“Dapat Namon Tumanon ang Dios Subong Manuggahom sa Baylo sang mga Tawo”

“Ang Inaway Iya ni Jehova”

DUHA ka magkaaway nga hangaway ang nagaatubangay sa magtimbang nga bahin sang nalupyakan. Sa sulod sang 40 ka adlaw, ang mga Israelinhon nagakurog sa kahadlok samtang ginainsulto sila sang maisog nga mangangaway sang mga Filistinhon nga si Goliat.—1 Samuel 17:1-4, 16.

Ginhangkat ni Goliat ang mga Israelinhon: “Pili kamo nga sa inyo sing isa ka lalaki, kag padulhuga sia sa akon. Kon makasarang sia sa pagpakig-away sa akon kag makapatay sa akon, nian kami mangin inyo mga alagad. Apang kon ako magdaug sa iya kag magpatay sa iya, kamo naman mangin amon mga alagad, kag mag-alagad kamo sa amon. . . . Ginahangkat ko ang mga hangaway sang Israel sining adlaw. Hatagi ninyo ako sing isa ka lalaki, agod nga mag-away kami nga duha!”—1 Samuel 17:8-10.

Sang una nga panahon, kinaandan na para sa duha ka maisog nga mga mangangaway nga mag-away bilang tiglawas sang ila mga hangaway. Kon sin-o sa duha ang magadaug, ang kadalag-an mangin iya sang hangaway nga iya ginatiglawas. Apang ining nagapanghangkat sa Israel indi lamang isa ka ordinaryo nga soldado. Isa sia ka higante—isa ka masingki kag makahaladlok nga kaaway. Apang, bangod sang pagyaguta niya sa katawhan ni Jehova, gintalana na ni Goliat ang matabo sa iya.

Indi ini isa lamang ka inaway militar. Inaway ini ni Jehova kag sang mga dios sang mga Filistinhon. Sa baylo nga maisog nga pangunahan ang iya hangaway batok sa mga kaaway sang Dios, si Hari Saul sang Israel kinum-an sing kahadlok.—1 Samuel 17:11.

Isa ka Pamatan-on ang Nagsalig kay Jehova

Sa sining tion sang pagbantayanay, isa ka pamatan-on nga gintangdo na nga mangin hari sang Israel ang nagduaw sa iya mga utod sa hangaway ni Saul. Sia amo si David. Sang mabatian niya ang panghangkat ni Goliat, namangkot sia: “Sin-o bala ining Filistinhon nga di-sirkunsidado nga maghangkat sia sang mga hangaway sang Dios nga buhi?” (1 Samuel 17:26) Para kay David, si Goliat nagatiglawas sa mga Filistinhon kag sa ila mga dios. Bangod naakig sing makatarunganon, luyag ni David nga pangapinan ang ngalan ni Jehova kag ang Israel kag atubangon ang pagano nga higante. Apang si Hari Saul nagsiling: “Indi ka makasarang magsumpong sining Filistinhon sa pagpakig-away sa iya, kay ikaw pamatan-on pa kaayo.”—1 Samuel 17:33, Ang Biblia, PBS.

Magkatuhay gid ang pagtamod nanday Saul kag David! Para kay Saul, si David isa lamang ka bata nga manugbantay sang karnero nga luyag makig-away sa mapintas nga higante. Apang, para naman kay David, si Goliat isa lamang ka tawo nga nagapanghangkat sa Soberanong Ginuong Jehova. Maisog si David bangod nagapati gid sia nga indi magatugot ang Dios nga ang nagayaguta sang Iya ngalan kag sang Iya katawhan indi masilutan. Samtang nagapahambog si Goliat sang iya kusog, nagasalig naman si David kay Jehova, sa amo gintamod niya ang kahimtangan suno sa pagtamod sang Dios.

“Ako Nagakari sa Imo sa Ngalan ni Jehova”

Ang pagtuo ni David may mapag-on nga basihan. Nadumduman niya nga ginbuligan sia sang Dios agod maluwas ang iya karnero gikan sa oso kag leon. Sigurado gid ang pamatan-on nga manugbantay sing karnero nga buligan man sia karon ni Jehova sa paglutos sining ginakahadlukan nga Filistinhon nga kaaway. (1 Samuel 17:34-37) Naarmasan lamang sing isa ka labyog kag lima ka mahining nga bato, si David naglakat sa pagpakig-away kay Goliat.

Ginbaton sang pamatan-on nga si David ining daw imposible nga hangkat paagi sa pagsandig sa  kusog nga ginaaman ni Jehova. Maisugon nga nagsiling sia sa Filistinhon: “Ikaw nagakari sa akon nga may espada kag may bangkaw kag may sumbiling, apang ako nagakari sa imo sa ngalan ni Jehova sang mga kasuldadusan, ang Dios sang mga hangaway sang Israel, nga imo ginyaguta. Sini nga adlaw si Jehova magatugyan sa imo sa akon kamot . . . Mahibaluan sang katawhan sa bug-os nga duta nga may nagaluntad nga Dios sang Israel. Kag mahibaluan sining bug-os nga katilingban nga si Jehova wala nagaluwas paagi sa espada kag sa bangkaw, kay ang inaway iya ni Jehova.”—1 Samuel 17:45-47.

Ano ang resulta? Ang inspirado nga rekord nagasiling: “Si David, paagi sa isa ka labyog kag isa ka bato, nangin mas makusog sangsa Filistinhon kag gintumba niya ang Filistinhon kag ginpatay sia; kag wala sing espada sa kamot ni David.” (1 Samuel 17:50) Wala sing espada sa iya kamot, apang ginsakdag gid sia ni Jehova nga Dios. a

Husto gid nga si David nagtuo kay Jehova sa sadto nga pagpakig-away! Kon papilion kita sa tunga sang pagkahadlok sa mga tawo kag sang pagsalig sa ikasarang ni Jehova sa pagluwas, maathag gid ang pilion: “Dapat [naton] tumanon ang Dios subong manuggahom sa baylo sang mga tawo.” (Binuhatan 5:29) Dugang pa, kon tamdon naton ang mabug-at nga mga problema suno sa pagtamod ni Jehova nga Dios, ang aton pagtamod bisan sa mga problema nga nagapaluya sing buot mangin timbang.

[Nota]

[Kahon/Retrato sa pahina 9]

DAW ANO KADAKU SI GOLIAT?

Ginasugid sa aton sang rekord sa 1 Samuel 17:4-7 nga si Goliat nagataas sing kapin sa anom ka kubiko—mga tatlo ka metro. Ang iya kutamaya nagapamatuod kon daw ano kadaku kag kakusog ang Filistinhon. Nagabug-at ini sing 57 ka kilo! Ang iya bangkaw daw subong sang isa ka malaba nga kahoy, kag ang salsalon nga sulab sini nagabug-at sing 7 ka kilo. Ti, ang armas ni Goliat mas mabug-at pa kay David!