Dignidad sang Tawo​—Posible Para sa Tanan

“Dapat kita magtukod sing isa ka bag-ong kalibutan—sing isa ka mas maayo nga kalibutan—isa nga sa diin ginatahod ang dayon nga dignidad sang tawo.”​—PRESIDENTE HARRY TRUMAN SANG ESTADOS UNIDOS, SAN FRANCISCO, CALIFORNIA, E.U.A., ABRIL 25, 1945.

KAANGAY sang madamo sadtong mga tinuig pagkatapos sang Bug-os Kalibutan nga Inaway II, nagpati si Presidente Truman nga ang tawo makatuon gikan sa iya nagligad kag makapaluntad sing “isa ka bag-ong kalibutan” nga may dignidad para sa tanan. Makapasubo nga indi amo sini ang nagakatabo karon. Ang “dayon nga dignidad sang tawo” padayon nga ginatapakan bangod indi ang tawo ang gamot sang problema, kundi ang mortal nga kaaway sang tawo.

Ang Gamot Sang Problema

Ginapakilala sang Biblia ini nga kaaway subong nga si Satanas nga Yawa, ang isa ka malauton kag espiritu nga tinuga nga kutob pa sa pamuno sang maragtas sang tawo naghangkat sang kinamatarong sang Dios sa paggahom. Kutob sang nasugilanon ni Satanas si Eva sa hardin sang Eden, tulumuron niya nga ipahilayo ang mga tawo gikan sa pag-alagad sa ila Manunuga. (Genesis 3:1-5) Hunahunaa lamang ang malaglagon nga mga epekto kanday Adan kag Eva sang nagpasulay sila sa Yawa! Ang insigida nga resulta sang ila paglapas sa kasuguan sang Dios bahin sa ginadumilian nga bungang-kahoy amo nga sila nga duha “nanago gikan sa nawong ni Jehova nga Dios.” Ngaa? Si Adan nagtu-ad: “Hinadlukan ako bangod  nga hubo ako kag gani nanago ako.” (Genesis 3:8-10) Ang kaangtanan ni Adan sa iya langitnon nga Amay kag ang pagtamod niya sa iya kaugalingon nagbag-o. Nahuya na sia kag nasaw-ahan nga makig-atubang kay Jehova.

Ngaa luyag makita sang Yawa nga ang pagtamod ni Adan sa iya kaugalingon maganubo? Bangod ang tawo gintuga sa larawan sang Dios, kag nalipay si Satanas nga makita nga wala ginapabanaag sing himpit sang tawo ang himaya sang Dios. (Genesis 1:27; Roma 3:23) Amo kon ngaa ang mga buhat sang pagpakanubo lapnag sa maragtas sang tawo. Subong “dios sining sistema sang mga butang,” ginpasanyog ni Satanas ini nga espiritu “sa tion nga gingamhan sang tawo ang tawo sa iya kasamaran.” (2 Corinto 4:4; Manugwali 8:9; 1 Juan 5:19) Nagakahulugan bala ini nga ang matuod nga dignidad sang tawo nadula na sing dayon?

Ginahatagan ni Jehova Sing Dignidad ang Iya mga Tinuga

Hunahunaa liwat ang mga kahimtangan sa hardin sang Eden antes nagpakasala sanday Adan kag Eva. May yara sila bugana nga pagkaon, makaalayaw nga hilikuton, kag paglaum nga magkabuhi sing mapagros kag walay katapusan para sa ila kaugalingon kag sa ila mga anak. (Genesis 1:28) Ang tanan nga aspekto sang ila pagkabuhi nagpatalupangod sang mahigugmaon kag may dignidad nga katuyuan sang Dios para sa katawhan.

Nagbag-o bala ang pagtamod ni Jehova sa dignidad sang tawo sang nagpakasala sanday Adan kag Eva? Wala. May pasunaid sia sa kahuya nga ila karon nabatyagan nga hubo sila. Bilang ilis sa mga dahon sang higuera nga gintahi nila agod mangin panapton, mahigugmaon nga nag-aman ang Dios sing “malaba nga panapton nga panit.” (Genesis 3:7, 21) Sa baylo nga pabay-an sila nga nagabatyag sing kahuya, ginpakig-angutan sila sang Dios nga may dignidad.

Sang ulihi, sang nagpakig-angot sa pungsod sang Israel, si Jehova nagpakita sing kaawa sa mga ilo, mga balo nga babayi, kag dumuluong nga mga pumuluyo—ang mga katapo sang katilingban nga masami ginaabusuhan. (Salmo 72:13) Halimbawa, kon nagaani sang ila patubas nga uyas, kahoy nga olibo, kag ubasan, ang mga Israelinhon ginsugo nga indi na pagbalikan ang mga nabilin. Sa baylo, nagsugo ang Dios nga ang mga nabilin ‘dapat ibilin para sa dumuluong nga pumuluyo, para sa bata nga lalaki nga ilo sa amay kag para sa balo nga babayi.’ (Deuteronomio 24:19-21) Ang pagsunod sa sining kasuguan nagdula sang kinahanglanon nga magpakilimos kag naghatag sing dungganon nga hilikuton bisan sa pinakaimol nga mga tawo.

Si Jesus Naghatag Sing Dignidad sa Iban

Sang si Jesucristo, nga Anak sang Dios, yari sa duta, nagpakita sia sing interes sa dignidad sang iban. Halimbawa, sang didto sia sa Galilea, ginpalapitan sia sang isa ka aruon. Suno sa Mosaikong Kasuguan, agod indi makalaton sa iban, ang aruon dapat magsinggit: “Di-matinlo, di-matinlo!” (Levitico 13:45) Apang, ini nga lalaki wala magsinggit bilang paandam samtang nagapalapit sia kay Jesus. Sa baylo, naghapa sia kag nagpakitluoy  kay Jesus: “Ginuo, kon luyag mo gid, matinluan mo ako.” (Lucas 5:12) Ano ang ginhimo ni Jesus? Wala ginsabdong ni Jesus ang lalaki bangod sang paglapas sa Kasuguan, ni ginpasapayanan lang sia ukon ginlikawan. Sa baylo, ginhatagan niya ang aruon sing dignidad paagi sa pagtandog sa iya kag sa pagsiling: “Luyag ko. Mangin matinlo ka.”—Lucas 5:13.

Sa iban pa nga mga okasyon, ginpakita ni Jesus ang iya ikasarang sa pagpang-ayo nga wala sing pisikal nga pagtandog—kon kaisa gikan sa malayo. Apang, sini nga okasyon, namat-od sia nga tandugon ang aruon. (Mateo 15:21-28; Marcos 10:51, 52; Lucas 7:1-10) Bangod “puno sang aro,” pat-od gid nga madugay na nga wala sing nagtandog ukon naghikap sa lalaki. Daw ano gid ka makalilipay nga mabatyagan liwat ang pagtandog sang iban nga tawo! Ang luyag lang niya amo nga mag-ayo ang iya aro. Apang, ang paagi ni Jesus sa pagpaayo sa iya pat-od gid nga nakabulig agod mapasag-uli ang isa pa ka butang—ang dignidad sang lalaki. Mapatihan gid bala nga ang amo nga pagkabalaka sa dignidad sang iban magaluntad sa katilingban karon? Kon amo, paano ini makita?

Ang Kasuguan nga Nagahatag Sing Dignidad

Ginhatag ni Jesus ang ginakabig sang madamo subong ang pinakabantog nga instruksion bahin sa mga kaangtanan sang mga tawo: “Busa, ang tanan nga butang nga luyag ninyo nga himuon sang mga tawo sa inyo, dapat man ninyo himuon sa ila.” (Mateo 7:12) Ining Bulawanon nga Kasuguan, subong amo ang masami nga tawag sa sini, nagapahulag sa isa nga tahuron ang isigkatawo bangod nagalaum sia nga tahuron man sia.

Subong sang ginapakita sang maragtas, ang pagsunod sa sini nga kasuguan indi mahapos, kay sa masami, mabudlay ini sundon. “Nalipay anay ako sa pagpakahuya sa iban,” siling sang isa ka lalaki nga tawgon naton si Harold. “Sa pila lamang ka tinaga, ginapaakig, ginapakahuy-an, kag kon  kaisa ginapahibi ko ang iban nga tawo.” Apang may isa ka butang nga nagpabag-o kay Harold. “Ginduaw ako sang pila ka Saksi ni Jehova. Kon panumdumon ko ang akon anay ginpanghambal kag ginpanghimo kon kaisa sa ila, nahuya gid ako. Apang wala gid sila mag-untat sa pagduaw sa akon, kag sing amat-amat, ang mga kamatuoran sang Biblia nagtandog sang akon tagipusuon kag nagpahulag sa akon nga magbag-o.” Sa karon, si Harold isa na ka gulang sa Cristianong kongregasyon.

Si Harold isa ka buhi nga pamatuod nga “ang pulong sang Dios buhi kag gamhanan kag matalom pa sa bisan ano nga espada nga duha sing sulab kag nagalapus tubtob sa nautlan sang kalag kag espiritu, kag sang mga lutalutahan kag ila utok, kag may ikasarang sa paghantop sa mga hunahuna kag mga tinutuyo sang tagipusuon.” (Hebreo 4:12) Ang Pulong sang Dios may gahom sa pagtandog sa tagipusuon sang isa ka tawo kag sa pagpabag-o sang iya paghunahuna kag paggawi. Amo ini ang panguna nga rason para hatagan sing dignidad ang iban—ang tinagipusuon nga handum nga magbulig sa baylo nga magsaklaw, nga magpadungog sa baylo nga magpakahuya.—Binuhatan 20:35; Roma 12:10.

Ang Nagakaigo nga Dignidad Ginpasag-uli

Amo man ini nga handum ang nagapahulag sa mga Saksi ni Jehova nga isugid sa iban ang makalilipay nga paglaum sang Biblia. (Binuhatan 5:42) Ang pinakamaayo gid nga paagi sa pagpakita sing pagtahod kag dignidad sa aton isigkatawo amo ang pagsugid sa iya sing “maayong balita tuhoy sa butang nga maayo pa.” (Isaias 52:7) Ang “butang nga maayo pa” nagalakip sang pagsul-ob sing “bag-ong personalidad,” nga magapatay sang “makahalalit nga handum” nga pakanubuon ang iban. (Colosas 3:5-10) Lakip man sa sini amo ang katuyuan ni Jehova nga sa dili madugay, dulaon niya ang mga kahimtangan kag mga panimuot nga nagakuha sa tawo sang iya dignidad, lakip na ang manugsugyot, nga si Satanas nga Yawa. (Daniel 2:44; Mateo 6:9, 10; Bugna 20:1, 2, 10) Sa tion lamang nga ang duta “matugob sang ihibalo ni Jehova” nga sa ulihi, ang tanan hatagan sing dignidad.—Isaias 11:9.

Ginaagda ka namon nga hibaluon ang tuhoy sining makatilingala nga paglaum. Paagi sa pagpakig-upod sa mga Saksi ni Jehova, mahibaluan mo nga ang pag-aplikar sa mga prinsipio sang Biblia nagahatag sing dignidad sa iban. Kag matun-an mo kon paano paluntaron sa dili madugay sang Ginharian sang Dios ang ‘isa ka bag-o kag mas maayo nga kalibutan,’ isa ka kalibutan diin “ang dayon nga dignidad sang tawo” mangin isa ka realidad, kag indi na gid liwat tapakon.

[Kahon/​Retrato sa pahina 6]

Bangod Sang Ila Integridad Natipigan Nila ang Ila Dignidad

Sadtong Bug-os Kalibutan nga Inaway II, kapin sa 2,000 ka Saksi ni Jehova ang ginbilanggo sa mga kampo konsentrasyon sang mga Nazi bangod sang ila pagtuluuhan. Nakita kon daw ano ka tumalagsahon ang ila integridad, ang anay bilanggo sa Ravensbrück nga si Gemma La Guardia Gluck nagsaysay sa iya libro nga My Story: “Isa ka bes nag-anunsio ang mga Gestapo nga ang bisan sin-o nga Estudyante sang Biblia nga magsikway sang ila pagtuluuhan kag magpirma sa isa ka deklarasyon tuhoy sini pagahilwayon kag indi na pagahingabuton.” Tuhoy sa mga wala nagpirma sa deklarasyon, sia nagsulat: “Mas gusto pa nila nga mag-antos kag hulaton sing mapailubon ang adlaw sang kahilwayan.” Ngaa amo sini ang ila panindugan? Si Magdalena, nga ginsambit sa panugod sang nauna nga artikulo kag karon 80 anyos na, nagpaathag: “Mas importante nga magpabilin nga matutom kay Jehova sangsa magkompromiso agod mabuhi lamang. Natipigan namon ang amon dignidad bangod sang paghupot namon sang amon integridad.” *

[Nota]

[Retrato sa pahina 5]

Ginhatagan ni Jesus sing dignidad ang mga gin-ayo niya

[Retrato sa pahina 7]

Ginahatagan sang mga Saksi ni Jehova sing dignidad ang iban paagi sa pagsugid sa ila sang “maayong balita tuhoy sa butang nga maayo pa”