:24-28; 1 Pedro 5:4.

6. Anong halimbawa ang ginpahamtang nanday Jesus kag Pablo sa paghanas sa iban?

⁶ Pagkatapos nga ginbanhaw si Jesus, padayon niya nga ginhanas yadtong gintangdo subong mga manugbantay. (Bugna 1:⁠1; 2:1⁠–​3:22) Halimbawa, sia gid ang nagpili kay Pablo kag naghanas sa iya. (Binuhatan 22:6-10) Gin-apresyar gid ni Pablo ang paghanas nga nabaton niya kag ginpaalinton niya sa iban nga mga gulang ang iya natun-an. (Binuhatan 20:17-35) Halimbawa, naghugod sia sing madamo nga tion kag panikasog agod hanason si Timoteo nga mangin “manugpangabudlay” sa pag-alagad sa Dios, “nga wala sing dapat ikahuya.” (2 Timoteo 2:15) Naglambo ang suod nga pag-abyanay sa sini nga mga lalaki. Antes sini, si Pablo nagsulat kay Timoteo: “Subong nga anak upod sa amay nag-alagad sia upod ko sa kauswagan sang maayong balita.” (Filipos 2:22) Wala gid gintinguhaan ni Pablo nga mangin disipulo niya si Timoteo ukon ang bisan sin-o. Sa baylo, ginpalig-on niya ang mga masigkatumuluo nga mangin ‘manug-ilog sa iya, subong nga sia man kay Cristo.’​—⁠1 Corinto 11:1.

7, 8. (a) Anong eksperiensia ang nagapakita nga kon ilugon sang mga gulang sanday Jesus kag Pablo maayo ang mga resulta? (b) San-o dapat sugdan sang mga gulang ang paghanas sa potensial nga mga ministeryal nga alagad kag mga gulang?

⁷ Bilang pag-ilog kanday Jesus kag Pablo, ang eksperiensiado nga mga manugbantay nagahimo sing inisyatibo agod hanason ang bawtismado nga mga utod nga lalaki, nga may maayo man nga mga resulta. Binagbinaga ang eksperiensia ni Chad. Nagdaku sia sa isa ka pamilya nga nabahinbahin sa relihion apang sining karon lang gintangdo sia subong isa ka gulang. Sia nagsiling: “Sa sulod sang mga tinuig, ginbuligan ako sang pila ka eksperiensiado nga mga gulang nga mag-uswag sa espirituwal. Bangod indi tumuluo ang akon amay, ining mga gulang nagpakita sing personal nga interes sa akon kag nangin espirituwal nga mga amay sila sa akon. Naghinguyang sila sing tion agod hanason ako sa ministeryo, kag sang ulihi, ang isa sining mga gulang naghanas sa akon sa pag-atipan sa akon nabaton nga asaynment sa kongregasyon.”

⁸ Subong sang ginapakita sang eksperiensia ni Chad, ginahanas na sang mahinantupon nga mga manugbantay ang potensial nga mga ministeryal nga alagad kag mga gulang antes pa sila mangin kalipikado sa sinang mga pribilehiyo. Ngaa? Bangod ginasugo sang Biblia nga dapat nalab-ot na lunsay sang mga ministeryal nga alagad kag mga gulang ang mataas nga talaksan sa moral kag espirituwal antes sila itangdo agod mag-alagad. Dapat “tilawan sila anay kon bagay sila.”​—⁠1 Timoteo 3:1-10.

9. Ano ang responsibilidad sang hamtong nga mga manugbantay, kag ngaa?

⁹ Kon ang bawtismado nga mga utod nga lalaki pagatilawan, nagakaigo lamang nga hanason anay sila. Sa pag-ilustrar: Kon ang isa ka estudyante sa eskwelahan pangabayon nga magkuha sing isa ka mabudlay nga eksaminasyon nga wala sing espesipiko nga paghanas sang mga manunudlo, makapasar ayhan ang estudyante? Mahimo gid nga indi sia makapasar. Busa, kinahanglanon ang paghanas. Apang, ang maukod nga mga manunudlo wala lamang nagahanas sa mga estudyante agod makapasar sa isa ka eksaminasyon kundi nagahanas man sa ila nga gamiton ang ihibalo nga ila natigayon. Sing kaanggid, ginabuligan sang maukod nga mga gulang ang bawtismado nga mga utod nga lalaki nga mapalambo  ang mga kinaiya nga kinahanglanon sa isa ka gintangdo nga lalaki paagi sa pag-aman sa ila sing espesipiko nga paghanas. Ginahimo nila ini indi lamang agod buligan nga matangdo ining mga utod nga lalaki kundi agod matatap man nila sing nagakaigo ang panong. (2 Timoteo 2:2) Huo, dapat himuon sang bawtismado nga mga utod nga lalaki ang ila bahin kag magpangabudlay sing lakas agod malab-ot ang mga kalipikasyon nga kinahanglanon sa isa ka ministeryal nga alagad ukon gulang. (Tito 1:5-9) Apang, paagi sa kinabubut-on nga paghanas sa mga luyag maglab-ot sing responsibilidad sa kongregasyon, mabuligan sila sang eksperiensiado nga mga manugbantay nga mag-uswag sing madasig.

10, 11. Paano mahanas sang mga manugbantay ang iban para sa dugang pa nga pribilehiyo?

¹⁰ Sing espesipiko, paano mahanas sang eksperiensiado nga mga manugbantay ang iban sa pag-atipan sa mga pribilehiyo sa kongregasyon? Una sa tanan, paagi sa pagpakita sing interes sa mga utod nga lalaki sa kongregasyon​—⁠regular nga pagpanghikot upod sa ila sa ministeryo sa latagon kag pagbulig sa ila sa pagpauswag sang ila ikasarang sa paggamit sing “matadlong sang pulong sang kamatuoran.” (2 Timoteo 2:15) Ginasugid sang hamtong nga mga manugbantay sa sining mga utod nga lalaki ang mga kalipay nga matigayon sa pag-alagad sa iban kag ang kaayawan nga nabaton nila mismo gikan sa pagpahamtang kag paglab-ot sing espirituwal nga mga tulumuron. Nagahatag man sila sing espesipiko nga mga panugda kon paano mag-uswag ang isa ka utod nga lalaki nga mangin ‘halimbawa sa panong.’​—⁠1 Pedro 5:​3, 5.

¹¹ Kon matangdo na ang isa ka utod nga lalaki subong isa ka ministeryal nga alagad, ang maalamon nga mga manugbantay padayon nga nagahanas sa iya. Si Bruce, nga dinekada na nga nagapangalagad subong gulang, nagsiling: Naluyagan ko gid maghinun-anon upod sa bag-o nga ministeryal nga alagad kag repasuhon sa iya ang mga instruksion nga ginbalhag sang matutom kag mainandamon nga ulipon. Ginabasa man namon ang mga giya tuhoy sa iya espesipiko nga mga asaynment, kag nian luyag ko gid manghikot upod sa iya tubtob nga mangin pamilyar na sia sa iya katungdanan.” Samtang nagadugang ang eksperiensia sang isa ka ministeryal, mahimo man sia hanason sa pagbantay nga hilikuton. “Kon updon ko ang ministeryal sa pagduaw sa pagbantay,” padayon ni Bruce, “ginabuligan ko sia sa pagpili sing espesipiko nga mga teksto nga makapalig-on kag makapahulag sa isa ka indibiduwal ukon sa pamilya nga amon duawon. Ang pagtuon kon paano gamiton ang Kasulatan sa paagi nga makatandog sa tagipusuon importante agod ang ministeryal mangin epektibo nga manugbantay.”​—⁠Hebreo 4:12; 5:14.

12. Paano ang eksperiensiado nga mga manugbantay nagahanas sa bag-uhan nga mga gulang?

¹² Ang bag-uhan nga mga manugbantay makabenepisyo man sing daku gikan sa dugang pa nga paghanas. Si Nick, nga ginsambit kaina, nagsiling: “Ang paghanas nga akon natigayon gikan sa duha ka may edad na nga manugtatap nakabulig gid. Ini nga mga utod nakahangop gid kon paano tatapon ang pila ka butang. Masami nga ginapamatian gid nila ako kag ginabinagbinag sing maayo ang akon pagtamod​—⁠bisan pa nga wala sila nagaugyon sa sini. Madamo ako sing natun-an gikan sa pagpanilag sa mapainubuson kag matinahuron nga pagpakig-angot nila sa mga kauturan sa kongregasyon. Ginpatudok sining mga gulang sa akon nga dapat gamiton ang Biblia sing malantipon kon nagatatap sing mga problema ukon nagapalig-on.”

Ginhanas sang Pulong sang Dios

13. (a) Ano ang kinahanglanon sang isa ka utod nga lalaki agod mangin epektibo nga manugbantay? (b) Ngaa nagsiling si Jesus: “Ang akon ginatudlo indi akon”?

¹³ Sa pagkamatuod, ang Pulong sang Dios, ang Biblia, nagaunod sing mga kasuguan, mga prinsipio, kag mga halimbawa nga kinahanglanon sang isa ka manugbantay agod mangin ‘lubos ang ikasarang, nga nasangkapan sing bug-os para sa tagsa ka maayong buhat.’ (2 Timoteo 3:​16, 17) Mahimo nga may mataas nga edukasyon ang isa ka utod nga lalaki, apang ang iya ihibalo sa Kasulatan kag kon  paano niya ini ginaaplikar amo ang magabulig sa iya nga mangin epektibo nga manugbantay. Binagbinaga ang halimbawa ni Jesus. Sia ang may pinakamadamo sing nahibaluan, ang labing mahinantupon, kag ang pinakamaalam nga espirituwal nga manugbantay nga nagkabuhi sa duta; apang, wala gid sia nagsalig sa iya kaugalingon nga kaalam sang nagpanudlo sia sa mga karnero ni Jehova. Nagsiling sia: “Ang akon ginatudlo indi akon, kundi iya sang nagpadala sa akon.” Ngaa ginhimaya ni Jesus ang iya langitnon nga Amay? Nagpaathag sia: “Sia nga nagapamulong gikan sa iya lamang kaugalingon nagapangita sang iya kaugalingon nga himaya.”​—⁠Juan 7:​16, 18.

14. Paano ginalikawan sang mga manugbantay ang paghimaya sa ila kaugalingon?

¹⁴ Ang mainunungon nga mga manugbantay nagalikaw sa paghimaya sa ila kaugalingon. Ginapasad nila ang ila laygay kag pagpalig-on, indi sa ila kaugalingon nga kaalam, kundi sa Pulong sang Dios. Nahangpan nila nga ang katungdanan sang isa ka manugbantay amo ang pagbulig sa mga karnero nga matigayon ‘ang hunahuna ni Cristo’ indi ang hunahuna sang mga gulang. (1 Corinto 2:14-16) Halimbawa, kamusta kon ang isa ka gulang nga nagabulig sa mag-asawa nga may problema sa ila pag-asawahay maglaygay pasad sa iya kaugalingon nga eksperiensia sa baylo nga sa mga prinsipio sang Biblia kag impormasyon nga ginabalhag sang “matutom kag mainandamon nga ulipon”? (Mateo 24:45) Ang iya laygay mahimo nga naimpluwensiahan sang lokal nga mga kustombre kag suno lamang sa iya limitado nga ihibalo. Matuod, indi tanan nga kustombre malain, kag mahimo nga eksperiensiado ang gulang. Apang ang karnero makabenepisyo sing labi gid kon palig-unon sila sang mga manugbantay sa pagpamati sa tingog ni Jesus kag sa mga pinamulong ni Jehova sa baylo nga sa panghunahuna sang mga tawo ukon sa dikta sang lokal nga kustombre.​—⁠Salmo 12:⁠6; Hulubaton 3:​5, 6.

Ginhanas sang “Matutom kag Mainandamon nga Ulipon”

15. Anong sugo ang ginhatag ni Jesus sa “matutom kag mainandamon nga ulipon,” kag ano ang isa ka rason nga nangin madinalag-on ang ulipon nga klase?

¹⁵ Ang mga manugbantay subong nanday apostol Pedro, Juan, kag Pablo mga katapo tanan sang grupo nga ginlaragway ni Jesus subong ang “matutom kag mainandamon nga ulipon.” Ining ulipon nga klase ginahuman sang hinaplas sang espiritu nga mga kauturan ni Jesus sa duta, nga may paglaum nga maggahom kaupod ni Cristo sa langit. (Bugna 5:​9, 10) Sa tion sining katapusan nga mga adlaw sini nga sistema, nagdiutay ang kadamuon sang kauturan ni Cristo sa duta. Apang, ang hilikuton nga ginsugo ni Jesus sa ila nga himuon​—⁠ang pagbantala sing maayong balita sang Ginharian antes mag-abot ang katapusan​—⁠labi pa gid nga nagasangkad karon. Bisan pa amo sini, ang ulipon nga klase nangin madinalag-on gid! Ngaa? Sa pila ka kasangkaron, bangod kay ginhanas nila ang mga katapo sang “iban nga mga karnero” agod magbulig sa ila sa pagbantala kag pagpanudlo nga hilikuton. (Juan 10:16; Mateo 24:14; 25:40) Sa karon, ang daku nga bahin sang hilikuton ginatuman sining mainunungon nga grupo.

16. Paano ginahanas sang ulipon nga klase ang gintangdo nga mga lalaki?

 ¹⁶ Paano ginaaman sang ulipon nga klase ini nga paghanas? Sang unang siglo, ang tiglawas sang ulipon nga klase gin-awtorisahan sa paghanas kag pagtangdo sa mga manugtatap sa mga kongregasyon, kag ining mga manugtatap amo naman ang naghanas sa mga karnero. (1 Corinto 4:17) Amo man sa karon. Ang Nagadumala nga Hubon​—⁠ang gamay nga grupo sang hinaplas nga mga gulang nga nagatiglawas sa ulipon nga klase​—⁠nagaawtorisar sa mga tiglawas sini sa paghanas kag pagtangdo sa mga ministeryal nga alagad kag mga gulang sa linibolibo ka kongregasyon sa bug-os nga kalibutan. Dugang pa, ang Nagadumala nga Hubon nagaorganisar sing mga eskwelahan agod hanason ang mga miembro sang Komite sang Sanga, mga nagalakbay nga manugtatap, mga gulang, kag mga ministeryal nga alagad kon ano ang pinakamaayo nga paagi sa pag-atipan sa mga karnero. Ang dugang pa nga panuytoy ginahatag paagi sa mga sulat, sa mga artikulo nga ginabalhag sa Ang Lalantawan, kag paagi sa iban pa nga mga publikasyon, subong sang Organisado sa Paghimo Sang Kabubut-on ni Jehova.⁠ *

17. (a) Paano ginpakita ni Jesus ang pagsalig sa ulipon nga klase? (b) Paano ginapakita sang espirituwal nga mga manugbantay nga may pagsalig sila sa ulipon nga klase?

¹⁷ Daku gid ang pagsalig ni Jesus sa ulipon nga klase amo nga gintangduan niya ini sang “tanan niya nga pagkabutang”​—⁠nga amo, ang tanan niya nga espirituwal nga mga intereses sa duta. (Mateo 24:47) Ang gintangdo nga mga manugbantay napamatud-an nga sila man nagasalig sa ulipon nga klase paagi sa pag-aplikar sang mga panuytoy nga ila nabaton sa Nagadumala nga Hubon sini. Sa pagkamatuod, kon ginahanas sang mga manugbantay ang iban, kon ginatugutan nila ang ila kaugalingon nga hanason sang Pulong sang Dios, kag kon ginaaplikar nila ang paghanas nga ginahatag sang ulipon nga klase, ginapasanyog nila ang paghiusa sa tunga sang panong. Mapinasalamaton gid kita nga si Jehova naghanas sing mga lalaki nga tudok nga nagaulikid sa tagsa ka miembro sang Cristianong kongregasyon!

[Nota]

Ano ang Imo Sabat?

• Paano ginahanas sang hamtong sa espirituwal nga mga manugbantay ang iban?

• Ngaa wala nagatudlo ang mga manugbantay pasad sa ila kaugalingon nga mga panghunahuna?

• Paano kag ngaa nagapakita sing pagsalig ang mga manugbantay sa ulipon nga klase?

[Mga Pamangkot sa Pagtinuon]

[Mga retrato sa pahina 25]

Ang Cristianong mga gulang nagahanas sa pamatan-on nga mga lalaki sa kongregasyon

[Mga retrato sa pahina 26]

“Ang matutom kag mainandamon nga ulipon” nagahatag sing bastante nga paghanas sa mga gulang