Mga Pamangkot Gikan sa mga Bumalasa

Sa ano nga paagi nagasulod ang “kalahamut-an nga mga butang sang tanan nga pungsod” sa “balay” sang matuod nga pagsimba?—Hageo 2:7.

Paagi kay manalagna Hageo si Jehova nagtagna: “Uyugon ko ang tanan nga pungsod, kag ang kalahamut-an nga mga butang sang tanan nga pungsod pagapasudlon; kag pun-on ko ining balay sing himaya.” (Hageo 2:7) Paagi bala sa pag-uyog sa “tanan nga pungsod” nga ginabaton sang “kalahamut-an nga mga butang” sang mga pungsod—bunayag sing tagipusuon nga mga indibiduwal—ang matuod nga pagsimba? Ang sabat indi.

Binagbinaga kon ano ang nagauyog, ukon nagatay-ug, sa mga pungsod kag kon ano ang resulta sini. Ang Biblia nagasiling nga “ang mga pungsod nagasingkal kag ang pungsudnon nga mga grupo padayon nga nagakumod sing walay pulos nga butang.” (Salmo 2:1) Ang “walay pulos nga butang” nga padayon nila nga ‘ginakumod,’ ukon ginakabalak-an gid, amo nga mahuptan nila ang ila soberanya. Kag ginakahadlukan gid nila nga mawasi ini.

Ang pagbantala sang mga Saksi ni Jehova tuhoy sa natukod nga Ginharian sang Dios sa bug-os nga kalibutan amo gid ang ginakahadlukan sang mga pungsod. Sa pagkamatuod, ang Mesianikong Ginharian sang Dios nga ginagamhan ni Jesucristo ‘magadugmok kag magapapas sang tanan nga [himo-tawo] nga ginharian.’ (Daniel 2:44) Ang mensahe sang paghukom nga nalakip sa aton pagbantala nagatay-ug sa mga pungsod. (Isaias 61:2) Kag mas nagabaskog ang pagtay-ug samtang ang pagbantala nga hilikuton mas nagalapnag kag ginahimo sing labi pa kakugi. Ano ang ginapahangop sang pag-uyog nga gintagna sa Hageo 2:7?

Sa Hageo 2:6, mabasa naton: “Amo ini ang ginsiling ni Jehova sang mga kasuldadusan, ‘Sa makaisa pa—diutay nga tion na lamang—kag uyugon ko ang langit kag ang duta kag ang dagat kag ang mamala nga duta.’” Ginakutlo ini nga bersikulo, si apostol Pablo nagsiling: “Nagsaad sia, nga nagasiling: ‘Apang liwat pa pagatay-ugon ko indi lamang ang duta kundi ang langit man.’ Karon ining pinamulong, ‘Apang liwat pa,’ nagapahayag sang pagkuha sang gintay-ug, subong sang nahimo, agod nga ang mga butang nga indi matay-ug [ang Ginharian] magpabilin.” (Hebreo 12:26, 27) Huo, pagalaglagon ang bug-os nga sistema sang mga butang karon agod paluntaron ang bag-ong kalibutan sang Dios.

Ang bunayag sing tagipusuon nga mga tawo naganyat sa matuod nga pagsimba indi bangod gin-uyog, ukon gintay-ug ang mga pungsod. Ang nagaganyat sa ila kay Jehova kag sa pagsimba sa iya amo man ang nagapatay-ug sa mga pungsod kag ini amo ang bug-os kalibutan nga pagbantala tuhoy sa gintukod nga Ginharian sang Dios. Ang pagbantala sang “walay katapusan nga maayong balita” nagaganyat sa mga tawo nga husto nga nahuyog sa pagsimba sa matuod nga Dios.—Bugna 14:6, 7.

Ang mensahe sang Ginharian isa ka mensahe sang paghukom kag kaluwasan. (Isaias 61:1, 2) Ang pagbantala sini sa bug-os kalibutan may duha ka epekto: ang pag-uyog sa mga pungsod kag ang pagsulod sang kalahamut-an nga mga butang sang mga pungsod sa kahimayaan ni Jehova.