Ang mga Kalipay sang Paglakat nga May Integridad

“Ang pagpakamaayo ni Jehova—amo ina ang nagapamanggad, kag wala sia nagadugang sing kasakit sa sini.”—HULUBATON 10:22.

1, 2. Ngaa dapat naton likawan ang sobra nga pagpamensar sa palaabuton?

 “ANG sobra nga pagpamensar sa palaabuton . . . nagaupang sa aton sa pagkalipay sa kon ano ang yara sa aton karon,” siling sang isa ka Amerikano nga pilosopo. Matuod ini sa mga bata nga nagapamensar sing sobra sa ila mahimo kon magdaku na sila amo nga indi na nila makita ang mga kalipay sang panahon nga bata pa sila.

² Bisan ang mga sumilimba ni Jehova may amo man sini kon kaisa nga panghunahuna. Binagbinaga ang masunod nga sitwasyon. Ginapaabot gid naton ang katumanan sang saad sang Dios nga paraiso nga duta. Ginakalangkagan gid naton ang kabuhi nga wala na sing balatian, pagtigulang, kasakit, kag pag-antos. Bisan pa nagakaigo lamang nga paabuton naton inang mga butang, ano ayhan kon indi na naton makita ang espirituwal nga mga pagpakamaayo nga ginaagom naton karon bangod sang sobra nga pagpamensar sang pisikal nga mga pagpakamaayo sa palaabuton? Kanugon gid kon amo sina ang matabo! Mahimo nga madali lamang kita maluyahan sing buot kag magbatyag sing ‘kasakit sang tagipusuon bangod mas madugay ang aton paghulat’ sangsa ginapaabot naton. (Hulubaton 13:12) Mahimo madaug kita sang kapung-aw ukon maluoy kita sa aton kaugalingon bangod sang mga problema kag mga kabudlayan sa kabuhi. Sa baylo nga landason ining di-maayo nga kahimtangan, mahimo kita mangin palareklamo. Ini tanan mahimo naton malikawan kon mainapresyahon naton nga pamalandungan ang mga pagpakamaayo nga ginaagom naton karon.

3. Sa ano naton ipatuhoy ang aton igtalupangod sa sining artikulo?

³ “Ang pagpakamaayo ni Jehova—amo ina ang nagapamanggad, kag wala sia nagadugang sing kasakit sa sini,” siling sang Hulubaton 10:22. Indi bala nga ang espirituwal nga kabuganaan sang mga alagad ni Jehova karon isa gid ka pagpakamaayo nga nagapahalipay sa aton? Binagbinagon naton ang pila ka aspekto  sang aton espirituwal nga kabuganaan kag tan-awon naton kon ano ang kahulugan sini sa aton sing personal. Ang pagpamalandong sa mga pagpakamaayo nga bugana nga ginahatag ni Jehova sa mga ‘matarong nga nagalakat sa iya integridad’ magapalig-on gid sang aton determinasyon nga padayunon ang aton pag-alagad sa aton langitnon nga Amay sing malipayon.—Hulubaton 20:7.

‘Mga Pagpakamaayo nga Nagapamanggad sa Aton’ Karon

4, 5. Ano nga panudlo sang Biblia ang imo personal nga ginapabaloran, kag ngaa?

⁴ May sibu kita nga ihibalo sang mga panudlo sang Biblia. Ang mga relihion sang Cristiandad sa kabilugan nagapangangkon nga nagapati sila sa Biblia. Apang, wala sila nagaugyon sa kon ano ang ginatudlo sini. Bisan ang mga magkapareho sing relihion wala nagahisantuanay sa ila mga pagtamod sa kon ano gid ang ginatudlo sang Kasulatan. Tuhay gid ang kahimtangan nila sa mga alagad ni Jehova! Walay sapayan sang aton ginhalinan nga pungsod, kultura, ukon rasa nagasimba kita sa Dios nga kilala naton ang ngalan. Indi sia isa ka misteryoso nga tatlo sing persona nga dios. (Deuteronomio 6:4; Salmo 83:18; Marcos 12:29) Nahibaluan man naton nga ang panguna nga hulusayon tuhoy sa bug-os uniberso nga pagkasoberano sang Dios malubad na sa dili madugay kag paagi sa paghupot naton sang aton integridad sa iya, personal nga nadalahig ang kada isa sa aton sa sinang hulusayon. Nahibaluan naton ang kamatuoran tuhoy sa mga patay kag wala kita nagabatyag sing di-nagakaigo nga kahadlok sa Dios nga ginasiling nila nga nagapaantos sa mga tawo sa kalayuhon nga impierno ukon nagatapok sa ila sa purgatoryo.​—Manugwali 9:​5, 10.

⁵ Dugang pa, makalilipay gid nga mahibaluan nga indi kita natabuan lamang nga produkto sang di-makatarunganon nga ebolusyon! Sa baylo, tinuga kita sang Dios, nga ginhimo sa iya kaugalingon nga dagway. (Genesis 1:​26; Malaquias 2:​10) “Magadayaw ako sa imo bangod sa makahalangawa nga paagi ginhimo ako sing makatilingala,” amba sang salmista sa iya Dios. “Ang imo mga binuhatan makatilingala, subong nahibaluan sing maayo sang akon kalag.”—Salmo 139:14.

6, 7. Ano nga mga pagbag-o sa imo kabuhi kag sa kabuhi sang iban nga kilala mo ang nagresulta sa isa ka pagpakamaayo?

⁶ Nahilway kita sa makahalalit nga mga bisyo kag mga buhat. Madamo sing mga paandam sa media tuhoy sa mga katalagman sang pagpanigarilyo, sobra nga pag-inom, kag pagkasalamwanan sa sekso. Sa masami, ining nga paandam wala ginapamatian. Apang, ano ang ginahimo sang isa ka sinsero nga tawo kon matun-an niya nga ginapakamalaut sang matuod nga Dios ining mga buhat kag nagakasubo Sia kon ginahimo ini sang mga tawo? Ti, mapahulag inang tawo nga bayaan ining malaut nga mga buhat! (Isaias 63:10; 1 Corinto 6:​9, 10; 2 Corinto 7:1; Efeso 4:​30) Bisan pa ginahimo niya ini agod pahamut-an si Jehova nga Dios, nagaagom man sia sing dugang pa nga mga benepisyo—mas maayo nga panglawas kag kalinong sa hunahuna.

⁷ Para sa madamo, mabudlay gid ang pag-untat sa malain nga mga bisyo. Apang, linibo ang nagahimo sini kada tuig. Ginadedikar nila ang ila kabuhi kay Jehova kag nagapabawtismo sa tubig, sa amo ginapahibalo nila sa publiko nga ginbayaan na nila ang mga buhat nga nagapaakig sa Dios. Makapalig-on gid ini sa aton tanan! Labi nga nagabakod ang aton determinasyon nga likawan nga magpaulipon liwat sa sala kag sa makahalalit nga mga paggawi.

8. Anong pasad sa Biblia nga laygay ang makabulig agod mangin malipayon ang pamilya?

⁸ Nangin malipayon ang aton pamilya. Sa madamo nga kadutaan nagahuyang ang mga pamilya. Madamo nga mga magtiayon ang nagadiborsio, nga sa masami ang mga bata amo ang nagaantos sing daku nga halit sa emosyon. Sa pila ka pungsod sa Europa, halos 20 porsiento sang tanan nga panimalay ang may isa lamang ka ginikanan. Paano kita ginabuligan ni Jehova nga makalakat sa dalanon sang integridad sa sining bahin? Palihug basaha ang Efeso 5:⁠22–​6:4, kag talupangda ang maayo nga laygay nga ginahatag sang Pulong sang Dios sa mga bana, mga asawa, kag mga kabataan. Ang  pag-aplikar sang mga ginasiling diri kag sa iban pa nga teksto sa Kasulatan nagapabakod gid sang higot sang pag-asawahay, nagabulig sa mga ginikanan sa husto nga pagpadaku sa mga kabataan, kag nagabulig sa pagtukod sang isa ka malipayon nga pamilya. Indi bala ina isa ka pagpakamaayo nga nagapahalipay sa aton?

9, 10. Paano nangin tuhay ang aton pagtamod sa palaabuton sa pagtamod sang kalibutan?

⁹ Ginapasalig kita nga ang mga problema sang kalibutan malubad na sa dili madugay. Walay sapayan sang pag-uswag sang ihibalo sa siensia kag teknolohiya kag sang sinsero nga mga panikasog sang pila ka mga lider, ang dalagku nga mga problema sa pagkabuhi karon wala gihapon malubad. Si Klaus Schwab, tagtukod sang World Economic Forum, nagsiling sining karon lang nga “ang mga problema sa kalibutan padayon nga nagadamo apang ang nabilin nga tion sa paglubad sini labi nga nagadiutay.” Ginpatuhuyan niya “ang mga katalagman nga nagaapektar sa tanan nga pungsod subong sang terorismo, pagkaguba sang palibot kag kapigaduhon.” Si Schwab naghinakop: “Ilabi na gid karon nga kinahanglan magkooperar ang mga tawo kag maghimo gilayon sing importante nga mga desisyon agod malubad ang mga problema sang kalibutan.” Samtang nagapadayon ang ika-21 nga siglo, ang kabug-usan nga pagtamod sang katawhan sa palaabuton madulom sa gihapon.

¹⁰ Makalilipay gid mahibaluan nga naghimo si Jehova sing isa ka kahimusan nga makalubad sang tanan nga problema sang katawhan—ang Mesianiko nga Ginharian sang Dios! Paagi sa sini, ang Dios ‘magapatunong sang mga inaway’ kag magapaluntad sing “bugana nga paghidait.” (Salmo 46:9; 72:7) Ang hinaplas nga Hari nga si Jesucristo, ‘magaluwas sa imol, nasit-an, kag sa kubos gikan sa pagpigos kag kasingki.’ (Salmo 72:12-14) Sa idalom sang paggahom sang Ginharian, wala na sing kakulang sa pagkaon. (Salmo 72:16) “Pahiran [ni Jehova] ang tagsa ka luha sa mga mata [naton], kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.” (Bugna 21:4) Ang Ginharian natukod na sa langit kag sa dili madugay magahimo ini sing kinahanglanon nga aksion agod lubaron ang tanan nga problema sa duta.​—Daniel 2:​44; Bugna 11:15.

11, 12. (a) Ang paglipaylipay bala nagadala sing matuod nga kalipay? Ipaathag. (b) Ano ang nagadala sing matuod nga kalipay?

¹¹ Nahibaluan naton kon ano ang nagadala sing matuod nga kalipay. Ano bala ang nagadala sing matuod nga kalipay? Ang isa ka sikologo nagsiling nga ang kalipay may tatlo ka elemento—paglipaylipay, pagpakigbahin (pagkanadalahig sa mga hilikuton subong sang trabaho kag pamilya), pagkamapuslanon (pagpangabudlay sa isa ka mas daku nga katuyuan ukon tulumuron para sa iban). Sa sining tatlo, ginkabig niya ang paglipaylipay subong labing kubos ka importante kag nagsiling: “Makapainteres gid ini bangod madamo nga tawo ang nagasentro sang ila kabuhi sa paglipaylipay.” Ano ang pagtamod sang Biblia sa sining bahin?

¹² Si Hari Solomon sang dumaan nga Israel nagsiling: “Nagsiling ako sa akon tagipusuon: ‘Kari ka karon, tilawan ko ikaw sang kasadya. Subong man, magpangalipay ka.” Kag, yari karon! ini man wala sing pulos. Ginsilingan ko ang pagkadlaw: ‘Kabuangan!’ kag sa pagkasadya: ‘Ano ang ginahimo sini?’” (Manugwali 2:1, 2) Suno sa Kasulatan, ang bisan ano nga kalipay nga ginahatag sang paglipaylipay umalagi lamang. Kamusta naman ang pagpakigbahin sa isa ka hilikuton? May yara labing mapuslanon nga hilikuton nga dapat naton pakigbahinan—ang pagbantala sang Ginharian kag paghimo sing disipulo nga hilikuton. (Mateo 24:14; 28:19, 20) Paagi sa pagbantala sa iban sang mensahe sang kaluwasan nga ginapaathag sa Biblia, nagapakigbahin kita sa isa ka hilikuton nga mahimo magresulta sa aton kaugalingon nga kaluwasan kag sang iya sang mga nagapamati sa aton. (1 Timoteo  4:​16) Subong “masigkamanugpangabudlay sang Dios,” naeksperiensiahan naton nga “may kapin nga kalipay sa paghatag sangsa pagbaton.” (1 Corinto 3:9; Binuhatan 20:35) Ining hilikuton nagadugang sing kabilinggan sa aton kabuhi kag bangod sini masabat sang Manunuga ang iya manugyaguta nga si Satanas nga Yawa. (Hulubaton 27:⁠11) Sa pagkamatuod, ginapakita sa aton ni Jehova nga ang diosnon nga debosyon nagadala sing tunay kag nagapabilin nga kalipay.​—1 Timoteo 4:8.

13. (a) Sa anong paagi ang Teokratikong Eskwelahan Para sa Ministeryo isa ka pagpakamaayo nga nagapahalipay sa aton? (b) Paano ka nakabenepisyo sa Teokratikong Eskwelahan Para sa Ministeryo?

¹³ May yara kita importante kag epektibo nga programa sa paghanas. Si Gerhard nagaalagad subong gulang sa isa ka kongregasyon sang mga Saksi ni Jehova. Nagahinumdom sang iya pagkapamatan-on, sia nagsiling: “Sang bata pa ako, may daku gid ako nga problema sa panghambal. Kon ginanerbios ako, indi ako makamitlang sing maayo kag dayon nagaang-ang. Nagbatyag ako nga kubos kag napung-awan. Ginpakuha ako sang akon mga ginikanan sing isa ka kurso agod matadlong ang akon paghambal, apang ang ila mga panikasog wala nakabulig. Ang akon problema sa hunahuna lamang kag indi pisikal. Apang, may isa ka dalayawon nga aman si Jehova—ang Teokratikong Eskwelahan Para sa Ministeryo. Ang pagpalista sa sining eskwelahan naghatag sa akon sing kaisog. Ginpanikasugan ko gid nga iaplikar ang akon natun-an. Kag nangin epektibo ini! Nangin talunsay na ako maghambal, wala na napung-awan, kag nangin mas maisog na sa ministeryo. Makahatag na ako karon sing mga pamulongpulong publiko. Nagapasalamat gid ako kay Jehova, kay ginpauswag niya ang kalidad sang akon kabuhi paagi sa sining eskwelahan.” Indi bala nga ang paagi sang paghanas ni Jehova sa aton isa ka rason agod magkalipay kita?

14, 15. Sa mga tion sang kasisit-an, ano nga bulig ang puede matigayon? Iilustrar.

¹⁴ Natigayon naton ang isa ka personal nga kaangtanan kay Jehova kag ang pagsakdag sang isa ka nahiusa nga internasyonal nga paghiliutod. Si Katrin, nga nagapuyo sa Alemanya, nasubuan gid sang mabatian niya ang report tuhoy sa isa ka mabaskog nga linog nga nagresulta sa tsunami sa bagatnan-sidlangan sang Asia. Ang iya bata nga babayi namasyar sa Thailand sang natabo ining kalamidad. Sa sulod sang 32 ka oras wala nakahibalo ining iloy kon bala buhi pa ang iya bata ukon isa na sa mga nahalitan ukon napatay nga nagadugang kada oras. Nahaw-asan gid si Katrin sang nakabaton sia sang ulihi sing tawag sa telepono nga nagasugid sa iya nga luwas sa katalagman ang iya anak!

¹⁵ Ano ang nakabulig kay Katrin sa sining mahuol nga mga inoras? Nagsiling sia: “Ginhinguyang ko ang halos tanan sining tion sa pagpangamuyo kay Jehova. Madamong beses ko nga naeksperiensiahan kon daw ano nga kusog kag kalinong sa hunahuna ang nahatag sini sa akon. Dugang pa, ginduaw ako sang mahigugmaon nga mga utod sa espirituwal kag ginpalig-on ako.” (Filipos 4:​6, 7) Daw ano pa gid ayhan ang nangin sitwasyon niya kon sa sadtong mabudlay nga tion wala sia nangamuyo kay Jehova kag wala sia ginlugpayan sang mahigugmaon nga espirituwal nga mga utod! Ang aton suod nga kaangtanan kay Jehova kag sa iya Anak kag ang aton suod nga pagpakig-upod sa Cristianong paghiliutod isa gid ka pinasahi nga pagpakamaayo, tuman ini ka bilidhon kag kabay nga indi naton ini pasapayanan.

16. Maghatag sing isa ka eksperiensia nga nagailustrar sang balor sang paglaum nga pagkabanhaw.

 ¹⁶ May paglaum kita nga makita liwat ang napatay naton nga mga hinigugma. (Juan 5:​28, 29) Ang pamatan-on nga lalaki nga si Matthias ginpadaku nga isa ka Saksi ni Jehova. Apang, sang tin-edyer pa lamang sia, ginpasapayanan niya inang mga pagpakamaayo kag nagpalayo sia sa Cristianong kongregasyon. Nagsulat sia karon: “Wala gid kami nakaeksperiensia sang akon amay sing madalom nga pagsugilanunay. Sa sulod sang mga tinuig, madamo nga beses kami nagbaisay. Walay sapayan sini, luyag gihapon sang akon amay nga matigayon ko ang maayo nga kabuhi. Ginpalangga gid niya ako, isa ka butang nga wala ko marealisar sadto. Sang 1996, samtang nagapungko ako sa tupad sang iya katre nga nagauyat sang iya kamot kag nagahilibion, ginsugiran ko sia nga naghinulsol gid ako sa ginpanghimo ko kag palangga ko gid sia. Apang indi sia makabati sa akon. Pagligad sang malip-ot nga tion nga pagmasakit, napatay sia. Kon mabuhi ako kag makita ang akon amay sa pagkabanhaw, didto na lang namon pun-an ang amon mga kakulangan. Kag sigurado nga malipay gid sia nga mahibaluan nga nagaalagad na ako karon subong gulang kag kami sang akon asawa nagaalagad subong payunir.” Daku gid nga pagpakamaayo ang paglaum nga pagkabanhaw para sa aton!

“Wala Sia Nagadugang sing Kasakit sa Sini”

17. Paano kita mabuligan sang pagpamalandong sa mga pagpakamaayo ni Jehova?

¹⁷ Si Jesucristo nagsiling tuhoy sa iya langitnon nga Amay: “Ginapabutlak niya ang iya adlaw sa mga tawo nga malauton kag sa mga maayo kag nagapaulan sa mga tawo nga matarong kag sa mga di-matarong.” (Mateo 5:45) Kon si Jehova nga Dios nagahatag sing mga pagpakamaayo bisan sa mga di-matarong kag sa mga malauton, ano pa ayhan sa mga tawo nga nagalakat sa dalanon sang integridad! “Si Jehova indi magdingot sing bisan ano nga maayo sa mga nagalakat sa pagkawalay-kasawayan,” siling sang Salmo 84:11. Samtang ginapamalandungan naton ang pinasahi nga pag-atipan kag kabalaka nga ginapakita niya sa mga nagahigugma sa iya, ang aton tagipusuon puno gid sing pagpasalamat kag kalipay!

18. (a) Paano masiling nga wala ginadugangan ni Jehova sing kasakit ang iya mga pagpakamaayo? (b) Ngaa madamo nga mga matutom sa Dios ang nagaantos?

¹⁸ “Ang pagpakamaayo ni Jehova”—amo ina ang naghatag sing espirituwal nga kabuganaan sa iya katawhan. Kag ginpasalig kita nga “wala sia nagadugang sing kasakit sa sini.” (Hulubaton 10:22) Ngaa, nian, madamo nga mga matutom sa Dios ang nakaeksperiensia sing mga pagtilaw, nga nagatuga sa ila sing daku nga kasakit kag pag-antos? Ang mga kabudlayan kag mga kasisit-an nagakahanabo sa aton bangod sa tatlo ka panguna nga rason. (1) Ang aton kaugalingon nga makasasala nga huyog. (Genesis 6:5; 8:​21; Santiago 1:​14, 15) (2) Si Satanas kag ang iya mga demonyo. (Efeso 6:​11, 12) (3) Ang malaut nga kalibutan. (Juan 15:19) Bisan pa ginatugutan ni Jehova nga mahanabo sa aton ang malain nga mga butang, indi sia ang ginahalinan sini. Sa katunayan, “ang tagsa ka maayong dulot kag tagsa ka himpit nga regalo nagagikan sa hitaas, kay halin ini sa Amay sang langitnon nga mga kapawa.” (Santiago 1:17) Ang mga pagpakamaayo ni Jehova wala sing upod nga kasakit.

19. Ano ang nagahulat sa mga nagapadayon sa paglakat nga may integridad?

¹⁹ Nadalahig pirme sa pag-agom sang espirituwal nga kabuganaan ang pagpakigsuod sa Dios. Kon nagapalambo kita sing suod nga kaangtanan sa iya, ‘nagatipon kita para sa aton kaugalingon sing maayo nga sadsaran para sa palaabuton, agod makapanguyapot kita sing hugot sa matuod nga kabuhi’—kabuhi nga walay katapusan. (1 Timoteo 6:12, 17-19) Sa bag-ong kalibutan sang Dios sa palaabuton, matigayon naton ang espirituwal kag pisikal nga mga pagpakamaayo. Nian, ang matuod nga kabuhi amo ang kabuhi nga maagom sang mga tawo nga ‘padayon nga nagapamati sa tingog ni Jehova.’ (Deuteronomio 28:2) Upod ang mas malig-on nga determinasyon, padayon kita nga maglakat sing malipayon nga may integridad.

Ano ang Imo Natun-an?

• Ngaa di-maalamon ang sobra nga pagpamensar sa palaabuton?

• Ano nga mga pagpakamaayo ang ginaagom naton karon?

• Ngaa ginatugutan nga mag-antos ang matutom nga mga alagad sang Dios?

[Mga Pamangkot sa Pagtinuon]