“Kutob Karon, Nagapati na Ako nga May Dios”

SI Alexandra, nga taga-Ukraine anay apang karon, nagapuyo na sa Prague, Czech Republic, manugpauli halin sa trabaho. Sa paradahan sang bus, nasiplatan niya ang isa ka daku nga kahita sa duta, nga ginalabaylabayan lang sang mga tawo. Sang ginpulot niya ini kag gintan-aw ang unod, daw indi sia makapati sa iya nakita. Isa ka bandol sang papelon nga 5,000-koruna [130 euro] ang unod sini! Daw wala man sing nagapangita sa kahita sa palibot niya. Bilang isa ka dumuluong nga nagapuyo sa Czech Republic, indi mahapos ang pangabuhi para kay Alexandra. Ano ang himuon niya?

Pag-abot niya sa ila balay, ginpakita ni Alexandra ang kahita sa iya bata nga babayi nga si Victoria. Gintan-aw nila kon may ngalan kag adres sang tag-iya sa kahita apang wala sila sing nakit-an. Pero, may nakita sila nga papel nga may nasulat nga mga numero. Account number ini, kag sa likod sang papel, may iban pa nga mga numero. Nakita man nila ang direksion pakadto sa lokal nga bangko kag ang papel nga may sulat nga “330,000 koruny” (mga $10,000, U.S.). Amo gid ini ang kantidad nga unod sang kahita.

Nanawag si Alexandra sa pagdumdom niya numero sang telepono sang bangko, apang napaslawan sia. Gani nagkadto sila sang iya anak nga babayi sa bangko kag ginsaysay ang natabo. Nangusisa sila tuhoy sa account number nga nakita nila sa kahita. Apang, ang bangko wala sing rekord sang amo nga account number. Pagkadason nga adlaw, nagbalik si Alexandra dala ang isa pa ka numero nga nakita sa kahita. Matuod gid, ang bangko may kliyente nga babayi nga may amo nga account number. Ginkontak ni Alexandra kag ni Victoria ang babayi, kag ginkompirmar niya nga sia gid man ang nadulaan. Sang nagkit-anay sila, nagpasalamat gid sing hanuot ang babayi kag namangkot, “Ano ang ihatag ko sa inyo sa pag-uli ninyo sang kuarta ko?”

Si Victoria nagsabat: “Wala kami sing ginapangayo. Kon interesado kami sa kuarta, kuntani gintago na namon ina.” Sa iya limitado nga Czech, sia nagsiling: “Ginauli namon ang kuarta sa imo bangod mga Saksi ni Jehova kami. Ang amon nahanas sa Biblia nga konsiensia indi magtugot nga taguon namon ang butang nga indi amon.” (Hebreo 13:18) Ang babayi malipayon nga nagsiling, “Kutob karon, nagapati na ako nga may Dios.”