Isa ka Masaligan nga Tuytoy Padulong sa Kalipay

“ANG pagtinguha sa Kalipay” kinamatarong sang tanan nga tawo. Amo sina ang pagtamod sang mga nagbalay sang Declaration of Independence sang Estados Unidos sang Amerika. Apang indi masiling nga nalab-ot mo na ang isa ka tulumuron kon ginatinguhaan mo pa lang ina. Bisan pa madamo nga pamatan-on ang nagapalambo sing kinaadman sa kalingawan kag isport, pila ang nahibaluan mo nga aktual nga nakatigayon sing kadalag-an nga ginahandum gid nila? “Mahimo nga indi ka magmadinalag-on,” siling sang isa ka bantog nga umalamba nga nakahibalo kon ano nga panikasog ang nadalahig agod mangin isa ka madinalag-on nga musikero.

Kon subong sina ang ginabatyag mo sa pagpangita sing kalipay, indi ka dapat maluyahan sing buot. Kon pangitaon mo ang kalipay sa husto nga paagi, matigayon mo ini. Ngaa masiling ina? Ginsambit sa nagligad nga artikulo ang tuhoy sa “malipayon nga Dios,” nga si Jehova. (1 Timoteo 1:11) Paagi sa Biblia, nagahatag ang Dios sing panuytoy agod nga indi ikaw mapaslawan sa imo pagpangita sing kalipay. Mabuligan ka ni Jehova kon paano landason ang kinaandan nga mga kabangdanan sang kasubo. Subong isa ka halimbawa, binagbinaga ang lugpay nga ginatanyag niya sa imo kon mapatay ang isa nga ginahigugma mo.

Kon Mapatay ang Isa nga Ginahigugma Mo

May masiling bala nga maayo tuhoy sa kamatayon? Ginabulag sang kamatayon ang mga ginikanan gikan sa mga anak kag ang mga anak gikan sa mga ginikanan. Ginabulag sini ang suod nga mga mag-abyan kag nagadulot sing pagkawalay kalig-unan sa tunga sang suod nga mga pumuluyo. Kon magbunal ang kamatayon, mahimo nga madaug sang kasubo ang isa ka malipayon nga pamilya.

 Indi ka na dapat pagsugiran pa nga ang kamatayon isa ka trahedya. Apang, ini nga katunayan ginapanghiwala sang iban nga mga tawo kag ginalaragway nila ang kamatayon subong isa ka pagpakamaayo. Talupangda kon ano ang natabo pagkatapos magwaswas ang Bagyo Katrina sa Gulpo sang Mexico sang Agosto 2005. Sa lubong sang isa ka biktima, nagsiling ang ministro: “Wala sia ginpatay ni Katrina. Ginkuha sia sang Dios.” Sa lain naman nga hitabo, ginsingganan sang isa ka mahinuklugon nga klerk sa ospital ang isa ka anak nga babayi nga indi sia magkabalaka, kay ginkuha sang Dios ang iya iloy agod makaupod niya sa langit. Naghibi ang anak nga babayi: “Ngaa ginkuha niya sia sa akon?”

Maathag nga ining sayop nga mga ideya tuhoy sa patay masami nga wala nagalugpay sa mga namatyan. Ngaa? Bangod indi ini matuod. Malain pa, ginalaragway nila ang Dios nga nagapang-agaw sang mga hinigugma gikan sa mga pamilya kag mga abyan sa makakulugmat kag masakit nga paagi. Sa baylo nga nagahatag sing lugpay, ginalaragway nila ang Dios subong isa ka kriminal sa trahedya sang kamatayon. Apang ginasugid sang Pulong sang Dios ang kamatuoran tuhoy sa kamatayon.

Ginatawag sang Biblia ang kamatayon subong kaaway. Ginapaanggid sini ang kamatayon sa isa ka hari nga nagagahom sa katawhan. (Roma 5:17; 1 Corinto 15:26) Ang kamatayon isa ka kaaway nga may daku gid nga gahom nga indi mapamatukan sang tawo, kag ang tagsa ka hinigugma nga nagakapatay dugang lamang sa indi maisip nga mga biktima sang kamatayon. Matuod gid man ining ginasiling sang Biblia kay kon mamatyan kita sing hinigugma nagakasubo kita kag wala sing mahimo. Ginapakita sini nga normal lamang ini nga mga balatyagon. Apang, ginagamit bala sang Dios ang kaaway nga kamatayon agod dalhon sa langit ang aton mga hinigugma? Tugutan naton ang Biblia nga sabton ina.

Ang Manugwali 9:5, 10 nagasiling: “Nahanungod sa mga patay, wala sila makahibalo sing bisan ano . . . Sa Sheol nga imo ginakadtuan walay buluhaton ukon pahito ukon ihibalo ukon kaalam.” Ano ang Sheol? Amo ini ang kabilugan nga lulubngan sang katawhan nga ginakadtuan sang mga tawo kon mapatay sila. Sa sulod sang lulubngan, indi sila aktibo, wala sila nagahulag, indi makabatyag, ukon indi makahunahuna sing bisan ano. Daw nagakatulog sila sing hamuok gid. * Gani, maathag nga ginapakita sang Biblia nga wala ginakuha sang Dios ang aton napatay nga mga hinigugma agod makaupod niya sa langit. Bangod sang kamatayon, nagapabilin sila nga wala sing kabuhi sa lulubngan.

Ginpakita ni Jesus nga matuod ini sang mapatay ang iya abyan nga si Lazaro. Ginpaanggid ni Jesus ang kamatayon sa pagtulog. Kon si Lazaro nagkadto sa langit agod makaupod sang Labing Gamhanan nga Dios, wala si Jesus nagpakita sing kaayo kon ginbanhaw niya si Lazaro nga mapatay man lang gali liwat sa ulihi. Ang inspirado nga rekord nagasiling nga sa atubang sang lulubngan, mabaskog nga nagsinggit si Jesus: “Lazaro, gua ka!” Nagsiling pa ang Biblia: “Ang tawo nga napatay naggua.” Liwat nga nagkabuhi si Lazaro. Nahibaluan ni Jesus nga wala gid magbiya si Lazaro sa duta. Nahamyang sia nga walay kabuhi sa sulod sang lulubngan.—Juan 11:11-14, 34, 38-44.

Ini nga hitabo nga narekord sa Biblia nagabulig sa aton sa paghangop nga ang kamatayon indi isa ka paagi nga ginagamit sang Dios agod isaylo ang mga tawo gikan sa duta pa langit. Gani,  makapalapit kita sa Dios, kay nahibaluan naton nga indi sia ang kabangdanan sang aton kasubo. Makasalig man kita nga nahangpan niya sing bug-os ang kasubo kag ang halit nga ginatuga sa aton sang kaaway nga kamatayon. Kag ginapamatud-an sang kamatuoran sa Biblia tuhoy sa kahimtangan sang mga patay nga wala sila nagaantos sa kalayuhon nga impierno ukon purgatoryo kundi walay kabuhi sa sulod sang lulubngan. Gani, wala kita nagakangil-ad sa Dios ukon nagakahangawa kon basi diin na sila, kon hinumdumon naton ang aton napatay nga mga hinigugma. Paagi sa Biblia, nagatanyag si Jehova sa aton sing dugang pa nga lugpay.

Ang Paglaum Nagadul-ong sa Kalipay

Ang mga teksto nga nabinagbinag naton nagatudlo sa paglaum, isa ka importante nga bahin sang matuod nga kalipay. Ang tinaga nga “paglaum” suno sa paggamit sang Biblia nagapahangop sing malaumon nga pagpaabot sing maayo. Agod mahangpan naton karon kon paano ang paglaum makadul-ong sa kalipay, balikan naton ang rekord tuhoy sa pagbanhaw ni Jesus kay Lazaro.

May mga duha ka rason kon ngaa ginhimo ni Jesus yadto nga milagro. Ang isa amo agod dulaon ang kasubo nanday Marta, Maria, kag sang nagakasubo nga mga abyan. Makaupod nila liwat ang ila hinigugma. Apang, ginsambit ni Jesus kay Marta ang ikaduha kag mas importante nga rason: “Wala bala ako magsiling sa imo nga kon magpati ka makita mo ang himaya sang Dios?” (Juan 11:40) Ang The New Testament in Modern English, ni J. B. Phillips, nagbadbad sang naulihi nga mga dinalan subong “ang kalatingalahan sang kon ano ang sarang mahimo sang Dios.” Paagi sa pagbalik sang kabuhi ni Lazaro, naghatag si Jesus sing laragway kon ano ang mahimo kag pagahimuon ni Jehova nga Dios sa palaabuton. Yari ang dugang pa nga mga detalye nahanungod sining “kalatingalahan sang kon ano ang sarang mahimo sang Dios.”

Sa Juan 5:28, 29, nagsiling si Jesus: “Indi kamo matingala sa sini, bangod magaabot ang tion nga ang tanan nga yara sa handumanan nga mga lulubngan makabati sang iya tingog kag magagua.” Nagakahulugan ini nga ang tanan nga patay nga yara sa Sheol, lakip ang aton mga hinigugma, mabuhi liwat. Ang Binuhatan 24:15 nagasugid sing dugang pa nahanungod sining makatilingala nga okasyon, sa pagsiling: “May pagkabanhaw sang mga matarong kag mga di-matarong.” Gani bisan ang “mga di-matarong,” ang madamo nga indibiduwal nga wala makakilala kag mag-alagad kay Jehova, makatigayon sing kahigayunan sa palaabuton nga matigayon ang kahamuot sang Dios.

Diin mahanabo ining pagkabanhaw? Ang Salmo 37:29 nagasiling: “Ang mga matarong magapanag-iya sang duta, kag magapuyo sila sing dayon sa sini.” Hunahunaa kon ano ang kahulugan sina! Ang mga pamilya kag mga abyan nga ginbulag sang kamatayon magakitaay liwat diri sa duta. Samtang ginahanduraw mo ang makalilipay nga mga tinion nga makaupod liwat ang mga tawo nga gusto mo gid sang una, dapat lamang nga malipay ka.

Luyag ni Jehova nga Magmalipayon Ka

Nabinagbinag naton ang duha ka paagi nga ginagamit ni Jehova agod magmalipayon ka walay sapayan sang imo mga problema. Una, paagi sa Biblia, nagaaman sia sing ihibalo kag panuytoy agod buligan ka nga atubangon ang mga problema sing madinalag-on. Luwas sa pagbulig sa aton kon paano malandas ang kasubo nga mamatyan, makabulig man sa aton ang laygay sang Biblia kon paano atubangon ang mga problema sa pangabuhi kag panglawas. Makahatag ini sa imo sing kusog agod mabatas ang inhustisya kag kagamo nga nagaluntad sa katilingban. Kag kon iaplikar mo ang panuytoy sini sa imo kabuhi, makabulig ini sa imo sa pag-atubang sang iban pa nimo nga mga problema.

Ikaduha, paagi sa pagtuon sa Biblia, matigayon mo ang paglaum nga labaw gid sangsa bisan ano nga ginatanyag sang tawo. Ang pagkabanhaw sang mga abyan kag pamilya bahin sang paglaum nga ginatudlo sang Biblia. Ang Bugna 21:3, 4 nagahatag sing dugang pa nga mga detalye: “Ang Dios gid magaupod sa [katawhan]. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.” Nagakahulugan ini nga sa indi madugay madula na sing dayon ang bisan ano nga ginabangdan sang imo kasubo. Ang ginasaad sang Biblia magamatuod, kag maeksperiensiahan mo ang katumanan sini. Makapaumpaw bisan ang mahibaluan lamang nga nagahulat sa aton sa palaabuton ang mas maayo nga  mga tion. Malipayon kita bangod nahibaluan naton nga indi kita magaantos sing dayon kon mapatay kita.

Sa pag-ilustrar: Sang nagligad nga pila ka tuig, nakita ni Maria ang masakit nga pagkapatay sang iya bana bangod sa kanser. Wala pa sila maumpawi sa sini sang mapilitan sia kag ang iya tatlo ka anak nga babayi nga maghalin sa ila balay bangod sang problema sa pinansial. Pagligad sang duha ka tuig, natukiban ni Maria nga may kanser man sia. Napaidalom sia sa duha ka serioso nga operasyon kag nagapakigbato sa tuman nga kasakit kada adlaw. Walay sapayan sini nga mga problema, positibo gid sia sa iya panghunahuna amo kon ngaa ginapalig-on pa gani niya ang iban nga mga tawo. Ngaa malipayon gihapon sia?

Nagsiling si Maria: “Kon may problema gani ako, wala ko ini ginapalibugan. Ginalikawan ko ang mamangkot sing subong sini: ‘Ngaa ako pa? Ngaa nagaantos ako sini? Ngaa nagmasakit ako?’ Makapaluya ang negatibo nga panghunahuna. Sa baylo, ginagamit ko ang akon kusog sa pag-alagad kay Jehova kag sa pagbulig sa iban. Nagahatag ina sa akon sing kalipay.”

Ano ang nabulig sang paglaum sa kabuhi ni Maria? Ginalauman niya ang palaabuton nga dulaon na ni Jehova ang balatian kag iban pa nga mga problema gikan sa katawhan. Kada magpaospital sia agod magpabulong, ginapaambit niya ina nga paglaum sa iban nga mga pasyente nga may kanser, nga mahimo nadulaan na sing paglaum. Daw ano ka importante ang paglaum kay Maria? Nagsiling sia: “Pirme ko ginahunahuna ang ginasiling sang Biblia sa Hebreo 6:19, diin ginalaragway ni Pablo ang paglaum subong angkla para sa kalag. Kon wala sina nga angkla, mahimo ka maanod kaangay sang barko sa tunga sang bagyo. Apang kon nahigot ka sa sina nga angkla, mangin mabakod ka walay sapayan sang maunos nga mga problema nga ginaatubang mo.” Ina nga “paglaum sa kabuhi nga walay katapusan nga ginsaad sang Dios, nga indi makabutig” nakabulig kay Maria sa pagpabilin nga malipayon. Amo man ang mahimo sini para sa imo.—Tito 1:2.

Paagi sa pagtuon sa Biblia, makasapo ka sing matuod nga kalipay walay sapayan sang imo mga problema. Apang, mahimo nga may mga pamangkot ka tuhoy sa praktikal nga mga aspekto sini. Malipay ang mga Saksi ni Jehova nga ipakita sa imo ang Makasulatanhon nga mga sabat nga ginakinahanglan mo agod mangin malipayon gid ikaw. Samtang ginahulat mo ang katumanan sang paglaum nga ginatanyag ni Jehova, mahimo ikaw mangin isa sa ginlaragway sing subong sini: “Magaagom sila sing kasadya kag kalipay, kag ang kasubo kag ang panghayhay magapalagyo.”—Isaias 35:10, King James Version.

[Nota]

[Retrato sa pahina 7]

Makapahalipay ang ginalauman nga pagkabanhaw nga ginasambit sa Biblia