‘Ang Labing Maayo nga Pagtapos sa Hayskul Para sa Akon’

ANG isa ka maestro sa Espanya nagsulat: “Sa sulod sang kapin sa isa ka gatos ka tuig, ginpakita sang mga Saksi ni Jehova ang tunay nga paghiusa, indi maduhaduhaan nga pagkabunayag, kag labaw sa tanan, di-malingkang nga pagtuo.” Ano ang nagtiklod sa sini nga maestro nga ihambal ini bisan pa nga ateista sia?

Nagsugod ini sang si Noemí, nga isa ka estudyante sa hayskul kag isa sa mga Saksi ni Jehova, gin-asaynan nga magsulat sing isa ka salaysay subong bahin sang ila katapusan nga eksaminasyon sa hayskul. Nagdesisyon sia nga magsulat tuhoy sa tema nga “Ang Purpura nga mga Trayanggulo sa Idalom Sang Paggahom Sang mga Nazi.”

Ngaa ini nga tema ang iya ginpili? Si Noemí nagpaathag: “Bangod usisaon ini sang akon maestro, napensaran ko nga kahigayunan ko na ini nga mapanaksihan sia. Natandog gid ako sang sugilanon kon paano ang mga Saksi ni Jehova sa Nazi sa Alemanya malig-on nga naghupot sang ila integridad. Nagapati ako nga subong man sini ang batyagon sang iban.”

Ang salaysay ni Noemí nagtandog sa mas madamo nga tawo sangsa ginhunahuna niya. Sang Oktubre 5, 2002, ang iya salaysay ginpremyuhan sa isa ka paindis-indis sa bug-os nga pungsod para sa pagpanalawsaw sa siensia kag katilingban. Ang mga premyo sa sini nga paindis-indis ginhatag sang hurado nga ginatapuan sang 20 ka iskolar kag manunudlo gikan sa kilala nga mga unibersidad sa Espanya.

Nabaton ni Noemí ang iya premyo gikan kay Pilar del Castillo, ang direktor sang edukasyon sa Espanya. Gingamit ni Noemí ini nga kahigayunan agod hatagan ang direktor sing kopya sang video nga Jehovah’s Witnesses Stand Firm Against Nazi Assault. Ginbaton sang direktor ang iya regalo.

Sa lugar naman ni Noemí sa Manresa, ginbalhag sang lokal nga pamantalaan ang pagdaug ni Noemí kag ginrepaso sini ang kaundan sang iya salaysay. Sa amo man nga tion ang prinsipal sang iya eskwelahan nagpangayo sing kopya sang iya salaysay agod malakip ini sa programa sa pagsaulog sang ika-75 nga anibersaryo sang eskwelahan.

“Amo ini ang labing maayo nga pagtapos sa hayskul para sa akon,” siling ni Noemí. Nalipay gid ako sang nabasa ko ang mga tinaga nga ginsulat sang akon maestro nga si G. Jorge Tomás Calot, subong bahin sang iya introduksion sa akon report:

“‘Atiesta ako, apang luyag ko magpati nga nagaluntad ining Supremo nga Persona, nga nagapahulag sa iya mga sumilimba nga magpakita sang matuodtuod gid nga “gugma sa isigkatawo.”’”