Mga Pamangkot Gikan sa mga Bumalasa

Sa tapos sang katapusan nga pagtilaw sa hingapusan sang Milenyo, posible bala nga magpakasala pa kag mapatay ang tawo?

Ang duha ka teksto sa tulun-an sang Bugna sa Biblia nagahatag sa aton sing impormasyon nga makabulig agod masabat ini nga pamangkot: “Ang kamatayon kag Hades gintagbong sa linaw nga kalayo. Ini nagakahulugan sang ikaduha nga kamatayon, ang linaw nga kalayo.” (Bugna 20:14) “Pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.”—Bugna 21:4.

Talupangda ang tion nga nadalahig diri. Ang pagtagbong sa “kamatayon kag Hades” sa linaw nga kalayo matabo sa tapos nga ang mga nakalampuwas sa Armagedon, ang mga ginbanhaw, kag ang mga natawo sa tapos sang Armagedon, nahukman na pasad sa “mga butang nga nasulat sa mga linukot nga tulun-an,” ukon sa detalyado nga mga ginapatuman ni Jehova sa sulod sang isa ka libo ka tuig. (Bugna 20:12, 13) Si apostol Juan nagrekord sang isa pa ka palanan-awon, nga mabasa sa Bugna kapitulo 21, nga matuman sa Isa ka Libo ka Tuig nga Paghari ni Cristo Jesus. Apang, ang bug-os nga katumanan sina nga palanan-awon matabo sa hingapusan sang isa-ka-libo-ka-tuig nga Adlaw sang Paghukom. Si Jehova magapuyo gid upod sa katawhan nga wala na sing manugpatunga, sa tapos nga gintugyan na ni Jesus ang Ginharian sa iya Amay. Si Jehova malaragwayon nga magapuyo upod sa “iya mga katawhan” sa permanente kag direkta nga paagi. Mangin matuod nga “wala na sing kamatayon” kon ang mga tawo mangin himpit na subong resulta sang bug-os nga pag-aplikar sang balor sang halad-gawad ni Cristo.—Bugna 21:3, 4.

Busa, ang kamatayon nga ginsambit sa mga teksto nga ginkutlo sa ibabaw amo ang Adamiko nga kamatayon, nga pagadulaon sang gawad ni Cristo. (Roma 5:12-21) Bangod wala na ang kamatayon nga napanubli gikan sa una nga tawo, ang mga tawo mangin kaangay ni Adan sang gintuga sia. Si Adan himpit, apang wala ini nagakahulugan nga indi gid sia mapatay. Ginsilingan ni Jehova si Adan nga indi magkaon gikan sa “kahoy sa pagkilala sang maayo kag malain” kag nagsiling: “Sa adlaw nga magkaon ka gikan sini mapatay ka nga totoo.” (Genesis 2:17) Kamatayon yadto bangod sa hungod nga pagpakasala. Pagkatapos sang katapusan nga pagtilaw sa hingapusan sang Isa ka Libo ka Tuig nga Paghari, ang mga tawo may kahilwayan gihapon nga magpili. (Bugna 20:7-10) Hilway sila nga makapili kon bala luyag nila padayunon ang pag-alagad kay Jehova ukon indi. Gani, wala sing makasiling nga wala na gid sing magatalikod sa Dios, kaangay sang pagtalikod ni Adan.

Ano ang matabo sa tawo nga nagrebelde sa tapos sang katapusan nga pagtilaw kay wala na sing kamatayon ukon Hades? Sa sina nga tion, wala na ang kamatayon nga resulta sang pagpakasala ni Adan. Kag ang Hades, ang kabilugan nga lulubngan sang katawhan nga may paglaum nga mabanhaw, wala na man. Apang, malaglag ni Jehova ang bisan sin-o nga rebelde paagi sa pagbutang sa iya sa linaw nga kalayo, nga wala na sing paglaum nga mabanhaw. Ina nga kamatayon kaangay sang kamatayon nanday Adan kag Eva, indi ang kamatayon nga napanubli sang mga tawo kay Adan.

Apang, wala kita sing rason sa paghunahuna nga matabo ini. Ang mga nakalampuwas sa katapusan nga pagtilaw tuhay gid kay Adan. Natilawan na sila sing bug-os. Makasalig kita sa pagkaid-id sang katapusan nga pagtilaw kay si Jehova makausisa sing bug-os sa mga tawo. Mapat-od naton nga dulaon sang katapusan nga pagtilaw ang bisan sin-o nga magaabuso sang ila kahilwayan sa pagpili. Busa, bisan pa nga posible nga magrebelde batok sa Dios kag malaglag ang mga nakalampuwas sa katapusan nga pagtilaw, malayo gid nga matabo ini.

[Retrato sa pahina 31]

Pagkatapos sang katapusan nga pagtilaw, sa ano nga kahulugan nga ang katawhan mangin kaangay ni Adan?