Sugilanon sa Kabuhi

Ginbuligan Ako ni Jehova sa mga Hangkat sa Akon Kabuhi

PANUGIRON NI DALE IRWIN

“ANG WALO INSAKTO NA! ANG KAPID NGA APAT DOBLE NGA TRABAHO!” Amo ini ang ulong-dinalan sang pamantalaan sa amon lugar nga nagpahibalo sang pagkabun-ag sang quadruplets (duha ka lalaki kag duha ka babayi) sa amon pamilya nga may yara na apat ka bata nga babayi. Sang lamharon pa ako, wala gid ako sing plano nga magpangasawa kag mangin amay. Apang karon, isa ako ka amay sang walo ka bata!

NATAWO ako sang 1934 sa banwa sang Mareeba, Australia. Kinagot ako sa tatlo ka mag-ulutod. Sang ulihi, ang amon pamilya nagsaylo sa Brisbane, diin nagtudlo si Mommy sa Sunday school sa simbahan sang mga Metodista.

Sang 1938, ginbalita sang mga pamantalaan sa amon lugar nga si Joseph F. Rutherford halin sa bug-os kalibutan nga ulong-talatapan sang mga Saksi ni Jehova mahimo nga indi pagpasudlon sa Australia. “Ngaa ginahimo nila ini sa iya?” pamangkot ni Mommy sa Saksi nga nagduaw sa amon balay pagkatapos niya mabasa ang balita. Ang Saksi nagsabat: “Indi bala nga nagsiling si Jesus nga ang iya mga sumulunod pagahingabuton?” Nian ginbaton ni Mommy ang bukleta nga Cure, nga nagapaathag sang kinatuhayan sang matuod nga relihion gikan sa butig nga relihion. * Bangod naluyagan gid ni Mommy ang iya nabasahan sa bukleta, gin-upod niya kami nga mga bata sa miting sang mga Saksi ni Jehova pagkadason nga Domingo. Sang primero, mabaskog nga nagpamatok si Daddy, apang kon kaisa kon may mga pamangkot sia sa Biblia, ginasulat niya ini kag ginapahatag ini kay Mommy sa isa ka utod nga lalaki. Nian, ginasulat naman sang utod ang mga sabat gikan sa Kasulatan para ihatag ni Mommy kay Daddy.

Isa ka Domingo, nag-upod si Daddy sa amon sa miting, kay plano niya nga ipabutyag ang mga  butang nga wala niya maluyagan sa mga Saksi. Apang, sa tapos masugilanon ni Daddy ang nagalakbay nga manugtatap nga nagduaw sa kongregasyon sadto nga tion, nagbag-o ang iya panimuot kag nagpasugot pa gani sia nga ang amon puluy-an mangin tilipunan para sa semanal nga pagtinuon sa Biblia, nga gintambungan sang mga interesado sa amon lugar.

Sang Septiembre 1938, ang akon mga ginikanan ginbawtismuhan. Kami naman sang akon mga utod ginbawtismuhan sang Disiembre 1941 sa isa ka nasyonal nga kombension nga ginhiwat sa Hargreave Park sa Sydney, New South Wales. Siete anyos ako sadto. Pagkatapos sini, regular ako nga nakigbahin sa ministeryo sa latagon upod sang akon mga ginikanan. Sadto, ang mga Saksi nagabitbit sing ponograpo kon nagapamalaybalay kag nagapatokar sing narekord nga mga diskurso sa Biblia sa mga tagbalay.

Ang isa ka Saksi nga indi ko gid malipatan amo si Bert Horton. May sound car sia—isa ka salakyan nga nasangkapan sing mabaskog nga amplipayer kag may daku nga ispiker sa atop sini. Ang pagbantala upod kay Bert makakulunyag gid, ilabi na para sa isa ka bata nga kaedad ko. Halimbawa, kon nagawaragwag sing isa ka diskurso sa Biblia gikan sa putukputukan sang isa ka pukatod, masami kami makakita sing salakyan sang pulis nga nagapadulong sa amon. Maabtik nga ginapatay ni Bert ang iya ponograpo, dayon nagasaylo kami sa pihak nga pukatod, kag ginapatokar ang isa pa ka rekording. Madamo ako sing natun-an kay Bert kag sa iban pa nga mainunungon kag maisog nga mga utod kaangay niya tuhoy sa pagsalig kay Jehova kag sa kinahanglanon nga mangin masidla.—Mateo 10:16.

Sang 12 anyos ako, masami ako nagapanaksi sing isahanon pagkatapos sang klase. Isa ka tion, nasugilanon ko ang pamilya Adshead. Sang ulihi, ang mga ginikanan, ang ila walo ka anak, kag ang ila madamo nga apo nagtuon sa kamatuoran. Nagapasalamat ako kay Jehova tungod sa pagpahanugot niya sa akon, nga isa lamang ka bata, nga mapakilala ang kamatuoran sang Biblia sa sining mabuot nga pamilya.—Mateo 21:16.

Mga Pribilehiyo sa Pag-alagad sa Lamharon nga Edad

Nangin bug-os tion nga payunir nga ministro ako sa edad nga 18 anyos kag gindestino ako sa Maitland, New South Wales. Sang 1956, gin-agda ako nga mag-alagad sa sanga talatapan sang Australia sa Sydney. Sa 20 ka katapo, mga un-tersia ang mga hinaplas, kag may paglaum sila nga maggahom kaupod ni Cristo sa iya Ginharian sa langit. Isa gid ka pribilehiyo nga magpangabudlay kaupod nila!—Lucas 12:32; Bugna 1:6; 5:10.

Nagbag-o ang akon pamat-od nga indi magminyo sang nakilala ko si Judy Helberg, isa ka matahom nga payunir nga gin-agda sing temporaryo sa sanga talatapan sa pagbulig sa akon sa isa ka daku nga proyekto. Naghigugmaanay kami ni Judy, kag nagpakasal kami pagligad sang duha ka tuig. Pagkatapos sang kasal, nagsugod kami sa pag-alagad sa sirkito, kag sa sini nga pribilehiyo may ginaduaw kami nga isa ka kongregasyon sang mga Saksi ni Jehova kada semana agod pabakuron ang mga kauturan.

Sang 1960, nagbun-ag si Judy sang amon panganay nga babayi, si Kim. Sa karon, kon magbata ang mag-asawa nga nagaalagad sa sirkito, kinahanglan nila biyaan ini nga pribilehiyo kag magtener na lang sa isa ka lugar. Apang, nakibot gid kami sang ginpangabay kami nga padayunon namon ang pagduaw sa mga kongregasyon. Pagkatapos sang hanuot nga pangamuyo, nagpasugot kami nga magpadayon, kag sa sulod sang masunod nga pito ka bulan, si Kim naglakbay sing 13,000 ka kilometro kaupod namon sakay sa bus, eroplano, kag tren samtang ginaduaw namon ang malayo nga mga kongregasyon sa Queensland kag sa Northern Territory. Wala kami sing kaugalingon nga salakyan sadto.

 Masami kami nga nagadayon sa balay sang mga kauturan. Bangod mainit ang klima, ang mga puertahan sang mga hulot-tulugan sadto masami nga mga kurtina lamang, kag dugang nga kahuol para sa amon kon maghibi si Kim sa gab-i. Ang pag-atipan sa lapsag kag sa amon asaynment nangin mabudlay gid para sa amon sang ulihi. Gani nagpuyo kami sing permanente sa Brisbane, kag ang akon nangin trabaho amo ang sign painting, isa ka sahi sang commercial art. Sang duha ka tuig na si Kim, nabun-ag naman ang amon isa pa ka anak nga babayi, si Petina.

Pag-atubang sa Trahedya

Sang 1972, sang ang mga bata nagaedad sing 12 kag 10 anyos, si Judy napatay sa balatian nga Hodgkin’s disease, isa ka sahi sang lymphoma. Ang iya kamatayon masakit gid para sa amon pamilya. Apang, sang nagamasakit pa lang si Judy kag tubtob sang mapatay na sia, si Jehova naglugpay sa amon paagi sa iya Pulong, sa iya balaan nga espiritu, kag sa mga kauturan. Ang magasin nga Ang Lalantawan nga amon nabaton pagkatapos mismo sang trahedya nagpabakod man sa amon. May isa ini ka artikulo nga nagabinagbinag tuhoy sa personal nga mga pagtilaw, lakip na ang pagkapatay sang isa ka hinigugma, kag ginpakita sini kon paano ang mga pagtilaw makabulig sa aton nga mapalambo ang diosnon nga mga kinaiya subong sang pagbatas, pagtuo, kag integridad. *—Santiago 1:2-4.

Sang mapatay si Judy, labi kami nga nagsuod sang akon mga anak. Apang ginabaton ko nga nabudlayan ako sa akon katungdanan subong amay kag iloy. Apang, ginpahapos ini sang akon duha ka pinalangga nga mga anak.

Pagminyo Liwat kag Isa ka Nagdaku nga Pamilya

Sang ulihi, nagminyo liwat ako. Magkapareho kami sang akon bag-o nga asawa, si Mary, sa madamo nga butang. Ang iya bana napatay man sa balatian nga Hodgkin’s disease. Ang iya mga bata duha man ka babayi—sanday Colleen kag Jennifer. Manghod si Colleen kay Petina sing mga tatlo ka tuig. Gani ang amon pamilya ginatapuan karon sang apat ka bata nga babayi, nga nagaedad sing 14, 12, 9, kag 7.

Nagdesisyon kami ni Mary nga sa umpisa, masigdisiplina kami sang amon mga bata tubtob sa tion nga halog na sa buot sang iya kag sang akon mga bata nga magbaton sing panuytoy gikan sa amon nga duha. Parte naman sa amon nga mag-asawa, duha ka importante nga pagsulundan ang amon ginsunod. Una, wala kami nagabaisay sa atubangan sang mga bata, kag ikaduha, nahisanto sa prinsipio sang Biblia sa Efeso 4:26, nagahambalanay kami tubtob malubad namon ang mga problema—bisan pa magalawig ini sing inoras!

Mahapos nga nakapasibu ang tanan sa pagkabuhi subong tapik nga pamilya, apang indi madali malipatan ang amon napatay nga mga mahal sa kabuhi. Halimbawa, si Mary pirme nagahibi kon Lunes sang gab-i. Pagkatapos sang amon pangpamilya nga pagtuon kag kon makatulog na ang mga bata, masami nga ginapautwas ni Mary ang iya ginapunggan nga emosyon.

Luyag ni Mary nga may bata kami nga amon. Sing makapasubo, nahulugan sia. Sang magmabdos liwat si Mary, isa ka daku nga sorpresa ang naghulat sa amon. Ginpakita sang ultrasound nga indi lamang isa ang iya ginadala kundi apat! Indi ako makapati. Sa dili madugay, mangin amay ako sang  walo ka kabataan sa edad nga 47 anyos! Ang mga kapid natawo sing Cesarean sang Pebrero 14, 1982, pagkatapos nga ginmabdos sing 32 ka semana. Sing pasunod, sila amo sanday Clint, 1.6 ka kilo; Cindy, 1.9 ka kilo; Jeremy, 1.4 ka kilo; kag Danette, 1.7 ka kilo. Lainlain ang ila mga hitsura.

Pagkabun-ag gid nila, ang doktor ni Mary nagduaw kag naglingkod sa akon tupad.

“Nabalaka ka bala kon paano padakuon ang mga bata?” pamangkot niya.

“Ti,” sabat ko, “wala ko pa maagihan ang subong sini.”

Ang iya masunod nga ginhambal nagpakibot gid kag nagpalig-on sa akon.

“Indi ka pagpabay-an sang inyo kongregasyon,” siling niya. “Bisan mangatsi ka lang, linibo ka tisyu na ang idaho sa imo!”

Bangod sang pagkasampaton sini nga obstetrician kag sang iya mga kaupdanan, ang apat ka mapagros nga mga lapsag naggua sa ospital sa sulod lamang sang duha ka bulan.

Ang Hangkat sa Pagpadaku sa mga Kapid

Agod indi magamo, naghimo kami ni Mary sing 24-oras nga iskedyul. Ang apat ka magulang nga mga babayi daku gid nga bulig sa pag-atipan sa mga lapsag. Kag matuod gid ang ginsiling sang doktor—bisan ‘pangatsi’ lang, ang kongregasyon nagbulig dayon sa amon. Antes matawo ang mga kapid, gintipon sang madugay na namon nga abyan nga si John MacArthur ang Saksi nga mga panday kag ginpangunahan niya ang trabaho nga padakuan ang amon balay. Sang matawo ang mga bata, isa ka grupo sang mga utod nga babayi ang nagbulig sa pag-atipan sa ila. Ini tanan nga kaayo isa ka pagpakita sang Cristiano nga gugma nga may buhat.—1 Juan 3:18.

Sa isa ka kahulugan, ang mga kapid nangin “mga bata sang kongregasyon.” Bisan tubtob karon, pamilya gihapon ang pagkabig sang mga kapid sa madamo nga mahigugmaon nga mga kauturan nga nagbulig sa amon. Parte naman kay Mary, isa sia ka maayo gid nga asawa kag iloy nga masinakripisyuhon nga nag-atipan sang iya mga kabataan. Ginsunod gid niya ang natun-an niya gikan sa Pulong sang Dios kag sa organisasyon. Amo ini ang pinakamaayo nga laygay!—Salmo 1:2, 3; Mateo 24:45.

Ang Cristiano nga mga miting kag pagbantala nga hilikuton isa gihapon ka importante nga bahin sang amon iskedyul kada semana, bisan pa nga ang pag-atipan sa apat ka lapsag tuman kabudlay. Gani, daku gid nga butang sadto para sa amon nga ang duha ka mag-asawa nga amon ginatun-an sa Biblia amo pa ang nagakadto sa amon balay. Bisan pa nga bentaha ini para sa amon, ginakapoy gid kon kaisa si Mary amo nga nagakadukaan sia sa tion sang amon pagtuon, samtang may ginauyatan nga nagakatulog nga bata. Sang ulihi, ang duha ka mag-asawa nangin espirituwal nga mga kauturan namon.

Espirituwal nga Paghanas Samtang Bata Pa

Bisan antes pa makatuon sa paglakat ang mga bata, amon na sila nanday Mary kag sang magulang nga mga bata ginpaupod sa ministeryo sa latagon. Sang makatuon na sila sa paglakat, gintigduhaan namon sila ni Mary, kag indi sila problema. Ang matuod, sila sa masami ang gingamit namon nga introduksion sa amon pagpakighambal sa mainabyanon nga mga tagbalay. Isa ka adlaw nasugilanon ko ang isa ka lalaki nga nagsiling nga kon matawo ka sa isa ka partikular nga adlaw sang isa ka zodiac sign, ang imo personalidad may ginasunod nga sulundan. Wala ako makigbais sa iya, apang ginpamangkot ko sia kon mahimo ako makabalik sa uluudto. Nagpasugot sia, gani nagbalik ako upod ang mga kapid. Samtang nagatan-aw sia nga natingala, ginpasunod ko ang mga bata sigun sa ila pagkabun-ag. Pagkatapos sini, malipayon kami nga nag-istoryahanay, indi lamang tuhoy sa ila lainlain nga mga hitsura kundi tuhoy man sa ila indi gid palareho nga mga personalidad, nga tuhay gid sa iya teoriya. “Daw kaladlawan gid nga ginsambit ko pa sa imo  ini nga teoriya,” siling niya. “Kinahanglan ko ang dugang pa nga pagpanalawsaw, indi bala?”

Sang bata pa ang mga kapid, indi nila luyag nga disiplinahon sing dulungan kon makahimo sila sing sala, gani gindisiplina namon sila sing tig-isaisa. Apang, nahibaluan nila nga dapat sila magsunod sa palareho nga mga pagsulundan. Kon may mga problema sila sa eskwelahan nga dapat nila lubaron nahisanto sa ila konsiensia, ginsunod nila ang mga prinsipio sang Biblia kag ginsuportahan ang isa kag isa, kag si Cindy ang ila humalambal. Narealisar sang ulihi sang mga tawo nga ang mga kapid isa ka mabakod gid nga puersa!

Sang magtin-edyer na ang mga bata, adlaw-adlaw nga hangkat para sa amon ni Mary ang buligan sila nga magpabilin nga mainunungon kay Jehova. Masiling namon nga mabudlay ini kuntani para sa amon kon wala kami ginbuligan sang mahigugmaon nga kongregasyon kag kon wala kami makabaton sing bugana nga espirituwal nga pagkaon gikan sa kitaon nga bahin sang organisasyon ni Jehova. Ginpanikasugan namon nga may yara kami regular nga pangpamilya nga pagtuon sa Biblia kag ginhuptan namon nga bukas ang amon komunikasyon, bisan pa nga indi ini pirme mahapos. Walay sapayan sini, takus gid ang amon panikasog kay ginpili sang walo namon ka bata nga mag-alagad kay Jehova.

Pag-atubang sa Pagtigulang

Sa sulod sang madamo nga tinuig, nakabaton ako sing madamo nga espirituwal nga mga pribilehiyo: gulang sa kongregasyon, manugtatap sang siudad, kag tal-us nga manugtatap sang sirkito. Nangin katapo man ako sang Hospital Liaison Committee sa amon lugar, nga ang katungdanan amo ang pagbulig sa mga doktor nga makigkooperar sa Saksi nga mga pasyente kon ang pagpatughong sing dugo mangin problema. Sa sulod sang 34 ka tuig may pribilehiyo man ako nga magkasal. Mga 350 ang akon ginkasal, lakip na ang amon anom ka bata.

Pirme ako nagapasalamat kay Jehova tungod sa mainunungon nga suporta nga nabaton ko, una gikan kay Judy kag karon naman gikan kay Mary. (Hulubaton 31:10, 30) Samtang ginasuportahan nila ako sa akon katungdanan subong gulang sa kongregasyon, nagpakita man sila sing maayo nga halimbawa sa ministeryo kag nagbulig nga mapatudok sa mga bata ang espirituwal nga mga kinaiya.

Sang 1996, nasayasat nga may yara ako balatian sa utok nga amo ang kabangdanan sang pagkurog sang akon mga kamot kag pagkadula sang akon panimbang. Gani, indi na ako makatrabaho sa sign painting. Apang, nalipay gihapon ako sa pag-alagad kay Jehova, bisan pa nga mahinay na ako. Ang bentaha sini amo nga nangin mas mahinuklugon ako sa iban pa nga mga tigulang.

Samtang ginapamalandungan ko ang akon kabuhi, nagapasalamat ako kay Jehova tungod pirme niya ginabuligan ang amon pamilya nga maatubang ang madamo nga hangkat nga may kalipay. (Isaias 41:10) Nagapasalamat man kami ni Mary, upod sang amon walo ka bata, tungod sa mainayuhon kag masinakdagon nga pamilya sang espirituwal nga mga kauturan. Halos indi namon masaysay ukon malaragway ang gugma nga ginpakita nila sa amon.—Juan 13:34, 35.

[Mga nota]

[Retrato sa pahina 12]

Upod si Mommy kag ang akon mga magulang nga sanday Garth kag Dawn, nga handa na sa paglakbay padulong sa 1941 nga kombension sa Sydney

[Retrato sa pahina 13]

Upod si Judy kag ang lapsag nga si Kim sang nagaalagad ako sa sirkito sa Queensland

[Retrato sa pahina 15]

Sang natawo ang mga kapid, ang apat ka magulang nga mga babayi kag ang kongregasyon nagbinuligay