“Bangod sa Siam-ka-Tuig nga Bata nga Lalaki”

SI Wiesława nagapuyo sa nabagatnan nga Poland. Kon magkadto gani ang mga Saksi ni Jehova sa iya puluy-an, ginapasalamatan apang ginabalibaran dayon niya sila. Isa ka adlaw, ang siam-ka-tuig nga si Samuel nagpanawag sa iya ganhaan upod sa iya iloy. Sa sini nga tion nagpamati si Wiesława sa mensahe gikan sa Biblia kag nagbaton sing magasin tuhoy sa paraiso sa duta.

Bangod nagahilapit ang Memoryal sang kamatayon ni Jesucristo, luyag ni Samuel nga agdahon si Wiesława sa sining pinasahi nga okasyon. Gani, upod sa iya iloy, ginduaw sia liwat sining bata nga lalaki, dala ang naimprinta nga imbitasyon. Sang nakita niya nga nakailis sing maayo ang bata, nagsiling si Wiesława nga mailis anay sia. Sang magbalik sia, ginpamatian niya si Samuel, ginbaton ang imbitasyon, kag namangkot: “Ako lang bala ang matambong ukon updon ko pa ang akon bana?” Dayon nagsiling pa sia: “Bisan indi mag-upod ang akon bana, matambong ako. Himuon ko ini bangod sa imo, Samuel.” Nalipay si Samuel sang gintuman ni Wiesława ang iya panaad.

Sa tion sang pamulongpulong sa Memoryal, gintuparan ni Samuel si Wiesława kag ginpakita niya sa iya ang mga teksto nga ginabinagbinag. Nagdayaw gid sa sini si Wiesława. Nanamian sia sa Memoryal kag mapinasalamaton sia nga ang madalom nga mga ideya ginpaathag lang sa simple nga mga tinaga. Natandog man sia sa mainit nga pag-abiabi kag sa kaayo nga ginpakita sang kongregasyon. Sugod sadto, nagpakita sing dugang pa nga interes sa espirituwal nga mga butang si Wiesława kag nagsugod sia sa pagpakig-upod sing regular sa mga Saksi ni Jehova. Sining karon lang nagsiling sia: “Nahuya ako nga sang una wala ako nagapamati sa inyo kon magkadto kamo sa akon puluy-an. Kag ginabaton ko nga nagpamati lang ako sa inyo mensahe bangod sa siam-ka-tuig nga bata nga lalaki, bangod kay Samuel.”

Kaangay ni Samuel sa Poland, madamo sang pamatan-on nga mga Saksi ni Jehova ang nagadayaw sa Dios paagi sa ila mga pulong kag maayo nga paggawi. Kon ikaw isa ka pamatan-on, mahimo mo man mabuligan ang sinsero nga mga tawo nga magpakita sing interes sa maayo nga espirituwal nga mga butang.