Ang Pagpangita sang Tawo sing Kabuhi nga Walay Katapusan

HALIN pa sang una, handum gid sang tawo nga mabuhi sing dayon. Apang, ina nga handum nagapabilin nga isa lamang ka dalamguhanon—wala pa sing nakakita sing paagi nga malutos ang kamatayon. Apang, sining karon lang, ang pagpanalawsaw sang medisina naghatag liwat sing paglaum nga posible gid nga mapalawig ang kabuhi sang tawo. Binagbinaga ang resulta sang pagtuon sang nagkalainlain nga patag sang siensia.

Ginaeksperimentuhan sang mga biologo ang enzyme telomerase sa panikasog nga mapalawig sing pila pa ka beses ang pagmuad sang mga selula. Nahibaluan sang mga sientipiko nga ang daan kag maluya nga mga selula ginaislan sing bag-o nga mga selula. Sa katunayan, makapila nga ginabag-o ang laban nga bahin sang lawas sa sulod sang bug-os nga pagkabuhi sang tawo. Ginahaumhaum sang mga manugpanalawsaw nga kon ini nga proseso mapalawig, “mabag-o sang lawas sang tawo ang kaugalingon sa sulod sang tuman kalawig nga tion—bisan tubtob sa walay katubtuban.”

Sa teoriya, mahimo maamanan sang therapeutic cloning, isa ka ginadebatihan nga patag sang pagpanalawsaw, ang mga pasyente sing bag-o kag sibu gid nga atay, bato-bato, ukon tagipusuon para sa transplant. Ini nga mga organo mahimo kopyahon nga ginagamit ang mga stem cell mismo sang pasyente.

Nagalaum ang mga manugpanalawsaw sa nanotechnology nga magaabot ang tion nga mapasulod sang mga doktor ang subong kadaku sang selula nga mga robot sa dugo agod pangitaon kag patyon ang mga selula sang kanser kag makahalalit nga bakterya. Nagapati ang iban nga paagi sini nga patag sang siensia, upod sang gene therapy, mahuptan sa ulihi sang tawo ang kaugalingon nga lawas nga buhi tubtob sa walay katubtuban.

Ang mga sumalakdag sang cryonics nagapreserbar sang mga bangkay sa manubo nga temperatura. Ginapreserbar ini tubtob nga makatukib na ang mga doktor sing bulong nga makapaayo sang mga balatian, makatapna sang pagtigulang, kag makapasag-uli sang kabuhi kag kapagros sang mga patay. Ginatawag sang American Journal of Geriatric Psychiatry ini nga ideya nga “ang karon nga katumbas sang pag-embalsamar sang dumaan nga mga Egiptohanon.”

Ang padayon nga pagpangita sang tawo sing kabuhi nga walay katapusan nagapakita nga mabudlay gid batunon ang kamatayon. Posible gid bala nga matigayon sang tawo ang kabuhi nga walay katapusan? Ano ang ginasiling sang Biblia tuhoy sini? Sabton ini sang masunod nga artikulo.