“Nabatian Ninyo ang Pagbatas ni Job”

“Nabatian ninyo ang pagbatas ni Job kag nakita ang resulta nga ginhatag ni Jehova, nga si Jehova mapinalanggaon gid kag maluluy-on.”—SANTIAGO 5:11.

1, 2. Anong pagtilaw ang gin-atubang sang mag-asawa sa Poland?

SI Harald Abt nangin Saksi ni Jehova sing halos isa ka tuig pa lang sang ginkontrol sang mga soldado ni Hitler ang Danzig (Gdańsk karon) sa aminhan nga Poland. Nian, nagbudlay ang kahimtangan kag nangin makatalagam gid para sa matuod nga Cristiano didto. Gintinguhaan sang mga Gestapo nga piliton si Harald nga pirmahan ang dokumento nga nagapanghiwala sang iya pagtuo apang nangindi sia. Pagkatapos sang pila ka semana sa prisuhan, gindala si Harald sa kampo konsentrasyon sa Sachsenhausen, diin sulitsulit sia nga ginpahog kag ginbakol. Gintudlo sang opisyal ang simburyo sang sulunugan sang bangkay kag ginsilingan si Harald, “Magakayab ka dira sa imo Jehova kon indi mo pagbiyaan ang imo pagtuo sa sulod sang 14 ka adlaw.”

² Sang gin-aresto si Harald, ginapasuso pa sang iya asawa nga si Elsa ang ila napulo ka bulan nga bata nga babayi. Apang wala makaluwas sa mga Gestapo si Elsa. Wala magdugay, ginkuha sa iya ang iya bata kag gindala man sia sa kampo nga palatyan sa Auschwitz. Apang, kaangay ni Harald, nalampuwasan man niya ang mga tinuig sa prisuhan. Sa The Watchtower sang Abril 15, 1980, mabasa mo kon paano sila nakabatas. Si Harald nagsulat: Sa kabilugan, nakahinguyang ako sing 14 ka tuig sa mga kampo konsentrasyon kag sa mga prisuhan bangod sang akon pagtuo sa Dios. May nagapamangkot sa akon: ‘Nakabulig bala sa imo ang imo asawa sa pagbatas sining tanan?’ Isa gid sia ka daku nga bulig! Nahibaluan ko na nga daan nga indi gid sia magkompromiso sang iya pagtuo, kag nakabulig ini sa akon nga makabatas. Nahibaluan ko nga mas luyag niya nga makita ako nga mapatay nga matutom sangsa mahilway ako bangod nagkompromiso ako. . . . Ginbatas ni Elsa ang madamo nga kabudlayan sa mga tinuig nga yara sia sa mga kampo konsentrasyon sang Alemanya.”

3, 4. (a) Kay sin-o mga halimbawa ang makapalig-on sa mga Cristiano nga magbatas? (b) Ngaa ginapalig-on kita sang Biblia nga binagbinagon ang eksperiensia ni Job?

³ Ang pag-antos sang kalautan indi gid mahapos, subong sang ginapamatud-an sang madamo nga mga Saksi. Bangod sini, ang Biblia nagalaygay sa tanan nga Cristiano: “Gamita subong huwaran sang pag-antos sa kalautan kag sang pagpailob ang mga manalagna, nga naghambal sa ngalan  ni Jehova.” (Santiago 5:10) Sa bug-os nga maragtas, madamo nga alagad sang Dios ang ginhingabot nga walay kabangdanan. Ang halimbawa nga gin-aman sining daku nga “panganod sang mga saksi” makapalig-on sa aton nga magpadayon sa pagdalagan nga may pagbatas sa aton Cristianong dalaganon.—Hebreo 11:32-38; 12:1.

⁴ Sa rekord sang Biblia, si Job talalupangdon gid nga huwaran sang pagbatas. “Yari karon! Ginapahayag naton nga malipayon ang mga nagbatas,” sulat ni Santiago. “Nabatian ninyo ang pagbatas ni Job kag nakita ang resulta nga ginhatag ni Jehova, nga si Jehova mapinalanggaon gid kag maluluy-on.” (Santiago 5:11) Ang eksperiensia ni Job nagahatag sa aton sing ideya sa padya nga nagahulat sa mga matutom nga ginapakamaayo ni Jehova. Labing importante, nagapahayag ini sing mga kamatuoran nga makabulig sa aton sa tion sang kapiutan. Ang tulun-an sang Job nagabulig sa aton nga masabat ining mga pamangkot: Kon ginatilawan, ngaa dapat naton hunahunaon ang importante nga mga hulusayon nga nadalahig? Anong mga kinaiya kag panimuot ang makabulig sa aton nga makabatas? Paano naton mapalig-on ang masigka-Cristiano nga nagakalisod?

Paghangop sa Bug-os nga Kahimtangan

5. Anong importante nga hulusayon ang dapat naton dumdumon kon nagaatubang kita sing mga pagtilaw kag mga pagsulay?

⁵ Agod mahuptan ang espirituwal nga pagkabalanse sa tion sang kapiutan, dapat naton hangpon ang bug-os nga kahimtangan. Kay kon indi, mahimo tabunan sang personal nga mga problema ang aton espirituwal nga panan-aw. Ang hulusayon tuhoy sa pagkatutom sa Dios amo ang labing importante. Ang aton langitnon nga Amay may ginapangabay sa aton nga dapat naton dumdumon: “Magmaalam ka, anak ko, kag pahalipaya ang akon tagipusuon, agod nga masabat ko sia nga nagayaguta sa akon.” (Hulubaton 27:11) Daw ano ka pinasahi nga pribilehiyo! Walay sapayan sang aton mga kaluyahon kag pagkadihimpit, mapahalipay naton ang aton Manunuga. Mahimo naton ini kon pahulagon kita sang aton gugma kay Jehova nga batason ang mga pagtilaw kag mga pagsulay. Ang matuod nga Cristianong gugma nagabatas sa tanan nga butang. Wala ini nagakapaslawi.—1 Corinto 13:7, 8.

6. Paano ginayaguta ni Satanas si Jehova, kag tubtob sa anong kasangkaron?

⁶ Ang tulun-an sang Job maathag nga nagapakilala kay Satanas subong amo ang nagayaguta kay Jehova. Ginapahayag man sini ang malaut nga disposisyon sining di-kitaon nga kaaway kag ang iya handum nga gub-on ang aton kaangtanan sa Dios. Subong gin-ilustrar sa kaso ni Job, panguna gid nga ginasumbong ni Satanas nga may makagod nga mga motibo ang tanan nga alagad ni Jehova kag luyag niya pamatud-an nga ang ila gugma sa Dios mahimo magbugnaw. Ginyaguta niya ang Dios sa sulod na sang linibo ka tuig. Sang gintagbong si Satanas gikan sa langit, ang tingog gikan sa langit naglaragway sa iya subong “manugsumbong sang aton mga kauturan” kag nagsiling nga nagasumbong sia sa “atubang sang aton Dios sa adlaw kag gab-i.” (Bugna 12:10) Paagi sa aton matutom nga pagbatas, mapakita naton nga ang iya mga panumbungon indi matuod.

7. Paano naton mabatuan sing maayo ang pisikal nga kaluyahon?

⁷ Dapat naton dumdumon nga gamiton sang Yawa ang bisan ano nga kapipit-an nga mahimo ginaatubang naton agod ipahilayo kita kay Jehova. San-o niya ginsulay si Jesus? Sang tion nga gutom si Jesus pagkatapos nagpuasa sing madamong adlaw. (Lucas 4:1-3) Apang, bangod sa espirituwal nga kusog ni Jesus napamatukan niya sing malig-on ang mga pagsulay sang Yawa. Busa, importante gid nga batuan ang bisan ano nga pisikal nga kaluyahon—ayhan tuga sang balatian ukon katigulangon—paagi  sa espirituwal nga kusog! Bisan pa nga ang “pagkatawo sa gua nagapalangluya,” wala kita nagauntat bangod ang “pagkatawo sa sulod ginabag-o sa adlaw-adlaw.”—2 Corinto 4:16.

8. (a) Paano ang negatibo nga mga emosyon may makapaluya nga epekto? (b) Ano nga panimuot ang yara kay Jesus?

⁸ Dugang pa, ang negatibo nga mga balatyagon makaguba sang espirituwalidad sang isa. ‘Ngaa gintugutan ini ni Jehova?’ ayhan palibog sang isa. ‘Paano nga ang isa ka utod nagtratar sa akon sing subong sini?’ mahimo ipamangkot sang isa pagkatapos nga gintratar sing di-maayo. Ini nga mga balatyagon mahimo bangdan nga pasapayanan naton ang panguna nga mga hulusayon kag magkonsentrar sa personal nga mga kahimtangan. Ang kalugaw-an ni Job sa iya tatlo ka sayop nga mga abyan daw nagtuga pa sing daku nga halit sa iya sangsa iya balatian. (Job 16:20; 19:2) Sing kaanggid, ginpakita ni apostol Pablo nga ang paghupot sing kaakig ‘nagahatag sing lugar [ukon, kahigayunan] sa Yawa.’ (Efeso 4:26, 27) Sa baylo nga ipaupok ang kaakig ukon kalugaw-an sa mga indibiduwal ukon magsagi pamensar sa inhustisya nga natabo sa isa ka kahimtangan, makabenepisyo sing labi ang mga Cristiano paagi sa pag-ilog kay Jesus sa ‘pagtugyan sang iya kaugalingon sa isa nga nagahukom sing matarong,’ si Jehova nga Dios. (1 Pedro 2:21-23) Ang pagtigayon sing “disposisyon” ni Jesus isa gid ka panguna nga depensa batok sa mga pagsalakay ni Satanas.—1 Pedro 4:1.

9. Anong pasalig ang ginahatag sang Dios sa aton tuhoy sa mga lulan nga dapat naton batason ukon sa mga pagsulay nga ginaatubang naton?

⁹ Labaw sa tanan, indi gid naton dapat pagtamdon ang aton mga problema subong pamatuod nga wala kita ginakahamut-an sang Dios. Ining sayop nga paghangop nagpasakit kay Job sang tion nga ginsalakay sia paagi sa masakit nga mga tinaga sang iya manuglugpay kuntani. (Job 19:21, 22) Ginapasalig kita sang Biblia sa sining mga pulong: “Sa malaut nga mga butang ang Dios indi matilawan ukon sia mismo magatilaw kay bisan sin-o.” (Santiago 1:13) Sa baylo, si Jehova nagasaad nga buligan niya kita nga madala ang bisan ano nga lulan nga nagaabot sa aton kag amanan kita sing lulutsan gikan sa tanan nga pagsulay nga nagaabot sa aton. (Salmo 55:22; 1 Corinto 10:13) Paagi sa pagpakigsuod sa Dios sa tion sang kapipit-an, mahuptan naton ang nagakaigo nga pagtamod sa mga butang kag madinalag-on nga mapamatukan ang Yawa.—Santiago 4:7, 8.

Mga Bulig sa Pagbatas

10, 11. (a) Ano ang nakabulig kay Job nga makabatas? (b) Paano ang pagtigayon sing maayo nga konsiensia nakabulig kay Job?

¹⁰ Walay sapayan sang malain nga kahimtangan ni Job—lakip na ang pagpasipala sang iya mga “manuglugpay” kag ang iya kagumon tuhoy sa matuod nga kabangdanan sang iya kalamidad—ginhuptan gihapon ni Job ang iya integridad. Ano ang matun-an naton gikan sa iya pagbatas? Walay duhaduha, ang panguna nga rason sang iya kadalag-an amo ang iya katutom kay Jehova. ‘Nahadlok sia sa Dios kag naglikaw sa kalainan.’ (Job 1:1) Amo ini ang iya dalanon sang kabuhi. Wala ginsikway ni Job si Jehova, bisan pa nga wala sia makahangop kon ngaa hinali nga nagbag-o ang kahimtangan. Para kay Job, dapat sia mag-alagad sa Dios sa maayo kag malain nga mga tinion.—Job 1:21; 2:10.

¹¹ Ang pagtigayon sing maayo nga konsiensia nangin makalulugpay man kay Job. Sang daw mapatay na sia, nalugpayan sia kay nahibaluan niya nga nahimo niya ang iya labing masarangan sa pagbulig sa iban, nga nahuptan niya ang matarong nga mga talaksan ni Jehova, kag nalikawan niya ang bisan ano nga porma sang butig nga pagsimba.—Job 31:4-11.

12. Ano ang reaksion ni Job sa bulig nga nabaton niya kay Elihu?

¹² Matuod, nagakinahanglan si Job sing bulig agod mabag-o ang iya pagtamod sa pila ka bahin. Kag mapainubuson niya nga ginbaton ini nga bulig—isa pa ka sekreto nga nakabatas sia sing madinalag-on. Ginpamatian ni Job sing matinahuron ang maalam nga laygay ni Elihu, kag ginbaton niya sing positibo ang pagtadlong ni Jehova. “Naghambal ako, apang indi ko mahangpan,” baton niya. “Ginabawi ko ang akon ginahambal, kag nagahinulsol ako sa yab-ok kag abo.” (Job 42:3, 6) Walay sapayan sang balatian nga padayon nga nagapabudlay sa iya, nalipay si Job nga ining pagbag-o sa iya panghunahuna nagpasuod pa gid sa iya sa Dios. “Nahibaluan ko nga mahimo mo [Jehova] ang tanan nga butang,” siling ni Job. (Job 42:2) Sa bulig sang  pagpaathag ni Jehova tuhoy sa Iya pagkadungganon, nahangpan ni Job sing mas maathag ang iya kahimtangan kon ipaanggid sa Manunuga.

13. Paano ang pagkamaluluy-on nakahatag sing kaayuhan kay Job?

¹³ Sa katapusan, si Job isa ka talalupangdon nga halimbawa sang pagkamaluluy-on. Ang iya sayop nga mga manuglugpay nagsakit gid sa iya balatyagon, apang sang ginpangabay ni Jehova si Job nga mangamuyo tungod sa ila, ginhimo niya ini. Pagkatapos sini, ginpasag-uli ni Jehova ang kapagros ni Job. (Job 42:8, 10) Maathag nga ang paghinakit indi makabulig sa aton nga makabatas, kundi ang gugma kag pagkamaluluy-on. Ang indi paghinakit nagapaumpaw sa aton sa espirituwal, kag amo ini ang dalanon nga ginapakamaayo ni Jehova.—Marcos 11:25.

Maalam nga mga Manuglaygay nga Nagabulig sa Aton sa Pagbatas

14, 15. (a) Ano nga mga kinaiya ang makabulig sa isa ka manuglaygay agod mapaumpawan ang iban? (b) Ipaathag kon ngaa nangin madinalag-on si Elihu sa pagbulig kay Job.

¹⁴ Ang isa pa ka leksion nga matun-an naton gikan sa kasaysayan ni Job amo ang kapuslanan sang maalam nga mga manuglaygay. Ini sila kaangay sang utod nga “natawo kon may kapiutan.” (Hulubaton 17:17) Apang, subong sang ginapakita sang eksperiensia ni Job, ang pila ka manuglaygay makasakit sa baylo nga makapaayo. Kinahanglan nga ipakita sang maayo nga manuglaygay ang empatiya, pagtahod, kag kaayo, subong sang ginhimo ni Elihu. Mahimo pasibuon sang mga gulang kag iban pa nga hamtong nga mga Cristiano ang panghunahuna sang mga kauturan nga nabug-atan sing mga problema, kag makatuon gid sa sini ang mga manuglaygay gikan sa tulun-an sang Job.—Galacia 6:1; Hebreo 12:12, 13.

¹⁵ May maayo nga mga leksion sa paagi ni Elihu sa pag-atubang sa mga butang. Namati sia sing maayo antes magsabat sa sayop nga mga pulong sang tatlo ka abyan ni Job. (Job 32:11; Hulubaton 18:13) Gintawag ni Elihu si Job sa iya ngalan kag nagpakigsugilanon sa iya subong isa ka abyan. (Job 33:1) Indi kaangay sang tatlo ka sayop nga manuglugpay, wala ginkabig ni Elihu ang iya kaugalingon nga labaw kay Job. “Ako man ginhimo gikan sa lunang,” siling niya. Indi niya luyag nga dugangan ang pag-antos ni Job paagi sa wala sing pasunaid nga mga pulong. (Job 33:6, 7; Hulubaton 12:18) Sa baylo nga mulayon ang paggawi anay ni Job, gindayaw sia ni Elihu bangod sang iya pagkamatarong. (Job 33:32) Labi ka importante, may pagtamod sang Dios sa mga butang si Elihu, kag ginbuligan niya si Job nga magkonsentrar sa katunayan nga si Jehova indi maghikot sing di-nagakaigo. (Job 34:10-12) Ginpalig-on niya si Job nga maghulat kay Jehova, sa baylo nga panikasugan nga ipakita ang iya kaugalingon nga pagkamatarong. (Job 35:2; 37:14, 23) Makabenepisyo gid ang Cristianong mga gulang kag ang iban pa gikan sa sining mga leksion.

16. Paano nangin instrumento ni Satanas ang tatlo ka sayop nga manuglugpay ni Job?

¹⁶ Ang maalam nga laygay ni Elihu kabaliskaran gid sa makasakit nga mga tinaga nanday Elifaz, Bildad, kag Zofar. “Wala kamo magpamulong sing kamatuoran tuhoy sa akon,” siling ni Jehova sa ila. (Job 42:7) Bisan pa magpangangkon sila nga maayo ang ila intension, naghikot sila subong instrumento ni Satanas sa baylo nga matutom nga mga abyan. Halin sa umpisa, tanan sila nagsiling nga si Job amo ang balasulon sa iya mga kalamidad. (Job 4:7, 8; 8:6; 20:22, 29) Suno kay Elifaz, wala sing pagsalig ang Dios sa iya mga alagad, kag wala sia sing labot kon matarong man ukon malaut kita. (Job 15:15; 22:2, 3) Gin-akusahan pa gani ni Elifaz si Job sang sala  nga wala niya nahimo. (Job 22:5, 9) Sa pihak nga bahin, si Elihu nagbulig kay Job sa espirituwal, nga amo pirme ang tulumuron sang isa ka mahigugmaon nga manuglaygay.

17. Ano ang aton hunahunaon kon ginatilawan kita?

¹⁷ May isa pa gid ka leksion sang pagbatas nga makuha naton sa tulun-an sang Job. Nahibaluan sang aton mahigugmaon nga Dios ang aton kahimtangan kag sia handa kag makasarang magbulig sa aton sa nanuhaytuhay nga paagi. Kaina, nabasa naton ang eksperiensia ni Elsa Abt. Pamalandungi ang iya ginsiling: “Antes ako naaresto, nabasa ko ang sulat sang utod nga nagasiling nga sa idalom sang mabudlay nga pagtilaw ang espiritu ni Jehova nagahatag sa imo sang kalinong. Abi ko nagapasobra lang sia. Apang sang ako na ang gintilawan, narealisar ko nga matuod gid ang iya ginsiling. Amo gid sini ang natabo sa akon. Mabudlay ini handurawon, kon wala mo ini naeksperiensiahan. Apang, natabo gid ini sa akon. Nagabulig gid si Jehova.” Ang ginsiling ni Elsa indi tuhoy sa himuon pa ni Jehova ukon sa ginhimo niya sang nagligad nga linibo ka tuig sang adlaw ni Job. Nagasugid sia tuhoy sa aton tion. Huo, “nagabulig gid si Jehova!”

Malipayon ang Tawo nga Nagabatas

18. Ano nga mga benepisyo ang natigayon ni Job sa iya pagbatas?

¹⁸ Ang pila sa aton mahimo mag-atubang sang mabudlay nga kahimtangan kaangay ni Job. Apang ang bisan ano man nga mga pagtilaw ang maatubang naton sa sining sistema sang mga butang, may mabakod kita nga rason sa paghupot sang aton integridad, kaangay ni Job. Sa pagkamatuod, ang pagbatas nagpabugana sang kabuhi ni Job. Naghimpit ini sa iya, naghimo sa iya nga mabakod. (Santiago 1:2-4) Nagpabakod ini sang iya kaangtanan sa Dios. “Sa hinuringhuring nakabati ako tuhoy sa imo, apang karon makita ka sang akon mata,” siling ni Job. (Job 42:5) Napamatud-an si Satanas nga butigon bangod wala niya nabungkag ang integridad ni Job. Pagligad sang ginatos ka tuig, ginapatuhuyan man gihapon ni Jehova ang iya alagad nga si Job subong halimbawa sang pagkamatarong. (Ezequiel 14:14) Ang iya rekord sang integridad kag pagbatas nagapahulag sa mga alagad sang Dios bisan karon.

19. Ngaa nagapati ka nga takus gid ang pagbatas?

¹⁹ Sang ginsulatan ni Santiago ang unang siglo nga mga Cristiano tuhoy sa pagbatas, ginpatuhuyan niya ang kaayawan nga resulta sang pagbatas. Kag gingamit niya ang halimbawa ni Job sa pagpahanumdom sa ila nga ginapakamaayo ni Jehova sing bugana ang iya matutom nga mga alagad. (Santiago 5:11) Mabasa naton sa Job 42:12: “Tuhoy kay Jehova, ginpakamaayo niya ang kaulihian ni Job sing kapin sang sa iya panugod.” Ginhatagan si Job sing doble sa iya nadula, kag nagkabuhi sia sing malawig, malipayon nga kabuhi. (Job 42:16, 17) Sing kaanggid, ang bisan ano nga kasakit, pag-antos, ukon kalisod nga aton maeksperiensiahan sa sining sistema sang mga butang pagadulaon kag kalimtan na sa bag-ong kalibutan sang Dios. (Isaias 65:17; Bugna 21:4) Nabatian naton ang pagbatas ni Job, kag determinado kita, sa bulig ni Jehova, nga ilugon ang halimbawa ni Job. Nagsaad ang Biblia: “Malipayon ang tawo nga padayon nga nagabatas sang pagtilaw, kay bangod nga nahamut-an magabaton sia sing purongpurong sang kabuhi, nga ginsaad ni Jehova sa mga padayon nga nagahigugma sa iya.”—Santiago 1:12.

Ano ang Imo Sabat?

• Paano naton mapahalipay si Jehova?

• Ngaa indi kita maghinakop nga ang aton mga problema pamatuod nga wala kita ginakahamut-an sang Dios?

• Ano nga mga butang ang nakabulig kay Job nga magbatas?

• Paano naton mailog si Elihu sa pagpalig-on sa aton mga masigkatumuluo?

[Mga Pamangkot sa Pagtinuon]

[Retrato sa pahina 28]

Mahinuklugon, matinahuron, kag mainayuhon gid ang isa ka maayo nga manuglaygay

[Mga retrato sa pahina 29]

Sanday Elsa kag Harald Abt