Kon ang Isa ka Hinigugma Magbiya kay Jehova

SANDAY Mark kag Louise mga Saksi ni Jehova. a Upod ang gugma kag pag-atipan, gintudlo nila ang Kasulatan sa ila mga kabataan, subong amo ang ginalaygay sang Biblia nga himuon sang Cristiano nga mga ginikanan. (Hulubaton 22:6; 2 Timoteo 3:15) Sing makapasubo, ang iban nila nga mga kabataan wala nagpadayon sa pag-alagad kay Jehova sang magdalalagku na sila. “Nagasakit ang akon buot para sa kabataan nga wala na nagaalagad kay Jehova,” siling ni Louise. “Paano ako makapakunokuno sa kada adlaw nga wala ako ginasakitan sini? Kon ang iban mag-istorya parte sa ila mga anak nga lalaki, nagapug-ok ang akon dughan, kag ginapunggan ko nga indi maghibi.”

Matuod, kon ang isa magdesisyon nga biyaan si Jehova kag ang dalanon sang kabuhi nga nabalay sa Kasulatan, natural lamang nga tuman ini kasakit para sa matutom nga mga katapo sang pamilya. “Palangga ko gid ang akon magulang nga babayi,” siling ni Irene. “Himuon ko ang tanan agod manumbalik lang sia kay Jehova!” Si Maria, nga may manghod nga lalaki nga nagtalikod kay Jehova bangod sang imoral nga paggawi, nagsiling: “Ginbudlayan gid ako nga batason ini, kay sa iban nga bahin, kaayo gid sa iya nga sahi sang manghod. Ginakahidlawan ko sia ilabi na sa dalagku nga mga pagtinipon sang pamilya.”

Ngaa Tuman Gid Kabudlay?

Ngaa ang pagbiya sa espirituwal sang isa ka anak ukon iban pa nga hinigugma nagatuga sing tuman nga kasakit sa Cristiano nga mga himata? Bangod nahibaluan nila nga ang Kasulatan nagasaad sing dayon nga kabuhi sa paraiso nga duta sa mga nagapabilin nga matutom kay Jehova. (Salmo 37:29; 2 Pedro 3:13; Bugna 21:3-5) Nagalaum sila nga magkalipay sa sining mga pagpakamaayo kaupod sa ila asawa, kabataan, mga ginikanan, mga utod, kag mga kaapuhan. Daw ano kasakit pensaron para sa ila nga mahimo indi malakip sa sini ang ila mga hinigugma nga nag-untat sa pag-alagad kay Jehova! Bisan sa ila kabuhi sa karon, nahangpan sang mga Cristiano nga ang mga kasuguan kag mga prinsipio ni Jehova para sa ila kaayuhan. Busa, makapasubo para sa mga Cristiano nga makita nga ang ila mga hinigugma nagabuhat sing mga butang nga may mapait nga mga resulta.—Isaias 48:17, 18; Galacia 6:7, 8.

 Para sa mga wala nakaeksperiensia sini nga kahimtangan ayhan mabudlay hangpon kon daw ano ini ka makapasubo. Nagaapektar ini sa halos tanan nga bahin sang kabuhi. “Labi nga nagabudlay ang magtambong sa Cristiano nga mga miting kag makita ang mga ginikanan nga nagakinadlaw kag nagapakighambal sa ila mga anak,” siling ni Louise. “Sa bisan ano nga makalilipay nga okasyon nagabatyag ako sing kasubo bangod wala ang iban nga mga hinigugma.” Ang isa ka Cristiano nga gulang naghinumdom sang apat ka tuig nga wala nagpakig-angot sa ila ang iya manak nga babayi. Sia nagsiling: “Sing masami, bisan ang ‘makalilipay nga mga tion,’ nagadala sing kasubo. Kon regaluhan ko gani ang akon asawa ukon dal-on sia sa isa ka matahom nga duog sa talipuspusan sang semana, nagahibi sia dayon, kay madumduman niya nga wala ang iya anak agod mag-ambit sa amon kalipay.”

Sobra bala ang reaksion sini nga mga Cristiano? Indi gid man. Ang matuod, mahimo nga sa pila ka kasangkaron ginapakita nila ang mga kinaiya ni Jehova, nga sa iya dagway ginhimo ang mga tawo. (Genesis 1:26, 27) Ano ang buot silingon sini? Ti, ano ang ginbatyag ni Jehova sang ang iya katawhan nga Israel nagrebelde sa iya? Sa Salmo 78:38-41, matun-an naton nga nasaklaw sia kag nasakitan. Apang, mapailubon nga ginpaandaman kag gindisiplina niya sila, nga sulitsulit nga nagapatawad sa ila sa kada maghinulsol sila. Maathag nga si Jehova nagabatyag sing personal nga kaangtanan sa iya mga tinuga, ‘ang binuhatan sang iya mga kamot,’ kag wala dayon nagabiya sa ila. (Job 14:15; Jonas 4:10, 11) Ginhatagan niya ang mga tawo sing ikasarang nga magbatyag sing subong man sini ka  mainunungon nga kaangtanan, kag mas labi nga mabakod ang higot nga yara sa tunga sang mga katapo sang pamilya. Gani indi katingalahan kon ang mga tawo magkasubo bangod sa pagbiya sa espirituwal sang isa ka hinigugma nga himata.

Sa pagkamatuod, ang pagbiya sa espirituwal sang isa ka hinigugma amo ang isa sa pinakamabudlay nga mga pagtilaw nga nagaabot sa matuod nga mga sumilimba. (Binuhatan 14:22) Si Jesus nagsiling nga ang pagbaton sa iya mensahe magaresulta sa pagbinahinbahin sang pila ka pamilya. (Mateo 10:34-38) Indi ang mensahe sang Biblia ang nagapabahinbahin sang pamilya. Sa baylo, ang di-matinuuhon ukon ang di-matutom nga katapo sang pamilya nagatuga sing pagbinahinbahin paagi sa pagsikway, pagbiya, ukon pagpamatok sa dalanon sang Cristianismo. Apang, makapasalamat kita nga wala ginapabay-an ni Jehova ang iya matutom nga mga alagad nga wala sing bulig agod malandas nila ang mga pagtilaw nga nagaabot sa ila. Kon sa karon nagakasubo ka bangod sang pagbiya sa espirituwal sang isa ka hinigugma, ano nga mga prinsipio sa Biblia ang makabulig sa imo nga mabatas ang kasubo kag sa pila ka paagi makasapo sing kalipay kag pagkakontento?

Pag-atubang sa Kahimtangan

“Paagi sa pagpalig-on sang inyo kaugalingon . . . , magpabilin kamo sa gugma sang Dios.” (Judas 20, 21) Depende sa imo kahimtangan, ayhan wala ka sing mahimo sa sini nga tion agod buligan ang isa ka katapo sang pamilya nga nag-untat sa pag-alagad kay Jehova. Walay sapayan sini, mahimo mo kag dapat mo palig-unon ang imo kaugalingon subong man ang bisan sin-o nga katapo sang pamilya nga nagapabilin nga matutom. Si Veronica, nga ang duha sa iya tatlo ka anak nga lalaki nagbiya sa kamatuoran, nagsiling: “Kami sang akon bana ginlaygayan nga kon magpabilin kami nga mabakod sa espirituwal, mangin yara kami sa labing maayo nga kahimtangan sa pag-abiabi sa amon mga anak kon magpanumbalik sila. Ano ayhan ang natabo sa buhaha nga anak kon ang iya amay wala sa maayo nga kahimtangan sa pagbaton sa iya?”

Agod makapabilin ka nga mabakod, mangin masako sa espirituwal nga mga hilikuton. Lakip sa sini ang regular nga iskedyul sang maid-id nga pagtuon sing Biblia kag pagtambong sa Cristiano nga mga miting. Mangin handa sa pagbulig sa iban sa kongregasyon suno sa ginatugot sang imo kahimtangan. Matuod nga sa primero, daw mabudlayan ka sa pagpakigbahin sa sini nga mga hilikuton. Si Veronica naghinumdom: “Ang akon una nga ginhimo amo ang pagpahilayo sang akon kaugalingon kaangay sang isa ka napilasan nga sapat. Apang nagpanikasog gid ang akon bana nga mapadayon namon ang amon maayo nga espirituwal nga mga rutina. Ginapat-od gid niya nga makatambong kami sa tanan nga mga miting. Sang tion na agod magtambong sa isa ka kombension, kinahanglan ko gid ang kusog agod makatambong kag makaatubang sa mga tawo. Apang, ang programa nagpasuod pa gid sa amon kay Jehova. Ang amon anak nga nagpabilin nga matutom napalig-on gid sadto nga kombension.”

Nasapwan ni Maria, nga ginhinambitan kaina, nga labi sia nga nabuligan sang pagpabilin nga masako sa ministeryo sa latagon kag sa karon ginabuligan niya ang apat ka tawo nga makatuon tuhoy sa Biblia. Si Laura nagsiling man: “Walay sapayan nga nagahibi gihapon ako adlaw-adlaw, ginapasalamatan ko si Jehova nga bisan pa wala ako magmadinalag-on kaangay sang iban nga ginikanan sa pagpadaku sa kabataan, yara sa akon ang himpit nga mensahe sang Biblia, nga nakabulig sa mga pamilya sa sining katapusan nga mga adlaw.” Sanday Ken kag Eleanor, nga may hamtong nga mga kabataan nga nagbiya sa kongregasyon, nagbag-o sang ila kahimtangan kag nagsaylo sa duog diin mas  madamo ang kinahanglanon nga mga manugbantala sang Ginharian kag nagsulod sila sa bug-os tion nga ministeryo. Nakabulig ini sa ila nga tamdon sing nagakaigo ang mga butang kag malikawan nga madaug sila sang kasubo.

Indi madulaan sing paglaum. Ang gugma ‘nagalaum sa tanan nga butang.’ (1 Corinto 13:7) Si Ken, nga ginsambit bag-o lang, nagsiling: “Sang ginbiyaan sang amon mga anak ang dalanon sang kamatuoran, abi ko kaangay na nga napatay sila. Apang sang mapatay ang akon kapid nga babayi, nagbag-o ang akon pagtamod. Nagapasalamat ako nga ang akon mga anak indi pa literal nga patay kag si Jehova padayon nga nagahatag sa ila sing kahigayunan agod makabalik sila sa iya.” Sa pagkamatuod, ginapakita sang eksperiensia nga madamo sang mga nagbiya sa kamatuoran ang nagbalik sang ulihi.—Lucas 15:11-24.

Likawi ang pagbasol sa kaugalingon. Masami nga ginapamensar sang mga ginikanan ang nagligad kag ginahinulsulan ang ila paagi sa pag-atubang sa pila ka kahimtangan. Apang, ang panguna nga punto nga ginapakita sang Ezequiel 18:20 amo nga si Jehova magasukot sa nakasala, indi sa iya mga ginikanan, sa iya mga sayop. Sing makawiwili, samtang ang tulun-an sang Mga Hulubaton madamong beses nga nagasambit tuhoy sa obligasyon sang mga ginikanan nga hanason ang ila kabataan sa husto nga dalanon, apat ka pilo nga mas madamo ang mga laygay sini para sa mga pamatan-on nga pamatian kag tumanon ang ila mga ginikanan. Huo, ang mga kabataan may responsibilidad nga tumanon ang pasad sa Biblia nga paghanas sang ila di-himpit nga mga ginikanan. Ayhan ginhimo mo ang labing maayo nga masarangan mo sadto sa amo nga kahimtangan. Sa gihapon, bisan pa nagabatyag ka nga may pila ikaw ka sayop kag ang mga ini imo kasal-anan, wala ini nagakahulugan nga ini nga sayop amo ang kabangdanan sang pagbiya sang imo hinigugma sa kamatuoran. Kon ano man, wala sing mabulig ang pagsagad pamensar sing “kuntani.” Magtuon gikan sa imo mga sayop, nga nagatinguha nga indi na ini masulit, kag magpangamuyo kay Jehova sing kapatawaran. (Salmo 103:8-14; Isaias 55:7) Nian, magtan-aw sa palaabuton, indi sa nagligad.

Mangin mapailubon sa iban. Mahimo nga ang iban indi makahibalo kon paano ka palig-unon ukon lugpayan, ilabi na kon wala nila maagihan ini nga eksperiensia. Luwas pa, nanuhaytuhay ang pagtamod sang kada isa sa kon ano ang makapalig-on kag makalulugpay. Gani kon ang iban may ginhambal nga nagpasakit sang imo buot, iaplikar ang laygay ni apostol Pablo nga makita sa Colosas 3:13: “Padayon kamo nga magpinaumuray sa isa kag isa kag hilway nga magpinatawaray sa isa kag isa kon ang isa may inugsumbong batok sa isa.”

Tahura ang kahimusan ni Jehova sa pagdisiplina. Kon ang imo himata nadisiplina sa kongregasyon, dumduma nga bahin ini sang kahimusan ni Jehova kag para ini sa kaayuhan sang tanan, lakip ang nakasala. (Hebreo 12:11) Busa, batui ang huyog nga pangitaan sing sayop ang mga gulang nga nadalahig ukon ang desisyon nga ila ginhimo. Dumduma nga maayo gid ang resulta sang paghimo sang mga butang suno sa kabubut-on ni Jehova, samtang ang pagpamatok sa mga kahimusan ni Jehova magaresulta lamang sing dugang nga kasubo.

Sa tapos nga naluwas ang Israel gikan sa Egipto, si Moises amo ang nag-alagad subong hukom. (Exodo 18:13-16) Bangod ang isa ka paghukom nga pabor sa isa ka indibiduwal mahimo nga batok naman sa isa, mahangpan naton nga ang iban nalugaw-an sa mga desisyon ni Moises. Ang pagpangita sing sayop sa mga paghukom ni Moises mahimo nga kabangdanan man sang pila ka pagrebelde batok sa iya pagpanguna. Apang, ginagamit ni Jehova si Moises agod magpanguna sa Iya katawhan, kag indi si Moises ang ginsilutan Niya, kundi ang mga rebelde kag ang ila mga pamilya nga nagsakdag sa ila. (Numeros 16:31-35) Makatuon kita sa sini paagi sa pagtinguha nga magtahod kag magkooperar sa mga desisyon sang mga may teokratiko nga awtoridad sa karon.

 May kaangtanan sa sini, madumduman pa ni Dolores kon daw ano kabudlay para sa iya nga huptan ang balanse nga pagtamod sang ang iya anak nga babayi gindisiplina sa kongregasyon. “Nabuligan ako,” siling niya, “sang sulitsulit nga pagbasa sang mga artikulo nga tuhoy sa pagkamakatarunganon sang mga kahimusan ni Jehova. Naghimo ako sing isa ka espesyal nga kuwaderno sang mga punto gikan sa mga pamulongpulong kag mga artikulo nga makabulig sa akon nga magbatas kag magpadayon sa pag-alagad kay Jehova.” Nagabukas ini sang isa pa ka importante nga paagi sa pag-atubang sini nga kahimtangan.

Ipabutyag ang imo ginabatyag. Ayhan nasapwan mo nga makabulig ang makighambal sa isa ukon duha ka mahinuklugon nga mga abyan nga imo masaligan. Kon himuon mo ini, pilia ang mga abyan nga makabulig sa imo nga mahuptan ang positibo nga panimuot. Pat-od gid nga labi nga makabulig ang ‘pagbubo sang imo tagipusuon’ kay Jehova sa pangamuyo. b (Salmo 62:7, 8) Ngaa? Bangod bug-os nga nahangpan niya ang kabug-at sang imo ginabatyag. Halimbawa, mahimo nagabatyag ka nga indi gid makatarunganon nga nagaeksperiensia ka sini nga kasakit sa emosyon. Kay man, indi man ikaw ang nagbiya kay Jehova. Isugid ang imo ginabatyag kay Jehova, kag pangabaya sia nga buligan ikaw nga tamdon ang kahimtangan sa indi tanto kasakit nga paagi.—Salmo 37:5.

Sa pagligad sang panahon, ayhan matun-an mo sing mas maayo kon paano dal-on ang imo balatyagon. Samtang wala pa, indi magpangampo sa imo mga panikasog nga pahamut-an ang imo langitnon nga Amay, kag indi pagtamda nga wala ini sing pulos. (Galacia 6:9) Dumduma, may problema man gihapon kon biyaan naton si Jehova. Sa pihak nga bahin, kon magpabilin kita nga matutom sa iya, buligan niya kita sa mga pagtilaw nga aton ginaatubang. Makasalig ka nga nahangpan ni Jehova kon daw ano kabudlay ang imo kahimtangan kag padayon ka niya nga amanan sing kinahanglanon nga kusog sa husto nga tion.—2 Corinto 4:7; Filipos 4:13; Hebreo 4:16.

[Mga nota]

[Kahon sa pahina 19]

Kon Paano Atubangon ang Kahimtangan

◆ “Paagi sa pagpalig-on sang inyo mga kaugalingon . . . , magpabilin kamo sa gugma sang Dios.”—Judas 20, 21.

◆ Indi madulaan sing paglaum.—1 Corinto 13:7.

◆ Likawi ang pagbasol sa kaugalingon.—Ezequiel 18:20.

◆ Mangin mapailubon sa iban.—Colosas 3:13.

◆ Tahura ang kahimusan ni Jehova sa pagdisiplina.—Hebreo 12:11.

◆ Ipabutyag ang imo ginabatyag.—Salmo 62:7, 8.

[Kahon/Retrato sa pahina 21]

Ginbiyaan Mo Bala si Jehova?

Kon amo, ano man ang kabangdanan, ang imo kaangtanan kay Jehova kag ang imo palaabuton yara sa katalagman. Ayhan luyag mo nga magbalik kay Jehova. Ginatinguhaan mo gid bala nga himuon ini karon? Ukon ginapabuyanbuyanan mo ini kay nagahulat ka sang “husto nga tion”? Dumduma, nga madasig nga nagahilapit ang mga gal-um sang Armagedon. Dugang pa, ang kabuhi sa sini nga sistema malip-ot kag wala sing kasiguruhan. Wala ka makahibalo kon bala buhi ka pa buas. (Salmo 102:3; Santiago 4:13, 14) Ang isa ka tawo nga nasayasat nga may makamamatay nga balatian nagsiling: “Nagbalatian ako samtang nagaalagad kay Jehova sing bug-os tion, wala ako sing ginatago nga kahuy-anan. Kag kanami sini batyagon karon.” Apang, handurawa kon ano ayhan ang iya ginbatyag pananglitan nagbalatian sia samtang nagasiling, “Sa pila ka adlaw, magabalik ako kay Jehova!” Kon ginbiyaan mo si Jehova, subong ang labing maayo nga tion nga manumbalik.

[Mga retrato sa pahina 18]

Ang mangin masako sa espirituwal nga hilikuton makabulig sa imo nga tamdon sing nagakaigo ang mga butang