Mangin Kontento Paagi sa Pag-aplikar sang mga Prinsipio sang Biblia

PAT-OD gid nga nakakita ka na sang kuring nga nagabarikutot kag nagaingaw sing hinay—isa ka larawan sang pagkakontento. Daw ano kanami nga magbarikutot kag mangin kontento kaangay niya! Apang, para sa madamo, mabudlay mangin kontento kag ini umalagi lamang. Ngaa?

Bangod di-himpit kita amo nga pirme kita nagasala, kag dapat naton batason ang mga kakulangan sang iban. Isa pa, nagakabuhi kita sa tion nga ginatawag sang Biblia nga “katapusan nga mga adlaw,” nga maeksperiensiahan ang “makahalanguyos nga mga tion nga mabudlay pakigbagayan.” (2 Timoteo 3:1-5) Bisan pa may makalilipay kita nga handumanan sang pagkakontento sang bata pa kita, ang kalabanan sa aton sa karon nagaeksperiensia sing tuman nga pag-ipit sang “makahalanguyos nga mga tion.” Mahimo bala kita mangin kontento karon?

Talupangda nga ang Kasulatan nagasiling nga ining makahalanguyos nga mga tion mangin mabudlay, apang indi imposible pakigbagayan. Maatubang naton ini paagi sa pag-aplikar sang mga prinsipio sang Biblia. Ayhan indi naton pirme malubad ang aton mga problema, apang sa gihapon mangin kontento kita. Binagbinagon naton ang tatlo sining mga prinsipio.

Hupti ang Realistiko nga Pagtamod

Agod mangin kontento, dapat naton huptan ang realistiko nga pagtamod sa aton mga limitasyon kag ang iya sang iban. Sa iya sulat sa mga taga-Roma, si apostol Pablo nagsiling: “Ang tanan nakasala kag wala makalab-ot sa himaya sang Dios.” (Roma 3:23) Madamo nga aspekto sang himaya ni Jehova ang indi naton mahangpan. Ang isa ka halimbawa amo ang maathag nga kamatuoran nga ginsambit sa Genesis 1:31: “Nakita sang Dios ang tanan nga butang nga ginhimo niya kag, yari karon! tama gid ini kaayo.” Sa tagsa ka tion nga luyag ni Jehova dumdumon ang mga ginhimo niya sang una, masiling gid niya nga “tama gid ini kaayo.” Wala sing tawo ang pirme nga makasiling sina. Ang pagbaton sang aton mga limitasyon amo ang una nga tikang agod mangin kontento. Apang may isa pa ka butang nga kinahanglanon. Dapat man naton mahangpan kag batunon ang pagtamod ni Jehova sa mga butang.

Ang Griegong tinaga nga ginbadbad nga “sala” naghalin sa isa ka tinaga nga nagakahulugan sing “paglisa sa tanda.” (Roma 3:9, Reference Bible, footnote) Sa pag-ilustrar: Handurawa ang isa ka tawo nga nagalaum nga madaug ang premyo paagi sa pag-igo sa target gamit ang pana. Tatlo ka pana ang mahimo niya gamiton. Ang iya una nga pana naglisa sing isa ka metro gikan sa target. Ginsipat niya sing maayo ang ikaduha nga pana, apang sa gihapon naglisa ini sing 30 sentimetros. Nagkonsentrar gid sia sing maayo kag ginbuy-an ang katapusan nga pana kag naglisa ini sing duha ka sentimetro lamang. Halos naigo niya ang target, apang ginakabig ini nga wala gihapon maigo.

Tanan kita kaangay sinang napaslawan nga manugpana. Kon kaisa daw daku ang aton “paglisa sa tanda.” Kon kaisa naman halos naigo na naton ang target apang sa gihapon, wala naton ini maigo. Nasubuan kita bangod walay sapayan sang  aton mga panikasog, indi gihapon ini bastante. Karon, balikan naton ang manugpana.

Hinayhinay sia nga nagtalikod nga huyhoy ang abaga bangod luyag gid niya makuha ang premyo. Sing hinali lamang, gintawag sia sang tawo nga nagadumala sang paindis-indis kag gintunghol sa iya ang premyo nga nagasiling: “Luyag ko ini ihatag sa imo kay nanamian ako sa imo, kag nakita ko kon paano ka nagtinguha.” Nalipay gid ang manugpana!

Nalipay gid sia! Amo sini ang mabatyagan sang tanan nga makabaton halin sa Dios sang “dulot” nga walay katapusan kag himpit nga kabuhi. (Roma 6:23) Pagkatapos sina, ang tanan nga pagahimuon nila mangin himpit—indi na gid sila maglisa pa sa tanda. Mangin kontento sila sing bug-os. Samtang wala pa ini, kon huptan naton ini nga pagtamod sa aton hunahuna, mangin kontento kita sa aton kaugalingon kag sa iban man sa aton palibot.

Batuna nga ang Tanan nga Butang Nagakinahanglan ing Tion

Matuod gid nga ang tanan nga butang nagakinahanglan sing tion. Apang, nanutaran mo bala kon daw ano kabudlay nga mangin kontento kon ang ginahulat mo daw mas madugay sangsa ginapaabot mo ukon kon ang di-maayo nga kahimtangan mas madugay sangsa ginalauman mo? Bisan pa sa sini nga mga kahimtangan, nahuptan sang iban ang pagkakontento. Binagbinaga ang halimbawa ni Jesus.

Antes si Jesus nagkari sa duta, huwaran sia sang pagkamatinumanon sa langit. Apang, diri niya sa duta ‘natun-an ang pagkamatinumanon.’ Paano? “Gikan sa mga butang nga iya gin-antos.” Sang una, nakita niya ang pag-antos apang wala niya ini mismo maeksperiensiahan. Sang yari sia sa duta, ilabi na sang ginbawtismuhan sia sa Jordan tubtob sang napatay sia sa Golgota, naagihan niya ang madamo kag mabudlay nga mga kahimtangan. Wala kita makahibalo sang tanan nga detalye kon paano si Jesus “nahimpit” sa sini nga bahin, apang nahibaluan naton nga ini nga proseso nagkinahanglan sing tion.—Hebreo 5:8, 9.

Nagmadinalag-on si Jesus bangod ginpamalandungan niya ang “kalipay nga ginbutang sa iya atubang,” ang padya para sa iya katutom. (Hebreo 12:2) Walay sapayan sini, may mga tion nga “nagpangamuyo kag nag-ampo man [sia] . . . nga may mabaskog nga mga pagsinggit kag mga luha.” (Hebreo 5:7) Kon kaisa nagapangamuyo man kita sa amo sini nga paagi. Paano ini ginatamod ni Jehova? Ginapakita man sini nga bersikulo nga ginpamatian ni Jehova si Jesus nga may “kahamuot.” Amo man ang himuon sang Dios sa aton. Ngaa?

Bangod nahibaluan ni Jehova ang aton mga limitasyon, kag nagabulig sia sa aton. Ang tanan nga tawo may limitasyon sa kon tubtob diin lang ang iya masarangan. Ang mga taga-Benin, Aprika may hulubaton: “Bisan ang mga paka nagakalumos sa sobra nga tubig.” Mas nakahibalo si Jehova sangsa aton kon tubtob diin lang ang aton masarangan. Mahigugmaon sia nga nagaaman sing “kaluoy kag . . . di-bagay nga kaayo subong bulig sa husto nga tion.” (Hebreo 4:16) Ginhimo niya ini kay Jesus kag sa madamo pa nga mga tawo. Binagbinaga kon paano naeksperiensiahan ni Monika ang bulig sang Dios.

Nagdaku si Monika nga masinadyahon kag daw wala sing libog. Sang 1968, sang beintehon pa lang sia, nakibot gid sia sang mahibaluan niya nga  may masakit sia nga multiple sclerosis kag ini masami nga ginatunaan sang pagkaparalisar sang pila ka bahin sang lawas. Bug-os gid nga nagbalhin ang iya kabuhi kag kinahanglan sia maghimo sing daku nga mga pagbag-o sa iya bug-os tion nga pagministeryo. Nahibaluan ni Monika nga magalawig ini nga balatian. Pagligad sang 16 ka tuig, nagsiling sia: “Wala gihapon sing bulong ang akon balatian kag mahimo nga indi ini mag-ayo tubtob nga bag-uhon sang bag-ong sistema sang Dios ang tanan nga butang.” Gin-ako niya nga indi ini mahapos: “Bisan pa ang akon mga abyan nagasiling nga masinadyahon kag positibo ako gihapon pareho sang una, . . . nahibaluan sang akon suod nga mga abyan nga may mga tion nga nagatururagay lang ang akon mga luha.”

Apang, sia nagsiling: “Natun-an ko nga magpailob kag magkalipay bisan sa diutay nga pag-ayo-ayo sang akon panglawas. Naglig-on pa gid ang akon kaangtanan kay Jehova sang narealisar ko nga ang tawo wala gid sing mahimo sa pagbato sa balatian. Si Jehova lamang ang bug-os nga makaayo sa balatian.” Sa bulig ni Jehova, nahuptan ni Monika ang iya pagkakontento kag mahinumduman niya karon ang kapin sa 40 ka tuig sang bug-os tion nga pag-alagad.

Sa pagkamatuod, ang mga kahimtangan kaangay sang iya ni Monika indi mahapos. Apang sigurado gid nga mangin mas kontento ka kon batunon mo nga ang pila ka butang nagakinahanglan sing mas malawig nga tion sangsa ginapaabot mo. Kaangay ni Monika, makasalig ka man sa “bulig [ni Jehova] sa husto nga tion.”

Indi Magpaanggid—Magpahamtang sing Rasonable nga mga Tulumuron

Pinasahi ka. Wala sing kaangay sa imo. Ini nga katunayan ginpabutyag sang isa ka hulubaton sa lenguahe nga Gun sa Aprika: “Indi palareho ang kalabaon sang mga tudlo sa kamot.” Indi makatarunganon nga ipaanggid mo ang isa ka tudlo sa iban nga tudlo. Indi mo maluyagan nga ipaanggid ka ni Jehova sa iban nga tawo, kag indi gid niya paghimuon ina. Apang, kinaandan na sa mga tawo ang magpaanggid kag bangod sini madula sang isa ang iya pagkakontento. Talupangda kon paano ini ginpadaku ni Jesus paagi sa isa ka ilustrasyon nga mabasa naton sa Mateo 20:1-16.

Si Jesus nagpamulong tuhoy sa isa ka “agalon” nga nagkinahanglan sing mga mamumugon para sa iya ulubasan. Nakita niya ang pila ka mga tawo nga wala-obra kag ginpatrabaho sila sing “kaagahon pa,” ayhan mga alas 6:00 s.a. Nagsugtanay sila sa kinaandan nga suhol sadtong tion, isa ka denario para sa 12 ka oras nga trabaho sa isa ka adlaw. Pat-od gid nga nalipay ang mga tawo nga nakakita sila sing trabaho nga may kinaandan nga bayad. Sang ulihi, nakita sang agalon ang iban pa nga grupo sang mga tawo nga wala-obra kag ginpatrabaho sila—sing alas 9:00 s.a., alas 12:00 s.u., alas 3:00 s.h., kag bisan alas 5:00 na sa hapon. Indi makompleto sining mga grupo ang isa ka adlaw nga trabaho. Nagsaad ang agalon nga ihatag sa ila ang “kon ano ang nagakaigo” nga suhol, kag nagpasugot ang mga mamumugon.

Sa pagtakop sang adlaw, ginsugo sang agalon ang iya mga tulugyanan nga suhulan sila. Nagsiling sia nga tawgon ang mga mamumugon kag unahon bayad ang ulihi nga ginpaobra. Ini sila nag-obra sing isa lamang ka oras, apang makapakibot nga nakabaton sila sing suhol para sa isa ka adlaw nga trabaho. Mahanduraw naton ang mainit nga pagbinaisay. Ang mga nagtrabaho sing 12 oras naghinakop nga dapat mas daku ang ila suhol. Apang, palareho lang ang ila nabaton.

Ang ila reaksion? “Sang nabaton ini nagkumod sila batok sa agalon sang panimalay, kag nagsiling, ‘Ining mga naulihi nag-obra sing isa ka oras lamang; apang ang imo ginsuhol sa ila pareho lang sa amon nga nagpangabudlay sing lakas sa bug-os nga adlaw kag sa nagatagiti nga init!’”

Apang, tuhay ang pagtamod sang agalon. Ginpatalupangod niya nga nabaton nila kon ano ang ginkasugtan nila. Ang iban naman ginhatagan niya sing para sa isa ka adlaw nga suhol, nga pat-od gid nga labaw sa ila ginpaabot. Sa pagkamatuod, wala sang isa nga nagbaton sing kubos sangsa ginkasugtan; ang matuod, madamo ang nagbaton sing kapin sangsa ila ginpaabot. Gani sa paghinakop, ang agalon namangkot: “Indi bala tugot sa akon ang paghimo sing luyag ko sa akon pagkabutang?”

Karon, hunahunaa kon ang ginsuhulan una sang tulugyanan amo ang nahauna nga grupo kag naglakat sila dayon. Siguro nakontento na sila. Nangin  di-kontento lamang sila sang nakita nila nga pareho nga suhol ang ginbaton sang iban para sa diutay nga trabaho. Naakig sila, tubtob sa punto nga nagkumod sila batok sa agalon, ang isa nga dapat kuntani pasalamatan gid nila bangod ginpaobra sila.

Amo sini ang mahanabo kon ikumparar naton ang aton kaugalingon sa iban. Kon pamalandungan mo ang imo personal nga kaangtanan kay Jehova kag magpasalamat sa mga pagpakamaayo niya sa imo, mangin kontento ka. Indi pag-ipaanggid ang imo kahimtangan sa iban. Kon daw ginpakamaayo ang iban sing dugang ni Jehova, magkalipay upod sa ila.

Apang, may ginapaabot si Jehova nga himuon mo. Ano ina? Ang Galacia 6:4 nagasiling: “Pamatud-an sang kada isa kon ano ang iya kaugalingon nga binuhatan, kag nian ang rason niya sa pagkasadya mangin sa iya kaugalingon lamang.” Buot silingon, magpahamtang ka sing rasonable nga mga tulumuron para sa imo kaugalingon. Planuha kon ano lang ang imo masarangan, kag dayon himua ini. Kon rasonable ang imo tulumuron kag nalab-ot mo ini, may rason ka “sa pagkasadya.” Nian, mangin kontento ka.

May mga Pagpakamaayo

Ang tatlo ka prinsipio nga aton ginbinagbinag nagapakita nga ang pag-aplikar sang mga prinsipio sang Biblia makabulig gid sa aton nga mangin kontento bisan pa sa sining katapusan nga mga adlaw kag walay sapayan sang aton pagkadihimpit. Sa pagbasa mo sing Biblia adlaw-adlaw, ngaa indi pagpangitaon ang mga prinsipio nga ginsambit sing direkta ukon di-direkta sa mga sugilanon ukon sa mga ilustrasyon?

Kon sa pamatyag mo daw nagakadula ang imo pagkakontento, hibalua kon ano gid ang kabangdanan sini. Dason magpanalawsaw kon ano nga mga prinsipio ang puede mo gamiton sa pagtadlong sang kahimtangan. Halimbawa, mahimo mo tan-awon ang mga pahina 110-11 sang libro nga “All Scripture Is Inspired of God and Beneficial.” * Ginabinagbinag diri ang tulun-an sang Hulubaton, kag makakita ka sing madamo nga mga prinsipio kag mga laygay nga nalista sa idalom sang 12 ka uluhan. Ang The Watch Tower Publications Index * kag ang Watchtower Library sa CD-ROM * mapuslanon nga tiliman-an sang impormasyon. Kon pirme mo ini gamiton, mangin madasig ka sa pagpangita sing mapuslanon nga mga prinsipio.

Malapit na ang tion nga ihatag ni Jehova sa mga tawo nga takus ang himpit kag walay katapusan nga kabuhi sa isa ka paraiso nga duta. Kag mangin kontento sila sing bug-os.

[Nota]

[Blurb sa pahina 12]

“Ang tanan nakasala kag wala makalab-ot sa himaya sang Dios.”—Roma 3:23

[Blurb sa pahina 13]

“Nakatuon [si Jesus] sang pagkamatinumanon gikan sa mga butang nga iya gin-antos.”—Hebreo 5:8, 9

[Blurb sa pahina 15]

Ang iya “rason sa pagkasadya mangin sa iya kaugalingon lamang kag indi sa pagpaanggid sa iban.”—Galacia 6:4