Mga Pamangkot Gikan sa mga Bumalasa

Ano ang katungdanan sang kongregasyon kon ang isa ka Cristiano nga nagamaneho sing salakyan nakaaksidente kag may napatay?

Dapat tulutimbangon sang kongregasyon kon bala ang drayber nakasala sa dugo agod malikawan sang kongregasyon ang salabton sa dugo sa komunidad. (Deuteronomio 21:1-9; 22:8) Ang drayber nga nakaaksidente nga nagresulta sa kamatayon mahimo makasala sa dugo kon wala sia naghalong ukon hungod nga naglapas sang isa sang mga kasuguan ni Cesar tuhoy sa pangamlig ukon trapiko. (Marcos 12:14) Apang may iban pa nga mga butang nga dapat binagbinagon.

Ang isa nga nakapatay sing tawo nga nagdangop sa isa sang mga siudad nga dalangpan sang Israel dapat anay imbestigahan. Kon nasapwan nga di-hungod ang pagpatay, pahanugutan sia nga magpabilin sa siudad, nga hilway sa katalagman gikan sa manugtimalos sang dugo. (Numero 35:6-25) Gani kon ang isa ka Cristiano nakaaksidente kag may napatay, dapat usisaon sang mga gulang ang natabo agod pat-uron kon bala nakasala sia sa dugo. Ang pagtamod sang mga awtoridad ukon ang desisyon sang korte indi amo ang basihan sang aksion nga pagahimuon sang kongregasyon.

Halimbawa, mahimo ideklarar sang korte nga nakasala sia bangod ginlapas niya ang pila ka kasuguan sa trapiko, apang mahimo mamat-od ang nagausisa nga mga gulang nga ang drayber wala nakasala sa dugo bangod halos indi niya kontrolado ang mga kahimtangan nga nagresulta sa kamatayon. Apang, bisan pa nga wala na ginpadayon sang korte ang kaso, ang mga gulang mahimo maghinakop nga nakasala sia sa dugo.

Ang desisyon sang mga gulang nga nagausisa sa kaso dapat napasad sa Kasulatan kag sa mabakod nga mga pamatuod—ang pag-ako sang drayber sa iya sala kag/ukon ang testimonya sang duha ukon tatlo ka masaligan nga mga testigo. (Deuteronomio 17:6; Mateo 18:15, 16) Kon napamatud-an nga nakasala sia sa dugo, dapat magporma sang isa ka hudisyal nga komite. Kon nakita sang komite nga ang tawo nga nakasala sa dugo mahinulsulon, magabaton sia sing nagakaigo nga pagsabdong halin sa Kasulatan kag indi sia paghatagan sing mga katungdanan sa kongregasyon. Indi na sia makaalagad subong gulang ukon ministeryal nga alagad. Ang iban nga mga pagdumili dapat man ipatuman. Kag manabat sia sa Dios bangod sang iya pagpatumbaya ukon indi paghalong nga nagresulta sa aksidente kag kamatayon.—Galacia 6:5, 7.

Sa pag-ilustrar: Kon malain ang tiempo sang natabo ang aksidente, dapat naghalong pa gid kuntani ang drayber. Kon natuyo sia, dapat nagdulog sia anay kag nagpiyongpiyong tubtob nga nadula ang iya katuyo, ukon dapat nagpabulos sia anay sa iban.

Ibutang naton nga ang drayber nagapadalagan sing sobra sa speed limit. Kon isa sia ka Cristiano, indi ini paghatag kay ‘Cesar sang mga butang nga iya ni Cesar.’ Pagpakita man ini sang indi pagtahod sa pagkabalaan sang kabuhi, kay mahimo ini magresulta sa kamatayon. (Mateo 22:21) Sa sini nga bahin, binagbinaga ang iban pa nga butang. Ano nga sahi sang halimbawa ang ginapakita sang isa ka gulang sa panong kon wala sia naghalong ukon hungod niya nga ginlapas ang kasuguan sa trapiko?—1 Pedro 5:3.

Indi dapat pag-obligahon sang mga Cristiano ang iban nga mag-abot sa isa ka partikular nga duog sing eksakto sa oras kon nahibaluan gid nila nga imposible sila makaabot kon indi sila mag-overspeeding. Apang sa masami, kinahanglan lang nga maghalin sia sing temprano ukon bag-uhon niya ang iya iskedyul agod may supisyente sia nga tion sa pagbiyahe. Kon himuon ini sang isa ka Cristiano, indi sia matentar nga magpadalagan sing tuman kadasig, sa baylo masunod niya ang mga kasuguan sa trapiko sang “superyor nga mga awtoridad.” (Roma 13:1, 5) Magabulig ini sa drayber nga malikawan ang mga aksidente nga magaresulta sa kamatayon kag ang posibilidad nga makasala sa dugo. Magabulig man ini sa iya sa pagpahamtang sing maayo nga halimbawa kag sa paghupot sing matinlo nga konsiensia.—1 Pedro 3:16.