Mga Pamangkot Gikan sa mga Bumalasa

Sa Mosaikong Kasuguan, ngaa ang pila ka kinaugali nga mga butang may kaangtanan sa sekso ginakabig nga nagahimo sa isa ka tawo nga “di-matinlo”?

Ginhimo sang Dios ang sekso para sa pagpadamo sang tawo kag para sa kalipay sang mga mag-asawa. (Genesis 1:28; Hulubaton 5:15-18) Apang, sa kapitulo 12 kag 15 sang Levitico, mabasa naton ang detalyado nga mga kasuguan tuhoy sa pagkadimatinlo bangod sa paggua sang semilya, pamulanon, kag pagpanganak. (Levitico 12:1-6; 15:16-24) Yadtong mga kasuguan sa dumaan nga Israel nagbulig agod mahuptan ang matinlo nga pagkabuhi kag ang mataas nga talaksan sa moral, kag mapadaku ang pagkabalaan sang dugo kag ang kinahanglanon nga tumbasan ang mga sala.

Labaw sa tanan, ang mga ginapatuman sang Mosaikong Kasuguan tuhoy sa mga butang may kaangtanan sa sekso nagpauswag sang maayo nga panglawas sang mga Israelinhon. Ang libro nga The Bible and Modern Medicine nagsiling: “Ang pagsunod sa siklo sang pamulanon sa diin may natalana nga tion nga indi dapat maghulid napamatud-an nga isa ka epektibo nga paagi agod malikawan ang pila ka sahi sang balatian sa sekso . . . kag isa man ka pat-od nga pangamlig batok sa kanser sa matris.” Ini nga mga kasuguan nag-amlig sa katawhan sang Dios gikan sa mga balatian nga wala pa makilal-an ukon wala pa gani nila madiskobrehan. Bangod sang katinlo sa sekso, nangin madasig ang pagbuad sang pungsod nga ginpakamaayo sang Dios kag ginsaaran nga pabuaron kag hatagan sing kabuganaan. (Genesis 15:5; 22:17) Gin-amligan man sining kasuguan ang emosyonal nga kapagros sang katawhan sang Dios. Paagi sa pagtuman sini nga mga kasuguan, natun-an sang mga bana kag mga asawa nga kontrolon ang ila seksuwal nga handum.

Apang, ang panguna gid nga isyu nga nalakip sa mga sahi sang pagkadimatinlo tuhoy sa mga butang may kaangtanan sa sekso amo ang pagtagas ukon pagkawasi sang dugo. Ang mga kasuguan ni Jehova tuhoy sa dugo nagpatudok sa hunahuna sang mga Israelinhon indi lamang sang pagkabalaan sang dugo kundi sang importansia man sang dugo sa pagsimba kay Jehova, nga amo, ang mga halad kag ang katumbasan sang aton mga sala.—Levitico 17:11; Deuteronomio 12:23, 24, 27.

Busa, ang detalyado nga ginapatuman sang Kasuguan tuhoy sa sini nga butang naangot sing suod sa pagkadihimpit sang tawo. Nahibaluan sang mga Israelinhon nga si Adan kag si Eva—pagkatapos sila nagpakasala—indi makapanganak sing himpit nga kabataan. Ang tanan nila nga mga kaliwat magaantos sang epekto sang ginpanubli nga sala—pagkadihimpit kag kamatayon. (Roma 5:12) Bangod sini, maliton lamang sang mga ginikanan ang di-himpit kag makasasala nga kabuhi, bisan pa nga gindisenyo anay ang ila sistema sa pagpamuad sa pagliton sing himpit nga kabuhi paagi sa kahimusan sang pag-asawahay.

Gani, ang Kasuguan tuhoy sa pagkatinlo magapahanumdom sa mga Israelinhon indi lamang sang ila napanubli nga pagkamakasasala kundi sang pagkinahanglan man nila sing halad nga gawad nga magatabon sa mga sala kag magapasag-uli sa tawo sa kahimpitan. Sa pagkamatuod, ang sapat nga ila ginhalad wala sing ikasarang sa paghimo sini. (Hebreo 10:3, 4) Ang katuyuan sang Mosaikong Kasuguan amo nga tuytuyan sila padulong kay Cristo kag buligan sila nga mahangpan nga paagi lamang sa himpit tawhanon nga halad ni Jesus nga matigayon ang matuod nga kapatawaran, sa amo nagabukas sang dalan padulong sa kabuhi nga walay katapusan para sa mga matutom.—Galacia 3:24; Hebreo 9:13, 14.