Isa ka Leksion Tuhoy sa Bugal kag Pagkamapainubuson

ANG isa ka hitabo sa kabuhi ni Hari David nagapadaku sang kinatuhayan sang matuod nga pagkamapainubuson kag sang malaut nga bugal. Natabo ini sa tapos nga nalutos ni David ang Jerusalem kag ginhimo ini nga iya kapital nga siudad. Gintamod ni David si Jehova subong amo ang matuod nga Hari sang Israel, gani naghimo sia sing kahimusan nga ang Kaban, nga nagasimbulo sang presensia sang Dios, madala sa siudad. Ini nga okasyon tuman gid ka importante para kay David amo nga ginpakita niya sa tanan ang iya kalipay samtang nagasunod sia sa mga saserdote nga nagadala sang Kaban. Nakita sang mga pumuluyo sang Jerusalem ang ila hari nga “nagatumbo” kag “nagasaot sa bug-os niya nga kusog.”—1 Cronica 15:15, 16, 29; 2 Samuel 6:11-16.

Apang, ang asawa ni David nga si Mical wala nagbuylog sa sining malipayon nga prosesyon. Naggawa sia sa bintana, apang sa baylo nga dayawon ang paagi ni David sa pagdayaw kay Jehova, “gintamay niya sia sa iya tagipusuon.” (2 Samuel 6:16) Ngaa amo sini ang ginbatyag ni Mical? Maathag nga sobra gid ang iya pagpabugal kay anak sia ni Saul, ang una nga hari sang Israel, kag karon asawa sia sang ikaduha nga hari sang Israel. Ayhan sa pamatyag niya ang iya bana nga amo ang hari, dapat wala nagpanubo sang iya kaugalingon kaupod sang ordinaryo nga mga tawo kag nagbuylog sa ila pagkinasadya. Ginpadayag niya ini nga pagkabugalon sa iya paagi sa pagtamyaw kay David sang magpauli ini. Mayubiton nga nagsiling sia: “Daw ano ka mahimayaon ang hari sang Israel karon sang maghublas sia karon sa panulok sang ulipon nga mga babayi sang iya mga alagad, subong sang isa sa mga tawo nga kulangkulang nga naghublas sang iya kaugalingon!”—2 Samuel 6:20.

Ano ang reaksion ni David sa sini nga pagyubit? Ginsabdong ni David si Mical paagi sa pagsiling nga ang iya amay nga si Saul ginsikway ni Jehova, kag sa baylo sia ang ginpili. Si David nagdugang: “Ako magamalaut pa sangsa sini, kag magakubos sa akon kaugalingon nga itululok; apang sa ulipon nga mga babayi nga ginpamulong mo, sa ila pagapasidunggan ako.”—2 Samuel 6:21, 22.

Huo, determinado si David nga padayon nga alagaron si Jehova sing mapainubuson. Ining panimuot nagabulig sa aton sa paghangop kon ngaa gintawag ni Jehova si David nga “isa ka tawo nga kalahamut-an sa akon tagipusuon.” (Binuhatan 13:22; 1 Samuel 13:14) Ang matuod, ginailog ni David ang pinakamaayo nga halimbawa sang pagkamapainubuson—ang iya ni Jehova nga Dios mismo. Sing makawiwili, ang ekspresyon nga gingamit ni David sang ginsilingan niya si Mical nga ‘ako magakubos’ naghalin sa Hebreong gamot nga berbo nga ginagamit man agod ilaragway ang pagtamod mismo sang Dios sa katawhan. Bisan pa si Jehova ang labing daku nga Persona sa uniberso, ang Salmo 113:6, 7 nagalaragway sa iya subong ‘nagapaubos [pagpanaug sa isa ka ranggo ukon posisyon agod makig-angot sa isa nga kubos] sa pagtulok sa langit kag duta, ginabangon niya ang kubos gikan sa yab-ok; ginabayaw niya ang imol gikan sa buho sang abo.’

Si Jehova mapainubuson, gani indi katingalahan nga ginadumtan niya ang “palabilabihon nga mga mata” sang bugalon nga mga tawo. (Hulubaton 6:16, 17) Bangod sa pagpakita sining malaut nga kinaiya kag di-pagtahod sa pinili sang Dios nga hari, nawasi ni Mical ang pribilehiyo nga magbun-ag sing anak nga lalaki kay David. Napatay sia nga wala sing anak. Daw ano ini ka mapuslanon nga leksion para sa aton! Ang tanan nga luyag sang kahamuot sang Dios dapat magsunod sining mga pinamulong: “Magpangwagkus kamo sa inyo kaugalingon sing mapainubuson nga panghunahuna sa isa kag isa, bangod ang Dios nagasumpong sang mga bugalon, apang nagahatag sing di-bagay nga kaayo sa mga mapainubuson.”—1 Pedro 5:5.