Maglaum Ka kay Jehova, kag Magpakaisog

“Maglaum ka kay Jehova; magpakaisog ka kag pabakura ang imo tagipusuon. Huo, maglaum ka kay Jehova.”—SALMO 27:14.

1. Daw ano ka importante ang paglaum, kag paano ginagamit ining termino sa Kasulatan?

ANG matuod nga paglaum kaangay sang isa ka masanag nga kapawa. Nagabulig ini sa aton nga makita sing maathag ang palaabuton kag atubangon ini nga may kaisog kag kalipay walay sapayan sang presente nga mga pagtilaw. Si Jehova lamang ang makahatag sa aton sing sigurado nga paglaum paagi sa iya inspirado nga Pulong. (2 Timoteo 3:16) Sa katunayan, ang mga tinaga nga “paglaum,” “naglaum,” kag “nagalaum” madamo nga beses nga mabasa sa Biblia kag nagapatuhoy lunsay sa hanuot kag sigurado nga pagpaabot sa isa ka maayo nga butang kag sa ginahalinan sinang pagpaabot. * Ining paglaum indi lamang basta isa ka handum, nga mahimo wala sing basihan ukon posibilidad nga matuman.

2. Paano nakaapektar ang paglaum sa kabuhi ni Jesus?

² Sang nag-atubang si Jesus sing mga pagtilaw kag mga kabudlayan, nagtulok sia indi sa presente nga kahimtangan kundi sa palaabuton kag naglaum kay Jehova. “Tungod sa kalipay nga ginbutang sa iya atubang nagbatas sia sing usok sang pag-antos, nga nagatamay sang kahuluy-an, kag naglingkod sa tuo nga kamot sang trono sang Dios.” (Hebreo 12:2) Bangod gintuon niya sing maayo ang iya igtalupangod sa paglaum nga mabindikar ang pagkasoberano ni Jehova kag mapakabalaan ang Iya ngalan, wala naglisa si Jesus sa dalanon sang pagkamatinumanon sa Dios, ano man ang kinahanglan niya batason.

3. Paano nakaapektar ang paglaum sa kabuhi sang mga alagad sang Dios?

³ Gintalupangod ni Hari David ang kaangtanan sang paglaum kag kaisog, nga nagasiling: “Maglaum ka kay Jehova; magpakaisog ka kag pabakura ang imo tagipusuon. Huo, maglaum ka kay Jehova.” (Salmo 27:14) Kon luyag naton nga magbakod ang aton tagipusuon, indi naton dapat pagtugutan ang aton paglaum nga magburon kundi huptan ini pirme nga maathag sa aton hunahuna kag pakabahandion ini sa aton tagipusuon. Ang paghimo sini magabulig sa aton nga ilugon si Jesus sa pagpakita sing kaisog kag kakugi samtang nagapakigbahin kita sa hilikuton nga ginpahimo niya sa iya mga disipulo. (Mateo 24:14; 28:19, 20) Sa pagkamatuod, ang paglaum ginasambit sa Biblia upod sa pagtuo kag gugma subong  importante, nagadugay nga kinaiya sa kabuhi sang mga alagad sang Dios.—1 Corinto 13:13.

‘Nagabugana Ka Bala sa Paglaum’?

4. Ano ang malangkagon nga ginapaabot sang hinaplas nga mga Cristiano kag sang ila kaupod nga “iban nga mga karnero”?

⁴ May matahom nga palaabuton nga nagahulat sa katawhan sang Dios. Ang hinaplas nga mga Cristiano malangkagon nga nagapaabot nga mag-alagad upod kay Cristo sa langit, samtang ang “iban nga mga karnero” nagalaum nga “pagahilwayon man gikan sa pagkaulipon sa pagkamadinulunton kag maagom ang mahimayaon nga kahilwayan sang [dutan-on nga] mga anak sang Dios.” (Juan 10:16; Roma 8:19-21; Filipos 3:20) Inang “mahimayaon nga kahilwayan” nagalakip sang kahilwayan sa sala kag sa makakulugmat nga mga resulta sini. Sa pagkamatuod, si Jehova—ang Taghatag sang “tagsa ka maayong dulot kag tagsa ka himpit nga regalo”—magahatag gid sang pinakamaayo nga regalo sa mga mainunungon sa iya.—Santiago 1:17; Isaias 25:8.

5. Paano kita ‘magbugana sa paglaum’?

⁵ Ano ka daku ang epekto sang Cristianong paglaum sa aton kabuhi? Sa Roma 15:13, aton mabasa: “Kabay nga ang Dios nga nagahatag sing paglaum magpuno sa inyo sing bug-os nga kalipay kag paghidait bangod sa inyo pagpati, agod magbugana kamo sa paglaum paagi sa gahom sang balaan nga espiritu.” Huo, ang paglaum mapaanggid, indi sa kandila sa kadudulman, kundi sa masanag nga silak sang adlaw sa aga, nga nagapuno sa kabuhi sang isa sing paghidait, kalipay, katuyuan, kag kaisog. Talupangda nga ‘magabugana kita sa paglaum’ kon nagapati kita sa nasulat nga Pulong sang Dios kag nagabaton sang iya balaan nga espiritu. Ang Roma 15:4 nagasiling: “Ang tanan nga butang nga ginsulat sadto ginsulat sa pagtudlo sa aton, agod nga paagi sa aton pagbatas kag paagi sa lugpay gikan sa Kasulatan makatigayon kita sing paglaum.” Gani pamangkuta ang imo kaugalingon: ‘Ginahuptan ko bala nga masanag ang akon paglaum paagi sa maukod nga pagtuon sang Biblia kag pagbasa sini adlaw-adlaw? Pirme ko bala ginapangayo ang espiritu sang Dios sa pangamuyo?’—Lucas 11:13.

6. Agod magpabilin nga masanag ang aton paglaum, sa ano kita dapat magbantay?

⁶ Si Jesus, ang aton Huwaran, nagkuha sing kusog gikan sa Pulong sang Dios. Paagi sa pag-ilog sing maayo sa iya halimbawa, malikawan naton nga ‘malapyo kag mangampo ang aton kalag.’ (Hebreo 12:3) Makatarunganon lamang nga kon ang aton hatag-Dios nga paglaum mangin di-maathag sa aton hunahuna kag tagipusuon ukon kon ang aton igtalupangod matuon na sa iban nga mga butang—ayhan sa materyal nga mga butang ukon sa sekular nga mga tulumuron—mahimo kita tuyhon sa espirituwal, kag sa ulihi madulaan sing kusog kag kaisog nga magkabuhi nahisuno sa moral nga mga prinsipio. Kon amo sina ang panimuot naton, mahimo naton maeksperiensiahan ang ‘pagkalunod sang aton pagtuo.’ (1 Timoteo 1:19) Sa pihak nga bahin, ang matuod nga paglaum nagapabakod sang aton pagtuo.

Paglaum—Importante sa Pagtuo

7. Sa anong paagi ang paglaum importante sa pagtuo?

⁷ “Ang pagtuo amo ang masaligan nga pagpaabot sang mga butang nga ginalauman, ang maathag nga pagpasundayag sang mga katunayan bisan nga di-makita,” siling sang Biblia. (Hebreo 11:1) Busa, ang paglaum indi lamang magamay nga bahin sang pagtuo; importante gid ini nga bahin sang pagtuo. Binagbinaga si Abraham. Sa tawhanon nga pagtamod, sia kag ang iya asawa nga si Sara tigulang na para makapamata sang ginsaaran sila ni Jehova sing anak. (Genesis 17:15-17) Ano ang ginhimo ni Abraham? “Bisan pa wala na sing rason nga maglaum, apang pasad sa paglaum may pagtuo sia, nga mangin amay sia sang madamo nga pungsod.” (Roma 4:18) Huo, ang hatag-Dios nga paglaum ni Abraham nagpabakod sang iya pagtuo nga magapatubas sia sing kaliwat. Subong resulta, ang iya pagtuo nagpasanag kag nagpabakod sang iya paglaum. Ti, may kaisog pa gani si Abraham kag si Sara nga biyaan ang ila puluy-an kag mga himata kag magpuyo sa nabilin nga bahin sang ila kabuhi sa mga tolda sa iban nga pungsod!

8. Paano ang matutom nga pagbatas makapabakod sang paglaum?

⁸ Ginhuptan ni Abraham nga masanag ang iya paglaum paagi sa pagtuman sing bug-os kay Jehova, bisan pa mabudlay ini himuon. (Genesis 22:2, 12) Sing kaanggid, paagi sa aton pagkamatinumanon kag pagkamabinatason sa pag-alagad kay Jehova, makasalig kita sang aton padya. “Ang pagbatas,” sulat ni Pablo, nagaresulta sa “kalahamut-an nga kahimtangan,” kag nian, nagapatubas ini sing paglaum, “kag ang paglaum wala nagadul-ong sa kalugaw-an.” (Roma 5:4, 5) Amo sini kon ngaa si Pablo  nagsulat man: “Ginahandum namon nga ang kada isa sa inyo magpakita sang amo man nga kapisan agod may bug-os nga kapat-uran sang paglaum tubtob sa katapusan.” (Hebreo 6:11) Ining positibo nga panan-aw sa kabuhi, nga pasad sa suod nga kaangtanan kay Jehova, makabulig sa aton nga maatubang ang bisan ano nga kabudlayan upod ang kaisog kag kalipay.

“Magkasadya sa Paglaum”

9. Ano ang regular naton nga himuon agod “magkasadya [kita] sa paglaum”?

⁹ Ang aton hatag-Dios nga paglaum labaw katama sangsa bisan ano nga mahatag sang kalibutan. Ang Salmo 37:34 nagasiling: “Maglaum kay Jehova kag bantayi ang iya dalanon, kag sia magabayaw sa imo sa pagpanag-iya sang duta. Kon ang malauton utdon, makita mo ini.” Busa, may rason gid kita nga “magkasadya sa paglaum.” (Roma 12:12) Apang, agod magkasadya sa sini, dapat naton pirme hunahunaon ang aton paglaum. Regular mo bala nga ginapamalandungan ang imo hatag-Dios nga paglaum? Ginapanan-aw mo bala ang imo kaugalingon nga yara sa Paraiso, nga may maayo nga panglawas, wala sing mga kabalaka, ginapalibutan sang mga tawo nga ginahigugma mo, kag nagapakigbahin sa makaalayaw gid nga hilikuton? Ginapamalandungan mo bala ang mga laragway sang Paraiso nga makita sa aton mga publikasyon? Inang regular nga pagpamalandong mahimo mapaanggid sa paglimpio sa bintana agod makita ang isa ka matahom nga talan-awon. Kon patumbayaan naton ang paglimpio sang kristal sang bintana, sa dili madugay ang mga higko kag mga yab-ok mahimo magpaburon sang maathag kag matahom nga talan-awon. Nian mahimo na makuha sang iban nga mga butang ang aton atension. Kabay nga indi naton pagtugutan nga matabo ina sa aton!

10. Paano ang aton pagpaabot sa padya nagapabanaag sang aton kaangtanan kay Jehova?

¹⁰ Siempre, ang aton panguna nga rason sa pag-alagad kay Jehova amo ang aton gugma sa iya. (Marcos 12:30) Apang, dapat gid naton kalangkagan ang padya. Sa katunayan, ginapaabot ni Jehova nga amo sina ang himuon naton! Ang Hebreo 11:6 nagasiling: “Kon wala sing pagtuo imposible nga mapahamut-an sia sing maayo, kay sia nga nagapalapit sa Dios dapat magpati nga nagaluntad sia kag nga sia ang manugpadya sa mga hanuot nga nagapangita sa iya.” Ngaa luyag ni Jehova nga tamdon naton sia subong Manugpadya? Bangod kon himuon naton ina, ginapakita naton nga kilala gid naton ang aton langitnon nga Amay. Maalwan sia, kag ginahigugma gid niya ang iya mga anak. Hunahunaa lamang kon daw ano nga kasubo kag kaluya sing buot ang aton mabatyagan kon wala kita “sing palaabuton kag sing paglaum.”—Jeremias 29:11.

11. Paano ang hatag-Dios nga paglaum ni Moises nagbulig sa iya sa paghimo sing maalamon nga mga desisyon?

¹¹ Ang isa ka talalupangdon nga halimbawa sang isa nga nagpabilin nga nagkonsentrar sa iya hatag-Dios nga paglaum amo si Moises. Subong “anak sang anak nga babayi ni Paraon,” si Moises may gahom, impluwensia, kag manggad sa Egipto. Magapadayon bala sia sa sining mga butang, ukon magaalagad sia kay Jehova? Ginpili ni Moises nga alagdon si Jehova. Ngaa? Bangod “gintulok niya sing maayo  ang balos nga padya.” (Hebreo 11:24-26) Huo, ginpabaloran gid ni Moises ang paglaum nga ginbutang ni Jehova sa atubangan niya.

12. Ngaa ang Cristianong paglaum kaangay sang isa ka helmet?

¹² Ginpaanggid ni apostol Pablo ang paglaum sa isa ka helmet. Ang aton malaragwayon nga helmet nagaamlig sang aton ikasarang sa panghunahuna, nagabulig sa aton sa paghimo sing maalamon nga mga desisyon, sa pagpahamtang sing makatarunganon nga mga prioridad, kag sa paghupot sang integridad. (1 Tesalonica 5:8) Ginasuksok mo bala ang imo malaragwayon nga helmet sa tanan nga tion? Kon amo, kaangay ni Moises kag ni Pablo, ipahamtang mo ang imo paglaum, “indi sa walay kapat-uran nga mga manggad, kundi sa Dios, nga nagahatag sa aton sing tanan nga butang sing bugana para sa aton ikalipay.” Matuod, ang pagsikway sa popular nga mga huyog kag pagtalikod sa maiyaiyahon nga mga tulumuron nagakinahanglan sing kaisog, apang takus ini panikasugan! Sa katunayan, ngaa abi magpasugot kita sa bisan ano nga mas kubos kon may yara man “matuod nga kabuhi” nga nagahulat sa mga nagalaum kag nagahigugma kay Jehova?—1 Timoteo 6:17, 19.

“Indi Ko Gid Kamo Pagbayaan”

13. Ano nga pasalig ang ginhatag ni Jehova sa iya mainunungon nga mga alagad?

¹³ Ang mga tawo nga nagapasad sang ila paglaum sa karon nga sistema sang mga butang dapat mahadlok sa palaabuton samtang ang kalibutan nagabatyag sing dugang nga “mga hapdi sang kasakit.” (Mateo 24:8) Apang ang mga nagalaum kay Jehova wala sing amo nga kahadlok. Padayon sila nga ‘magapuyo nga may kalig-unan kag indi matublag sang kahadlok sa kalamidad.’ (Hulubaton 1:33) Bangod ang ila paglaum indi sa karon nga sistema, malipayon nila nga ginatuman ang laygay ni Pablo: “Likawi ninyo ang gugma sa kuarta, samtang kontento kamo sa mga butang karon. Kay sia nagsiling: ‘Indi ko gid kamo pagbayaan ukon pagpatumbayaan.’”—Hebreo 13:5.

14. Ngaa ang mga Cristiano indi kinahanglan nga magkabalaka sing tuman tuhoy sa ila materyal nga mga kinahanglanon?

¹⁴ “Indi ko gid”—ining mapuersa nga mga tinaga maathag nga nagapakita nga magaulikid gid ang Dios sa aton. Ginpasalig man kita ni Jesus sang mahigugmaon nga kabalaka sang Dios, nga nagasiling: “Gani, padayon nga pangitaa anay ang ginharian kag ang iya pagkamatarong, kag ini tanan iban pa nga mga butang [ang materyal nga mga kinahanglanon sa kabuhi] idugang sa inyo. Busa, indi gid kamo magkabalaka tuhoy sa masunod nga adlaw, kay ang masunod nga adlaw may kaugalingon nga mga kabalaka.” (Mateo 6:33, 34) Nahibaluan ni Jehova nga mabudlay para sa aton nga magmakugi para sa iya Ginharian kag sa amo man nga tion abagahon ang salabton nga amanan ang aton pisikal nga mga kinahanglanon. Gani magsalig kita sing bug-os sa iya ikasarang kag handum nga atipanon ang aton mga kinahanglanon.—Mateo 6:25-32; 11:28-30.

15. Paano mahuptan sang mga Cristiano ang ‘simple nga mata’?

¹⁵ Ginapakita naton nga nagasandig kita kay Jehova kon ginahuptan naton nga ‘simple ang aton mata’. (Mateo 6:22, 23) Ang simple nga mata sinsero, putli ang motibo, kag hilway sa makagod nga ambisyon. Ang pagtigayon sing simple nga mata wala nagakahulugan sang pagkabuhi sa kapigaduhon ukon pagpatumbaya sang Cristianong mga salabton. Sa baylo, nagakahulugan ini sa pagpakita sing “kaligdong sang hunahuna” samtang ginauna naton ang pag-alagad kay Jehova.—2 Timoteo 1:7.

16. Ngaa kinahanglan ang pagtuo kag kaisog agod mahuptan ang simple nga mata?

¹⁶ Ang paghupot sing simple nga mata nagakinahanglan sing pagtuo kag kaisog. Halimbawa, kon piliton ka sang imo amo nga regular nga magtrabaho sa tion nga may Cristianong mga miting, maisugon mo bala nga unahon ang imo espirituwal nga mga prioridad? Kon nagaduhaduha ang isa ka tawo nga tumanon ni Jehova ang Iya saad nga atipanon Niya ang Iya mga alagad, nian mahapos lang kay Satanas nga dugangan ang pag-ipit kag mahimo inang tawo indi na gid magtambong sa mga miting. Huo, ang kakulang sang pagtuo sa aton bahin makahatag kay Satanas sing kontrol sa aton agod nga sia ang magapahamtang sang aton mga prioridad kag indi si Jehova. Masubo gid kon amo sina ang matabo!—2 Corinto 13:5.

“Maglaum kay Jehova”

17. Paano ang mga nagasalig kay Jehova ginapakamaayo bisan karon pa lang?

¹⁷ Sulitsulit nga ginapakita sa Kasulatan nga ang mga nagalaum kag nagasalig kay Jehova wala nagakapaslawan. (Hulubaton 3:5, 6; Jeremias 17:7) Huo, mahimo nagaagwanta sila sa kapigaduhon kon  kaisa, apang ginakabig nila ini nga gamay nga sakripisyo kon ipaanggid sa mga pagpakamaayo nga nagahulat sa ila. Busa, ginapasundayag nila nga ‘nagalaum sila kay Jehova’ kag nagasalig nga ihatag niya sa ulihi ang tanan nga matarong nga handum sang tagipusuon sang mga mainunungon sa iya. (Salmo 37:4, 34) Busa, matuod sila nga malipayon bisan karon pa lang. “Ang pagpaabot sang mga matarong isa ka kasadyahan, apang ang paglaum sang mga malauton mawala.”—Hulubaton 10:28.

18, 19. (a) Anong mahigugmaon nga pasalig ang ginahatag ni Jehova sa aton? (b) Paano naton mabutang si Jehova sa aton “tuo”?

¹⁸ Kon ang isa ka magamay nga bata nga lalaki nagauyat sa kamot sang iya amay samtang nagalakat, nagabatyag sia sing kasiguruhan. Amo man sina ang aton ginabatyag samtang nagalakat kita upod sa aton langitnon nga Amay. “Dili ka mahadlok,” siling ni Jehova sa Israel, “kay ako upod sa imo. . . . Buligan ko gid ikaw. . . . Kay ako, si Jehova nga imo Dios, nagauyat sang imo kamot nga tuo, ang Isa nga nagasiling sa imo, ‘Dili magkahadlok. Ako gid magabulig sa imo.’”—Isaias 41:10, 13.

¹⁹ Daw ano gid ka mahigugmaon nga paglaragway—ginauyatan ni Jehova ang aton kamot! “Pirme ko ginabutang si Jehova sa akon atubangan,” sulat ni David. “Bangod nga yara sia sa akon tuo, indi ako mationg.” (Salmo 16:8) Paano naton mabutang si Jehova sa aton “tuo”? Mahimo naton ini sa di-magkubos duha ka paagi. Una, tugutan naton ang iya Pulong nga magtuytoy sa aton sa tanan nga aspekto sang aton kabuhi; kag ikaduha, magkonsentrar kita sa mahimayaon nga premyo nga ginbutang ni Jehova sa atubangan naton. Ang salmista nga si Asaf nag-amba: “Kaupod mo ako pirme; ginakaptan mo ang akon tuo nga kamot. Paagi sa imo laygay tuytuyan mo ako, kag pagkatapos dalhon mo ako sa himaya.” (Salmo 73:23, 24) Bangod sini nga pasalig, pat-od nga maatubang naton ang palaabuton nga may kompiansa.

“Ang Pagtubos sa Inyo Nagahilapit Na”

20, 21. Ano nga palaabuton ang nagahulat sa mga nagalaum kay Jehova?

²⁰ Samtang nagahilapit na ang adlaw, labi na gid nga dapat naton ibutang si Jehova sa aton tuo. Sa dili madugay, umpisa sa paglaglag sa butig nga relihion, maeksperiensiahan sang kalibutan ni Satanas ang kapipit-an nga wala pa sini anay maeksperiensiahan. (Mateo 24:21) Ang di-matinuuhon nga katawhan mahugakom sa kahadlok. Apang, sa sinang magamo nga tion, ang maisugon nga mga alagad ni Jehova magakasadya sa ila paglaum! “Kon magsugod nga mahanabo ini nga mga butang,” siling ni Jesus, “magtindog kamo kag ihangad ang inyo ulo, bangod ang pagtubos sa inyo malapit na.”—Lucas 21:28.

²¹ Busa magkasadya kita sa aton hatag-Dios nga paglaum kag indi magpalimbong sa mga pagtublag ni Satanas. Sa amo man nga tion, manikasog kita sing lakas nga magpalambo sing pagtuo, gugma, kag diosnon nga kahadlok. Sa paghimo sini, matigayon naton ang kaisog agod matuman si Jehova sa idalom sang tanan nga sirkunstansia kag agod mapamatukan ang Yawa. (Santiago 4:7, 8) Huo, “magpakaisog kamo, kag kabay nga magpakabakod ang inyo tagipusuon, kamo tanan nga nagahulat kay Jehova.”—Salmo 31:24.

[Footnote]

Masabat Mo Bala?

• Sa ano nga paagi ang paglaum nakabulig kay Jesus sa pagtigayon sing kaisog?

• Ano ang kaangtanan sang pagtuo sa paglaum?

• Paano ang paglaum upod ang pagtuo makahatag sa Cristiano sing kaisog sa pagpahamtang sing makatarunganon nga mga prioridad sa kabuhi?

• Ngaa ang mga ‘nagalaum kay Jehova’ makatan-aw sa palaabuton nga may kompiansa?

[Mga Pamangkot sa Pagtinuon]

[Retrato sa pahina 28]

Bata ka man ukon tigulang, ginapanan-aw mo bala ang imo kaugalingon nga yara sa Paraiso?