Ang mga Mapainubuson Magapanubli sang Duta

“Ginahanduraw ko nga ang kinaugali bag-uhon kag ipasag-uli. . . . Indi buas, kundi madugay pa, kon may bag-ong langit kag bag-ong duta na.”—Jean-Marie Pelt, Pranses nga eksperto sa palibot.

BANGOD ginahul-an sang mga kahimtangan sang palibot kag katilingban, madamo ang luyag nga mangin paraiso ang aton duta. Apang ini nga handum indi lamang isa ka moderno nga damgo. Madugay na nga ang Biblia nagsaad nga ang Paraiso ipasag-uli sa duta. Ang ginsiling ni Jesus nga “ang mga mapainubuson . . . magapanubli sang duta” kag “paghimuon ang imo kabubut-on sa duta, subong sang sa langit,” lakip sa bantog nga mga dinalan sa Kasulatan. (Mateo 5:5; 6:10, Ang Biblia, PBS) Apang, madamo karon ang wala nagapati sa isa ka dutan-on nga paraiso nga panublion sang mapainubuson nga mga tawo. Para sa kalabanan nga nagapangangkon nga Cristiano, nadula na ang Paraiso.

Ang Pranses nga semanal nga pamantalaan nga La Vie nagapaathag kon ngaa ang pagpati sa paraiso—sa duta man ukon sa langit—ginsikway, ilabi na sang Iglesia Katolika: “Pagkatapos nga nagdominar ini sa mga panudlo sang Katoliko sa sulod sang halos 19 ka siglo, [ang ideya] tuhoy sa isa ka paraiso nadula sa mga pagpamalandong, mga misa kon Domingo, mga kurso sa teolohiya, kag mga klase sa katekismo.” Ini mismo nga tinaga napalibutan kuno sang “madamol nga gal-um” sang “misteryo kag kagumon.” Ang pila ka teologo hungod nga nagsikway sini bangod may “tuman ini kadamo nga ideya tuhoy sa dutan-on nga kalipay.”

Para kay Frédéric Lenoir, isa ka eksperto sa sosyologo nga nagaespesyalisar sa relihion, ang mga ideya tuhoy sa isa ka paraiso nangin “kinaandan na lang.” Subong man, si Jean Delumeau, isa ka istoryador kag awtor sang pila ka libro tuhoy sa sini, naghunahuna nga ang katumanan sang mga saad sa Biblia masami nga simbuliko. Sia nagsulat: “Tuhoy sa pamangkot nga, ‘Kamusta na ang pagpati sa Paraiso?’ Ang Cristiano nga pagtuo padayon nga nagasabat: Salamat sa pagkabanhaw sang Manluluwas, kay sa ulihi magaululupod kita tanan kag makakita kita sing kalipay.”

May kapuslanan pa bala gihapon ang mensahe tuhoy sa isa ka dutan-on nga paraiso? Ano gid bala ang palaabuton sang aton duta? Malubog bala ang palanan-awon sa palaabuton, ukon mangin maathag bala ini? Sabton sang masunod nga artikulo ini nga mga pamangkot.