Madumduman Mo Bala?

Nakabenepisyo ka bala sa pagbasa sa ulihi nga mga gua sang Ang Lalantawan? Tilawi kon masabat mo ang masunod nga mga pamangkot:

• Paano ni Jesus “luwason ang imol,” suno sa Salmo 72:12?

Sa tion sang iya paggahom, makatigayon ang tanan sing katarungan nga wala sing kagarukan. Ang inaway masami nga ginabangdan sang kaimulon, apang paluntaron ni Cristo ang himpit nga paghidait. May kaawa sia sa katawhan kag magahiusa ang tanan, kag pat-uron niya nga may bugana nga pagkaon para sa mga tawo. (Salmo 72:4-16)—5/1, pahina 7.

• Paano naton mapakita subong mga Cristiano ang aton “kahilwayan sa paghambal”? (1 Timoteo 3:13; Filemon 8; Hebreo 4:16)

Mapakita naton ini paagi sa makugi nga pagbantala sa iban sing may kasidla, sa pagpanudlo kag indi pagpalantang sa paghatag sing epektibo nga laygay, kag sa pagpautwas sing bug-os sang aton kaugalingon sa Dios sa pangamuyo, nga may pagsalig nga magapamati sia kag magasabat.—5/15, pahina 14-16.

• Sa Kasuguan, ngaa ang pila ka kinaugali nga butang may kaangtanan sa sekso nagahimo sa isa ka tawo nga “di-matinlo”?

Ang kasuguan may kaangtanan sa pagkadimatinlo nga nagapatuhoy sa pagkadimatinlo bangod sa paggua sang semilya, pamulanon kag pagpanganak nagbulig agod mahuptan ang matinlo nga pagkabuhi kag maayo nga panglawas, nagpadaku sang pagkabalaan sang dugo, kag nagpakita nga kinahanglan tumbasan ang mga sala.—6/1, pahina 31.

• Kon luyag sang isa ka tawo nga magmalipayon, ngaa mapuslanon nga binagbinagon niya ang tulun-an sang Mga Salmo?

Ang mga manunulat sang Mga Salmo nakahibalo nga ang kalipay resulta sang maayo nga kaangtanan sa Dios. (Salmo 112:1) Ginpadaku nila nga wala sing tawhanon nga kaangtanan, wala sing pagkabutang, kag wala sing katigayunan ang makadala sing kalipay nga yara sa “katawhan nga ang ila Dios amo si Jehova.” (Salmo 144:15)—6/15, pahina 12.

• Ano nga pinasahi nga kaangtanan upod kay Jehova ang yara sa mga Israelinhon sang una?

Sang 1513 B.C.E., naghimo si Jehova sing isa ka bag-o nga kaangtanan upod sa mga Israelinhon, isa ka katipan. (Exodo 19:5, 6; 24:7) Sa tapos sini, ang mga Israelinhon ginbun-ag nga katapo sang pinili sang Dios nga pungsod nga nadedikar sa iya. Apang, ang tagsa ka indibiduwal dapat gihapon maghimo sing personal nga desisyon nga mag-alagad sa Dios.—7/1, pahina 21-2.

• Ngaa dapat naton himuon ang tanan nga butang “nga walay pagkumod”? (Filipos 2:14)

Madamong Makasulatanhon nga halimbawa ang nagapakita nga ang pagkumod nagatuga sing halit sa tunga sang katawhan sang Dios. Dapat naton hunahunaon sing serioso ang makahalalit nga impluwensia sini karon. Ang di-himpit nga mga tawo may huyog nga magreklamo, kag dapat kita mangin alisto nga bantayan ini sa aton kaugalingon kag likawan ini.—7/15, pahina 16-17.

• Paano naton nahibaluan nga ang kaalam nga ginlaragway sa Hulubaton 8:22-31 indi lamang konsepto sang kaalam?

Ini nga kaalam “ginhimo,” ukon gintuga, subong ang pamuno sang dalanon ni Jehova. Ang Dios wala sing ginsuguran kag wala sing katapusan, amo man ang iya kaalam; wala ini gintuga. Ang kaalam sa Hulubaton 8:22-31 yara sa tupad sang Dios subong “batid nga manugpangabudlay,” nga nagapatuhoy sa espiritu nga persona nga si Jesus nga nagpangabudlay sing suod upod Dios sa tion sang pagpanuga. (Colosas 1:17; Bugna 3:14)—8/1, pahina 31.