“Ipahibalo sa Dios ang Inyo mga Pangabay”

“Sa tagsa ka butang paagi sa pangamuyo kag pag-ampo nga may pagpasalamat ipahibalo sa Dios ang inyo mga pangabay.”—FILIPOS 4:6.

1. May pribilehiyo kita nga makakomunikar kay sin-o, kag ngaa tumalagsahon gid ini?

 KON mangabay ka nga makighambal sa manuggahom sang inyo pungsod, ano ayhan ang isabat sa imo? Mahimo nga makabaton ka sing mainayuhon nga sabat gikan sa iya mga tinawo, apang daw imposible nga tugutan ka nga masugilanon ang manuggahom mismo. Apang, tuhay ang kahimtangan sa labing gamhanan nga Manuggahom sa tanan, si Jehova nga Dios, ang Soberano sang uniberso. Makapakigsugilanon kita sa iya bisan diin man kita kag bisan ano nga tion nga luyag naton. Ang kalahamut-an nga mga pangamuyo makalab-ot gid sa iya. (Hulubaton 15:29) Tumalagsahon gid ini! Indi bala ang pag-apresyar sa sini magapahulag sa aton nga mangamuyo sing regular sa Isa nga nagakaigo tawgon nga “Manugpamati sang pangamuyo”?—Salmo 65:2.

2. Ano ang kinahanglanon agod kahamut-an sang Dios ang mga pangamuyo?

² Apang, mahimo mamangkot ang iban, ‘Ano nga pangamuyo ang kalahamut-an sa Dios?’ Ginapaathag sang Biblia ang isa ka butang nga kinahanglanon sa kalahamut-an nga pangamuyo sang nagsiling ini: “Kon wala sing pagtuo imposible nga mapahamut-an sia sing maayo, kay sia nga nagapalapit sa Dios dapat magpati nga nagaluntad sia kag nga sia ang manugpadya sa mga hanuot nga nagapangita sa iya.” (Hebreo 11:6) Huo, subong sang ginpaathag sang nagligad nga artikulo, ang panguna nga kinahanglanon sa pagpalapit sa Dios amo ang pagtuo. Ang Dios handa magbaton sang pangamuyo sang mga nagapalapit sa iya, apang dapat nila ini himuon nga may pagtuo kag matarong nga mga buhat upod ang pagkasinsero kag husto nga panimuot.

3. (a) Subong ginpakita sang mga pangamuyo sang mga matutom nga mga alagad sang una, ano pa ang mahimo naton mapabutyag sa aton mga pangamuyo? (b) Ano ang nanuhaytuhay nga porma sang pangamuyo?

³ Ginlaygayan ni apostol Pablo ang mga Cristiano sang iya adlaw: “Indi kamo magkabalaka sa bisan ano nga butang, kundi sa tagsa ka butang paagi sa pangamuyo kag pag-ampo nga may pagpasalamat ipahibalo sa Dios ang inyo mga pangabay.” (Filipos 4:6, 7) Sa Biblia may madamong halimbawa sang mga nangamuyo sa Dios tuhoy sa mga butang nga ila ginakabalak-an. Lakip sa ila amo sanday Ana, Elias, Ezequias, kag Daniel. (1 Samuel 2:1-10; 1 Hari 18:36, 37; 2 Hari 19:15-19; Daniel 9:3-21) Dapat naton ilugon ang ila halimbawa. Talupangda man nga ginapakita sang pinamulong ni Pablo nga mahimo nanuhaytuhay ang porma sang aton pangamuyo. Ginsambit niya ang pagpasalamat, nga amo ang pangamuyo agod ipabutyag ang aton pasalamat sa mga ginhimo sang Dios sa aton. Mahimo ini updan sang pagdayaw. Ang pag-ampo nagapatuhoy sa mapainubuson, hanuot nga pangabay. Kag makapabutyag man kita sang aton mga pangabay, ukon mga hingyo sa pila ka espesipiko nga butang. (Lucas 11:2, 3) Malipay gid ang aton langitnon nga Amay sa pagbaton sang aton pagpalapit sa iya sa bisan diin sini nga mga paagi.

4. Bisan pa nga nahibaluan na ni Jehova ang aton mga kinahanglanon, ngaa kinahanglan gihapon nga mangabay sa iya?

⁴ Mahimo mamangkot ang iban, ‘Indi bala nahibaluan na ni Jehova ang aton tanan nga kinahanglanon?’ Matuod gid ina. (Mateo 6:8, 32) Kon amo, ngaa kinahanglan pa gid nga ipalapit naton sa iya ang aton mga pangabay? Binagbinaga ini nga halimbawa: Ang isa ka tag-iya sang tiendahan mahimo maghatag sing regalo sa iya pila ka kostumer. Apang, agod mabaton ini nga regalo,  ang kostumer dapat magkadto sa tag-iya kag pangayuon ini. Yadtong indi buot manikasog sa pagpangayo sini nagapakita nga wala nila ginaapresyar ang ginatanyag. Sing kaanggid, kon wala naton ginapahibalo ang aton mga pangabay sa pangamuyo nagapakita ini nga wala kita sing apresasyon sa mga ginaaman ni Jehova. Nagsiling si Jesus: “Pangayo kag magabaton kamo.” (Juan 16:24) Sa sining paagi, mapakita naton ang aton pagsalig sa Dios.

Paano Kita Dapat Magpalapit sa Dios?

5. Ngaa dapat kita mangamuyo sa Dios sa ngalan ni Jesus?

⁵ Wala nagpahamtang si Jehova sing madamo nga pagsulundan kon paano mangamuyo. Apang, dapat naton hibaluon ang nagakaigo nga pagpalapit sa Dios, nga ginpaathag sa Biblia. Halimbawa, gintudluan ni Jesus ang iya mga sumulunod: “Kon magpangayo kamo sa Amay sing bisan ano nga butang sa akon ngalan ihatag niya ini sa inyo.” (Juan 16:23) Busa, kinahanglan nga mangamuyo kita sa ngalan ni Jesus, nga ginakilala nga paagi lamang kay Jesus nga matigayon sang mga tawo ang mga pagpakamaayo sang Dios.

6. Ano dapat ang aton posisyon kon nagapangamuyo?

⁶ Ano dapat ang aton posisyon kon nagapangamuyo? Wala sing ginsiling ang Biblia tuhoy sa espesipiko nga posisyon agod pamatian ang aton mga pangamuyo. (1 Hari 8:22; Nehemias 8:6; Marcos 11:25; Lucas 22:41) Ang importante amo ang pagpangamuyo sa Dios sing sinsero kag sa husto nga panimuot.—Joel 2:12, 13.

7. (a) Ano ang buot silingon sang “amen”? (b) Paano ini gamiton sing nagakaigo sa mga pangamuyo?

⁷ Kamusta naman ang pagsambit sing “amen”? Ginapakita sang Kasulatan nga nagakaigo gid ini sa katapusan sang aton mga pangamuyo, ilabi na kon nagapangamuyo sa publiko. (Salmo 72:19; 89:52) Ang Hebreong tinaga nga ʼa·menʹ nagakahulugan sing “pat-od gid.” Ginapaathag sang McClintock and Strong’s Cyclopedia nga ang kahulugan sa pagsiling sing “Amen” sa katapusan sang pangamuyo amo ang “pag-ugyon sa mga ginsiling, kag nagapangabay nga matuman ini.” Busa, paagi sa pagsiling sing tinagipusuon nga “Amen,” ang isa nga nagapangamuyo nagapakita sang iya hanuot nga balatyagon tuhoy sa iya ginhambal. Kon ang isa ka Cristiano nga nagatiglawas sa kongregasyon magatapos sang iya pangamuyo sa sini nga ekspresyon, yadtong nagapamati mahimo hipos man nga magasiling sing “Amen” ukon sing matunog sa pagpakita nga nagaugyon gid sila sa ginpangamuyo.—1 Corinto 14:16.

8. Paano mahimo mangin kaanggid sa pangamuyo nanday Jacob ukon Abraham ang pila sang aton pangamuyo, kag ano ang ginapakita sini tuhoy sa aton?

⁸ May mga tion nga ginatugutan kita sang Dios nga ipakita ang aton tudok nga kabalaka tuhoy sa mga butang nga aton ginapangamuyo. Ayhan kinahanglan nga mangin kaangay kita ni Jacob sang una, nga nakigdumog sa bug-os nga gab-i sa isa ka anghel agod lamang pakamaayuhon. (Genesis 32:24-26) Ukon sa iban nga kahigayunan ayhan kinahanglan mangin kaangay kita ni Abraham, nga sulitsulit nga nangabay kay Jehova tungod kay Lot kag sa iban pa nga matarong nga mga tawo nga mahimo yara sa Sodoma. (Genesis 18:22-33) Sing kaanggid, makapangabay man kita kay Jehova tuhoy sa mga butang nga hamili sa aton, nagahingyo sa iya pasad sa iya hustisya, mahigugmaon nga kaayo, kag kaluoy.

Ano ang Mahimo Naton Ipangabay?

9. Ano dapat ang una naton nga patuhuyan kon nagapangamuyo?

⁹ Dumduma nga nagsiling si Pablo: “Sa bisan ano nga butang . . . ipahibalo sa Dios ang inyo mga pangabay.” (Filipos 4:6) Busa, ang personal nga mga pangamuyo mahimo nga maglakip sang halos tanan nga bahin sang aton pagkabuhi. Apang, ang una naton nga patuhuyan sa aton mga pangamuyo amo dapat ang mga intereses ni Jehova. Nagpahamtang gid sing maayong halimbawa sa sini si Daniel. Sang ginsilutan ang Israel bangod sang ila mga sala, nangabay si Daniel nga kaluy-an sila ni Jehova, nga nagasiling: “Indi magpalantang, tungod sa imo kaugalingon, O Dios ko, kay ang imo siudad kag ang imo katawhan ginatawag sa imo ngalan.” (Daniel 9:15-19) Ginapakita bala sang aton mga pangamuyo nga ang pagpakabalaan sang ngalan ni Jehova kag katumanan sang iya kabubut-on amo ang aton panguna nga ginakabalak-an?

10. Paano naton nahibaluan nga nagakaigo ang pagpangamuyo tuhoy sa personal nga mga butang?

¹⁰ Apang, nagakaigo man nga mangabay tuhoy sa personal nga mga butang. Halimbawa, kaangay sang salmista, mahimo kita makapangamuyo  para sa mas madalom pa nga paghangop sa espirituwal. Nangamuyo sia: “Pahangpa ako, agod matuman ko ang imo sugo kag agod matuman ko ini sing bug-os tagipusuon.” (Salmo 119:33, 34; Colosas 1:9, 10) Si Jesus “nagpangamuyo kag nag-ampo man sa Isa nga makaluwas sa iya sa kamatayon.” (Hebreo 5:7) Sa paghimo sini, ginpakita niya nga nagakaigo gid nga mangayo sing kusog kon yara kita sa katalagman ukon ginatilawan. Sang ginhatag niya ang modelo nga pangamuyo sa iya mga disipulo, ginlakip ni Jesus ang iya personal nga mga ginakabalak-an, subong sang kapatawaran sang mga sala kag pagtigayon sang pagkaon sa adlaw-adlaw.

11. Paano makabulig ang pangamuyo agod indi kita masulay?

¹¹ Sa modelo nga pangamuyo, ginlakip ni Jesus ang pangabay nga: “Indi kami pagdalha sa pagsulay, kundi luwasa kami gikan sa isa nga malauton.” (Mateo 6:9-13) Naglaygay sia sang ulihi: “Magpadayon kamo sa pagbantay kag magpangamuyo sing padayon, agod indi kamo masulay.” (Mateo 26:41) Importante gid ang pangamuyo kon ginsulay kita. Mahimo kita masulay nga supakon ang mga prinsipio sa Biblia sa ulubrahan ukon eskwelahan. Mahimo kita imbitahon sang mga di-Saksi nga magbuylog sa ila sa kuwestionable nga mga hilikuton. Mahimo kita pangabayon nga magbuhat sing butang nga lapas sa matarong nga mga prinsipio. Sa sina nga kahimtangan, mas maayo kon sundon naton ang laygay ni Jesus nga mangamuyo—antes ang pagsulay ukon sa tion mismo sang pagsulay—nga nagapangabay sa Dios nga buligan kita nga indi masulay.

12. Ano nga mga kabangdanan sang kabalaka ang makapahulag sa aton nga mangamuyo, kag ano ang mapaabot naton kay Jehova?

¹² Nanuhaytuhay ang mga pag-ipit kag mga kabalaka sang mga alagad sang Dios karon. Ang mga balatian kag kahuol amo ang panguna nga rason sang kabalaka sang madamo. Ang masingki nga  kahimtangan sa palibot nagapahuol man sa aton. Ginabudlayan kita sa pagtigayon sang mga kinahanglanon sang kabuhi bangod sang kapurauton. Makapalugpay gid mahibaluan nga nagapamati si Jehova sa iya mga alagad nga nagapangayo sing bulig sa iya tuhoy sa sining mga butang! Ang Salmo 102:17 nagsiling tuhoy kay Jehova: “Pat-od gid nga pamatian niya ang pangamuyo sang ginhublasan sang tanan nga butang, kag indi niya tamayon ang ila mga pangamuyo.”

13. (a) Anong personal nga mga butang ang nagakaigo nga ipangamuyo? (b) Isaysay ang halimbawa sang amo sina nga sahi sang pangamuyo.

¹³ Sa pagkamatuod, nagakaigo nga ipangamuyo ang bisan ano nga mahimo makaapektar sa aton pag-alagad kay Jehova ukon sa aton kaangtanan sa iya. (1 Juan 5:14) Kon magdesisyon tuhoy sa pagminyo ukon sa pagtrabaho ukon pagpasangkad sang imo ministeryo, indi mangalag-ag nga ipangamuyo ini sa Dios, nga nagapangabay sang iya panuytoy. Halimbawa, ang isa ka pamatan-on nga babayi sa Pilipinas luyag nga mangin bug-os tion nga ministro. Apang, wala sia sing trabaho nga isakdag sa iya kaugalingon. Nagsiling sia: “Isa ka Sabado, espesipiko nga nangamuyo ako kay Jehova tuhoy sa pagpayunir. Saadto man nga adlaw, sang nagabantala kami sa latagon, nagtanyag ako sing isa ka libro sa isa ka dalagita. Sa hinali nagsiling ang dalagita: ‘Kadto ka sa amon eskwelahan sa Lunes sang aga.’ Namangkot ako, ‘Ngaa?’ Nagpaathag sia nga may bakante pa nga trabaho nga kinahanglan pun-an sa gilayon. Nagkadto ako, kag ginbaton ako dayon. Ginsabat dayon ang akon pangamuyo.” Madamong Saksi sa bug-os nga kalibutan ang may kaanggid sini nga mga eksperiensia. Gani indi gid mangalag-ag nga isugid ang imo tinagipusuon nga pangabay sa Dios sa pangamuyo!

Kamusta Kon Nakasala Kita?

14, 15. (a) Ngaa indi dapat mangalag-ag sa pagpangamuyo ang isa ka tawo bisan pa kon nakasala sia? (b) Luwas sa personal nga mga pangamuyo, ano pa ang makabulig sa isa ka tawo nga makapanumbalik gikan sa iya pagpakasala?

¹⁴ Paano makabulig ang pangamuyo sa isa nga nakasala? Bangod sa kahuya, ang pila nga nakasala wala na nagapangamuyo. Apang, indi gid ini maalamon. Sa pag-ilustrar: Ang mga piloto sang eroplano nakahibalo nga kon magtalang sila, makapakigkomunikar sila sa mga air traffic controller agod magpabulig. Apang, kamusta, kon ang nagtalang nga piloto mangalag-ag sa pagpakigkomunikar sa mga controller bangod nahuya sia kay nagtalang sia. Magadul-ong ini sa kapahamakan! Sing kaanggid, ang isa nga nakasala kag nahuya sa pagpangamuyo sa Dios magaantos sing daku. Ang kahuya sa nahimo nga sala indi dapat magpugong sa isa sa pagpakigsugilanon kay Jehova. Sa pagkamatuod, ginaagda sang Dios ang mga nakasala sing mabug-at nga mangamuyo sa iya. Si manalagna Isaias nagpalig-on sa mga nakasala sang iya adlaw nga magpanawag kay Jehova, “kay sia magapatawad sing bugana.” (Isaias 55:6, 7) Siempre pa, kinahanglan sang isa nga ‘pahumukon ang nawong ni Jehova’ paagi sa pagpaubos sang iya kaugalingon, pagbiya sa iya makasasala nga dalanon, kag paghinulsol sing tudok.—Salmo 119:58; Daniel 9:13.

¹⁵ Kon nakasala, ang pangamuyo importante gid bangod sang isa pa ka rason. Nagsiling si disipulo Santiago tuhoy sa pila nga nagakinahanglan sing espirituwal nga bulig: “Magpatawag sia sang mga tigulang sang kongregasyon, kag pangamuyuan nila sia, . . . kag si Jehova magabangon sa iya.” (Santiago 5:14, 15) Huo, dapat personal nga itu-ad sang isa sa pangamuyo ang iya sala kay Jehova, apang mahimo man niya mapangabay ang mga gulang nga mangamuyo para sa iya. Makabulig ini sa iya pagpanumbalik sa espirituwal.

Mga Sabat sa mga Pangamuyo

16, 17. (a) Paano ginasabat ni Jehova ang mga pangamuyo? (b) Ano nga mga eksperiensia ang nagapakita nga may daku nga kaangtanan ang pangamuyo kag pagbantala nga hilikuton?

¹⁶ Paano ginasabat ang mga pangamuyo? Ang iban nga mga pangamuyo, insigida kag maathag  ang mga sabat. (2 Hari 20:1-6) Ang iban naman mahimo nga medyo madugay, kag indi madali matalupangdan ang mga sabat. Subong sang ginpakita sa ilustrasyon ni Jesus tuhoy sa balo nga nagbalikbalik sa hukom, ayhan kinahanglanon ang sulitsulit nga pagpalapit sa Dios. (Lucas 18:1-8) Apang, makapat-od gid kita nga kon mangamuyo kita nahisuno sa kabubut-on sang Dios, indi gid magsiling si Jehova sa aton: “Untati ang paggamo sa akon.”—Lucas 11:5-9.

¹⁷ Ang katawhan ni Jehova madamo sing eksperiensia kon tuhoy sa ginsabat nga mga pangamuyo. Masami ini nga nagakatabo sa aton publiko nga ministeryo. Halimbawa, duha ka Cristianong utod nga babayi sa Pilipinas ang nagapanagtag sang literatura sa Biblia sa isa ka naligwin nga duog. Sang ginhatagan nila sing tract ang isa ka babayi, naghibi ini. Nagsiling sia: “Kagab-i nangamuyo ako sa Dios nga magpadala sia sing tawo nga magatudlo sa akon sa Biblia, kag sa banta ko amo na ini ang sabat sa akon pangamuyo.” Wala magdugay pagkatapos sini, nagtambong na ang babayi sa mga miting sa Kingdom Hall. Sa isa pa ka bahin sang Bagatnan-sidlangan nga Asia, ang isa ka Cristianong utod nga lalaki nagapangalag-ag sa pagbantala sa isa ka guardiado nga puluy-an nga mga tinukod. Apang, nangamuyo sia kay Jehova, nangisog, kag nagsulod sa bilding. Nanuktok sia sa isa ka apartment, kag naggua ang isa ka pamatan-on nga babayi. Sang ginpaathag sang utod kon ngaa nagduaw sia, naghibi ang babayi. Nagsiling sia nga ginapangita niya ang mga Saksi ni Jehova kag nangamuyo sing bulig agod makit-an sila. Malipayon nga ginbuligan sia sang utod nga makapakig-angot sa lokal nga kongregasyon sang mga Saksi ni Jehova.

18. (a) Kon ginsabat ang aton mga pangamuyo, ano dapat ang aton himuon? (b) Ano ang aton mapat-od kon mangamuyo kita sa tanan nga higayon?

¹⁸ Dalayawon gid nga aman ang pangamuyo. Si Jehova handa nga magpamati kag magsabat. (Isaias 30:18, 19) Apang, dapat mangin mabinantayon kita kon paano ginasabat ni Jehova ang aton mga pangamuyo. Mahimo nga sa masami indi ini sa paagi nga ginapaabot naton. Apang, kon mahantop naton ang iya panuytoy, indi gid naton dapat pagkalimtan nga pasalamatan kag dayawon sia. (1 Tesalonica 5:18) Dugang pa, dumduma pirme ang laygay ni apostol Pablo: “Sa tagsa ka butang paagi sa pangamuyo kag pag-ampo nga may pagpasalamat ipahibalo sa Dios ang inyo mga pangabay.” Huo, himusli ang tanan nga kahigayunan sa pagpakigsugilanon sa Dios. Sa sini nga paagi, padayon mo nga maeksperiensiahan ang pagkamaminatud-on sang ginsiling ni Pablo tuhoy sa mga tawo nga nakatigayon sang sabat sa ila mga pangamuyo: “Ang paghidait sang Dios nga nagalabaw sa tanan nga panghunahuna magabantay sa inyo tagipusuon kag sa inyo ikasarang sa paghunahuna.”—Filipos 4:6, 7.

Masabat Mo Bala?

• Ano ang nanuhaytuhay nga porma sang pangamuyo?

• Paano kita dapat mangamuyo?

• Ano nga mga topiko ang mahimo naton malakip sa aton mga pangamuyo?

• Ano ang papel sang pangamuyo kon ang isa nakasala?

[Mga Pamangkot sa Pagtinuon]

[Mga retrato sa pahina 29]

Ang tinagipusuon nga pangamuyo nagabulig agod indi kita masulay

[Mga retrato sa pahina 31]

Paagi sa pangamuyo, mapabutyag naton sa Dios ang aton mga pagpasalamat, mga kabalaka, kag mga pangabay