Ang Pagduaw nga Nagresulta sing Pagbag-o

“NALANGKAG gid ako nga sugiran ang akon pamilya tuhoy sa duha ka ‘anghel’ nga ginpadala sang Dios sa akon.” Amo ini ang sulat sang isa ka lalaki nga ginduaw sang duha ka pamatan-on nga babayi nga mga Saksi ni Jehova. Mga pila ka semana antes sila nagduaw, ang asawa sining lalaki napatay pagkatapos sang 45 ka tuig nila nga pag-upod. Tuman gid ang iya kalisod. Ginlugpayan sia sang iya adulto na nga mga kabataan, apang sa malayo sila nagapuyo. Wala gid sing abyan ukon kaingod nga nagduaw sa iya.

“Pamatyag ko indi na ako suod sa Dios, gani wala na ako nagapangamuyo,” siling sang lalaki sa mga pamatan-on sang magduaw sila sa iya. Apang, mahinuklugon sila kag ginbilinan nila sia sing isa ka gamay kag pasad-sa-Biblia nga tract nga natig-uluhan Ano ang Paglaum Sang Napatay nga mga Hinigugma? Ginbasa niya ini sina nga gab-i kag nalugpayan sia.

Mga pila ka adlaw sang ulihi, nagbalik ining duha ka Saksi ni Jehova. Nadumduman nila kon daw ano sia kasubo sang una nila nga pagduaw gani nagbalik sila agod kamustahon sia. “Daw indi ako makapati,” sulat sining lalaki sang ulihi, “nga ginaulikdan ako sang duha ka indi ko gid kilala nga mga tawo kag nagakabalaka sila sa akon.” Napalig-on gid sia sang mga mensahe gikan sa Biblia nga ginsugid nila sa iya. Ining mga babayi nagsiling nga magaduaw sila liwat. Nalipay gid ining lalaki kag ang komento nga ginhinambit kaina nalakip sa sulat nga ginpadala niya sa Kingdom Hall sang mga Saksi ni Jehova didto.

Antes sia magsaylo sa duog nga malapit sa isa sang iya mga kabataan, ining lalaki nagtambong sa isa ka Cristianong miting sang mga Saksi ni Jehova kag nakabuylog sia sa pagkaon upod sa pamilya sang isa sa pamatan-on nga babayi nga nagduaw sa iya. Sia nagsulat: “Magabiya ako sa sini nga duog, apang pirme ko gid dumdumon sa akon mga pangamuyo ang mga pamatan-on nga nagduaw sa akon kag ang inyo simbahan. Huo, pirme na ako nagapangamuyo karon. Nakahimo ako sing isa ka daku nga pagbag-o. Daku gid ang papel sadtong mga pamatan-on sa akon pagbag-o kag mapinasalamaton gid ako sa ila.”