Kon Paano Kita Makapalapit sa “Manugpamati sang Pangamuyo”

“O Manugpamati sang pangamuyo, bisan ang katawhan sang tanan nga unod magakari sa imo.”—SALMO 65:2.

1. Ano ang kinatuhayan sang mga tawo gikan sa iban nga tinuga sa duta, kag anong kahigayunan ang ginahatag sini?

 SA LINIBO ka buhi nga tinuga sa duta, ang mga tawo lamang ang may ikasarang sa pagsimba sa Manunuga. Ang mga tawo lamang ang mahunahunaon sa ila espirituwal nga mga kinahanglanon kag nagahandum nga mapaayawan ini. Nagahatag ini sa aton sing dalayawon nga kahigayunan nga makatigayon sing personal nga kaangtanan sa aton langitnon nga Amay.

2. Ano ang malain nga epekto sang sala sa kaangtanan sang tawo sa iya Manunuga?

² Gintuga sang Dios ang tawo nga may ikasarang sa pagpakigkomunikar sa iya Magbubuhat. Gintuga sanday Adan kag Eva nga himpit. Busa, hilway sila nga makapalapit sa Dios kaangay sa pagpalapit sang isa ka bata sa iya amay. Apang, inang dalayawon nga pribilehiyo nawasi bangod sang sala. Ginlapas nanday Adan kag Eva ang Dios kag nadula ang ila suod nga kaangtanan sa iya. (Genesis 3:8-13, 17-24) Nagakahulugan bala ina nga indi na gid makapalapit ang di-himpit nga mga kaanakan ni Adan sa Dios? Indi, ginatugutan gihapon sila ni Jehova nga makapalapit sa iya apang dapat nila anay sundon ang pila ka mga kinahanglanon. Ano ini nga mga kinahanglanon?

Mga Kinahanglanon sa Pagpalapit sa Dios

3. Paano dapat magpalapit sa Dios ang makasasala nga mga tawo, kag ano nga halimbawa ang nagalaragway sa sini?

³ Ang hitabo may kaangtanan sa duha ka anak ni Adan magabulig sa aton nga mahibaluan kon ano ang ginapatuman sang Dios sa isa ka di-himpit nga tawo nga luyag magpalapit sa Iya. Nanikasog gid sanday Cain kag Abel nga makapalapit sa Dios paagi sa paghalad sa iya. Ginbaton sang Dios ang dulot ni Abel, apang ang kay Cain wala. (Genesis 4:3-5) Ano ang kinatuhayan sang ila dulot? Ang Hebreo 11:4 nagasiling: “Bangod sa pagtuo si Abel nagdulot sa Dios sing halad nga daku pa ang bili sangsa kay Cain, nga paagi sini nga pagtuo nagpanaksi sia nga matarong sia.” Maathag gid nga kinahanglanon ang pagtuo agod makapalapit sa Dios. Ang isa pa ka kinahanglanon masapwan sa ginpamulong ni Jehova kay Cain: “Kon nagahimo ka sing maayo, indi ka bala pagbayawon?” Huo, ginbaton tani sang Dios ang pagpalapit ni Cain kon naghimo sia sing maayo. Apang, ginsikway ni Cain ang laygay sang Dios, ginpatay niya si Abel, kag nagresulta ini sa pagsikway sa iya. (Genesis 4:7-12) Busa, sa ginsuguran pa lang, ginpadaku na ang importansia sang pagpalapit sa Dios nga may pagtuo upod ang paghimo sing maayo.

4. Ano ang dapat naton kilalahon kon nagapalapit sa Dios?

⁴ Importante man nga kilalahon naton ang aton makasasala nga kahimtangan kon luyag naton magpalapit sa Dios. Ang tanan nga tawo makasasala, kag ang sala balagbag sa pagpalapit sa Dios. Si manalagna Jeremias nagsulat tuhoy sa Israel: “Nagpakasala kami . . . Ginbalabagan mo sang madamol nga gal-um ang pagpalapit sa imo, agod nga ang pangamuyo indi makalapos.” (Panalabiton 3:42, 44) Walay sapayan sini, sa bug-os nga maragtas sang tawo ginpakita sang Dios ang iya kahanda sa pagbaton sang mga pangamuyo sang mga nagapalapit sa iya nga may pagtuo kag may nagakaigo nga panimuot sang tagipusuon, nga nagatuman sang iya mga sugo. (Salmo 119:145) Sin-o ang pila sa sini nga mga tawo, kag ano ang matun-an naton sa ila mga pangamuyo?

5, 6. Ano ang matun-an naton gikan sa pagpalapit ni Abraham sa Dios?

 ⁵ Ang isa sa ila amo si Abraham. Ginbaton sang Dios ang iya pagpalapit, kay gintawag sang Dios si Abraham nga “akon abyan.” (Isaias 41:8) Ano ang matun-an naton gikan sa pagpalapit ni Abraham sa Dios? Ining matutom nga patriarka namangkot kay Jehova tuhoy sa isa ka manunubli, nga nagasiling: “Ano bala ang ihatag mo sa akon, sanglit wala ako sing anak?” (Genesis 15:2, 3; 17:18) Sang isa pa ka bes, nagpautwas sia sang iya kabalaka kon sin-o ang maluwas kon hukman na sang Dios ang mga malauton sa Sodoma kag Gomorra. (Genesis 18:23-33) Nangamuyo man si Abraham para sa iban. (Genesis 20:7, 17) Kag, subong sang ginhimo ni Abel, ang pagpalapit ni Abraham sa Dios nagadalahig kon kaisa sing pagdulot kay Jehova.—Genesis 22:9-14.

⁶ Sa sini tanan nga kahimtangan, wala nagpangalag-ag si Abraham sa pagpakighambal kay Jehova. Apang, ang iya kahilwayan sa paghambal gin-updan sang mapainubuson nga pagtamod sa iya kaugalingon may kaangtanan sa iya Manunuga. Talupangda ang iya matinahuron nga mga pinamulong, nga masapwan sa Genesis 18:27: “Palihug, yari karon nangahas ako sa pagpakigsugilanon kay Jehova, ako nga yab-ok kag abo lamang.” Maayo gid nga panimuot nga dapat ilugon!

7. Ano nga mga butang ang ginpangamuyo sang mga patriarka kay Jehova?

⁷ Ang mga patriarka nangamuyo tuhoy sa nanuhaytuhay nga butang, kag ginpamatian sila ni Jehova. Si Jacob nangamuyo paagi sa isa ka panaad. Sang nakapangabay na sia sing bulig sa Dios, hanuot sia nga nagsaad: “Tuhoy sa tanan nga ihatag mo sa akon ihatag ko gid ang ikanapulo sini sa imo.” (Genesis 28:20-22) Sang ulihi, sang malapit na lang sila magkitaay sang iya utod, nangabay si Jacob sing pangamlig kay Jehova, nga nagasiling: “Luwasa ako, ginaampo ko sa imo, gikan sa kamot sang akon utod, gikan sa kamot ni Esau, kay nahadlok ako sa iya.” (Genesis 32:9-12) Ang patriarka nga si Job nagpalapit kay Jehova para sa iya pamilya, nga nagahalad tungod sa ila. Sang ang tatlo ka abyan ni Job nakasayop sa ila ginpanghambal, nangamuyo si Job tungod sa ila, kag “ginbaton ni Jehova ang nawong ni Job.” (Job 1:5; 42:7-9) Ini nga mga kasaysayan magabulig sa aton nga mahibaluan ang mga butang nga mahimo naton ipangamuyo kay Jehova. Nahangpan man naton nga handa gid si Jehova nga pamatian ang mga pangamuyo sang mga nagapalapit sa iya sa husto nga paagi.

Sa Idalom sang Kasuguan nga Katipan

8. Sa idalom sang Kasuguan nga katipan, paano ginapresentar kay Jehova ang mga butang nga makaapektar sa katawhan?

⁸ Sang naluwas na ni Jehova ang pungsod sang Israel gikan sa Egipto, ginhatag niya sa ila ang Kasuguan nga katipan. Ginbalay sa Kasuguan ang kahimusan sa pagpalapit sa Dios paagi sa  gintangdo nga saserdote. Ang iban nga Levinhon gintangdo subong saserdote tungod sa katawhan. Kon mag-utwas ang mga butang nga makaapektar sa pungsod, ang tiglawas sang katawhan—kon kaisa isa ka hari ukon isa ka manalagna—amo ang nagapresentar sini sa Dios paagi sa pangamuyo. (1 Samuel 8:21, 22; 14:36-41; Jeremias 42:1-3) Halimbawa, sang gindedikar ang templo, si Hari Solomon nagpalapit kay Jehova paagi sa tinagipusuon nga pangamuyo. Ginpakita ni Jehova ang iya kahamuot sa pangamuyo ni Solomon paagi sa pagpuno sang templo sang Iya himaya kag nagsiling: ‘Pamatian ko ang pangamuyo sa sini nga duog.’—2 Cronica 6:12–7:3, 15.

9. Ano ang ginakinahanglan para sa nagakaigo nga pagpalapit kay Jehova sa santuaryo?

⁹ Sa Kasuguan nga ginhatag sa Israel, ginlakip ni Jehova ang mga kinahanglanon para sa kalahamut-an nga pagpalapit sa iya sa santuaryo. Ano ini? Kada aga kag kada gab-i, luwas sa mga dulot nga sapat, ang mataas nga saserdote dapat magsunog sing mahumot nga incienso sa atubang ni Jehova. Sang ulihi, ang mga kabulig nga saserdote makahimo man sini nga pag-alagad, luwas sa Adlaw sang Katumbasan. Kon indi mahimo sang mga saserdote ining matinahuron nga pagsimba, indi gid mahamuot si Jehova sa ila pag-alagad.—Exodo 30:7, 8; 2 Cronica 13:11.

10, 11. Ano ang aton pamatuod nga ginbaton ni Jehova ang mga pangamuyo sang mga indibiduwal?

¹⁰ Sa dumaan nga Israel, ang pagpalapit sa Dios posible lamang bala paagi sa tinangdo nga mga tiglawas? Indi, ginapakita sang Kasulatan nga nahamuot si Jehova sa pagbaton sang personal nga pangamuyo sang mga indibiduwal. Sa pangamuyo ni Solomon sa dedikasyon sang templo, nangabay sia kay Jehova, nga nagasiling: “Ang bisan ano nga pangamuyo, ang bisan ano nga pagpangabay sing pabor nga himuon sang bisan sin-o nga tawo ukon sang imo bug-os nga katawhan nga Israel, . . . kon ihumlad niya ang iya mga palad sa sini nga balay, nian kabay nga ikaw magapamati gikan sa mga langit.” (2 Cronica 6:29, 30) Ang kasaysayan sang Lucas nagasugid sa aton nga sang si Zacarias, ang amay ni Juan Bautista, naghalad sing incienso sa santuaryo, madamo nga di-saserdote nga mga sumilimba ni Jehova ang “nagapangamuyo sa gua.” Maathag nga kinabatasan na sang mga tawo nga magtipon sa gua sang santuaryo sa pagpangamuyo samtang ang incienso ginahalad kay Jehova sa bulawan nga halaran.—Lucas 1:8-10.

¹¹ Busa, kon nagakaigo ang paagi sang pagpalapit kay Jehova, malipay sia sa pagbaton sang pangamuyo sang mga nagatiglawas sa bug-os nga pungsod kag gikan sa mga indibiduwal nga personal nga nagapalapit sa iya. Sa karon wala na kita sa idalom sang Kasuguan nga katipan. Apang, makatuon kita sing pila ka importante nga mga leksion tuhoy sa pangamuyo sa pamaagi sang mga Israelinhon sang una sa pagpalapit sa Dios.

Sa Idalom sang Cristianong Kahimusan

12. Ano nga kahimusan ang ginhatag sa mga Cristiano agod makapalapit kay Jehova?

¹² Nagakabuhi kita karon sa idalom sang Cristianong kahimusan. Wala na sing dutan-on nga templo nga may mga saserdote nga nagatiglawas sa bug-os nga katawhan sang Dios ukon duog nga makadtuan naton agod mangamuyo sa Dios. Apang, may kahimusan gihapon si Jehova agod makapalapit kita sa iya. Ano ini? Sang 29 C.E., sang si Cristo ginhaplasan kag gintangdo nga Mataas nga Saserdote, nagsugod sa pagpanghikot  ang espirituwal nga templo. a Ining espirituwal nga templo amo ang bag-o nga kahimusan sa pagpalapit kay Jehova sa pagsimba pasad sa nagatumbas nga halad ni Jesucristo.—Hebreo 9:11, 12.

13. May kaangtanan sa pangamuyo, ano ang isa ka pagkaanggid sang templo sa Jerusalem kag sa espirituwal nga templo?

¹³ Madamo nga aspekto sang templo sa Jerusalem ang maathag nga naglaragway sa nanuhaytuhay nga bahin sang espirituwal nga templo, lakip na yadtong may kaangtanan sa pangamuyo. (Hebreo 9:1-10) Halimbawa, ano ang ginalaragway sang incienso nga ginahalad, sa aga kag sa gab-i, sa halaran sang incienso sa Balaan nga hulot sang templo? Suno sa tulun-an sang Bugna, ang “incienso nagakahulugan sang mga pangamuyo sang mga balaan.” (Bugna 5:8; 8:3, 4) Gin-inspirar si David sa pagsulat: “Kabay nga ang akon pangamuyo nahanda subong sang incienso sa atubangan mo.” (Salmo 141:2) Busa, sa Cristianong kahimusan, ang mahumot nga incienso nagakaigo gid nga nagapatuhoy sa kalahamut-an nga mga pangamuyo kag pagdayaw kay Jehova.—1 Tesalonica 3:10.

14, 15. Ano ang masiling tuhoy sa pagpalapit kay Jehova (a) sang hinaplas nga mga Cristiano? (b) sang “iban nga mga karnero”?

¹⁴ Sin-o ang makapalapit sa Dios sa sining espirituwal nga templo? Sa dutan-on nga templo, ang mga saserdote kag mga Levinhon amo ang may pribilehiyo sa pag-alagad sa nasulod nga luwang, apang ang mga saserdote lamang ang mahimo makasulod sa Balaan nga hulot. Ang hinaplas nga mga Cristiano nga may langitnon nga paglaum nakatigayon sang pinasahi nga espirituwal nga kahimtangan nga ginalandong sang nasulod nga luwang kag Balaan nga hulot, kag amo ang nagpaposible sa ila nga makapangamuyo kag makadayaw sa Dios.

¹⁵ Kamusta naman ang may dutan-on nga paglaum, ang “iban nga mga karnero”? (Juan 10:16) Ginpakita ni manalagna Isaias nga ang katawhan sang madamo nga pungsod magadugok sa pagsimba kay Jehova “sa ulihi nga bahin sang mga adlaw.” (Isaias 2:2, 3) Nagsulat man sia nga ang mga “dumuluong” magabuylog kay Jehova. Nagapakita sang iya kahanda sa pagbaton sang ila pangamuyo, ang Dios nagsiling: “Pasadyahon ko sila sa sulod sang akon balay nga palangamuyuan.” (Isaias 56:6, 7) Naghatag sing dugang pa nga pagpaathag ang Bugna 7:9-15, nga nagasugid tuhoy sa “dakung kadam-an” gikan sa “tanan nga pungsod” nga nagatipon sa pagsimba kag pagpangamuyo sa Dios “adlaw kag gab-i” samtang nagatindog sila sa naggua nga luwang sang espirituwal nga templo. Makalulugpay gid hunahunaon nga ang tanan nga alagad sang Dios karon hilway nga makapalapit sa Iya upod ang bug-os nga pagsalig nga pamatian Niya sila!

Ano nga mga Pangamuyo ang Kalahamut-an?

16. Ano ang matun-an naton sa mga Cristiano sang una tuhoy sa pangamuyo?

¹⁶ Mapinangamuyuon gid ang mga Cristiano sang una. Ano ang ila ginapangamuyo? Ang mga Cristianong gulang nangabay sing panuytoy sa pagpili sang mga lalaki para sa mga katungdanan sa organisasyon. (Binuhatan 1:24, 25; 6:5, 6) Nangamuyo si Epafras para sa iya mga masigkatumuluo. (Colosas 4:12) Ang mga katapo sang kongregasyon sa Jerusalem nangamuyo para kay Pedro sang nabilanggo sia. (Binuhatan 12:5) Ang mga Cristiano sang una nangabay sa  Dios nga hatagan sila sing kaisog sa pag-atubang sang mga pagpamatok, nga nagasiling: “Jehova, talupangda ang ila mga pamahog, kag tuguti ang imo mga ulipon nga padayon nga maghambal sang imo pulong nga may bug-os nga kaisog.” (Binuhatan 4:23-30) Ginpalig-on ni disipulo Santiago ang mga Cristiano nga mangamuyo sa Dios para sa kaalam kon ginatilawan sila. (Santiago 1:5) Ginalakip mo bala ini nga butang sa imo mga pangamuyo kay Jehova?

17. Kay sin-o pangamuyo ang ginakahamut-an ni Jehova?

¹⁷ Wala ginakahamut-an sang Dios ang tanan nga pangamuyo. Kon amo, paano kita makasalig nga ang aton pangamuyo kalahamut-an? Ang matutom nga katawhan nga ginpamatian sang Dios sang una nga tion nagapalapit sa iya sing tinagipusuon kag upod ang nagakaigo nga panimuot. Nagpakita sila sing pagtuo kag ginpamatud-an ini paagi sa maayong mga buhat. Makasalig man kita karon nga pamatian ni Jehova ang mga nagpalapit sa iya sa sini nga paagi.

18. Agod pamatian ang ila pangamuyo, ano ang dapat himuon sang mga Cristiano?

¹⁸ May dugang pa nga kinahanglanon. Ginpaathag ini ni apostol Pablo, nga nagasiling: “Paagi sa iya kita . . . makapalapit sa Amay paagi sa isa ka espiritu.” Sin-o ang ginapatuhuyan ni Pablo sang sia nagsulat, “paagi sa iya”? Si Jesucristo. (Efeso 2:13, 18) Huo, paagi lamang kay Jesus nga makapalapit kita sing hilway sa Amay.—Juan 14:6; 15:16; 16:23, 24.

19. (a) San-o nangin kalangil-aran ang halad nga incienso sang Israel kay Jehova? (b) Paano naton mapat-od nga kaangay sang mahumot nga incienso ang aton mga pangamuyo kay Jehova?

¹⁹ Subong sang nasambit na, ang incienso nga ginahalad sang mga saserdote nga Israelinhon nagapatuhoy sa kalahamut-an nga mga pangamuyo sang matutom nga mga alagad sang Dios. Apang, kon kaisa, ang incienso nga ginahalad sang mga Israelinhon kalangil-aran kay Jehova. Amo sini kon ang mga Israelinhon nagasunog sang incienso sa templo apang nagasimba man sa mga idolo. (Ezequiel 8:10, 11) Amo man karon, ang pangamuyo sang mga nagapangangkon nga nagaalagad kay Jehova apang nagahimo sang mga buhat nga supak sa iya kasuguan mangin kalangil-aran sa iya. (Hulubaton 15:8) Kabay nga huptan naton ang tanan nga bahin sang aton pagkabuhi nga matinlo agod ang aton pangamuyo sa Dios kaangay sang mahumot nga incienso. Nalipay gid si Jehova sa pangamuyo sang mga nagasunod sa iya matarong nga mga dalanon. (Juan 9:31) Apang, may pila pa ka pamangkot. Paano kita dapat mangamuyo? Ano ang aton mahimo ipangamuyo? Kag paano ginasabat sang Dios ang aton mga pangamuyo? Ang masunod nga artikulo magabinagbinag sa sini kag sa iban pa nga mga pamangkot.

[Nota]

Mapaathag Mo Bala?

• Paano makapalapit sing kalahamut-an sa Dios ang di-himpit nga mga tawo?

• Sa aton mga pangamuyo, paano naton mailog ang mga patriarka?

• Ano ang aton matun-an sa mga pangamuyo sang mga Cristiano sang una?

• San-o ang aton mga pangamuyo sa Dios kaangay sang mahumot nga incienso?

[Mga Pamangkot sa Pagtinuon]

[Retrato sa pahina 23]

Ngaa ginbaton sang Dios ang dulot ni Abel apang ang kay Cain wala?

[Retrato sa pahina 24]

“Ako nga yab-ok kag abo lamang”

[Retrato sa pahina 25]

“Ihatag ko gid ang ikanapulo sini sa imo”

[Retrato sa pahina 26]

Ang imo bala mga pangamuyo kaangay sang mahumot nga incienso kay Jehova?