Makapapagsik nga Pag-uswag sa Isa ka Matahom nga Isla

ANG mga bisita sa Taiwan nagadayaw gid sa madabong nga mga tanom nga nagatabon sa isla. Ang matahom nga kalagtom sang linghod nga humay nagadalag kon alanyon na. Madabong nga talon ang nagatabon sa kabukiran. Kon ipaanggid sa gutok nga mga siudad, ang madabong nga mga tanom sa latagon kag sa mga bukid makapapagsik gid. Sa pagkamatuod, amo sini ang nagpahulag sa una nga dumuluong nga nakakita sang isla nga pilion ang ngalan nga Ilha Formosa, ukon “Matahom nga Isla.”

Huo, ang Taiwan isa ka matahom apang gamay nga isla—mga 390 kilometros kalaba kag mga 160 kilometros kalapad. Mataas nga mga kabukiran ang halos nagapuno sa isla. Ang Yü Shan (Mount Morrison) mas mataas sangsa Mount Fuji sa Japan ukon sa Mount Cook sa New Zealand. Ang makitid nga mga patag sa baybayon nagalibot sa mga kabukiran kag nagalab-ot sa dagat, nga karon puno na sang kapin sa 22 ka milyon nga pumuluyo sang Taiwan.

Isa Pa ka Sahi sang Pag-uswag

Apang, may isa pa ka sahi sang pag-uswag nga mas talalupangdon sa Taiwan—ang espirituwal nga pag-uswag. Makita ini sa kakugi sang mga tawo, bata kag tigulang, kon makilala na nila ang matuod nga Dios, si Jehova. Makadalayaw gid nga makita ang pag-uswag sa kadamuon sang makugi nga mga nagapangabudlay agod buligan ang iban nga makatuon tuhoy kay Jehova kag sa iya katuyuan.

Ang pag-uswag nagakinahanglan sing pagpasangkad. Sang Disiembre 1990, isa ka propiedad ang ginbakal agod padakuon ang sanga talatapan sang mga Saksi ni Jehova. Ang pasilidad sang una, nga nahamtang sa Taipei, tuman na kagamay agod atipanon ang mga hilikuton sang 1,777 ka manugbantala sang Ginharian sa Taiwan sa sina nga tion. Pagkatapos sang pila ka tuig nga makugi nga pag-obra sang internasyonal kag lokal nga mga boluntaryo nga lainlain ang edad, ang bag-o nga mga pasilidad sa Hsinwu sarang na gamiton sadtong Agosto 1994. Sadto nga tion  may 2,515 nga nagapaambit sang maayong balita gikan sa Pulong sang Dios, ang Biblia. Karon, pagligad sang mga napulo ka tuig, ini nga kadamuon nagdoble, nga naglampas sa 5,500 nga kadamuon, kag kada bulan mga ikap-at nga bahin sini ang nagapakigbahin sa bug-os tion nga ministeryo nga hilikuton. Talalupangdon gid ang mga lamharon nga kaangay sang makapapagsik nga “mga tulo sang tun-og” sa kaagahon.—Salmo 110:3.

Espirituwal nga Pag-uswag sa Tunga sang mga Lamharon

Madamo sa makugi nga mga manugbantala sang maayong balita mga lamharon pa. Ang iban mga elementarya pa lang. Halimbawa, sa isa ka banwa sa naaminhan sang Taiwan, isa ka mag-asawa ang gin-agda sa nahauna nga tion nga magtambong sa Teokratikong Eskwelahan Para sa Ministeryo, diin nagatuon ang mga Saksi ni Jehova kon paano magtudlo sang mga kamatuoran sa Biblia. Nakibot ang mag-asawa nga makita ang isa ka diutay nga bata, si Weijun, nga nagabasa sang Biblia sa plataporma sing mas hanas sangsa madamo nga adulto. Nian sa iban nga mga miting nga ila natambungan, nagdayaw gid sila sa maalam nga mga sabat sang wala pa nagaeskwela nga mga kabataan. Nagkomento ining mag-asawa kon daw ano kabuot ang mga kabataan sa Kingdom Hall.

Ngaa nagakonsentrar gid ining mga lamharon sa pagtudlo sang Biblia sa pungsod nga ang kalabanan Budhista kag Taoista? Ini bangod gin-aplikar sang ila Cristiano nga mga ginikanan ang mga prinsipio sa Biblia kag nagtukod sing isa ka malipayon nga pamilya nga nasentro sa kaangtanan kay Jehova. Bangod nanikasog ang mga ginikanan ni Weijun nga mangin malipayon ang pagtuon sang pamilya sa Biblia kag ang pag-alagad sa latagon, ang mga magulang sining bata bawtismado naman nga mga Saksi. Sining karon lang, sang nangabay si Weijun nga makigbahin sa pagbantala nga hilikuton, nagsiling ang iya iloy nga mas madamo pa nga magasin ang napahamtang ni Weijun sangsa kon tingbon ang ginpahamtang sang iban pa nga katapo sang pamilya sina nga bulan. Nalipay gid sia maghambal tuhoy sa kamatuoran, magkomento sa mga miting, kag magpaambit sang iya natun-an sa iban.

Samtang Nagahamtong Sila

Ano ang ginahimo sining mga lamharon samtang nagahamtong sila? Kalabanan sa ila padayon nga nagapakita sing matuod nga gugma kay Jehova kag sa ministeryo. Halimbawa, si Huiping isa ka estudyante. Isa ka adlaw, nagsiling ang iya maestro nga may mga katapo sang isa ka relihion nga wala nagapatughong sing dugo apang wala sia makahibalo kon sin-o sila. Sang matapos ang klase, ining lamharon nga Cristiano nagpaathag sa iya maestro nga sila mga Saksi ni Jehova kag kon ngaa amo sini ang ila tindog.

Ang isa pa ka instruktor nagpasalida sing video tuhoy sa mga balatian nga ginapaliton paagi sa sekso. Ang video nagsambit sang 1 Corinto 6:9, apang nagsiling sia nga wala ginapakamalaut sang Biblia ang homoseksuwalidad. Sa liwat napaathag ni Huiping sa instruktor ang pagtamod sang Dios tuhoy sa sini.

Sang ang klasmeyt ni Huiping nga si Shuxia nagahanda sing isa ka report tuhoy sa kasingki sa sulod sang pamilya, ginhatagan niya sia sang Nobiembre 8, 2001 nga gua sang Magmata! nga may panghapin nga “Bulig Para sa Ginasakit nga mga Babayi” kag nagpaathag nga nagaunod ini sing madamo nga pasad sa Biblia nga impormasyon tuhoy sa sini nga topiko. Sang ulihi, nangin di-bawtismado nga manugbantala si Shuxia. Sila ni Huiping nagapaambit karon sang maayong balita sa iban.

Nasapwan sang madamo nga Cristiano sa eskwelahan nga indi mahapos nga makilal-an subong katawhan nga nagakabuhi suno sa mga prinsipio sang Biblia. Matuod ini ilabi na sa magagmay nga mga banwa sa uma. Si Zhihao dapat magpakigbato sa pag-ipit sang katubotubo bangod sang iya pagtuo kag pagbantala nga hilikuton. Sia nagsiling: “Nalugaw-an gid ako amo nga nahadlok ako nga makit-an sang akon mga klasmeyt samtang nagapakigbahin ako sa ministeryo. Kon kaisa napulo gid sila nga nagayaoyao sa akon!” Isa ka adlaw, gin-asaynan si Zhihao sang iya maestro sing isa ka presentasyon tuhoy sa iya  relihion sa atubangan sang klase. “Namat-od ako nga sugdan ang akon presentasyon sa Genesis kapitulo 1 kag nian hinun-anunan ang mga pamangkot subong sang: Sin-o ang nagtuga sang duta kag sang tanan nga butang sa sini? Kag paano nagluntad ang tawo? Sang ginsugdan ko nga basahon ang Kasulatan, nagsugod na sa pagkadlaw ang pila, nga nagasiling nga mapinatihon ako sa disparatis. Apang, gintapos ko ang akon presentasyon. Sang ulihi, nahambal ko ang pila ko ka klasmeyt tuhoy sa aton hilikuton kag sa aton pagtuo. Karon, kon makita nila ako nga nagabantala, wala na nila ako ginakadlawan!”

Si Zhihao nagpadayon: “Bangod mga Saksi ang akon mga ginikanan, ginahinun-anunan namon kada aga ang adlaw-adlaw nga teksto. Regular man kami nga nagatuon sing Biblia kag nagatambong sa mga miting. Amo kon ngaa maatubang ko ang bisan sin-o nga mahimo magyaoyao sa akon kon magtinguha ako nga ipaambit sa iban ang makapaumpaw nga mga kamatuoran sa Biblia.”

Si Tingmei isa ka estudyante sa teknikal nga eskwelahan. Isa ka bes, gin-agda sia sang iya mga klasmeyt sa isa ka piknik kaupod sang pila ka estudyante gikan sa iban nga eskwelahan. Nakita niya ang katalagman sa moral sa sini nga pagpakig-upod gani nangindi sia. Pila ka bes pa nila sia nga ginaagda, bisan pa nga ginpaambit niya sa iya mga klasmeyt ang maayo nga impormasyon gikan sa libro nga Questions Young People Ask—Answers That Work. * Ginyaguta sia sang iya mga klasmeyt, nga nagasiling nga old-fashioned sia. Apang napamatud-an nga maalamon ang pagsunod sa mga prinsipio sang Biblia sang nagbusong ang isa sa sining mga babayi kag nagpahulog. Si Tingmei nagsiling: “Matinlo ang akon konsiensia bangod ginsunod ko ang sugo ni Jehova. Subong resulta, nalipay ako kag may kaayawan gid.”

Paglandas sa mga Balagbag sa Pag-uswag

Ang isa sang suod nga abyan ni Tingmei amo si Ruiwen. Sang batabata pa sia, abi niya isa lamang ka makatalaka nga rutina ang pagkadto sa Cristiano nga mga miting kag pagpakigbahin sa ministeryo sa latagon. Apang sang nakita niya ang kinatuhayan sang matuod nga gugma sa iya kongregasyon kag sang pakulahaw nga pagpakig-abyan sang iya mga klasmeyt, nakumbinse sia nga dapat sia magbag-o. Nagbantala dayon si Ruiwen sa iya mga kabutho kag labi nga nag-athag sa iya kon ano ang dapat niya himuon. Nag-auxiliary payunir sia, nga nagahinguyang sing 50 ka oras kada bulan sa ministeryo. Nian nagregular payunir sia, nga nagahinguyang sing 70 ka oras kada bulan sa pag-alagad. Si Ruiwen  nagsiling: “Mapinasalamaton gid ako kay Jehova. Wala gid sia mangampo sa akon. Palangga niya ako gihapon bisan pa nga may nahimo ako nga nagpasubo sa iya. Amo man sini ang pagpalangga sang akon iloy kag sang iban sa kongregasyon. Sanglit nagadumala ako karon sing lima ka pagtuon sa Biblia, nabatyagan ko nga nagapakigbahin ako sa labing makaalayaw nga hilikuton.”

Sa isa ka hayskul sa uma, duha ka Saksi nga kabataan ang gin-asayn nga mangin sumalaot sang eskwelahan para sa isa ka paindis-indis sa saot. Sang nahibaluan nila kon ano ini nga paindisanay, nagbatyag ining mga pamatan-on nga Saksi nga kon makigbahin sila malapas nila ang ila Cristianong konsiensia. Sang gintilawan nila nga ipaathag ang ila pagtamod kag nangabay nga indi na lang mag-entra, wala sila ginpasugtan. Sa baylo, ginsilingan sila sang mga manunudlo nga bangod sila ang gin-asaynan, dapat mag-entra gid sila. Bangod indi luyag magkompromiso, nagpadala sing sulat ining mga pamatan-on nga Saksi sa Web site sang departamento sang edukasyon nga nagapaathag sang ila problema. Bisan pa nga wala makabaton sing sabat ining mga pamatan-on, nakabaton dayon ang eskwelahan sing sulat nga nagasiling nga indi pagpiliton ang bisan sin-o nga makigbahin sa amo nga paindisanay. Nalipay gid ining mga pamatan-on nga bangod sa paghanas sang Biblia, nadihon indi lamang ang ila konsiensia kundi naghatag man ini sa ila sing kusog nga manindugan kon ano ang husto!

Bisan yadtong may pisikal nga mga limitasyon nalipay man sa pagpaambit sa iban sang ila paglaum gikan sa Biblia. Si Minyu paralisado halin sang pagkabata. Bangod indi niya magamit ang iya mga kamot, ginabukad niya ang Biblia paagi sa iya dila agod basahon ang teksto nga luyag niya. Sa iya mga asaynment sa Teokratikong Eskwelahan Para sa Ministeryo sa Kingdom Hall, nagahigda sia, kag ang iya tagbalay nagapungko sa manubo nga bangko kag amo ang nagauyat sang mikropono para sa iya. Makalilipay gid ang panikasog ni Minyu sa paghanda sining mga bahin!

Sang luyag na ni Minyu nga mangin manugbantala sang Ginharian, nagtuon ang pila ka utod nga babayi sa kongregasyon kon paano magpanaksi sa telepono agod mabuligan sia. Ginatum-ok sang iya dila ang numero sang telepono samtang ginabuligan sia sang mga utod nga babayi sa paghimo sing listahan sang iya mga tawag. Nalipay gid sia sa hilikuton amo nga nag-auxiliary payunir sia, nga nagapakighambal sa iban tuhoy sa Ginharian sang Dios sing 50 tubtob 60 ka oras kada bulan sa telepono. May pila nga nagbaton sang literatura sang Biblia kag nagpasugot nga tawgan niya sila liwat. Nagadumala sia karon sing tatlo ka pagtuon sa Biblia sa mga tawo nga iya nakontak sa sini nga paagi.

Huo, kaangay sang makapapagsik nga mga tinulo sang tun-og, ang mga lamharon nga lalaki—kag babayi—sa 78 ka kongregasyon sang mga Saksi ni Jehova sa Taiwan kinabubut-on kag makugi nga nagadala sang nagasakdag kabuhi nga maayong balita sang Ginharian sa sining madamo sing pumuluyo nga isla. Diutay lamang ini nga bahin sang bug-os kalibutan nga katumanan sang masunod nga tagna sa Biblia: “Ang imo katawhan magahalad sang ila kaugalingon sing kinabubut-on sa adlaw sang imo puersa militar. Sa himaya sang pagkabalaan, gikan sa pamanagbanag sang kaagahon, kaupod mo ang mga pamatan-on kaangay sang mga tulo sang tun-og.” (Salmo 110:3) Daw ano nga pagpalig-on sa mga may edad na ining mga lamharon sa tunga sang ila mga masigkamanugpangabudlay, kag labaw sa tanan, nalipay gid sa ila ang ila langitnon nga Amay, si Jehova nga Dios!—Hulubaton 27:11.

[Nota]

[Kahon/Retrato sa pahina 10]

KINAHANGLAN ANG DUGANG NGA MGA KINGDOM HALL

Bangod sang pagdamo sang mga manugbantala sa Taiwan, nangin daku nga hangkat ang dugang nga mga Kingdom Hall. Ngaa? Bangod magluwas sa pila ka duog sa uma, daw wala sing duta nga sarang mapatindugan sang Kingdom Hall. Dugang pa, tama ka mahal ini, kag estrikto ang mga zoning law. Sa dalagku nga mga banwa kag siudad, ang lamang nga medyos amo ang pagbakal sing mga opisina kag himuon ini nga mga Kingdom Hall. Apang, ang kalabanan nga mga opisina indi bagay gamiton subong Kingdom Hall kay manubo ang mga kisame sini, mahal mentinahon, estrikto ang seguridad, ukon may iban pa nga rason.

Sining nagligad nga tinuig, nakapatindog na sing pila ka bag-o nga Kingdom Hall ang mga Saksi ni Jehova sa Taiwan. Padayon gihapon ang pagpangita sing bag-o nga mga propiedad kay handa ang mga Saksi nga sakdagon ang kagastuhanan kag tun-an ang kinahanglanon nga mga ikasarang sa pagtukod.