Mga Pamangkot Gikan sa mga Bumalasa

Ano ang buot silingon ni Jesus sang ginsilingan niya si Nicodemo nga: “Wala sing tawo nga nakasaka sa langit kundi sia nga nagpanaug gikan sa langit, ang Anak sang tawo”?—Juan 3:13.

Si Jesus yari sadto sa duta, kag wala pa sia makakayab, ukon makabalik sa langit. Apang, ang aton nahibaluan tuhoy kay Jesus kag ang konteksto sang iya mga pinamulong makabulig sa aton nga mahangpan ang iya buot silingon.

Si Jesus “nagpanaug gikan sa langit” kay nagpuyo sia anay sa duog sang mga espiritu upod sa iya Amay, apang sa gintalana nga tion, ang kabuhi sang Anak ginsaylo sa taguangkan ni Maria, nga nagresulta sa pagkabun-ag kay Jesus subong isa ka tawo. (Lucas 1:30-35; Galacia 4:4; Hebreo 2:9, 14, 17) Sa tapos sia mapatay, pagabanhawon si Jesus subong isa ka espiritu nga tinuga kag magabalik liwat upod kay Jehova. Busa, wala madugay antes sia ginpatay, si Jesus nagpangamuyo: “Amay, himayaa ako upod sa imo sing himaya nga yara sa akon sadto upod sa imo sang wala pa ang kalibutan.”—Juan 17:5; Roma 6:4, 9; Hebreo 9:24; 1 Pedro 3:18.

Sang nagpakigsugilanon si Jesus kay Nicodemo, nga isa ka Fariseo kag manunudlo sa Israel, si Jesus wala pa makabalik sa langit. Sa pagkamatuod, wala sing iban pa nga tawo nga napatay kag nagkayab sa duog sang mga espiritu, sa langit. Si Jesus mismo nagsiling nga wala sing kaangay si Juan Bautista subong manalagna sang Dios, apang “ang tawo nga kubos sa ginharian sang langit daku pa sa iya.” (Mateo 11:11) Kag ginpaathag ni apostol Pedro nga bisan ang matutom nga si Hari David napatay kag yara sia gihapon sa iya lulubngan; si David wala nagpalangit. (Binuhatan 2:29, 34) May rason kon ngaa ang mga tawo sang pagtuo nga napatay antes kay Jesus, subong nanday David, Juan Bautista, kag iban pa, wala nagpalangit. Napatay sila antes ginbuksan ni Jesus ang paagi ukon kahigayunan nga mabanhaw ang mga tawo padulong sa langitnon nga kabuhi. Si apostol Pablo nagsulat nga si Jesus, kaangay sang isa ka tig-una, ‘nagbukas . . . sang dalanon nga bag-o kag buhi’ pakadto sa langit.—Hebreo 6:19, 20; 9:24; 10:19, 20.

Sanglit si Jesus wala pa mapatay kag mabanhaw, ano ang buot niya silingon sang magsiling sia kay Nicodemo: “Wala sing tawo nga nakasaka sa langit kundi sia nga nagpanaug gikan sa langit, ang Anak sang tawo”? (Juan 3:13) Binagbinaga ang konteksto ukon kon ano ang ginahinun-anunan ni Jesus kag ni Nicodemo.

Sang ining Judiyo nga manuggahom nagkadto kay Jesus sa kagab-ihon, si Jesus nagsiling sa iya: “Sa pagkamatuod nagasiling ako sa imo, Kon ang isa indi mabun-ag liwat, indi niya makita ang ginharian sang Dios.” (Juan 3:3) Bilang sabat, namangkot si Nicodemo: ‘Paano ina matabo? Paano mabun-ag ang isa ka tawo sa ikaduha nga tion?’ Wala niya mahangpan ining diosnon nga panudlo tuhoy sa pagkabuhi sa Ginharian sang Dios. May paagi bala nga mahangpan niya ini? Wala, kon sa pagtamod lamang sang tawo; bangod wala pa sing tawo nga nakapalangit kag makapaathag sa iya sang bisan ano nahanungod sa pagsulod sa Ginharian. Ang lamang nga makahimo sini amo si Jesus. Matudluan niya si Nicodemo kag ang iban pa bangod nagpanaug Sia gikan sa langit kag kalipikado sa pagtudlo sa mga tawo tuhoy sining mga butang.

Ang pamangkot sa sining teksto nagailustrar sang isa ka importante nga punto tuhoy sa pagtuon sa Pulong sang Dios. Indi makatarunganon nga duhaduhaan ang isa ka teksto bangod lamang daw mabudlay ini hangpon. Ang ginasiling sa isa ka teksto sang Biblia dapat hangpon sa bulig sang iban pa nga mga teksto kag dapat nagahisantuanay ini. Dugang pa, masami nga ang konteksto—ang kahimtangan ukon ano ang ginahinun-anunan—makabulig sa aton nga makita ang makatarunganon kag lohiko nga kahulugan sang isa ka makalilibog nga teksto.