Ang Dios Nagaulikid sa mga Tigulang

ANG lapnag nga pagmaltrato karon sa mga tigulang indi makapakibot. Madugay na nga gintagna sang Biblia nga sa “katapusan nga mga adlaw” sining di-diosnon nga sistema, ang mga tawo mangin “mahigugmaon sa kaugalingon, . . . wala sing kinaugali nga gugma.” (2 Timoteo 3:1-3) Ang Griegong tinaga nga ginbadbad nga “kinaugali nga gugma” nagalakip sa gugma nga kinaandan nga nagaluntad sa sulod sang mga pamilya. Nahisanto sa tagna sang Biblia, ini nga sahi sang gugma maathag gid nga kulang karon.

Indi kaangay sang mga nagamaltrato sa mga tigulang, si Jehova nga Dios nagapabalor kag nagaulikid gid sa mga tigulang. Binagbinaga kon paano ini ginapakita sa Biblia.

“Hukom sang mga Balo nga Babayi”

Ang pag-ulikid ni Jehova nga Dios sa mga tigulang maathag sa Hebreong Kasulatan. Sa Salmo 68:5, halimbawa, gintawag ni David ang Dios nga “hukom sang mga balo nga babayi,” nga sa masami mga tigulang. * Sa iban nga mga badbad sang Biblia, ang tinaga nga “hukom” ginabadbad nga “manugpangapin,” “manug-amlig,” kag “manugsakdag.” Maathag nga si Jehova nagaulikid sa mga balo nga babayi. Sa pagkamatuod, ang Biblia nagasiling nga kon ginamaltrato sila, ang iya kasingkal nagadabdab. (Exodo 22:22-24) Ang mga balo nga babayi—kag ang tanan nga matutom nga mga tigulang—ginapabaloran gid sang Dios kag sang iya mga alagad. Tuhoy sa pagtamod ni Jehova nga Dios kag sang iya katawhan, ang Hulubaton 16:31 nagasiling: “Ang ubanon nga ulo amo ang purongpurong sang katahom kon makita ini sa dalanon sang pagkamatarong.”

Indi makapakibot nga ang pagtahod sa mga tigulang isa ka importante nga bahin sang Kasuguan  ni Jehova sa Israel. Ang mga Israelinhon ginsugo: “Magtindog ka sa atubangan sang ulo nga ubanon, kag magpakita ka sing patugsiling sa pagkatawo sang isa ka tigulang, kag magkahadlok ka sa imo Dios. Ako amo si Jehova.” (Levitico 19:32) Gani, sadto anay sa Israel, ang pagtahod sa mga tigulang gin-angot sa kaangtanan sang isa kay Jehova nga Dios. Indi makasiling ang isa nga ginahigugma niya ang Dios kon ginamaltrato niya ang mga tigulang.

Ang mga Cristiano wala na sa idalom sang Mosaikong Kasuguan. Apang, yara sila sa idalom sang “kasuguan ni Cristo,” nga may yara daku nga epekto sa ila paggawi kag panimuot, nga nagalakip sang pagpakita sing gugma kag pag-ulikid sa mga ginikanan kag mga tigulang. (Galacia 6:2; Efeso 6:1-3; 1 Timoteo 5:1-3) Kag ang mga Cristiano nagapakita sing gugma indi lamang bangod ginsugo sila nga himuon ini kundi bangod ginapahulag sila sang ila tagipusuon. “Maghigugmaanay kamo sing hanuot gikan sa tagipusuon,” laygay ni apostol Pedro.—1 Pedro 1:22.

Ginahatag ni disipulo Santiago ang isa pa ka rason kon ngaa dapat naton atipanon ang mga tigulang. “Ang sahi sang pagsimba nga matinlo kag walay dagta gikan sa pagtamod sang aton Dios kag Amay amo ini: ang pag-atipan sa mga ilo kag sa mga balo nga babayi sa ila kapipit-an, kag sa paghupot sa kaugalingon nga walay higko gikan sa kalibutan.” (Santiago 1:27) Si Santiago naghatag sing makalilipay nga punto. Ginapatalupangod sini sa aton kon daw ano gid ang pagpalangga ni Jehova sa ila.

Gani, indi lamang bastante nga untatan ang pagmaltrato sa mga tigulang. Sa baylo, dapat naton sila pakitaan sing hanuot nga pag-ulikid paagi sa paghimo sing mapuslanon nga mga buhat. (Tan-awa ang kahon, “Gugma nga May Binuhatan,” sa pahina 6-7.) Si Santiago nagsulat: “Ang pagtuo nga wala sing mga binuhatan patay.”—Santiago 2:26.

Lugpay “sa Ila Kapipit-an”

May isa pa ka punto nga matun-an gikan sa ginsiling ni Santiago. Talupangda nga ginsugo ni Santiago ang mga Cristiano nga atipanon ang mga balo nga babayi “sa ila kapipit-an.” Ang Griegong tinaga nga ginbadbad nga “kapipit-an” nagapatuhoy sa kalisdanan, kapiutan, ukon pag-antos nga resulta sang mga kabudlayan sa aton pangabuhi. Indi maduhaduhaan nga madamo nga tigulang ang nagaeksperiensia sing amo nga kalisdanan. Ang iban ginamingaw. Ang iban ginapung-aw bangod sang mga limitasyon nga resulta sang katigulangon. Bisan ang mga daw aktibo pa sa ila pag-alagad sa Dios mahimo maluyahan sing buot. Binagbinaga si John, * isa ka matutom nga manugwali sang Ginharian sang Dios sa kapin sa kap-atan ka tuig, kag ginhinguyang niya ang naulihi nga katluan ka tuig sini sa pinasahi nga bug-os tion nga pag-alagad. Si John otsentahon na karon kag ginabaton niya nga kon kaisa ginaluyahan sia sing buot. Nagsiling sia: “Pirme ko ginabalikan ang nagligad kag ginahinumdom ang akon tuman kadamo nga kasaypanan. Pirme ko ginapamensar nga kuntani mas maayo pa ang akon ginhimo.”

Malipay sila nga mahibaluan nga walay sapayan nga si Jehova himpit, wala sia nagapaabot nga kita mangin himpit. Walay sapayan nga nahibaluan niya ang aton mga kasaypanan, ang Biblia nagasiling tuhoy sa iya: “Kon ang mga sayop amo ang imo ginabantayan, O Jah, O Jehova, sin-o bala ang makatindog?” (Salmo 130:3) Huo, indi ang aton mga kasaypanan ang ginatan-aw ni Jehova, kundi kon ano ang yara sa aton tagipusuon. Paano naton ini nahibaluan?

 Si Hari David—nga nakasala kag nakahimo man sing madamo nga kasaypanan—gin-inspirar sang Dios sa pagsulat sing masunod nga mga pinamulong, nga ginrekord sa Salmo 139:1-3: “O Jehova, nausisa mo ako, kag nakilala mo ako. Nahibaluan mo ang akon paglingkod kag ang akon pagtindog. Ginbinagbinag mo ang akon panghunahuna gikan sa malayo. Ang akon paglakbay kag ang akon paghigda gin-usisa mo, kag nahibaluan mo ang tanan ko nga dalanon.” Ang tinaga diri nga “gin-usisa” literal nga nagakahulugan sing “pag-ayag,” kaangay sang pag-ayag sang mangunguma sa upa agod mabilin ang uyas. Paagi sa pag-inspirar sang Dios, ginapasalig kita ni David nga kalimtan ni Jehova ang aton mga kasaypanan kag dumdumon ang aton maayo nga mga binuhatan.

Ginadumdom kag ginapakabahandi sang aton maluluy-on nga langitnon nga Amay ang aton maayong mga binuhatan kon magpabilin kita nga matutom sa iya. Sa pagkamatuod, ang Biblia nagasiling nga isa ka di-matarong nga buhat para sa iya nga kalimtan ang aton ginhimo kag ang gugma nga ginpakita naton tungod sa iya ngalan.—Hebreo 6:10.

“Ang Nahaunang mga Butang Nagtaliwan”

Ginapakita sang Biblia nga indi katuyuan sang Dios nga magtigulang ang tawo. Nangin bahin lamang  sang kabuhi sang tawo ang makahalalit nga mga epekto sang pagtigulang sang ang aton una nga mga ginikanan, ang nahaunang mag-asawa, nagrebelde sa Manunuga. (Genesis 3:17-19; Roma 5:12) Indi ini magapadayon sa walay katapusan.

Subong sang ginsiling na kaina, madamong malain nga mga kahimtangan nga naeksperiensiahan naton karon—lakip na ang pagmaltrato sa mga tigulang—ang nagapamatuod nga nagakabuhi kita sa “katapusan nga mga adlaw” sining sistema sang mga butang. (2 Timoteo 3:1) Katuyuan sang Dios nga dulaon ang mga epekto sang sala, lakip na ang makahalalit nga mga epekto sang pagtigulang kag kamatayon. Ang Biblia nagasiling: “Pahiran [sang Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”—Bugna 21:4.

Sa bag-ong kalibutan sang Dios, ang mga kasakit sang pagtigulang mangin mga butang na sang nagligad. Amo man ang pagmaltrato sa mga tigulang. (Miqueas 4:4) Bisan ang mga napatay na kag yara sa handumanan sang Dios pagabanhawon, agod may kahigayunan man sila nga magkabuhi sing dayon sa paraiso nga duta. (Juan 5:28, 29) Sa sina nga tion, makita gid nga si Jehova nga Dios nagaulikid indi lamang sa mga tigulang kundi sa tanan nga nagatuman sa iya.

[Mga nota]

[Kahon/Mga Retrato sa pahina 6, 7]

Gugma nga May Binuhatan

Sa tunga sang mga Saksi ni Jehova, ang mga gulang sang kongregasyon nagapanguna sa pagpakita sing pag-ulikid sa mga tigulang. Ginatuman nila ang laygay ni apostol Pedro: “Bantayi ninyo ang panong sang Dios nga yara sa inyo pag-atipan.” (1 Pedro 5:2) Ang pagtatap sa mga tigulang sa praktikal nga mga paagi isa ka bahin sang pag-atipan sa panong sang Dios. Apang, ano ang kinahanglan?

Kinahanglan ang pagpailob kag ayhan ang mga pagduaw kag mga pagpakigsugilanon agod mahibaluan kon ano gid ang mga kinahanglanon sang isa ka tigulang. Ayhan kinahanglan ang bulig sa pagpamalaklon kag sa pagpaninlo, sa transportasyon pakadto sa Cristianong mga miting, sa pagbasa sing Biblia kag Cristianong mga publikasyon, kag sa madamo pa nga butang. Kon posible, dapat maghimo kag magpatuman sing praktikal kag masaligan nga mga kahimusan. *

Apang, ano abi kon ang isa ka tigulang nga utod sa kongregasyon puraot kag nagakinahanglan sing pinansial nga bulig? Una, mas maayo nga hibaluon kon may yara sia mga kabataan ukon mga himata nga makabulig. Nahisanto ini sa ginasiling sang 1 Timoteo 5:4: “Kon ang balo nga babayi may mga kabataan ukon mga apo, patun-a sila sing una sang ila diosnon nga katungdanan ayon sa ila kaugalingon nga panimalay kag sa pagbalos sa ila mga ginikanan; kay ini kalahamut-an sa itululok sang Dios.”

Mahimo kinahanglan sang isa ka tigulang ang bulig sa paghibalo kon bala kalipikado sia sa bisan ano nga bulig sang gobierno. Ayhan ang pila sa kongregasyon makabulig sa iya bahin sini. Kon wala sing amo sini nga bulig, hambalan sang mga gulang kon bala kalipikado sia para buligan sang kongregasyon. Sa pila ka halimbawa, gintugutan ini anay sa unang-siglo nga kongregasyon, kay si apostol Pablo nagsulat sa iya masigkamanugpangabudlay nga si Timoteo: “Ibutang sa listahan ang babayi nga balo nga indi magkubos sa kan-uman ka tuig, asawa sang isa ka bana, nga napamatud-an tungod sa iya maayong mga buhat, kon nagbatiti sia sa mga anak, kon nagsapupo sia sa mga dumuluong, kon naghinaw sia sa mga tiil sang mga balaan, kon nagtabang sia sa mga napiutan, kon maukod sia nga nagsunod sa maayo sa tagsa ka maayo nga buhat.”—1 Timoteo 5:9, 10.

[Nota]

[Retrato sa pahina 5]

Gin-atipan ni Dorcas ang imol nga mga balo nga babayi.—Binuhatan 9:36-39