Sunda ang Huwaran ni Jesus kag Magpakita sing Kabalaka sa mga Imol

ANG kaimulon kag pagpigos nagaluntad nga halos kadungan sang mga tawo. Bisan pa ang Kasuguan anay sang Dios sa Israel nagtinguha sa pag-amlig sa mga imol kag sa pagpahaganhagan sang ila pag-antos, ina nga Kasuguan masami nga wala gintuman. (Amos 2:6) Ginpakamalaut ni manalagna Ezequiel ang pagtratar sa mga imol. Nagsiling sia: “Ang katawhan sang duta naghimo sang ila ginpahito nga pagpangdaya kag nangawat paagi sa pagpang-agaw, kag ginpintasan nila ang mga nagaantos kag ang mga imol, kag ang pangayaw gindayaan nila nga wala sing katarungan.”​—⁠Ezequiel 22:29.

Indi tuhay ang kahimtangan sang si Jesus yari sa duta. Ang relihioso nga mga lider wala gid nagpakita sing kabalaka sa mga imol kag mga kubos. Ang relihioso nga mga lider ginlaragway subong “mahigugmaon sa kuarta” nga ‘nagpanguha sang pagkabutang sang mga balo nga babayi’ kag mas nabalaka nga padayunon ang ila mga tradisyon sangsa atipanon ang mga tigulang kag mga kubos. (Lucas 16:14; 20:47; Mateo 15:​5, 6) Talalupangdon nga sa parabola ni Jesus tuhoy sa maayo nga Samaritano, naglikaw sa pihak sang dalan ang isa ka saserdote kag isa ka Levinhon, sang makita nila ang isa ka may samad nga tawo, sa baylo nga buligan sia.​—⁠Lucas 10:30-37.

Nagpakita si Jesus sing Kabalaka sa mga Imol

Ginapakita sang mga rekord sang Ebanghelyo tuhoy sa kabuhi ni Jesus nga nahangpan gid niya ang mga kabudlayan sang mga imol kag nahanuklog gid sia sa ila mga kinahanglanon. Bisan pa nagakabuhi anay si Jesus sa langit, gin-uba niya ang iya kaugalingon, nangin tawo sia, kag ‘nangin imol tungod  sa aton.’ (2 Corinto 8:9) Sang makita ni Jesus ang kadam-an, “naluoy sia sa ila, kay ginpanitan sila kag nag-alaplaag kaangay sa mga karnero nga wala sing manugbantay.” (Mateo 9:36) Ang rekord tuhoy sa imol nga balo nga babayi nagapakita nga nahamuot si Jesus, indi sa daku nga amot sang mga manggaranon, nga naghulog “gikan sa ila mga sobra,” kundi sa diutay nga amot sang imol nga balo nga babayi. Natandog ang iya tagipusuon sa ginhimo sang imol nga balo nga babayi kay “gikan sa iya kinawad-on naghulog [sia] sang iya bug-os nga palangabuhian.”​—⁠Lucas 21:4.

Wala lamang si Jesus nagbatyag sing kaluoy sa mga imol kundi nagpakita man sia sing personal nga interes sa ila mga kinahanglanon. Sia kag ang iya mga apostoles may yara pundo nga gingamit man nila sa paghatag sa imol nga mga Israelinhon. (Mateo 26:6-9; Juan 12:5-8; 13:29) Ginpalig-on ni Jesus ang mga tawo nga luyag mangin mga sumulunod niya nga kilalahon ang ila obligasyon nga magbulig sa mga kubos. Ginsilingan niya ang isa ka manggaranon nga pamatan-on nga manugdumala: “Ibaligya ang tanan mo nga pagkabutang kag ihatag ini sa imol nga mga tawo, kag makatigayon ka sing bahandi sa langit; kag kari mangin sumulunod ko ikaw.” Ang katunayan nga indi luyag sini nga tawo nga ipanghatag ang iya mga pagkabutang nagpakita nga ang iya gugma sa manggad mas labaw sangsa iya gugma sa Dios kag sa isigkatawo. Sa amo, wala sa iya ang mga kinaiya nga kinahanglanon agod mangin isa ka disipulo ni Jesus.​—⁠Lucas 18:​22, 23.

Ang mga Sumulunod ni Cristo Nabalaka sa mga Imol

Sang napatay na si Jesus, nagpadayon gihapon ang mga apostoles kag ang iban pa nga mga sumulunod ni Cristo sa pagpakita sing kabalaka sa mga imol nga yara sa tunga nila. Sang mga 49 C.⁠E., nakigsapol si apostol Pablo kanday Santiago, Pedro, kag Juan kag ginhambalan nila ang buluhaton nga nabaton niya gikan kay Ginuong Jesucristo nga ibantala ang maayong balita. Nagsugot sila nga sanday Pablo kag Bernabe dapat magkadto sa “mga pungsod,” nga ginatumod ang mga Gentil sa ila pagbantala. Apang, ginpalig-on ni Santiago kag sang iya mga kaupod sanday Pablo kag Bernabe nga “dumdumon ang mga imol.” Kag amo sina ang ‘hanuot nga gintinguhaan nga himuon’ ni Pablo.​—⁠Galacia 2:7-10.

Sa tion sang paggahom ni Emperador Claudio, isa ka grabe gid nga tiggulutom ang natabo sa nanuhaytuhay nga bahin sang Romanong Emperyo. Bangod sini, ang mga Cristiano sa Antioquia “namat-od . . .  ang tagsatagsa sa ila suno sa iya masarangan, [nga] mag-alagad paagi sa pagpadala sing bulig sa mga kauturan nga nagapuyo sa Judea; kag ginhimo nila ini kag ginpadala ini sa mga gulang nga lalaki paagi kay Bernabe kag kay Saulo.”​—⁠Binuhatan 11:28-30.

Nahangpan man sang matuod nga mga Cristiano karon nga dapat magpakita ang mga sumulunod ni Jesus sing kabalaka sa mga imol kag mga kubos, ilabi na gid sa mga masigkatumuluo. (Galacia 6:10) Gani, nagapakita sila sing matuod nga kabalaka para sa materyal nga mga kinahanglanon sang mga nadingutan sini. Halimbawa, sang 1998, grabe nga tigpalamangag ang natabo sa daku nga bahin sang naaminhan-sidlangan sang Brazil. Napierde sang tigpalamangag ang pananom nga mga humay, mga balatong, kag mga mais, nga ginbangdan sang lapnag nga tiggulutom​—⁠ang pinakagrabe sa 15 ka tuig. Sa iban nga mga duog, nag-iwat gani bisan ang ilimnon nga tubig. Gilayon nga nag-organisar ang mga Saksi ni Jehova sa iban nga mga bahin sang pungsod sing mga relief committe, kag sa sulod lamang sang malip-ot nga tion, nakatipon sila sing mga tonelada nga pagkaon kag nabayaran ang gasto para sa pagdul-ong sini nga mga suplay.

Ang mga Saksi nga nagsuportar sang mga panikasog sa paghatag sing bulig nagsulat: “Malipayon  gid kami nga nakabulig kami sa amon mga kauturan, ilabi na bangod napat-od namon nga ginpahalipay namon ang tagipusuon ni Jehova. Wala gid namon nalipatan ang ginasiling sang Santiago 2:​15, 16.” Ini nga mga bersikulo sa Biblia nagasiling: “Kon ang isa ka utod nga lalaki ukon isa ka utod nga babayi hubo kag kulang sing kalan-on nga nagakaigo para sa adlaw, apang may isa sa inyo nga nagasiling sa ila: ‘Lakat kamo sa paghidait, magpainit-init kag magpakabusog,’ apang wala ninyo sila ginahatagan sing mga kinahanglanon para sa ila lawas, ano ang kapuslanan sini?”

Sa isa sa mga kongregasyon sang mga Saksi ni Jehova sa siudad sang São Paulo, ang isa ka mapainubuson kag makugi nga Saksi nga pigado masami nga nagahimakas gid agod may ibuhi lang sa iya kaugalingon. Nagsiling sia: “Bisan pa imol lang ako, ang mensahe sang Biblia naghatag sing matuod nga katuyuan sa akon kabuhi. Ambot lang kon ano ang natabo sa akon kon wala ako mabuligan sang akon mga masigka-Saksi.” Uluperahan sadto ining mapisan nga Cristianong babayi apang wala sia sing inugbayad sa ospital. Sa sining partikular nga tion, ang Cristianong mga kauturan sa kongregasyon amo ang nagbayad sa operasyon. Ang pagbulig sa bululigan nga mga masigka-Cristiano ginahimo sang matuod nga mga Cristiano sa bug-os nga kalibutan.

Apang, maathag nga walay sapayan kon daw ano ka makalilipay ini nga mga eksperiensia, indi madula sini nga sahi sang sinsero nga mga panikasog ang kaimulon. Bisan pa nagmadinalag-on ang gamhanan nga mga gobierno kag ang dalagku nga internasyonal nga mga ahensia sa paghatag sing bulig, wala gihapon madula ang kaimulon nga isa ka madugay na nga problema. Busa, nagautwas ang pamangkot, Ano ang pat-od nga solusyon sa kaimulon kag sa iban pa nga mga problema nga nagapaantos sa katawhan?

Ang mga Panudlo sang Biblia Nagahatag sing Dayon nga Bulig

Ang mga rekord sang Ebanghelyo nagasugid nga si Jesucristo regular nga naghimo sing maayo nga mga buhat para sa mga imol ukon may iban pa nga mga kinahanglanon. (Mateo 14:14-21) Apang, ano nga hilikuton ang gin-una niya? Sang isa ka tion, pagkatapos maghinguyang sing pila ka tion sa pagbulig sa mga nagakinahanglan, nagsiling si Jesus sa iya mga disipulo: “Makadto kita sa iban nga duog, sa malapit nga mga banwa, agod makabantala man ako didto.” Ngaa gin-untatan anay ni Jesus ang iya ginabuhat para sa mga balatianon kag mga kubos agod padayunon liwat ang iya pagbantala nga hilikuton? Nagpaathag sia: “Tungod sini [buot silingon, sa pagbantala] ginpadala ako.” (Marcos 1:​38, 39; Lucas 4:43) Bisan pa importante kay Jesus ang paghimo sing maayo nga mga buhat para sa mga tawo nga nagakinahanglan sini, ang panguna nga misyon niya amo ang pagbantala tuhoy sa Ginharian sang Dios.​—⁠Marcos 1:14.

Sanglit ginalaygayan sang Biblia ang mga Cristiano nga ‘sundon sing maayo ang mga tikang’ ni Jesus, may maathag nga giya ang mga Cristiano karon kon ano ang ila dapat unahon may kaangtanan sa ila panikasog nga buligan ang iban. (1 Pedro 2:21) Kaangay ni Jesus, ginabuligan nila ang bululigan nga mga tawo. Apang, kaangay man ni Jesus, ang pinakaimportante sa ila amo ang ila pagpanudlo sing mensahe sang Biblia tuhoy sa maayong balita sang Ginharian sang Dios. (Mateo 5:14-16; 24:14; 28:​19, 20) Ngaa dapat gid unahon ang pagbantala sing mensahe sang Pulong sang Dios sangsa iban nga mga paagi sa pagbulig sa iban?

Ginapakita sang mga eksperiensia sa kabuhi gikan sa bug-os nga kalibutan nga kon mahangpan kag ginasunod sang mga tawo ang praktikal nga  laygay sang Biblia, mas masarangan nila nga atubangon ang matag-adlaw nga mga problema sang kabuhi, lakip ang kaimulon. Dugang pa, ang mensahe sang Biblia tuhoy sa Ginharian sang Dios nga ginabantala sang mga Saksi ni Jehova karon nagahatag sa katawhan sing paglaum sa palaabuton​—⁠isa ka paglaum nga nagahimo sang kabuhi nga takus ikabuhi, bisan pa sa idalom sang mabudlay gid nga mga kahimtangan. (1 Timoteo 4:8) Ano ina nga paglaum?

Ang Pulong sang Dios nagapasalig sa aton tuhoy sa aton palaabuton: “May yara bag-ong mga langit kag bag-ong duta nga ginahulat naton suno sa iya [sang Dios] saad, kag sa sini magapuyo ang pagkamatarong.” (2 Pedro 3:13) Kon ang Biblia nagasambit sang “duta,” nagapatuhoy ini kon kaisa sa katawhan nga nagapuyo sa duta. (Genesis 11:1) Gani ang matarong nga “bag-ong duta” nga ginasaad nga maabot amo ang katilingban sang katawhan nga nahamut-an sang Dios. Ang Pulong sang Dios nagasaad pa nga sa idalom sang paggahom ni Cristo, ang mga tawo nga nahamut-an sang Dios makabaton sing padya nga kabuhi nga walay katapusan kag magakabuhi sing makaalayaw sa isa ka dutan-on nga paraiso. (Marcos 10:30) Inang matahom nga palaabuton sarang matigayon sang tanan, lakip ang mga imol. Sa sina nga “bag-ong duta,” ang problema nga kaimulon malubad na sing dayon.

[Kahon/​Retrato sa pahina 7]

PAANO NI JESUS ‘LUWASON ANG IMOL’?​—⁠Salmo 72:12

KATARUNGAN: “Magahukom sia sang mga nasit-an sang katawhan, luwason niya ang mga anak nga lalaki sang imol, kag dugmukon niya ang madaya.” (Salmo 72:4) Kon maggahom na si Cristo sa duta, makatigayon ang tanan sing katarungan. Wala na sing kagarukan, nga isa ka kalautan nga nagdala sing kaimulon sa madamo nga pungsod nga manggaranon kuntani.

PAGHIDAIT: “Sa iya mga adlaw magalambo ang matarong, kag ang bugana nga paghidait tubtob nga wala na ang bulan.” (Salmo 72:7) Ang madamo nga kaimulon sa kalibutan resulta sang pag-ilinaway sang mga tawo. Paluntaron ni Cristo ang himpit nga paghidait sa duta, sa amo madula na ang isa sa daku nga mga kabangdanan sang kaimulon.

KAAWA: “Magakaawa sia sa kubos kag imol, kag luwason niya ang mga kalag sang mga imol. Tubson niya ang ila kalag gikan sa pagpigos kag kasingki, kag ang ila dugo mangin bilidhon sa iya itululok.” (Salmo 72:12-14) Ang mga kubos, mga imol, kag ginapigos mangin bahin sang isa ka malipayon nga pamilya sang tawo, nga nahiusa sa idalom sang pagpanguna ni Hari Jesucristo.

KAHAMUNGAYAAN: “May bugana nga uyas sa duta.” (Salmo 72:16) Mangin hamungaya kag bugana ang materyal nga mga butang sa paggahom ni Cristo. Indi na magaantos ang katawhan sing kakulang sa pagkaon kag tiggulutom nga amo masami ang kabangdanan sang kaimulon karon.

[Retrato sa pahina 5]

Nagpakita si Jesus sing personal nga interes sa kinahanglanon sang mga imol

[Retrato sa pahina 6]

Ang mensahe sang Biblia nagahatag sing matuod nga paglaum