“Dapat Namon Tumanon ang Dios Subong Manuggahom sa Baylo Sang mga Tawo”

‘Luwason Kami sang Amon Dios’

ANG okasyon gintuyo nga mangin makahalawhaw. Isa ka daku nga larawan nga bulawan ang ginpatindog sa kapatagan sang Dura, ayhan malapit sa siudad sang Babilonia. Ang larawan inagurahan sa isa ka pinasahi nga seremonya nga tambungan sang mataas nga mga opisyales kag ginapaabot nga magayaub sila sa atubangan sang larawan pagkabati nila sang madamong instrumento sa musika. Nagsugo si Hari Nabocodonosor sang Babilonia nga ang bisan sin-o nga indi magsimba sa larawan idap-ong sa nagadabdab nga horno. Sin-o ang mangahas sa paglapas sa sugo?

Sa kakibot sang mga tumalan-aw, ang tatlo ka mahinadlukon sa Dios nga mga sumilimba ni Jehova—sanday Sadrac, Mesac, kag Abednego—wala magyaub. Nahibaluan nila nga ang pagyaub sa sini supak sa ila eksklusibo nga debosyon kay Jehova nga Dios. (Deuteronomio 5:8-10) Sang ginpangayuan sing paathag tuhoy sa ila di-mationg nga panindugan, walay kahadlok sila nga nagsiling kay Nabocodonosor: “Kon amo ini, ang amon Dios nga ginaalagad namon makasarang magluwas sa amon. Gikan sa nagadabdab nga horno sang kalayo kag gikan sa imo kamot, O hari, luwason niya kami. Apang kon indi man, hibalua, O hari, nga ang imo mga dios indi ang ginaalagad namon, kag indi kami magsimba sa larawan nga bulawan nga imo ginpatindog.”—Daniel 3:17, 18.

Sang gindap-ong ang tatlo ka Hebreo sa nagadabdab nga horno sang kalayo, isa lamang ka milagro ang makaluwas sang ila kabuhi. Nagpadala ang Dios sing anghel agod amligan ang Iya matutom nga mga alagad. Apang desidido na sila nga mapatay sangsa lapason si Jehova. a Ang ila panindugan pareho sa iya sang mga apostoles ni Jesucristo nga pagligad sang kapin sa anom ka siglo, nagpahayag man sa atubangan sang mataas nga hukmanan sang mga Judiyo: “Dapat namon tumanon ang Dios subong manuggahom sa baylo sang mga tawo.”—Binuhatan 5:29.

Importante nga mga Leksion Para sa Aton

Sanday Sadrac, Mesac, kag Abednego maayo nga mga halimbawa sang pagtuo, pagkamatinumanon, kag pagkamainunungon. Ang tatlo ka Hebreo nagpakita sing pagtuo kay Jehova. Ang ila konsiensia nga ginhanas sa Kasulatan wala magtugot sa ila nga makigbahin sa bisan ano nga buhat sang butig nga pagsimba ukon nasyonalistiko nga debosyon. Ang mga Cristiano karon nagapakita man sing bug-os nga pagsalig sa matuod nga Dios. Ginatuytuyan sila sang ila konsiensia nga nahanas sa Biblia kag wala sila nagapakigbahin sa mga buhat sang butig nga pagsimba ukon sa mga seremonya nga nagalapas sa mga kasuguan kag mga prinsipio sang Dios.

Ang tatlo ka matutom nga mga Hebreo nagsalig kay Jehova kag wala nila ginbaylo ang ila pagkamatinumanon sa bisan ano nga pagkilala, estado, ukon himaya nga gintanyag sang Emperyo sang Babilonia. Ining mga pamatan-on handa mag-antos kag mapatay sa baylo nga gub-on ang ila kaangtanan sa Dios. Kaangay ni Moises antes sa ila, “nagpabilin [sila] nga mabakod subong nga nagatan-aw sa Isa nga di-makita.” (Hebreo 11:27) Luwason man sila ni Jehova gikan sa kamatayon ukon indi, ang tatlo desidido nga magpabilin nga matutom  sangsa magkompromiso agod luwason ang ila kabuhi. Ayhan nagapatuhoy sa ila halimbawa, si apostol Pablo naghinambit sa mga matutom nga “nakapalong sang gahom sang kalayo.” (Hebreo 11:34) Ginapakita sang mga alagad ni Jehova ang amo nga pagtuo kag pagkamatinumanon sa atubangan sang mga pagtilaw sa integridad sa panahon naton.

Sa natabo kanday Sadrac, Mesac, kag Abednego, nahibaluan man naton nga ginapadyaan sang Dios ang mainunungon sa iya. Ang salmista nag-amba: ‘Si Jehova indi magabiya sang iya mga mainunungon.’ (Salmo 37:28) Sa karon, indi kita makapaabot nga luwason kita sang Dios sing milagruso, subong sang ginhimo niya sa tatlo ka Hebreo. Apang, makasalig kita nga bisan ano pa nga kabudlayan ang ginaatubang naton, buligan kita sang aton langitnon nga Amay. Mahimo nga dulaon sang Dios ang problema, hatagan kita sing kusog nga mabatas ini, ukon banhawon kita kon magpabilin kita nga may integridad tubtob sa kamatayon. (Salmo 37:10, 11, 29; Juan 5:28, 29) Nagamadinalag-on ang pagtuo, pagkamatinumanon, kag pagkamainunungon kada ginatilawan ang aton integridad kag nagadesisyon kita nga tumanon ang Dios sa baylo sang mga tawo.

[Nota]

[Kahon/​Retrato sa pahina 9]

NAHIBALUAN MO BALA?

• Ang tatlo ka Hebreo halos treinta anyos na sang gintilawan ang ila integridad.

• Ang horno ginpainit sing tama.—Daniel 3:19.