“Ang Imo mga Pahanumdom Amo ang Akon Naluyagan”
“Ang Imo mga Pahanumdom Amo ang Akon Naluyagan”
“Ang tanan nga butang nga ginsulat sadto anay ginsulat sa pagtudlo sa aton.”—ROMA 15:4.
1. Paano si Jehova nagahatag sa aton sing mga pahanumdom, kag ngaa kinahanglan naton ini?
GINAHATAGAN ni Jehova ang iya katawhan sing mga pahanumdom agod buligan sila nga maatubang ang mga pag-ipit sa sining mabudlay nga mga tion. Ang pila sining mga pahanumdom ginaaman sa tion sang personal nga pagbasa sang Biblia, samtang ang iban matigayon sa impormasyon ukon mga komento nga ginapresentar sa Cristianong mga miting. Kalabanan sang aton mabasa ukon mabatian sa sining mga okasyon nahibaluan na naton. Mahimo nga nabinagbinag na naton sang nagligad ang amo man nga impormasyon. Apang, bangod nagakalipat kita, kinahanglan nga padayon kita nga pahanumdumon tuhoy sa mga katuyuan, mga kasuguan, kag mga instruksion ni Jehova. Dapat naton apresyahon ang mga pahanumdom sang Dios. Ginapalig-on kita sini paagi sa pagbulig sa aton nga hunahunaon ang mga rason nga nagpahulag sa aton nga sundon ang dalanon sang diosnon nga pagkabuhi. Busa, ang salmista nag-amba kay Jehova: “Ang imo mga pahanumdom amo ang akon naluyagan.”—Salmo 119:24.
2, 3. (a) Ngaa gintipigan ni Jehova tubtob sa aton karon ang sugilanon sa kabuhi sang mga karakter sa Biblia? (b) Ano nga mga kasaysayan gikan sa Kasulatan ang pagabinagbinagon sa sini nga artikulo?
2 Bisan pa ginsulat ini madamong siglo na ang nagligad, ang Pulong sang Dios gamhanan gihapon. (Hebreo 4:12) Nagasugid ini sa aton sang matuod nga sugilanon sang kabuhi sang mga karakter sa Biblia. Bisan pa daku na ang ginbag-o sang mga kustombre kag mga opinyon sugod sang panahon sang Biblia, masami nga ang mga problema nga aton maatubang pareho man sang una. Madamong sugilanon sa Biblia nga gintipigan para sa aton kaayuhan ang nagahatag sa aton sing makapalig-on nga mga halimbawa sang mga naghigugma kay Jehova kag nag-alagad sa iya sing matutom walay sapayan sang mabudlay nga mga kahimtangan. Ang iban nga mga kasaysayan nagasambit sang sahi sang buhat nga ginadumtan sang Dios. Ginlakip ni Jehova sa Biblia ining mga kasaysayan tuhoy sa mga tawo, maayo man ukon malain, bilang mga pahanumdom. Subong sang ginsulat ni apostol Pablo: “Ang tanan nga butang nga ginsulat sadto anay ginsulat sa pagtudlo sa aton, agod nga paagi sa aton pagbatas kag paagi sa lugpay gikan sa Kasulatan makatigayon kita sing paglaum.”—Roma 15:4.
3 Binagbinagon naton ang tatlo ka kasaysayan gikan sa Kasulatan: ang sugilanon tuhoy sa pagpakig-angot ni David kay Saul, ang kay Ananias kag Safira, kag ang tuhoy sa paggawi ni Jose may kaangtanan sa asawa ni Potifar. Ang tagsa sa sini nagatudlo sa aton sing mapuslanon nga mga leksion.
Pagkamainunungon sa mga Kahimusan Sang Dios
4, 5. (a) Ano nga kahimtangan ang nagluntad sa tunga nanday Hari Saul kag David? (b) Ano ang reaksion ni David sa kaakig ni Saul?
4 Si Hari Saul nangin di-matutom kay Jehova kag nangin di-takus sa paggahom sa Iya katawhan. Gani ginsikway sia sang Dios kag ginsugo si manalagna Samuel nga haplasan si David subong palaabuton nga hari sang Israel. Sang ginpakita ni David ang kaisog subong mangangaway kag gindayaw sang mga tawo, gintamod ni Saul si David nga isa ka karibal. Makapila nga gintinguhaan ni Saul nga patyon sia. Nakalampuwas si David sa tagsa ka higayon bangod si Jehova upod sa iya.—1 Samuel 18:6-12, 25; 19:10, 11.
5 Tinuig nga napilitan si David nga magkabuhi subong laaslaas. Sang may kahigayunan sia nga patyon si Saul, ang mga kaupdanan ni David ang nagpalig-on sa iya nga himuon ini, nga nagasiling nga ginhatag ni Jehova sa mga kamot ni David ang iya kaaway. Apang, nangindi si David. Ginhimo niya ini bangod sang iya pagkamainunungon kay Jehova kag pagtahod sa katungdanan ni Saul subong ginhaplas nga hari sang katawhan sang Dios. Indi bala nga si Jehova ang nagtangdo kay Saul subong hari sang Israel? Si Jehova man ang magakuha sa iya sa Iya gintalana nga tion. Nangatarungan si David nga wala sia sing kinamatarong nga magpasilabot. Pagkatapos mahimo ang tanan niya nga masarangan agod indi maakig si Saul sa iya, si David naghinakop: “Si Jehova magasakit sa iya; ukon ang iya adlaw nga ikamatay magaabot, ukon magadulhog sia sa inaway kag mawala. Malayo nga matabo, sa akon bahin, gikan sa pagtamod ni Jehova, nga untayon ang akon kamot batok sa hinaplas ni Jehova!”—1 Samuel 24:3-15; 26:7-20.
6. Ngaa makapainteres sa aton ang sugilanon nanday David kag Saul?
6 Ini nga kasaysayan nagaunod sing isa ka importante nga leksion. Napamangkot mo na bala sa imo kaugalingon kon ngaa ang pila ka problema nagautwas sa Cristianong kongregasyon? Ayhan ang isa ka indibiduwal nagapanghikot sing di-nagakaigo. Ang iya paggawi indi gid man makabig nga serioso nga sala, apang ginatublag ikaw sini. Ano ang himuon mo? Bangod luyag mo ipakita ang imo kabalaka sa imo Cristiano nga utod, kag ang imo pagkamainunungon kay Jehova, ayhan luyag mo nga istoryahon sia sing malulo, sa tuyo nga daugon sia. Apang, ano kon ang problema nagapadayon gihapon? Kon nahimo mo na ang tanan mo nga masarangan, ayhan luyag mo itugyan ini nga butang kay Jehova. Amo sina ang ginhimo ni David.
7. Bilang pag-ilog kay David, ano ang dapat naton himuon kon makaatubang kita sing inhustisya ukon pag-ihig-ihig?
7 Mahimo nga nagaatubang ka sing inhustisya sa katilingban ukon pag-ihig-ihig sa relihion. Ayhan diutay gid lang ang imo mahimo ukon wala gid gani agod masolbar ini nga mga problema karon. Daw mabudlay gid batason ini nga kahimtangan, apang may matun-an kita nga leksion sa ginhimo ni David sang nag-atubang sia sing inhustisya. Ang mga salmo nga ginsulat ni David makatalandog gid nga mga rekord indi lamang sang iya tinagipusuon nga mga pangamuyo sa Dios nga buligan sia nga indi madakpan ni Saul kundi sang iya man pagkamainunungon kay Jehova kag sa iya kabalaka sa pagdala sing kadayawan sa ngalan sang Dios. (Salmo 18:1-6, 25-27, 30-32, 48-50; 57:1-11) Si David nagpabilin nga mainunungon kay Jehova bisan pa tinuig nga nangin di-makatarunganon si Saul. Dapat man kita magpabilin nga matutom kay Jehova kag sa iya organisasyon walay sapayan sang mga inhustisya nga naeksperiensiahan naton kag kon ano man ang ginabuhat sang iban. Makasalig kita nga nahibaluan gid ni Jehova ang nagakatabo.—Salmo 86:2.
8. Ano ang ginhimo sang mga Saksi ni Jehova sa Mozambique sang gintilawan ang ila pagkamainunungon kay Jehova?
8 Ang mga Cristiano sa Mozambique nagahatag sing modernong-adlaw nga halimbawa sang pila nga nangin matutom kay Jehova sang gintilawan. Sang 1984, ang ila mga minuro sulitsulit nga ginsalakay sang armado nga mga miembro sang rebelde nga hublag nga nagpangawat, nagpanunog sang mga balay, kag nagpamatay. Halos wala gid sing mahimo ining matuod nga mga Cristiano agod amligan ang ila kaugalingon. Ang mga pumuluyo sa sini nga duog ginapilit nga makigbahin sa mga hublag sang militar ukon sakdagon ini sa iban nga paagi. Nahibaluan sang mga Saksi ni Jehova nga ang paghimo sini wala nagahisanto sa ila Cristianong neutralidad. Ang ila pagpamalibad nagpaakig sa hublag sang militar. Mga 30 ka Saksi ang ginpatay sa sining magamo nga tion, apang bisan ang katalagman nga mapatay wala makabungkag sa katutom sang katawhan sang Dios. * Kaangay ni David, ginbatas nila ang mga inhustisya kag nagmadinalag-on sang ulihi.
Isa ka Nagapaandam nga Pahanumdom
9, 10. (a) Paano kita makabenepisyo gikan sa pila ka mga halimbawa sa Kasulatan? (b) Ano ang sayop sa ginhimo nanday Ananias kag Safira?
9 Ang pila ka indibiduwal nga ginsambit sa Kasulatan nagahatag sing nagapaandam nga mga pahanumdom tuhoy sa paggawi nga dapat likawan. Sa pagkamatuod, ang Biblia nagaunod sing madamo nga mga kasaysayan sang mga tawo, bisan sang mga alagad sang Dios, nga nakasala kag nag-antos sang mga resulta sini. (1 Corinto 10:11) Isa sining mga kasaysayan ang ila nanday Ananias kag Safira, ang mag-asawa nga katapo sang Cristianong kongregasyon sa Jerusalem sang unang-siglo.
10 Pagkatapos sang Pentecostes 33 C.E., kinahanglan nga amanan sing materyal nga bulig ang bag-uhan nga mga tumuluo nga nagpabilin sa Jerusalem agod makabenepisyo sila sa ila pagpakig-upod sa mga apostoles. Ang iban nga katapo sang kongregasyon nagbaligya sing pagkabutang agod maamanan ang tagsatagsa nga nagakinahanglan. (Binuhatan 2:41-45) Ginbaligya nanday Ananias kag Safira ang ila duta kag gindala nila ang bahin sang ila binaligyaan sa mga apostoles, nga nagasiling nga ang ila gindulot amo ang tanan nga kita nila sa ila pagbaligya. Matuod, wala sing espesipiko nga kantidad kon pila ang dapat nga ihatag nanday Ananias kag Safira, apang sayop ang ila motibo kag di-bunayag sila. Luyag nila nga dayawon sila sang mga apostoles kag pagguaon nga naghatag sila sing kapin sangsa matuod nga ginhatag nila. Sa bulig sang balaan nga espiritu, ginbuyagyag ni apostol Pedro ang ila pagkadibunayag kag pagkasalimpapaw, kag ginpatay sila ni Jehova.—Binuhatan 5:1-10.
11, 12. (a) Ano ang pila ka pahanumdom sa Kasulatan tuhoy sa pagkabunayag? (b) Ano ang mga pagpakamaayo kon bunayag ang isa?
11 Kon ginasulay kita nga mangin di-bunayag agod dayawon kita sang iban nga tawo, kabay nga ang kasaysayan nanday Ananias kag Safira mangin serioso nga pahanumdom sa aton kon ano ang indi naton dapat paghimuon. Ayhan malimbungan naton ang aton mga isigkatawo, apang indi naton malimbungan si Jehova. (Hebreo 4:13) Sulitsulit nga ginapahanumdom kita sang Biblia nga mangin bunayag sa isa kag isa, kay ang mga butigon wala sing duog sa duta nga wala na sing pagkadimatarong. (Hulubaton 14:2; Bugna 21:8; 22:15) Maathag kon ngaa subong sini. Ang kabutigan nagahalin kay Satanas nga Yawa.—Juan 8:44.
12 Ang pagkabuhi sing bunayag may madamong pagpakamaayo. Lakip sa sini ang matinlo nga konsiensia kag ang kalipay nga ginasaligan ka sang iban. Sa madamo nga kaso, ang mga Cristiano nakakita sing trabaho ukon nakapabilin sa ila trabaho, bangod bunayag sila. Apang ang labing importante sa tanan, amo nga mangin abyan naton ang Labing Gamhanan nga Dios kon bunayag kita.—Salmo 15:1, 2.
Pagpabilin nga Putli
13. Ano nga kahimtangan ang gin-atubang ni Jose, kag ano ang iya ginhimo?
13 Si Jose, nga anak sang patriarka nga si Jacob, ginbaligya subong ulipon sa edad nga 17 anyos. Nangin suluguon sia sa panimalay ni Potifar, isa ka opisyal sang hukmanan sa Egipto, kag didto natalupangdan sia sang asawa sang iya agalon. Luyag niya makighulid kay Jose, nga isa ka maambong nga pamatan-on, kag adlaw-adlaw ginasilingan niya sia: “Hulid ka sa akon.” Si Jose malayo sa iya pamilya kag nagapuyo sa isa ka pungsod nga wala gid sing nakakilala sa iya. Mahapos lang para sa iya nga makigrelasyon sa sini nga babayi nga indi mahibaluan sang iban nga mga tawo. Apang, sang ginbuyutan sia sang asawa ni Potifar, nagdalagan si Jose.—Genesis 37:2, 18-28; 39:1-12.
14, 15. (a) Ngaa makapainteres sa aton ang sugilanon ni Jose? (b) Ngaa mapinasalamaton gid ang isa ka Cristianong babayi nga ginpamatian niya ang mga pahanumdom sang Dios?
14 Si Jose nagdaku sa isa ka pamilya nga mahinadlukon sa Dios, kag nahangpan niya nga sayop ang seksuwal nga relasyon sa tunga sang mga indi mag-asawa. “Paano ako makahimo sining daku nga kalainan kag magpakasala batok sa Dios?” pamangkot niya. Ang iya desisyon mahimo nga suno sa iya ihibalo sa talaksan sang Dios nga ginpatok sa Eden para sa mga tawo, nga amo ang monogamya. (Genesis 2:24) Makabenepisyo ang katawhan sang Dios karon paagi sa pagpamalandong kon ano ang ginhimo ni Jose sa amo nga kahimtangan. Sa pila ka duog, ginatugutan ang seksuwal nga mga relasyon amo nga ang mga pamatan-on nga wala nagahimo sing imoralidad ginayaguta sang ila mga katubotubo. Ang pagpakighilahi kinaandan na lamang sa mga adulto. Busa, ang kasaysayan ni Jose isa gid ka importante nga pahanumdom karon para sa aton. Wala nagbag-o ang talaksan sang Dios nga ang pagpakighilawas kag panghilahi sala. (Hebreo 13:4) Madamo sa mga nagpadaug sa pag-ipit nga naghimo sing ginadumilian nga paghuliray ang nagaugyon nga may makapakumbinsi gid nga rason kon ngaa indi ini dapat paghimuon. Lakip sa di-maayo nga mga resulta ang pagbatyag sing kahuya, ginatublag nga konsiensia, mga kahisa, pagbusong, kag mga balatian nga ginapalaton paagi sa seksuwal nga pagpakigrelasyon. Subong sang ginapahanumdom sa aton sang Kasulatan, ang tawo nga nagapakighilawas “nagapakasala batok sa kaugalingon niya nga lawas.”—1 Corinto 5:9-12; 6:18; Hulubaton 6:23-29, 32.
15 Si Jenny, * nga isa ka di-minyo nga Saksi ni Jehova, mapinasalamaton gid sa mga pahanumdom ni Jehova. Sa ulubrahan, ginapakita sang iya maambong nga kaupod sa trabaho nga may luyag ini sa iya. Sang wala sia ginsapak ni Jenny, gindugangan pa gid sang lalaki ang paghatag sing atension sa iya. “Ginbudlayan gid ako sa pagpabilin nga putli,” gin-ako niya, “kay nalipay ka man kon pakitaan ka sang espesyal nga atension sang isa ka lalaki.” Apang, narealisar niya nga luyag lamang sang lalaki nga idugang sia sa listahan sang iya karelasyon nga mga babayi. Sang mabatyagan niya nga nagaluya ang iya panindugan nga pamatukan ini, nag-ampo sia kay Jehova nga buligan sia nga makapabilin nga matutom sa Iya. Nasapwan ni Jenny nga ang iya mga natun-an sa iya pagpanalawsaw sa Biblia kag sa Cristianong mga publikasyon kaangay sa mga pahanumdom nga nagpabugtaw sa iya agod magmabinantayon. Isa sining mga pahanumdom ang sugilanon ni Jose kag sang asawa ni Potifar. “Samtang sulitsulit nga ginapahanumdom ko ang akon kaugalingon sang akon daku nga gugma kay Jehova,” siling niya, “makasalig ako nga indi ako makahimo sining daku nga kalainan kag magpakasala batok sa iya.”
Pamatii ang mga Pahanumdom Sang Dios!
16. Paano kita makabenepisyo sa pagrepaso kag pagpamalandong sa kabuhi sang mga indibiduwal nga ginsambit sa Biblia?
16 Madugangan naton tanan ang aton apresasyon sa mga talaksan ni Jehova paagi sa pagpanikasog nga mahangpan kon ngaa gintipigan niya ang pila ka kasaysayan sa Kasulatan para sa aton. Ano ang ginatudlo sini? Ano nga mga kinaiya ukon mga huyog ang ginpakita sang mga karakter sa Biblia nga dapat naton ilugon ukon likawan nga himuon? Ginatos ka indibiduwal ang narekord sa Pulong sang Dios. Ang tanan nga nagahigugma sa instruksion sang Dios makapanginpulos kon palambuon nila ang handum para sining nagahatag-kabuhi nga kaalam, lakip ang mga leksion nga matun-an naton gikan sa mga halimbawa nga gintipigan gid ni Jehova. Ini nga magasin, masami nga nagapagua sing mga artikulo tuhoy sa mga indibiduwal nga ang sugilanon sa kabuhi may matudlo sa aton. Ngaa indi maghinguyang sing tion nga basahon ini liwat?
17. Ano ang ginabatyag mo tuhoy sa mga pahanumdom ni Jehova, kag ngaa?
17 Mapinasalamaton gid kita sa mahigugmaon nga pag-ulikid nga ginapakita ni Jehova sa mga nagatinguha nga himuon ang iya kabubut-on! Indi kita himpit, subong nga ang mga lalaki kag mga babayi nga ginsambit sa Biblia indi man himpit. Apang, ang nasulat nga rekord sang ila mga binuhatan isa gid ka mapuslanon nga manggad para sa aton. Paagi sa pagpamati sa mga pahanumdom ni Jehova, malikawan naton ang serioso nga mga sala, kag mailog naton ang maayo nga mga halimbawa sang mga naglakat sa dalanon sang pagkamatarong. Kon himuon naton ini, makaamba man kita kaangay sang salmista: “Malipayon ang mga nagatuman sa mga pahanumdom [ni Jehova]; nga nagapangita sa iya sa bug-os nga tagipusuon. Gintuman sang akon kalag ang imo mga pahanumdom, kag ginahigugma ko ini sing lakas.”—Salmo 119:2, 167.
[Mga nota]
^ par. 8 Tan-awa ang 1996 Tuigan nga Libro Sang mga Saksi ni Jehova, pahina 160-2.
^ par. 15 Gin-islan ang ngalan.
Ano ang Imo Sabat?
• Ano ang matun-an naton gikan sa panimuot ni David kay Saul?
• Ano ang ginatudlo sa aton sang kasaysayan nanday Ananias kag Safira?
• Ngaa makapainteres sa aton karon ang sugilanon sang kabuhi ni Jose?
[Mga Pamangkot sa Pagtinuon]
[Retrato sa pahina 26]
Ngaa nangindi si David nga patyon si Saul?
[Retrato sa pahina 27]
Ano ang matun-an naton tuhoy sa kasaysayan nanday Ananias kag Safira?
[Retrato sa pahina 28]
Ano ang nagbulig kay Jose nga sikwayon ang imoral nga panghaylo?
