Ginbun-ag Sila Subong Pinili nga Pungsod sang Dios
Ginbun-ag Sila Subong Pinili nga Pungsod sang Dios
“Ikaw ang ginpili ni Jehova nga imo Dios agod mangin iya katawhan.”—DEUTERONOMIO 7:6.
1, 2. Anong gamhanan nga mga buhat ang ginhimo ni Jehova para sa iya katawhan, kag ano ang ginhimo sang mga Israelinhon wala magdugay pagkatapos nga nakagua sila sa Egipto?
SANG 1513 B.C.E., naghimo si Jehova sing isa ka bag-o nga kaangtanan upod sa iya mga alagad sa duta. Sina nga tuig, ginpakahuy-an niya ang isa ka kagamhanan sa kalibutan kag ginhilway ang mga Israelinhon gikan sa pagkaulipon. Sa paghimo sini, sia nangin Manluluwas kag Tag-iya nila. Antes maghikot, ginsilingan sang Dios si Moises: “Isiling sa mga anak ni Israel, ‘Ako si Jehova, kag pagguaon ko kamo gikan sa idalom sang mga lulan sang mga Egiptohanon kag luwason ko kamo sa kahiulipnan nila, kag tubson ko kamo sa butkon nga inuntay kag sa dalagku nga mga paghukom. Kag angkunon ko kamo nga akon katawhan, kag ako mangin inyo Dios.’”—Exodo 6:6, 7, New World Translation of the Holy Scriptures, With References, footnote; 15:1-7, 11.
2 Wala magdugay pagkatapos nga nakagua sila sa Egipto, ang mga Israelinhon nakigkatipan sa ila Dios nga si Jehova. Gani, sa baylo nga magpakig-angot sa mga indibiduwal, mga pamilya, ukon mga tribo, si Jehova may isa ka organisado nga katawhan, isa ka pungsod, sa duta. (Exodo 19:5, 6; 24:7) Ginhatagan niya ang iya katawhan sing mga kasuguan nga nagatuytoy sa ila adlaw-adlaw nga pagkabuhi kag sing labi ka importante, sa ila pagsimba. Si Moises nagsiling sa ila: “Anong daku nga pungsod ang may mga dios nga malapit sa ila subong kay Jehova nga aton Dios sa tanan nga pagtawag naton sa iya? Kag anong daku nga pungsod ang may matarong nga mga regulasyon kag hudisyal nga mga desisyon kaangay sining bug-os nga kasuguan nga ginabutang ko karon sa inyo atubangan?”—Deuteronomio 4:7, 8.
Ginbun-ag nga Isa ka Pungsod sang mga Saksi
3, 4. Ano ang importante nga rason sang pagluntad sang Israel subong isa ka pungsod?
3 Mga siglo sang ulihi, paagi sa iya manalagna nga si Isaias, ginpahanumdom ni Jehova ang mga Israelinhon sang isa ka importante nga rason sang ila pagluntad subong isa ka pungsod. Si Isaias nagsiling: “Amo ini ang ginasiling ni Jehova, ang imo Manunuga, O Jacob, kag ang imo Manughuman, O Israel: ‘Dili ka mahadlok, kay gintubos ko ikaw. Gintawag ko ikaw sa imo ngalan. Akon ikaw. Kay ako amo si Jehova nga imo Dios, ang Balaan sang Israel nga imo Manluluwas. . . . Dalha ang akon mga anak nga lalaki gikan sa malayo, kag ang akon mga anak nga babayi gikan sa ukbong sang duta, ang tagsatagsa nga ginatawag sa akon ngalan kag gintuga ko para sa akon himaya, nga ginhuman ko, huo, nga ginhimo ko. Kamo akon mga saksi,’ siling ni Jehova, ‘ang akon alagad nga ginpili ko, . . . ang katawhan nga ginhuman ko para sa akon kaugalingon, agod nga isaysay nila ang akon kadayawan.’”—Isaias 43: 1, 3, 6, 7, 10, 21.
4 Subong isa ka katawhan nga gintawag sa ngalan ni Jehova, ang mga Israelinhon magapanghikot subong mga saksi sang iya pagkasoberano sa atubangan sang mga pungsod. Sila mangin isa ka katawhan nga ‘gintuga para sa himaya ni Jehova.’ Dapat nila ‘isaysay ang kadayawan ni Jehova,’ isugid ang iya makahalawhaw nga mga buhat sang pagluwas kag busa nagahimaya sa iya balaan nga ngalan. Buot silingon, sila mangin isa ka pungsod sang mga saksi ni Jehova.
5. Sa anong paagi ang mga Israelinhon isa ka dedikado nga pungsod?
5 Sang ika-11 nga siglo B.C.E., ginpakita ni Hari Solomon nga ginhimo ni Jehova ang Israel subong napain nga pungsod. Sa pagpangamuyo kay Jehova, sia nagsiling: “Ikaw ang nagpain sa ila subong imo palanublion gikan sa tanan nga mga katawhan sang duta.” (1 Hari 8:53) Ang indibiduwal nga mga Israelinhon may yara man pinasahi nga kaangtanan kay Jehova. Antes sini, si Moises nagsiling sa ila: “Mga anak kamo ni Jehova nga inyo Dios. . . . Kay isa ikaw ka katawhan nga balaan kay Jehova nga imo Dios.” (Deuteronomio 14:1, 2) Busa, ang pamatan-on nga mga Israelinhon indi na kinahanglan magdedikar sang ila kabuhi kay Jehova. Nabun-ag sila subong mga katapo sang dedikado nga katawhan sang Dios. (Salmo 79:13; 95:7) Ang tagsa ka bag-o nga kaliwatan gintudluan sang mga kasuguan ni Jehova kag obligado nga sundon ini bangod sang katipan nga nagahigot sa mga Israelinhon kay Jehova.—Deuteronomio 11:18, 19.
Hilway sa Pagpili
6. Anong pagpili ang dapat himuon sang tagsa ka Israelinhon?
6 Bisan pa ang mga Israelinhon nabun-ag sa isa ka dedikado nga pungsod, ang tagsa ka indibiduwal dapat maghimo sing personal nga desisyon nga alagaron ang Dios. Antes sila magsulod sa Ginsaad nga Duta, si Moises nagsiling sa ila: “Ginagamit ko ang langit kag ang duta subong mga saksi batok sa inyo karon, nga ginbutang ko ang kabuhi kag kamatayon sa atubangan mo, ang pagpakamaayo kag ang pagpakamalaut; kag dapat pilion mo ang kabuhi agod padayon ka nga mabuhi, ikaw kag ang imo kaliwatan, paagi sa paghigugma kay Jehova nga imo Dios, paagi sa pagpamati sa iya tingog kag paagi sa pag-unong sa iya; kay sia ang imo kabuhi kag ang kalawigon sang imo mga adlaw, agod makapuyo ka sa duta nga ginsumpa ni Jehova sa imo mga katigulangan nga sanday Abraham, Isaac kag Jacob nga ihatag sa ila.” (Deuteronomio 30:19, 20) Busa, dapat pilion sang tagsa ka Israelinhon nga higugmaon si Jehova, pamatian ang iya tingog, kag unungan sia. Sanglit may kahilwayan sa pagpili ang mga Israelinhon, dapat nila batunon ang mga resulta sang ila ginpili.—Deuteronomio 30:16-18.
7. Ano ang natabo pagkatapos nga nagkalamatay ang kaliwatan ni Josue?
7 Ang panahon sang mga Hukom maathag nga nagailustrar sang mga epekto sang pagkatutom kag sang pagkadimatutom. Antes magsugod ining panahon, ginsunod sang mga Israelinhon ang maayo nga halimbawa ni Josue kag ginpakamaayo sila. “Ang katawhan padayon nga nag-alagad kay Jehova sa tanan nga mga adlaw ni Josue kag sa tanan nga mga adlaw sang tigulang nga mga lalaki nga ang mga adlaw naglawig pagkatapos ni Josue kag nakakita sang tanan nga dalagku nga buhat nga ginhimo niya para sa Israel.” Apang, mga pila ka tion pagkatapos nga napatay si Josue, “lain naman nga kaliwatan ang nagtuhaw sunod sa ila nga wala makakilala kay Jehova ukon sa buhat nga ginhimo niya para sa Israel. Kag ang mga anak ni Israel naghimo sing malaut sa mga mata ni Jehova.” (Hukom 2:7, 10, 11) Maathag nga ang mas bata kag di-eksperiensiado nga kaliwatan wala magpabalor sang ila palanublion subong mga katapo sang isa ka dedikado nga katawhan, nga tungod sa ila ang ila Dios nga si Jehova, naghimo sing gamhanan nga mga buhat sang nagligad.—Salmo 78:3-7, 10, 11.
Pagkabuhi Suno sa Ila Dedikasyon
8, 9. (a) Ano nga kahimusan ang nagtugot sa mga Israelinhon nga ipakita ang ila dedikasyon kay Jehova? (b) Ano ang nabaton sang mga nagahimo sang boluntaryo nga mga dulot?
8 Si Jehova nagtanyag sa iya katawhan sing kahigayunan nga magkabuhi sa ila dedikasyon subong isa ka pungsod. Halimbawa, ang iya Kasuguan nag-aman sing isa ka sistema sang mga halad ukon mga dulot, nga ang iban sining mga dulot obligado samtang ang iban naman boluntaryo nga mga dulot. (Hebreo 8:3) Ang kinabubut-on nga mga halad nagalakip sing mga halad nga sinunog, mga dulot nga uyas, kag mga halad sa paghidait—mga dulot nga ginahalad kay Jehova agod matigayon ang iya kahamuot kag agod ipabutyag ang pagpasalamat.—Levitico 7:11-13.
9 Yadtong kinabubut-on nga mga halad nagapahamuot kay Jehova. Ginakabig nga ang halad nga sinunog kag dulot nga uyas “maamyon kay Jehova.” (Levitico 1:9; 2:2) Sa halad sa paghidait, ginahalad kay Jehova ang dugo kag tambok sang sapat, samtang ang nabilin nga bahin sang unod ginakaon sang mga saserdote kag sang nagahalad. Gani, isa ini ka simbuliko nga pagkaon nga nagapatuhoy sa isa ka mahidaiton nga kaangtanan kay Jehova. Ang Kasuguan nagsiling: “Karon kon maghalad kamo sing halad sang paghidait kay Jehova, ihalad ninyo ini agod makabaton kamo sing kahamuot.” (Levitico 19:5) Bisan pa ang tanan nga Israelinhon dedikado kay Jehova sugod sang pagkabun-ag, ang mga nagahimo gid sang ila dedikasyon paagi sa boluntaryo nga mga dulot ‘nakabaton sing kahamuot’ kag ginpakamaayo gid sing bugana.—Malaquias 3:10.
10. Paano ginpabutyag ni Jehova ang iya di-kahamuot sang mga adlaw ni Isaias kag ni Malaquias?
10 Apang, sa masami ang dedikado nga pungsod sang Israel nangin di-matutom kay Jehova. Paagi sa iya manalagna nga si Isaias, si Jehova nagsiling sa ila: “Wala mo gindala sa akon ang karnero sang imo bug-os nga mga halad nga sinunog, kag paagi sa imo mga halad wala mo ako ginhimaya. Wala ko ikaw ginpilit nga mag-alagad sa akon upod ang dulot.” (Isaias 43:23) Dugang pa, ang mga dulot nga indi kinabubut-on kag wala napahulag sang gugma wala sing balor sa mga mata ni Jehova. Halimbawa, mga tatlo ka siglo pagkatapos ni Isaias, sang mga adlaw ni manalagna Malaquias, naghalad ang mga Israelinhon sing may depekto nga mga kasapatan. Busa, si Malaquias nagsiling sa ila: “‘Wala ako mahamuot sa inyo,’ siling ni Jehova sang mga kasuldadusan, ‘kag sa dulot nga halad gikan sa inyo kamot wala ako sing kahamuot.’ . . . ‘Nagdala kamo sing butang nga inagaw, kag sing piang, kag sing masakiton; huo, gindala ninyo ini subong dulot. Mahamuot bala ako sa sini sa inyo kamot?’ siling ni Jehova.”—Malaquias 1:10, 13; Amos 5:22.
Ginsikway Subong Isa ka Dedikado nga Pungsod
11. Ano nga kahigayunan ang ginhatag sa Israel?
11 Sang ang mga Israelinhon nangin pungsod nga dedikado kay Jehova, nagsaad sia sa ila: “Kon tumanon ninyo sing maayo ang akon tingog kag sundon gid ang akon katipan, nian pat-od nga kamo mangin akon pinasahi nga pagkabutang gikan sa tanan sang iban pa nga katawhan, bangod ang bug-os nga duta akon. Kag kamo mangin isa ka ginharian sang mga saserdote sa akon kag isa ka balaan nga pungsod.” (Exodo 19:5, 6) Ang ginsaad nga Mesias magatuhaw sa tunga nila kag magahatag sa ila sing una nga kahigayunan nga mangin katapo sang panguluhan sang Ginharian sang Dios. (Genesis 22:17, 18; 49:10; 2 Samuel 7:12, 16; Lucas 1:31-33; Roma 9:4, 5) Apang ang kalabanan sang pungsod sang Israel wala maghikot suno sa ila dedikasyon. (Mateo 22:14) Ginsikway nila ang Mesias kag sang ulihi ginpatay sia.—Binuhatan 7:51-53.
12. Anong pinamulong ni Jesus ang nagapakita nga ginsikway ang Israel subong dedikado nga pungsod ni Jehova?
12 Pila ka adlaw antes sia mapatay, ginsilingan ni Jesus ang Judiyong relihiosong mga lider: “Wala gid bala ninyo mabasahi sa Kasulatan, ‘Ang bato nga ginsikway sang mga manunukod nangin panguna nga sadsaran nga bato. Naggikan ini kay Jehova, kag makatilingala ini sa aton mga mata’? Amo kon ngaa nagasiling ako sa inyo, Ang ginharian sang Dios kuhaon sa inyo kag ihatag sa isa ka pungsod nga nagapatubas sing mga bunga sini.” (Mateo 21:42, 43) Agod ipakita nga ginsikway sila ni Jehova subong isa ka pungsod nga dedikado sa Iya, si Jesus nagsiling: “Jerusalem, Jerusalem, ang nagapatay sa mga manalagna kag nagabato sa mga ginpadala sa iya,—makapila kuntani nga luyag ko tipunon ang imo mga anak, subong sang isa ka munga nga nagatipon sang iya mga piso sa idalom sang iya mga pakpak! Apang indi ninyo luyag ini. Yari karon! Ini nga templo ginpabay-an sa inyo.”—Mateo 23:37, 38.
Isa ka Bag-o nga Dedikado nga Pungsod
13. Anong matagnaon nga pinamulong ang ginhimo ni Jehova sang mga adlaw ni Jeremias?
13 Sang tion ni manalagna Jeremias, nagtagna si Jehova sing isa ka bag-o nga butang tuhoy sa iya katawhan. Aton mabasa: “‘Yari karon! Nagaabot ang mga adlaw,’ siling ni Jehova, ‘kag magahimo ako sing bag-ong katipan upod sa panimalay sang Israel kag sa panimalay sang Juda; indi suno sa katipan nga ginhimo ko upod sa ila mga ginikanan sang adlaw nga gintuytuyan ko sila sa kamot sa pagpagua sa ila gikan sa duta sang Egipto, “ang akon katipan nga ginlalis nila, bisan ako bana nila,” siling ni Jehova.’ ‘Kay amo ini ang katipan nga ipakigkatipan ko sa panimalay sang Israel sa tapos sadto nga mga adlaw,’ siling ni Jehova. ‘Ibutang ko ang akon kasuguan sa sulod nila, kag isulat ko ini sa ila tagipusuon. Kag ako mangin ila Dios, kag sila mangin akon katawhan.’”—Jeremias 31:31-33.
14. San-o kag sa anong sadsaran nagluntad ang bag-ong dedikado nga pungsod ni Jehova? Ilaragway ining bag-o nga pungsod.
14 Ang sadsaran sining bag-ong katipan napahamtang sang napatay si Jesus kag sang ulihi ginpresentar ang balor sang iya ginpaagay nga dugo sa iya Amay, sang 33 C.E. (Lucas 22:20; Hebreo 9:15, 24-26) Apang, sang ginbubo ang balaan nga espiritu sang Pentecostes 33 C.E. kag ang pagkabun-ag sang bag-o nga pungsod, “ang Israel sang Dios,” ang bag-o nga katipan nagpanghikot. (Galacia 6:16; Roma 2:28, 29; 9:6; 11:25, 26) Nagasulat sa hinaplas nga mga Cristiano, nagsiling si apostol Pedro: “Kamo ‘pinili nga kaliwatan, harianon nga pagkasaserdote, balaan nga pungsod, katawhan nga pinasahi nga ginapanag-iyahan, agod mapahayag ninyo sing lapnag ang pagkahalangdon’ sang isa nga nagtawag sa inyo gikan sa kadudulman pakadto sa iya makatilingala nga kapawa. Kay sang nagligad indi kamo katawhan, apang karon katawhan kamo sang Dios.” (1 Pedro 2:9, 10) Natapos ang pinasahi nga relasyon sa tunga ni Jehova kag sang undanon nga Israel. Sang 33 C.E., ang kahamuot ni Jehova sa dutan-on nga Israel naliton sa espirituwal nga Israel, ang Cristianong kongregasyon, ‘isa ka pungsod nga nagapatubas sang mga bunga’ sang Mesianikong Ginharian.—Mateo 21:43.
Indibiduwal nga Dedikasyon
15. Sang adlaw sang Pentecostes 33 C.E., ano nga bawtismo ang ginpalig-on ni Pedro nga himuon sang iya mga tagpalamati?
15 Pagkatapos sang Pentecostes 33 C.E., ang tagsa ka indibiduwal, Judiyo ukon Gentil, dapat maghimo sing personal nga dedikasyon sa Dios kag bawtismuhan “sa ngalan sang Amay kag sang Anak kag sang balaan nga espiritu.” * (Mateo 28:19) Sang Pentecostes, ginsugiran ni apostol Pedro ang mabinatunon nga mga Judiyo kag mga proselita: “Maghinulsol kamo, kag ang tagsatagsa sa inyo magpabawtismo sa ngalan ni Jesucristo para sa kapatawaran sang inyo mga sala, kag mabaton ninyo ang wala bayad nga dulot nga balaan nga espiritu.” (Binuhatan 2:38) Dapat pamatud-an sining mga Judiyo kag mga proselita paagi sa ila pagpabawtismo nga wala lamang nila gindedikar ang ila kabuhi kay Jehova kundi ginbaton man nila si Jesus subong amo ang paagi ni Jehova agod mapatawad ang ila mga sala. Dapat nila sia kilalahon subong amo ang Mataas nga Saserdote ni Jehova kag subong ila Lider, ang Ulo sang Cristianong kongregasyon.—Colosas 1:13, 14, 18.
16. Sang adlaw ni Pablo, paano ang husto nga mga nahuyog—ang mga Judiyo kag ang mga Gentil—nangin bahin sang espirituwal nga Israel?
16 Tinuig sang ulihi, si apostol Pablo nagsiling: “Una sa mga yara sa Damasco kag sa mga yara sa Jerusalem, kag sa bug-os nga duta sang Judea, kag sa mga pungsod gindala ko ang mensahe nga dapat sila maghinulsol kag magliso sa Dios paagi sa paghimo sing mga buhat nga takus sa paghinulsol.” (Binuhatan 26:20) Pagkatapos nga nakumbinsi ang mga tawo—ang mga Judiyo kag mga Gentil—nga si Jesus amo ang Cristo, ang Mesias, ginbuligan sila ni Pablo nga magdedikar kag magpabawtismo. (Binuhatan 16:14, 15, 31-33; 17:3, 4; 18:8) Paagi sa pagliso sa Dios, inang bag-o nga mga disipulo nangin katapo sang espirituwal nga Israel.
17. Anong pagpat-in nga hilikuton ang malapit na, kag anong iban pa nga hilikuton ang nagakahanabo sing madasig?
17 Sa karon, malapit na ang katapusan nga pagpat-in sang nabilin sang espirituwal nga mga Israelinhon. Kon matapos na ining pagpat-in, ang “apat ka anghel” nga nagapugong sang hangin sang kalaglagan sang “dakung kapipit-an” tugutan na nga buy-an ini. Samtang wala pa ina, ang pagtipon sa “dakung kadam-an,” nga nagalaum nga magkabuhi sing dayon sa duta, nagakahanabo sing madasig. Ining “iban nga mga karnero” kinabubut-on nga nagpili nga magpakita sing pagtuo sa “dugo sang Kordero” kag magpabawtismo bilang simbulo sang ila dedikasyon kay Jehova. (Bugna 7:1-4, 9-15; 22:17; Juan 10:16; Mateo 28:19, 20) Sa tunga nila amo ang madamo nga mga pamatan-on nga ginpadaku sang Cristianong mga ginikanan. Kon ikaw isa sining mga pamatan-on, mangin interesado ikaw nga basahon ang masunod nga artikulo.
[Nota]
Bilang Pagrepaso
• Ngaa ang pamatan-on nga mga Israelinhon indi kinahanglan nga maghimo sing personal nga dedikasyon kay Jehova?
• Paano mapakita sang mga Israelinhon nga nagakabuhi sila suno sa ila dedikasyon?
• Ngaa ginsikway ni Jehova ang Israel subong iya dedikado nga pungsod, kag paano ini ginbuslan?
• Sugod sang Pentecostes 33 C.E. padayon, ano ang dapat nga himuon sang mga Judiyo kag mga Gentil agod mangin katapo sang espirituwal nga Israel?
[Mga Pamangkot sa Pagtinuon]
[Retrato sa pahina 21]
Ang pamatan-on nga mga Israelinhon ginbun-ag subong mga katapo sang ginpili nga pungsod sang Dios
[Retrato sa pahina 23]
Ang tagsa ka Israelinhon dapat maghimo sing personal nga desisyon nga alagaron ang Dios
[Retrato sa pahina 23]
Ang boluntaryo nga mga dulot naghatag sa mga Israelinhon sing kahigayunan nga ipakita ang ila gugma kay Jehova
[Retrato sa pahina 25]
Pagkatapos sang Pentecostes 33 C.E., ang mga sumulunod ni Cristo dapat maghimo sing personal nga dedikasyon sa Dios kag simbuluhan ini paagi sa bawtismo
