‘Padayon Kamo nga Walay Pagkumod’

“Padayon ninyo nga himua ang tanan nga butang nga walay pagkumod.”—FILIPOS 2:14.

1, 2. Ano nga laygay ang ginhatag ni apostol Pablo sa mga Cristiano sa Filipos kag Corinto, kag ngaa?

 SA IYA inspirado sang Dios nga sulat sa Cristianong kongregasyon sa Filipos sadtong nahaunang siglo, si apostol Pablo naghatag sing madamo nga komendasyon. Ginhatagan niya sing komendasyon ang iya masigkatumuluo sa sinang siudad bangod sang ila kaalwan kag kakugi, kag nalipay gid sia sa ila maayong mga binuhatan. Walay sapayan sina, ginpahanumdom sila ni Pablo nga ‘padayon nga himuon ang tanan nga butang nga walay pagkumod.’ (Filipos 2:14) Ngaa ginhatag sang apostol ining laygay?

² Nahibaluan ni Pablo kon ano ang mahimo nga resulta sang pagkumod. Mga pila ka tuig antes sini, ginpahanumdom niya ang kongregasyon sa Corinto nga makahalalit ang pagkumod. Ginpatalupangod ni Pablo nga samtang ang mga Israelinhon yara sa kahanayakan, sulitsulit nila nga ginpaakig si Jehova. Paano? Paagi sa paghandum sing makahalalit nga mga butang, paagi sa paghimo sing idolatriya kag pagpakighilawas, paagi sa pagbutang kay Jehova sa pagtilaw, kag paagi sa pagkumod. Ginpalig-on ni Pablo ang mga taga-Corinto nga magtuon gikan sa sining mga halimbawa. Nagsulat sia: “Indi kita . . . mangin mga palakumod, subong nga ang iban sa ila nagkumod, agod malaglag lamang paagi sa manuglaglag.”—1 Corinto 10:6-11.

3. Ngaa interesado kita karon sa topiko tuhoy sa pagkumod?

³ Subong mga alagad ni Jehova karon, nagapadayag man kita sing panimuot kaangay sang kongregasyon sa Filipos. Makugi kita sa maayong mga buhat, kag nagahigugmaanay kita sa isa kag isa. (Juan 13:34, 35) Apang, bangod sang halit nga natuga sang pagkumod sa katawhan sang Dios sang una, maayo nga tumanon naton ang laygay nga: “Padayon ninyo nga himua ang tanan nga butang nga walay pagkumod.” Binagbinagon anay naton  ang mga halimbawa sang pagkumod nga ginsambit sa Kasulatan. Dason binagbinagon naton ang pila ka butang nga himuon naton agod malikawan karon ang makahalalit nga resulta sang pagkumod.

Ang Isa ka Malaut nga Katilingban Nagkumod Batok kay Jehova

4. Sa anong paagi nagkumod ang mga Israelinhon sa kahanayakan?

⁴ Ang Hebreo nga tinaga nga nagakahulugan sing ‘pagkumod, pagyamo, ukon pagreklamo’ ginagamit sa Biblia may kaangtanan sa mga hitabo sa tion sang 40 ka tuig sang Israel sa kahanayakan. Kon kaisa, nangin di-kontento ang mga Israelinhon sa ila kahimtangan kag ginpabutyag ini paagi sa pagkumod. Halimbawa, mga pila lamang ka semana pagkatapos sila ginluwas sa pagkaulipon sa Egipto, “ang bug-os nga katilingban sang mga anak ni Israel nagsugod sa pagkumod batok kay Moises kag kay Aaron.” Nagreklamo ang mga Israelinhon tuhoy sa pagkaon, nga nagasiling: “Napatay na lang kuntani kami paagi sa kamot ni Jehova sa duta sang Egipto samtang nagapungko kami sa tupad sang mga kaldero sang karne, samtang nagakaon kami sing mga tinapay tubtob mabusog, bangod gindala ninyo kami sa sini nga kahanayakan agod patyon sa gutom ining bug-os nga kongregasyon.”—Exodo 16:1-3.

5. Sang nagreklamo ang mga Israelinhon, kay sin-o sa pagkamatuod sila nagkumod?

⁵ Ang matuod, ginhatag ni Jehova ang mga kinahanglanon sang mga Israelinhon sang yara sila sa kahanayakan, mahigugmaon nga gin-amanan sila sing pagkaon kag tubig. Wala gid nabutang sa katalagman ang kabuhi sang katawhan sang Israel bangod sa gutom sa kahanayakan. Apang, bangod sang pagkadikontento, ginpasobrahan nila ang ila kabudlayan kag nagsugod sa pagkumod. Bisan pa si Moises kag si Aaron ang ila ginareklamo, gintamod ni Jehova ang ila ginsiling subong pagreklamo batok sa Iya. Ginsilingan ni Moises ang mga Israelinhon: “Nabatian ni Jehova ang inyo mga pagkumod nga ginakumod batok sa iya. Kag ano bala kami? Ang inyo pagkumod indi batok sa amon, kundi batok kay Jehova.”—Exodo 16:4-8.

6, 7. Subong sang ginpakita sa Numeros 14:1-3, paano nagbag-o ang panimuot sang mga Israelinhon?

⁶ Wala magdugay pagkatapos sina, nagkumod liwat ang mga Israelinhon. Nagpadala si Moises sing 12 ka lalaki agod maglampitaw sa Ginsaad nga Duta. Ang napulo sa ila nagbalik nga may malain nga report. Ano ang resulta? “Ang tanan nga anak ni Israel nagsugod sa pagkumod batok kay Moises kag kay Aaron, kag ang bug-os nga katilingban nagsugod sa pagsiling batok sa ila: ‘Napatay na lang kuntani kita sa duta sang Egipto, ukon napatay na lang kuntani kita sa sining kahanayakan! Kag ngaa gindala pa kita ni Jehova sa sining duta [sang Canaan] agod lamang mapatay paagi sa espada? Ang aton mga asawa kag ang aton magamay nga mga kabataan mangin bihag. Indi bala mas maayo pa nga mabalik na lang kita sa Egipto?’”—Numeros 14:1-3.

⁷ Nagbag-o gid ang panimuot sang Israel! Sa umpisa, napahulag sila sa pag-amba sing pagdayaw bilang pagpasalamat kay Jehova sang ginpagua sila sa Egipto kag ginluwas sa Dagat nga Mapula. (Exodo 15:1-21) Apang sang nabudlayan na sila sa kahanayakan kag nahadlukan sa mga Canaanhon, ang pagkamapinasalamaton sang katawhan sang Dios ginbuslan sang pagkadikontento. Sa baylo nga pasalamatan ang Dios bangod sang ila kahilwayan, ginbasol nila sia bangod abi nila ginadingutan sila. Busa, ang pagkumod isa ka pagpakita sang pagkawalay apresasyon sa mga aman ni Jehova. Indi katingalahan nga nagsiling sia: “Tubtob san-o magakumod sing subong sini batok sa akon ining malaut nga katilingban.”—Numeros 14:27; 21:5.

Pagkumod sang Unang Siglo

8, 9. Maghatag sing mga halimbawa sang pagkumod nga narekord sa Cristianong Griegong Kasulatan.

⁸ Ang mga halimbawa sang pagkumod nga ginsambit na nagadalahig sa mga grupo sang mga tawo nga nagpabutyag sing dayag nga pagkadikontento. Apang, sang si Jesucristo didto sa Jerusalem para sa Piesta sang mga Kayangkayang sang 32 C.E., “madamo sing hinuringhuring tuhoy sa iya sa tunga sang kadam-an.” (Juan 7:12, 13, 32) Naghinutikay ang mga tawo tuhoy sa iya, ang  iban nagasiling nga maayo sia nga tawo, ang iban naman nagasiling nga indi.

⁹ Sang isa pa ka bes, bisita si Jesus kag ang iya mga disipulo sa puluy-an ni Levi, ukon Mateo, ang manugsukot sing buhis. “Nagkumod ang mga Fariseo kag ang ila mga escriba sa iya mga disipulo, nga nagasiling: ‘Ngaa nagakaon kamo kag nagainom upod sa mga manugsukot sing buhis kag mga makasasala?’” (Lucas 5:27-30) Mga pila ka tion sang ulihi sa Galilea, “ang mga Judiyo nagkumod [kay Jesus] bangod nagsiling sia: ‘Ako ang tinapay nga nagpanaug gikan sa langit.’” Bisan gani ang pila ka sumulunod ni Jesus nasaklaw sa ginsiling niya kag nagsugod sa pagkumod.—Juan 6:41, 60, 61.

10, 11. Ngaa nagkumod ang mga Judiyo nga nagahambal sing Griego, kag paano makabenepisyo ang Cristianong mga gulang sa kon paano ginhatagan sing igtalupangod ang reklamo?

¹⁰ Mas positibo ang resulta sa isa ka insidente sang pagkumod nga natabo wala magdugay pagkatapos sang Pentecostes 33 C.E. Madamong bag-ong nakumbertir nga mga disipulo gikan sa iban nga mga pungsod sa gua sang Israel ang gin-abiabi sadto sang ila mga masigkatumuluo sa Judea, apang nag-utwas ang problema tuhoy sa pagpaambitay sing pagkaon. Ang rekord nagasiling: “Ang mga Judiyo nga nagahambal sing Griego nagkumod batok sa mga Judiyo nga nagahambal sing Hebreo, bangod napabay-an ang ila mga balo nga babayi sa adlaw-adlaw nga pagpanagtag [sing pagkaon].”—Binuhatan 6:1.

¹¹ Ining mga nagkumod indi kaangay sang mga Israelinhon sa kahanayakan. Ang mga Judiyo nga nagahambal sing Griego indi makagod nga nagpabutyag sang ila pagkadikontento sa ila kaugalingon nga kahimtangan sa kabuhi. Ginpatalupangod nila nga napatumbayaan ang mga kinahanglanon sang pila ka balo. Isa pa, yadtong mga nagkumod wala nanggamo kag nagreklamo sing dayag batok kay Jehova. Ginhambal nila ang ila reklamo sa mga apostol, nga naghulag naman gilayon bangod makatarunganon ang reklamo. Maayo gid nga halimbawa ang ginpahamtang sang mga apostol para sa Cristiano nga mga gulang karon! Nagahalong gid ining espirituwal nga mga manugbantay nga indi sila ‘magapabungol sa pagtuaw sang imol.’—Hulubaton 21:13; Binuhatan 6:2-6.

Mag-andam sa Daw Nagaut-ot nga Impluwensia sang Pagkumod

12, 13. (a) Iilustrar ang mga epekto sang pagkumod. (b) Ano ang mahimo nga rason sang pagkumod sang isa ka indibiduwal?

¹² Ginapakita sang kalabanan nga mga halimbawa sa Kasulatan nga ginbinagbinag naton ang daku nga halit sang pagkumod sa katawhan sang Dios sang una. Busa, dapat naton hunahunaon sing serioso ang daw nagaut-ot nga impluwensia sini sa aton karon. Mahimo makabulig ang isa ka ilustrasyon. Madamo nga klase sang metal ang ginatuktok. Kon ang tuktok, sa una pa lang wala na ginasapak, ang metal mahimo tuktukon sing tuman tubtob nga indi na ini mapuslan. Madamo nga salakyan ang gin-iskrap na lang, indi bangod may diperensia ang makina sini, kundi bangod gintuktok ini sing tuman amo nga ang salakyan delikado na gamiton. Paano naton maaplikar ining ilustrasyon sa pagkumod?

¹³ Subong nga ang pila ka metal mahimo nga tuktukon, ang di-himpit nga mga tawo may huyog man sa pagreklamo. Dapat kita mangin alisto sa bisan ano nga palatandaan sini. Subong nga ang hun-og kag maparat nga hangin nagapadasig sang pagtuktok, mas nahuyog kita magreklamo kon magbudlay ang mga kahimtangan. Bangod sa pag-ipit, ang isa ka gamay nga iritasyon mahimo mangin isa sa daku nga reklamo. Samtang nagalala ang mga kahimtangan sa katapusan nga mga adlaw sining sistema, posible nga magadamo pa gid ang mga butang nga mahimo tunaan sang aton pagreklamo. (2 Timoteo 3:1-5) Gani, mahimo magsugod sa pagkumod ang isa ka alagad ni Jehova batok sa iya masigkatumuluo. Mahimo nga bangod lamang ini sa magamay nga butang, subong sang kaugot sa kaluyahon sang isa, kahisa sa iya abilidad ukon pribilehiyo sa pag-alagad.

14, 15. Ngaa dapat naton punggan ang aton huyog sa pagreklamo?

¹⁴ Ano man ang rason sang aton kaugot, mahimo maglambo sa aton ang espiritu sang pagkadikontento kag mangin palakumod kita kon indi naton kontrolon ang aton huyog sa pagreklamo. Huo, mahimo kita mahalitan sing bug-os sa espirituwal  bangod sa pagkumod. Sang nagkumod ang mga Israelinhon tuhoy sa ila kabuhi sa kahanayakan, ginbasol pa gani nila si Jehova. (Exodo 16:8) Kabay nga indi ini matabo sa aton!

¹⁵ Mahimo malikawan ang pagtuktok sang salsalon paagi sa pagpinta sini sing pintura nga nagabato sa tuktok kag pagkakas gilayon sang magamay nga mga bahin nga ginatuktok na. Sa kaanggid nga paagi, kon mamutikan naton nga may huyog kita sa pagkumod, mahimo naton ini matapna paagi sa pagpangamuyo tuhoy sini kag pagtadlong sini gilayon. Paano?

Tan-awa ang mga Butang Suno sa Pagtamod ni Jehova

16. Paano naton malandas ang huyog sa pagreklamo?

¹⁶ Ang pagkumod nagaliso sang aton igtalupangod sa aton kaugalingon kag sa aton mga problema sa baylo nga sa mga pagpakamaayo nga ginabaton naton subong mga Saksi ni Jehova. Agod mapunggan naton ang huyog sa pagreklamo, kinahanglan ining mga pagpakamaayo amo ang nagapangibabaw sa aton panghunahuna. Halimbawa, ang kada isa sa aton may hamili gid nga pribilehiyo nga magdala sang ngalan ni Jehova. (Isaias 43:10) Mapalambo naton ang suod nga kaangtanan sa iya, kag masugilanon naton ang “Manugpamati sang pangamuyo” sa bisan ano nga tion. (Salmo 65:2; Santiago 4:8) May matuod nga kahulugan ang aton kabuhi bangod nahangpan naton ang hulusayon tuhoy sa bug-os uniberso nga soberanya kag ginadumdom naton nga isa ka pribilehiyo nga huptan ang aton integridad sa Dios. (Hulubaton 27:11) Makapakigbahin kita sing regular sa pagbantala sing maayong balita sang Ginharian. (Mateo 24:14) Mahimo naton matigayon ang matinlo nga konsiensia paagi sa pagtuo naton sa halad gawad ni Jesucristo. (Juan 3:16) Amo ini ang mga pagpakamaayo nga matigayon naton bisan ano pa ang aton pagabatason.

17. Ngaa dapat naton tamdon ang mga butang suno sa pagtamod ni Jehova, bisan pa may makatarunganon kita nga rason sa pagreklamo?

¹⁷ Dapat naton tamdon ang mga butang suno sa pagtamod ni Jehova indi sa aton lamang kaugalingon nga pagtamod. “Ipahibalo sa akon ang imo mga dalanon, O Jehova; tudlui ako sang imo mga banas,” amba sang salmista nga si David. (Salmo 25:4) Kon may makatarunganon kita nga rason sa pagreklamo, nakita ini ni Jehova. Puede niya ini tadlungon sa gilayon. Ti, ngaa ayhan gintugutan niya kon kaisa nga magpadayon ang mabudlay nga kahimtangan? Mahimo nga agod mapalambo naton ang maayong mga kinaiya subong sang pagkamapailubon, pagbatas, pagtuo, kag pagkamainantuson.—Santiago 1:2-4.

18, 19. Iilustrar ang posible nga epekto sang pagbatas sa mabudlay nga mga kahimtangan nga walay pagreklamo.

¹⁸ Ang aton pagbatas sa mga kabudlayan nga walay pagreklamo wala lamang nagabulig agod mag-uswag ang aton personalidad kundi mahimo man ini maghatag sing maayo nga impresyon sa nagapanilag sa aton paggawi. Sang 2003, isa ka grupo sang mga Saksi ni Jehova ang naglakbay sakay sa bus gikan sa Alemanya agod magtambong sa kombension sa Hungary. Ang drayber sang bus indi Saksi, kag indi gid niya luyag makaupod ang mga Saksi sa sulod sang napulo ka adlaw. Apang, pagkatapos sang ila paglakbay, nagbag-o gid ang iya panimuot. Ngaa?

¹⁹ Sa tion sang ila paglakbay, madamo nga di-maayo nga sitwasyon ang nag-utwas. Apang wala gid nagreklamo ang mga Saksi. Nagsiling ang drayber nga sila ang pinakamabuot nga grupo nga nangin pasahero niya! Sa katunayan, nangako sia nga sa masunod nga tion nga magduaw ang  mga Saksi sa ila balay, pasudlon niya sila kag pamatian gid sila sing maayo. Daw ano gid kaayo nga impresyon ang ginhatag sang mga pasahero paagi sa ‘paghimo sang tanan nga butang nga walay pagkumod’!

Ang Pagpatawad Nagapasanyog sang Paghiusa

20. Ngaa dapat kita magpinatawaray?

²⁰ Ano abi kon may reklamo kita batok sa aton masigkatumuluo? Kon serioso ini nga butang, dapat naton iaplikar ang prinsipio sa ginsiling ni Jesus nga narekord sa Mateo 18:15-17. Apang, masami nga indi na ini kinahanglan bangod ang kalabanan nga mga reklamo magamay lamang. Ngaa indi na lang ini tamdon subong isa ka kahigayunan sa pagpatawad? Si Pablo nagsulat: “Padayon kamo nga magpinaumuray sa isa kag isa kag hilway nga magpinatawaray sa isa kag isa kon ang isa may inugsumbong batok sa isa. Subong nga si Jehova hilway nga nagapatawad sa inyo, amo man ang himuon ninyo. Apang, luwas sa sining tanan nga butang, panapti ninyo ang inyo kaugalingon sang gugma, kay amo ini ang himpit nga higot sang paghiusa.” (Colosas 3:13, 14) Handa bala kita sa pagpatawad? Indi bala nga may rason si Jehova nga magreklamo batok sa aton? Apang, sulitsulit sia nga nagapakita sing kaawa kag pagpatawad.

21. Ano ang epekto sang pagkumod sa mga nagapamati sa sini?

²¹ Bisan ano man ang aton ginareklamo, indi ini malubad paagi sa pagkumod. Ang Hebreo nga termino nga nagakahulugan sing “pagkumod” mahimo man magkahulugan sing “pagyamo.” Mahimo gid nga indi kita komportable makig-upod sa isa ka tawo nga palakumod kag ginatinguhaan naton nga likawan sia. Kon magkumod kita, ukon magyamo, mahimo amo man sini ang batyagon sang mga nagapamati sa aton. Ti, mahimo indi gid sila komportable amo nga indi nila luyag nga makigsuod sa aton! Ang pagyamo mahimo makakuha sing atension sang iban, apang indi gid ini makaganyat sa mga tawo nga magsuod sa aton.

22. Ano ang ginsiling sang isa ka lin-ay tuhoy sa mga Saksi ni Jehova?

 ²² Ang pagkamapinatawaron nagapasanyog sang paghiusa—butang nga ginapakabahandi gid sang katawhan ni Jehova. (Salmo 133:1-3) Sa isa ka pungsod sa Europa, isa ka 17-anyos nga Katoliko nga lin-ay ang nagsulat sa sanga talatapan sang mga Saksi ni Jehova agod ipabutyag ang iya pagdayaw sa ila. Nagsiling sia: “Amo lamang ini ang organisasyon nga nahibaluan ko nga ang mga miembro wala nabahinbahin bangod sa kaugot, kakagod, pagkadimapahanuguton, pagkamaiyaiyahon, ukon di-paghiusa.”

23. Ano ang pagabinagbinagon naton sa masunod nga artikulo?

²³ Ang aton apresasyon sa espirituwal nga mga pagpakamaayo nga ginabaton naton subong mga sumilimba sang matuod nga Dios nga si Jehova, magabulig sa aton nga pasanyugon ang paghiusa kag likawan ang pagkumod batok sa iban tuhoy sa personal nga mga butang. Ipakita sang masunod nga artikulo kon paano makabulig ang diosnon nga mga kinaiya agod malikawan naton ang labi pa ka makatalagam nga porma sang pagkumod—ang pagkumod batok sa dutan-on nga bahin sang organisasyon ni Jehova.

Madumduman Mo Bala?

• Ano ang nadalahig sa pagkumod?

• Paano mailustrar ang mga epekto sang pagkumod?

• Ano ang makabulig sa aton nga malandas ang huyog sa pagkumod?

• Paano ang aton kahanda sa pagpatawad nagabulig sa aton nga likawan ang pagkumod?

[Mga Pamangkot sa Pagtinuon]

[Retrato sa pahina 14]

Ang mga Israelinhon aktual nga nagkumod batok kay Jehova!

[Retrato sa pahina 17]

Ginatan-aw mo bala ang mga butang suno sa pagtamod ni Jehova?

[Retrato sa pahina 18]

Ang pagpatawad nagapasanyog sang Cristianong paghiusa