Ang Balahibo nga Kamisadentro kag ang Espirituwalidad
Ang Balahibo nga Kamisadentro kag ang Espirituwalidad
GINSUKSOK ini ni Hari Louis IX sang Pransia. Sang ang pamatan-on nga si Sir Thomas More nagatuon sang abogasiya, nagbulig ini sa iya nga magpabilin nga nagamata sing 19 tubtob 20 ka oras kada adlaw sa sulod sang mga binulan. Ang matuod, nakilal-an si More nga nagsuksok sini sa halos bug-os niya nga kabuhi. Kag sang ginpatay ang Arsobispo sang Canterbury nga si Thomas Becket sa Canterbury Cathedral, wala dinahumdahom nga nakit-an nga nagasuksok man sia sini. Sa ano magkapareho ining bantog nga mga tawo? Nagapenitensia sila paagi sa pagsuksok sing balahibo nga kamisadentro agod punggan ang ila mga handum kag mga kailigbon.
Ang balahibo nga kamisadentro isa ka magaras nga panapton nga human sa balahibo sang kanding nga kon isuksok kag magdapat sa panit, mahapdos ini kag mahapdi. Ginaistaran man ini sang kuto. Ginasiling nga magluwas sa kamisadentro, nagsuksok pa gid si Thomas Becket sang balahibo nga karsonsilyo tubtob nga “ginpungyutan ini sang kuto.” Pagligad sang ika-16 nga siglo, sa baylo sang balahibo sang kanding, ang iban naggamit sing mapino nga alambre nga ang taliwis sini nagatuslok sa lawas sang tawo. Ini nga sahi sang kamisadentro masakit gid.
Suno sa isa ka reperensia, ang katuyuan sang balahibo nga kamisadentro, subong sang iban pa nga paagi sang pagpenitensia, amo ang “pagkontrol sa makasasala nga handum sang unod kag pagpalambo sing isa ka panimuot kag paagi sang pagkabuhi nga mas kalahamut-an sa Dios.” Indi lamang mga asetiko, kundi bisan pa ang ordinaryo nga mga tawo nagsuksok man sini lakip na ang mga may mataas nga posisyon sa gobierno. Bisan gani karon ginasuksok ini sang pila ka relihiosong mga lider.
Ang pagsuksok bala sini ukon ang pagbatas sa pila ka sahi sang pagdingot sa kaugalingon nagahimo sa isa nga espirituwal nga persona? Wala, ang espirituwalidad wala nasandig sa sining mga buhat. Ang matuod, si apostol Pablo nagpamulong batok sa “isa ka pagsakit sa lawas.” (Colosas 2:23) * Sa baylo, ang matuod nga espirituwalidad nagagikan sa pagkuha sing ihibalo tuhoy sa Dios paagi sa maukod nga pagtuon sa iya Pulong kag pag-aplikar sini nga ihibalo sa kabuhi.
[Nota]
^ par. 5 Para sa dugang nga paghinun-anon sini nga topiko, tan-awa ang Magmata! Oktubre 8, 1997, “Ang Pagtamod Sang Biblia: Ang Asetisismo Bala ang Yabi sa Kaalam?”
[Credit Lines sang retrato sa pahina 32]
King Louis IX, top: From the book Great Men and Famous Women; Thomas Becket, center: From the book Ridpath’s History of the World (Vol. IV); Thomas More, bottom: From the book Heroes of the Reformation, 1904
