Mga Pamangkot Gikan sa mga Bumalasa

Paano naton nahibaluan nga ang kaalam nga ginlaragway sa Hulubaton 8:22-31 nagapatuhoy kay Jesucristo antes sia nangin tawo?

Ang inspirado nga paglaragway sa kaalam nga mabasa sa tulun-an sang Hulubaton nagasiling: “Ginhimo ako ni Jehova subong pamuno sang iya dalanon, ang pinakauna sa iya mga hinimuan sang dumaan nga tion. . . . Sa wala pa mapahamtang ang kabukiran, una pa sa kabakuluran, ginpanganak ako nga daw ginasakitan . . . Sang ginhanda niya ang langit didto na ako; . . . sadto yara ako sa tupad niya subong batid nga manugpangabudlay, kag ako ang labi nga ginakahamut-an niya sa adlaw-adlaw, nagakalipay ako sa atubangan niya sa tanan nga tion, . . . kag ang mga butang nga akon nahamut-an yara sa mga anak sang tawo.”

Ini nga teksto wala lamang nagapatuhoy sa kaalam sang Dios ukon sa konsepto sang kaalam. Ngaa? Bangod ang kaalam nga ginsambit diri “ginhimo,” ukon gintuga, subong ang pamuno sang dalanon ni Jehova. Si Jehova nga Dios wala sing ginsuguran kag wala sing katapusan, amo man ang iya kaalam. (Salmo 90:1, 2) Ang iya kaalam wala sing ginsuguran; wala man ini gintuga ukon ginhimo. Wala ini “ginpanganak . . . nga daw ginasakitan.” Dugang pa, ginasiling nga ining kaalam nagapamulong kag nagapanghikot, nga nagarepresentar sa isa ka persona.—Hulubaton 8:1.

Ang tulun-an sang Hulubaton nagasiling nga sang una ang kaalam yara sa tupad ni Jehova, ang Manunuga, “subong batid nga manugpangabudlay.” Pat-od gid nga nagapatuhoy ini kay Jesus. Antes si Jesus nagkari sa duta, nangabudlay sia sing suod upod kay Jehova amo nga ang Pulong sang Dios nagsiling: “Sia una sa tanan iban pa nga mga butang kag paagi sa iya ang tanan iban pa nga mga butang ginpaluntad.”—Colosas 1:17; Bugna 3:14.

Ang paglaragway sa Anak sang Dios subong kaalam nagakaigo gid, kay sia amo ang Isa nga nagpahayag sang maalam nga mga katuyuan kag mga dekrito ni Jehova. Antes sia nangin tawo, si Jesus amo ang Pulong sang Dios, ukon Humalambal. (Juan 1:1) Ginalaragway sia subong “ang gahom sang Dios kag ang kaalam sang Dios.” (1 Corinto 1:24, 30) Daw ano katahom nga paglaragway sa Anak sang Dios, nga bangod sang iya kahamuot sa katawhan, napahulag sia nga ihatag ang iya kabuhi subong gawad para sa ila!—Juan 3:16.

[Retrato sa pahina 31]

“Sa wala pa mapahamtang ang kabukiran . . . ginpanganak ako”